PC

PC
De finale fan 'e PC 2006.
plak en tiid
lân	Nederlân
provinsje	Fryslân
gemeente	De Waadhoeke
plak	Frjentsjer
holden yn	Sjûkelân
datum	5e woansdei nei 30 juny
bysûnderheden
soarte evenemint	sportevenemint (keatsen)
bestean	1850 – no
org. troch	Permaninte Kommisje    fan de Frjentsjerter    Balferkeatsersdei
offisjele webside
www.pc-franeker.nl

De Keninklike PC (in Nederlânske ôfkoarting foar Permanente Commissie; Frysk: "Permaninte Kommisje") is de wichtichste Fryske keatspartij foar manlju. Dit evenemint wurdt sûnt 1850 yn prinsipe alle jierren holden, en fynt plak op it Sjûkelân yn Frjentsjer. Tsjintwurdich dogge oan dizze partij 16 partoeren mei. Allinne troch it KNKB selektearre haadklassers en earste-klassers komme yn oanmerking en nim diel oan 'e PC. Op dizze keatspartij komme alle jierren sa'n 12.000 belangstellenden ôf. De PC wurdt holden op 'e fyfde woansdei fan 1 july ôf. De organisaasje is yn 'e hannen fan 'e Permaninte Kommisje fan de Frjentsjerter Balferkeatsersdei (Nederlânsk en offisjeel: Permanente Commissie der Franeker Balverkaatsersdag). Troch omstannichheden hat de PC yn syn skiednis fjouwer kear in jier oerslaan moatten. Sadwaande waard yn 2024 de 171e edysje holden.

Skiednis

It keatsen yn Frjentsjer is gâns âlder as de PC. It is wis dat op it Ald Keatsfjild (no in strjitte tusken de Stasjonsbrêge oer it Van Harinxmakanaal en Saakstra's Brêge oer de Alde Trekfeart) om 1650 hinne al keatst waard. Yn 1850 en folgjende jierren waarden op dat plak ek de earste keatspartijen organisearre dy't letter (mei weromwurkjende krêft) PC komme soene te hjitten. Oer dy iere PC's is mar sa'n bytsje oerlevere, dat sels de nammen fan 'e winners net bekend bleaun binne. De organisaasje wie yn dy tiid yn 'e hannen fan ferskate Frjentsjerter kastleins.

Yn 1853 rjochte in fiiftal Frjentsjerter winkellju ûnder lieding fan Jan Bogtstra in kommisje op foar wat doe noch de 'Keatspartij te Frjentsjer' neamd waard. Dy kommisje wie yn it foarste plak bedoeld om 'e organisaasje fan it jierlikse evenemint op him te nimmen en om 'e regels en prosedueres fêst te lizzen. Yn bredere sin wie it doel de befoardering en it yn stân hâlden fan it keatsen en de "feredeling" (fierdere ûntwikkeling) fan wat doe as in ienfâldich folksfermaak sjoen waard. Troch it wurk fan dy kommisje, dat mei de edysje fan 1854 begûn, binne fan dy tiid ôf (njonken bestjoerlike en prosedurele ynformaasje) de nammen fan dielnimmers en winners fan 'e PC oerlevere.

Ympresje fan 'e PC fan 1903. (Detail fan âlde printbriefkaart, makker ûnbekend.)

Yn 1855 waard de partij foar it lêst op it Ald Keatsfjild holden; mei yngong fan 'e edysje fan 1856 ferhuze de PC nei it Sternse Slotland, better bekend as it Sjûkelân, dêr't it evenemint neitiid altyd bleaun is. Fan 1866 ôf hiet de kommisje de Permaninte Kommisje fan de Frjentsjerter Balferkeatsersdei (offisjeel: Permanente Commissie der Franeker Balverkaatsersdag). Doe (en net earder) kaam ek de keatspartij dy't troch de kommisje organisearre waard, bekend te stean as de PC. Njonken Jan Bogtstra, dy't yn 1887-1888 foar de PC de earste bûtenlânske keatskontakten lei, wie ek mr. Klaas Bijlsma in legindarysk PC-bestjoerder.

Sûnt 1850 is de PC fiif kear net trochgien: yn 1859 fanwege in pokke-epedemy (of mooglik troch jildgebrek); yn 1866 fanwegen in goalera-epidemy; en yn 1943 en 1944 fanwegen de Twadde Wrâldoarloch. Yn 2020 waard de PC ôflast troch Corona. It bestjoer fûn in PC mei in beheind oantal taskôgers op it Sjûkelân net PC-wurdich. Yn 1883 waard de tradysje ynfierd dat út it winnend partoer fan 'e PC troch de saneamde 'keningskommisje' in kening oanwiisd wurdt. It keningskip op 'e PC is de heechste eare dy't in Fryske keatser behelje kin. De direkte oanlieding ta dizze fernijing wie dat de kommissaris fan de kening, mr. Binnert Philip baron van Harinxma thoe Slooten, dat jiers de Sulveren Keningsbal beskikber stelde, in kostbere wikselpriis foar de kening fan 'e PC.

Under de Earste Wrâldoarloch, doe't der in soad Belgyske flechtlingen yn Nederlân wiene, waard de PC yn 1916 wûn troch in partoer fan twa Friezen en in Belch en yn 1917 troch in partoer fan trije Belgen. Fan 'e 1990-er jierren ôf wurdt de PC elts jier op 'e regionale tillefyzje útstjoerd troch Omrop Fryslân. Mei it 150-jierrich bestean fan 'e PC, yn 2003, waarden op it Sjûkelân by wize fan tinkteken twa tuorren pleatst. De PC krige doe ek it predikaat Keninklik taparte. Yn 2018 makke de PC ûnderdiel út fan 'e Keatswike, dy't dat jiers ûnder it biedwurd Heedaar! organisearre waard yn it ramt fan it projekt Ljouwert/Fryslân Kulturele Haadstêd fan Jeropa 2018.

Keatspartij yn Frjentsjer, 1924.

Yn 2020 moast de 167e edysje fan 'e PC oergean fanwegen de wrâldwide pandemy fan it koroanafirus. Yn 'e nûmering fan 'e PC's waard it sifer 167 lykwols al oan 2020 ferbûn, sadat de earstfolgjende PC, yn 2021, nûmer 168 waard. (Earder, doe't de PC yn 'e njoggentjinde iuw oergie fanwegen epidemyen en yn 'e tweintichste iuw fanwegen de Twadde Wrâldoarloch, wie de nûmering mei fersprongen, sadat bgl. op 'e 91e PC yn 1942 de 92e yn 1945 folge.)

Tiid en plak

Sûnt 1856 wurdt de PC holden op it Sjûkelân, in keatsfjild dat yn 'e Frjentsjerter binnenstêd oan 'e noardkant fan 'e Fiverstrjitte leit, rjocht foar de ôfslach nei de Foarstrjitte oer. It is net tafallich dat oan 'e noardein fan 'e Foarstrjitte ek it Keatsmuseum stiet. Oan 'e PC dogge 16 partoeren mei fan elts trije manlju. Allinnich troch it KNKB selektearre haadklassers en earste-klassers komme yn oanmerking foar dielname.

De PC wurdt elts jier holden op 'e fyfde woansdei nei 30 juny, wat delkomt op 'e fyfde woansdei yn july of de earste woansdei yn augustus, ôfhinklik fan 'e kalinder. De PC kin beskôge wurde as it Frysk kampioenskip keatsen foar manlju. Persiis ien wike letter wurdt yn Wommels de Freulepartij organisearre, dat de wichtichste keatswedstryd foar jonges is. Der bestiet ek in froulike wjergader fan 'e PC. Dat is de Frouljus-PC, dy't persiis trije wiken nei de PC ferkeatst wurdt yn Weidum.

Organisaasje

De PC wurdt organisearre troch de Permaninte Kommisje fan de Frjentsjerter Balferkeatsersdei (Nederlânsk en offisjeel: Permanente Commissie der Franeker Balverkaatsersdag). Dat is in yn 1853 oprjochte organisaasje dy't bestjoerlik en finansjeel ûnôfhinklik is fan it KNKB. De kommisje is in orgaan dat bestiet út fiif (meastal) manlike leden sûnder maksimale sittingstermyn, en dat himsels troch koöptaasje oanfollet.

Tradysjes omtrint organisaasje en iepening

De PC wurdt omjûn troch âlde tradysjes dy't mei soarch libben holden wurde. In wat frjemde ein yn 't byt is datoangeande de 'Keats Off', dy't pas yn 2012 ynfierd is. Foarhinne waarden alle sechstjin dielnimmende partoeren troch de kommisje oanwiisd, mar sûnt 2012 wurde der njoggentjin partoeren oanwiisd. De earste fyftjin pleatse har streekrjocht, mar om it lêste, sechstjinde plak moat keatst wurde tusken de partoeren 16 oant en mei 19. Dy saneamde Keats Off wurdt op it Sjûkelân holden, op 'e tongersdei foarôfgeande oan 'e PC fan 18.00 oere ôf. Dat barren is foar it publyk fergees tagonklik. Dêrnei jildt de haadklassewedstryd fan Arum, dy't op 'e snein foar de PC organisearre wurdt, al sûnt jier en dei as de 'generale repetysje' foar de PC. De lotting fynt plak op 'e jûn fan 'e moandei foar de PC. Mei-inoar wurde de Keats Off, de wedstryd yn Arum en de lotting ek wol de 'Prolooch' fan 'e PC neamd. De tiisdei tusken de lotting (op moandei) en de PC (op woansdei) yn, wurdt tradisjoneel de 'tuskenynse dei' neamd, in term dy't yntrodusearre waard troch PC-foarsitter Klaas Bijlsma.

De iepening fan 'e PC set útein mei in publyk tagonklike resepsje yn Teäter De Koornbeurs, dy't moarns stipt om 8.00 oere begjint. De fiifkoppige kommisje ferskynt dêr yn rokkostúm en mei hege hoed op. De foarsitter hâldt tradisjoneel in taspraak fan likernôch in trije kertier, wêryn't er oantinkens oan 'e 'goeie âlde tiid' opropt en de winners fan 'e PC fan fyftich jier earder yn it sintsje set, ynsafier't dy oanwêzich binne. Dêrnjonken wurde ek aktuële en organisatoaryske saken oan 'e oarder steld. Hy beslút syn taspraak tradisjoneel mei de wurden: "It giet los." Dêrnei wurde de kening fan it foargeande jier, dy syn beide partoersmaten fan it foargeande jier, de haadskiedsrjochter en de kommisjeleden sels yn iepen rydtugen nei it keatsfjild riden, foarôfgien troch it Stedsk Muzykkorps Harmony, dat ek al oardel iuw bestiet. De optocht giet it hiele ein stadich troch in tichte hage fan publyk en arrivearret om likernôch 9.15 oere op it Sjûkelân. Dêr docht de âlde kening ôfstân fan 'e Sulveren Keningsbal, dy't dêrnei troch de foarsitter fan 'e kommisje foar eltsenien sichtber yn 'e PC-koepel ophongen wurdt. Om persiis 10.00 oere begjinne de wedstriden.

Klasseminten

Punteklassemint

Yn it PC-klassemint aller tiden steane Piet Jetze Faber en (sûnt 2022) Taeke Triemstra mei 35 punten op in dield 3e plak, 4 punten efter de legindaryske Harnzer keatser Hotze Schuil, dy't 39 PC-punten byinoar sloech.

De PC op it Sjûkelân yn Frjentsjer.

Tal kearen wûn

Allinne Taede Zijlstra fan Wytmarsum en Jan Reitsma sr. fan Penjum slagge it de PC 9 kear op harren namme te skriuwen. Goede trêde op dizze list is Piet Jetze Faber mei 8 kear winst. Klaas Boorsma en Sjirk de Wal wûnen beide 7 kear, folge troch Hotze Schuil mei 6 kear winst (út mar leafst 13 finalepartijen). Dyselde moat syn plak diele mei Sake Saakstra en Jan E. Bonnema en sûnt 2021 ek mei Gert-Anne van der Bos en Taeke Triemstra.

Keningskippen

Piet Jetze Faber fan Froubuorren is wat it keningskip fan 'e PC oanbelanget de ûnbekreaude listoanfierder: hy krige 4 kear de keningsbal omhongen. Sân keatsers foel 3 kear de heechste PC-eare ta diel: Minze de Vries fan Bitgum, Hotze Schuil fan Harns, Taede Zijlstra fan Wytmarsum, Klaas Kuiken fan Sint-Anne, Tunno Schurer fan Arum, Lammert Scheltes Hilarides fan Penjum en Jan Reitsma sr. fan Penjum.

Hotze Schuil, dy't yn 2005 ferstoar, waard yn 2000 troch it PC-bestjoer útroppen ta 'keatser fan 'e (tweintichtste) iuw'.

Klaverke Fjouwer

De PC is mei de Freulepartij, yn Wommels. en de Jong Nederlânpartij en de Bûnspartij foar Senioaren, beide yn Frjentsjer, ien fan 'e keatswedstriden dy't diel útmeitsje fan it saneamde Klaverke Fjouwer. Dat is in bysûndere priis, ynsteld troch de PC, foar keatsers dy't it slagget en win al dy fjouwer partijen.

Winners fan 'e PC

Hjirûnder in list mei de winners fan 'e PC, fan 1854 ôf. Spitigernôch is de oer de winners fan 'e edysjes dy't fan 1850 oant en mei 1853 ferkeatst waarden, neat oerlevere.

nûmer	jier	keatsers	wenplakken	kening
1	1850	ûnbekend	ûnbekend	n.f.t.
2	1851	ûnbekend	ûnbekend	n.f.t.
3	1852	ûnbekend	ûnbekend	n.f.t.
4	1853	ûnbekend	ûnbekend	n.f.t.
5	1854	Pieter B. Rijpma Rients D. IJntema Willem K. Boorsma	Penjum Penjum Tsjummearum	n.f.t.
6	1855	Evert K. Boorsma Jan K. Boorsma Willem K. Boorsma	Tsjummearum Tsjummearum Tsjummearum	n.f.t.
7	1856	Johannes F. Felkers Pieter F. Felkers Frans F. Felkers	Wommels Winsum Winsum	n.f.t.
8	1857	Evert K. Boorsma Jan K. Boorsma Willem K. Boorsma	Tsjummearum Tsjummearum Tsjummearum	n.f.t.
9	1858	Pieter B. Rijpma Rients D. IJntema Pieter U. Rijpma	Penjum Penjum Penjum	n.f.t.
–	1859	gjin PC fanwege in pokke-epidemy
10	1860	Pieter B. Rijpma Rients D. IJntema Pieter U. Rijpma	Penjum Penjum Penjum	n.f.t.
11	1861	Pieter B. Rijpma Rients D. IJntema Pieter U. Rijpma	Penjum Penjum Penjum	n.f.t.
12	1862	Pieter B. Rijpma Rients D. IJntema Hielke F. Post	Penjum Penjum Kimswert	n.f.t.
13	1863	Jan D. Bangma Frans F. Felkers Pieter U. Rijpma	Arum Winsum Mullum	n.f.t.
14	1864	Jan D. Bangma Dirk IJ. de Boer Frans F. Felkers	Arum Winaam Winsum	n.f.t.
15	1865	Dirk IJ. de Boer Pieter IJ. de Boer Pieter P. Hiddinga	Winaam Winaam Winaam	n.f.t.
–	1866	gjin PC fanwegen in goalera-epidemy
16	1867	Klaas F. Post Rein Schiphof Auke Miedema	Kimswert Berltsum Berltsum	n.f.t.
17	1868	Klaas F. Post Rein Schiphof Auke Miedema	Kimswert Berltsum Berltsum	n.f.t.
18	1869	Klaas F. Post Klaas W. Boorsma Auke Miedema	Kimswert Tsjummearum Frjentsjer	n.f.t.
19	1870	Dirk IJ. de Boer Jan P. Hiddinga Auke Miedema	Tsjummearum Winaam Sweins	n.f.t.
20	1871	Jan P. Hiddinga Pieter P. Hiddinga Auke Miedema	Menaam Winaam Sweins	n.f.t.
21	1872	Jan P. Hiddinga Klaas W. Boorsma Auke Miedema	Menaam Sweins Sweins	n.f.t.
22	1873	Dirk IJ. de Boer Jan D. Hiddinga Rients P. Koopmans	Winaam Winaam Winaam	n.f.t.
23	1874	Jan E. Bonnema Jacob T. Runia Sjouke Anema	Arum Berltsum Berltsum	n.f.t.
24	1875	Jan E. Bonnema Jan D. Hiddinga Rients P. Koopmans	Arum Winaam Frjentsjer	n.f.t.
25	1876	Jacob Klaver Folkert G. Struiksma Rients P. Koopmans	Winsum Easterlittens Frjentsjer	n.f.t.
26	1877	Jan E. Bonnema Sjirk de Wal Johannes Donia	Arum Dronryp Dronryp	n.f.t.
27	1878	Jan E. Bonnema Sjirk de Wal Rein van de Witte	Arum Dronryp Penjum	n.f.t.
28	1879	Tjerk Hiemstra Wiebe P. Steensma Rein van de Witte	Penjum Penjum Penjum	n.f.t.
29	1880	Jan E. Bonnema Sjirk de Wal Jelle Bruinsma	Arum Dronryp Arum	n.f.t.
30	1881	Jan E. Bonnema Klaas W. Boorsma Sjirk de Wal	Arum Wjelsryp Dronryp	n.f.t.
31	1882	Wiebren Kooistra Meindert Kooistra Rein van de Witte	Dokkum Dokkum Penjum	n.f.t.
32	1883	Sjirk de Wal Klaas W. Boorsma Auke Miedema	Dronryp Sweins Sweins	Auke Miedema
33	1884	Hein D. Postma Marten C. Banning Tjerk Hiemstra	Surch Penjum Penjum	Hein D. Postma
34	1885	Sjirk de Wal Klaas W. Boorsma Auke Miedema	Dronryp Sweins Sweins	Sjirk de Wal
35	1886	Sjirk de Wal Klaas W. Boorsma Jacob Wassenaar	Dronryp Sweins Sint-Jabik	Klaas W. Boorsma
36	1887	Jacob Wassenaar Klaas W. Boorsma Lammert S. Hilarides	Sint-Jabik Sweins Penjum	Lammert S. Hilarides
37	1888	Siebren G. Kooistra Meindert Kooistra Lammert S. Hilarides	Harns Harns Penjum	Lammert S. Hilarides
38	1889	Meindert Kooistra Wiebren Kooista Lammert S. Hilarides	Harns Dokkum Penjum	Lammert S. Hilarides
39	1890	Pieter B. Yetsenga Jan Reitsma sr. Taeke de Jong	Arum Penjum Penjum	Pieter B. Yetsenga
40	1891	Johannes Anema Hemke Elzinga Cornelis van der Weg	Skingen Holwert Tsjummearum	Johannes Anema
41	1892	Johannes Anema Jan Reitsma sr. Nanne S. de Boer	Skingen Penjum Penjum	Johannes Anema
42	1893	Johannes Anema Jan Reitsma sr. Pieter B. Yetsenga	Skingen Penjum Arum	Jan Reitsma sr.
43	1894	Johannes Bierma Klaas Leeuwen Arjen de Vries	Sint-Jabik Sint-Jabik Berltsum	Johannes Bierma
44	1895	Johannes Anema Jan Reitsma sr. Pieter B. Yetsenga	Skingen Penjum Arum	Pieter B. Yetsenga
45	1896	Minze de Vries Sjoerd Heslinga Klaas P. Vonk	Bitgum Bitgum Bitgum	Minze de Vries
46	1897	Minze de Vries Jan Reitsma sr. Klaas P. Vonk	Bitgum Penjum Bitgum	Minze de Vries
47	1898	Johannes Bierma Jan Reitsma sr. Johannes Struiksma	Sint-Jabik Penjum Wommels	Johannes Struiksma
48	1899	Johannes Bierma Jan Reitsma sr. Johannes Struiksma	Sint-Jabik Penjum Wommels	Jan Reitsma sr.
49	1900	Minze de Vries Gerben Wassenaar Anne Groenveld	Bitgum Bitgum Bitgum	Minze de Vries
50	1901	Jan Reitsma sr. Jan Kuperus Meindert Helfrich	Penjum Marsum Kimswert	Jan Kuperus
51	1902	Sijtze A. Kooistra Jan Kuperus Johannes Struiksma	Wytmarsum Wytmarsum Wommels	Jan Kuperus
52	1903	Minze de Vries Jan Reitsma sr. Johannes Struiksma	Bitgum Penjum Wommels	Jan Reitsma sr.
53	1904	Pieter Hovenga Lodewijk Leicht Rinze Feitsma	Marsum Frjentsjer Wommels	Pieter Hovenga
54	1905	Tjeerd W. Kooistra Jan W. Kooistra Gerrit Terpstra	Dokkum Dokkum Marsum	Tjeerd W. Kooistra
55	1906	Catrinus Werkhoven Sijtze A. Kooistra Tjeerd W. Kooistra	Wytmarsum Wytmarsum Dokkum	Sijtze A. Kooistra
56	1907	Sijtze A. Kooistra Tjeerd W. Kooistra Meindert Helfrich	Wytmarsum Dokkum Kimswert	Sijtze A. Kooistra
57	1908	Ultsje Tijmstra Hans Schaafsma Roel Boorsma	De Lemmer Arum Wommels	Ultsje Tijmstra
58	1909	Catrinus Werkhoven Sijtze A. Kooistra Rein Zaagemans	Wytmarsum Wytmarsum Wytmarsum	Catrinus Werkhoven
59	1910	Catrinus Werkhoven Sijtze A. Kooistra Tjeerd W. Kooistra	Wytmarsum Wytmarsum Ljouwert	Catrinus Werkhoven
60	1911	Tjeerd W. Kooistra Sijtze A. Kooistra Rein Zaagemans	Dokkum Wytmarsum Wytmarsum	Sijtze A. Kooistra
61	1912	Rinse Brink Sikke de Vries Sybolt M. Tigchelaar	Easterlittens Harns Dronryp	Sybolt M. Tigchelaar
62	1913	Catrinus Werkhoven Anne Smidts Ids Roukema	Wytmarsum Frjentsjer Harns	Anne Smidts
63	1914	Rinse Brink Germ Hoitsma Rein Zaagemans	Easterlittens Berltsum Wytmarsum	Germ Hoitsma
64	1915	Jacobus Jellema Sikke de Vries Hendrik van Haitsma	Frjentsjer Harns Frjentsjer	Sikke de Vries
65	1916	Rinse Brink Ids Roukema August van Lierde	Easterlittens Harns Belgje	Rinse Brink
66	1917	August van Lierde Émile Hoyois Georges Herphelin	Belgje Belgje Belgje	August van Lierde
67	1918	Hubert Westerhuis Roelof de Jong Pé Hiemstra	Easterlittens Wommels Wommels	Hubert Westerhuis
68	1919	Jan IJ. Heeg Anne Smidts Sybolt M. Tigchelaar	Easterein Frjentsjer Dronryp	Anne Smidts
69	1920	Taede Zijlstra Ids Roukema Ids Jousma	Wytmarsum Harns Dokkum	Ids Jousma
70	1921	Taede Zijlstra Jan IJ. Heeg Rinze R. Yetsinga	Wytmarsum Easterein Arum	Jan IJ. Heeg
71	1922	Taede Zijlstra Jan IJ. Heeg Rinze R. Yetsinga	Wytmarsum Easterein Arum	Rinze R. Yetsinga
72	1923	Machiel Miedema Ids Roukema Klaas de Jager	Frjentsjer Harns Harns	Ids Roukema
73	1924	Hans Knol Ids Roukema Klaas de Jager	Harns Harns Harns	Klaas de Jager
74	1925	Taede Zijlstra Klaas Kuiken Ids Jousma	Wytmarsum Sint-Jabik Dokkum	Klaas Kuiken
75	1926	Taede Zijlstra Klaas Kuiken Ids Jousma	Wytmarsum Sint-Jabik Dokkum	Klaas Kuiken
76	1927	Germ Koster Rinze Werkhoven Sake Zijlstra	Dokkum Frjentsjer Bitgum	Germ Koster
77	1928	Ids Roukema Dirk de Jong Klaas Kooistra	Wommels Wier Dokkum	Klaas Kooistra
78	1929	Taede Zijlstra Pieter Helfrich Ids Jousma	Wytmarsum Harns Dokkum	Taede Zijlstra
79	1930	Reinder Terpstra Nanne Koopmans Klaas Kooistra	Bitgum Ljouwert Dokkum	Reinder Terpstra
80	1931	Taede Zijlstra Pieter Helfrich Klaas de Jager	Wytmarsum Harns Harns	Pieter Helfrich
81	1932	Klaas Kuiken Sape de Haan Jan van der Lei	Sint-Jabik Berltsum Berltsum	Klaas Kuiken
82	1933	Hans Knol Dooitzen de Bildt Anne van Sinderen	Harns Sint-Jabik Sint-Anne	Dooitzen de Bildt
83	1934	Marten van der Hem Hampie Bogaard Klaas de Jager	Raerd Harns Harns	Marten van der Hem
84	1935	Taede Zijlstra Dooitzen de Bildt Sjouke Helfrich	Wytmarsum Sint-Jabik Sint-Jabik	Taede Zijlstra
85	1936	Marten van der Hem Anne Braam Willem Bosma	Raerd Seisbierrum Boalsert	Willem Bosma
86	1937	Klaas Kuiken Dooitzen de Bildt Sjouke Helfrich	Sint-Jabik Sint-Jabik Frjentsjer	Sjouke Helfrich
87	1938	Folkert Hiddinga Cees Kamminga Willem Bosma	Weidum Arum Boalsert	Cees Kamminga
88	1939	Taede Zijlstra IJnze Kuperus Sjouke Helfrich	Wytmarsum Winaam Winaam	Taede Zijlstra
89	1940	Marten van der Hem Lou Seerden Feite de Jager	Raerd Frjentsjer Harns	Lou Seerden
90	1941	Klaas Kuiken Jan de Groot Sjouke Helfrich	Sint-Anne Weidum Winaam	Jan de Groot
91	1942	Jan Rodenhuis Feite de Jager Frans Helfrich	Húns Harns Harns	Jan Rodenhuis
–	1943	gjin PC fanwegen de Twadde Wrâldoarloch
–	1944
92	1945	Klaas Posthumus Pieter de Haan Hiele de Haan	Holwert Holwert Ljouwert	Klaas Posthumus
93	1946	Hotze Schuil Æbe Haima Riemer Reinalda	Harns Doanjum Winsum	Hotze Schuil
94	1947	Hotze Schuil Æbe Haima Frans Helfrich	Harns Doanjum Harns	Hotze Schuil
95	1948	Marten van der Leest Theun de Bruin Sjouke Helfrich	Stiens Ljouwert Wergea	Marten van der Leest
96	1949	Lammert Heeringa Hotze Schuil Wijtse Vlietstra	Holwert Harns Frjentsjer	Lammert Heeringa
97	1950	Marten van der Leest Theun de Bruin Arp Hiemstra	Stiens Ljouwert Ljouwert	Marten van der Leest
98	1951	Roel Hoekstra Pieter de Haan Hiele de Haan	Ternaard Holwert Holwert	Hiele de Haan
99	1952	Hotze Schuil Sikke Olivier Frans Helfrich	Harns Harns Ljouwert	Hotze Schuil
100	1953	Hotze Schuil Rinnie Kuiper Frans Helfrich	Harns Makkum Ljouwert	Rinnie Kuiper
101	1954	Johannes Stavinga Albert Veldkamp Sipke van der Zee	Poppenwier Huzum Ljouwert	Johannes Stavinga
102	1955	Meindert van der Weerd Johannes Zijlstra Wijtse Vlietstra	Arum Kimswert Frjentsjer	Wijtse Vlietstra
103	1956	Marten van der Leest Johan Jansen Arp Hiemstra	Stiens Harns Ljouwert	Arp Hiemstra
104	1957	Jan Sijtsma Albert Rinia Sake Faber	Rie Makkum Berltsum	Jan Sijtsma
105	1958	Roel Hoekstra Johan Jansen Albert Veldkamp	Ternaard Harns Huzum	Johan Jansen
106	1959	Meindert van der Weerd Albert Rinia Rinnie Kuiper	Arum Makkum Makkum	Rinnie Kuiper
107	1960	Jan Sijtsma Johannes Zijlstra Dirk van der Zee	Rie Kimswert Ljouwert	Johannes Zijlstra
108	1961	Rienk de Groot Johan Jansen Martinus Santema	Ljouwert Harns Easterlittens	Martinus Santema
109	1962	Gerrit Okkinga Drewis Smedinga Sjoerd Heeringa	Easterein Harns Tsjummearum	Drewis Smedinga
110	1963	Gerrit Okkinga Drewis Smedinga Martinus Santema	Easterein Harns Easterlittens	Gerrit Okkinga
111	1964	Rienk de Groot Sjoerd Heeringa Johan Halbesma	Ljouwert Tsjummearum Harns	Johan Halbesma
112	1965	Hein Zijlstra Martinus Santema Gerrit Langerak	Deinum Easterlittens Snits	Hein Zijlstra
113	1966	Rienk de Groot Gerrit de Jong Durk Talsma	Ljouwert Snits Weidum	Gerrit de Jong
114	1967	Hotze Schuil Klaas van Wieren Johan Halbesma	Harns Marsum Harns	Klaas van Wieren
115	1968	Johan van Seijst Tamme Velstra Johannes Westra	Frjentsjer Baard Ljouwert	Tamme Velstra
116	1969	Johan van Seijst Sikke Sikkema Johannes Westra	Frjentsjer Frjentsjer Ljouwert	Johan van Seijst
117	1970	Gerrit Okkinga Klaas van Wieren Durk Talsma	Arum Marsum Weidum	Durk Talsma
118	1971	Jarich van der Veen Gerrit de Jong Reitse Mienstra	Ikkerwâld Snits It Hearrenfean	Reitse Mienstra
119	1972	Piet de Jong Bert Rinia André Roosenburg jr.	Wommels Makkum Frjentsjer	Bert Rinia
120	1973	Sjouke de Boer Wybren van Wieren Gerrit van der Heide	Eksmoarre Marsum Harns	Sjouke de Boer
121	1974	Jarich van der Veen Gerrit de Jong Flip Soolsma	Damwâld Snits Drachten	Jarich van der Veen
122	1975	Johan van Seijst Klaas van Wieren Piet Jetze Faber	Drachten Berltsum Stiens	Johan van Seijst
123	1976	Sake Saakstra Piet Jetze Faber Durk Talsma	Winsum Stiens Weidum	Sake Saakstra
124	1977	Sjouke de Boer Klaas van Wieren Wybren van Wieren	Eksmoarre Berltsum Marsum	Wybren van Wieren
125	1978	Sjouke de Boer Klaas van Wieren Wybren van Wieren	Eksmoarre Berltsum Marsum	Sjouke de Boer
126	1979	Sake Saakstra Piet Jetze Faber Flip Soolsma	Grou Froubuorren Boarnburgum	Piet Jetze Faber
127	1980	Sake Saakstra Piet Jetze Faber Flip Soolsma	Grou Froubuorren Boarnburgum	Piet Jetze Faber
128	1981	Sake Saakstra Piet Jetze Faber Tjisse Wallendal	Grou Froubuorren Rie	Sake Saakstra
129	1982	Sake Saakstra Piet Jetze Faber Johannes Brandsma	Grou Froubuorren Seisbierrum	Piet Jetze Faber
130	1983	Sake Saakstra Piet Jetze Faber Johannes Brandsma	Grou Froubuorren Seisbierrum	Piet Jetze Faber
131	1984	Peter Rinia Wybren van Wieren Tunno Schurer	Makkum Marsum Frjentsjer	Wybren van Wieren
132	1985	Ruurd Rutten Johannes van Dijk Tjerk de Groot	Winaam Seisbierrum Froubuorren	Johannes van Dijk
133	1986	Peter Rinia Wybren van Wieren Tunno Schurer	Makkum Marsum Frjentsjer	Tunno Schurer
134	1987	Peter Rinia Johannes Brandsma Tunno Schurer	Makkum Seisbierrum Frjentsjer	Tunno Schurer
135	1988	Peter Rinia Johannes Brandsma Tunno Schurer	Makkum Seisbierrum Frjentsjer	Tunno Schurer
136	1989	Joop Bierma Sake Porte Hotze Rusticus	Sint-Jabik Stiens Marsum	Joop Bierma
137	1990	Coos Veltman Piet Jetze Faber Tunno Schurer	Dronryp Froubuorren Frjentsjer	Coos Veltman
138	1991	Erik Seerden Rinse Bleeker Thomas van der Meer	Frjentsjer It Hearrenfean Akkrum	Erik Seerden
139	1992	Erik Seerden Rinse Bleeker Thomas van der Meer	Frjentsjer It Hearrenfean Akkrum	Rinse Bleeker
140	1993	Erik Seerden Rinse Bleeker Thomas van der Meer	Ljouwert It Hearrenfean Akkrum	Thomas van der Meer
141	1994	Coos Veltman Johannes van Dijk Hotze Rusticus	De Jouwer Ljouwert Marsum	Coos Veltman
142	1995	Simon Minnesma Sake Porte Klaas Anne Terpstra	Menaam Grins Menaam	Simon Minnesma
143	1996	Johan Okkinga Sake Porte Pieter Tienstra	Arum Grins Winsum (Grinslân)	Johan Okkinga
144	1997	Pieter van Tuinen Rinse Bleeker Chris Wassenaar	Grins It Hearrenfean Minnertsgea	Pieter van Tuinen
145	1998	Johan Okkinga Sake Porte Auke van der Graaf	Arum Winsum (Grinslân) Berltsum	Johan Okkinga
146	1999	Johan Okkinga Sake Porte Auke van der Graaf	Arum Winsum (Grinslân) Berltsum	Auke van der Graaf
147	2000	Klaas Berkepas Dirk Jan van der Woud Klaas Anne Terpstra	Aldeboarn Goutum Minnertsgea	Klaas Anne Terpstra
148	2001	Pieter van Tuinen André Kuipers Chris Wassenaar	Ljouwert Bitgummole Minnertsgea	Chris Wassenaar
149	2002	Rutmer van der Meer Jacob Wassenaar Cornelis Terpstra	Wergea Minnertsgea Minnertsgea	Cornelis Terpstra
150	2003	Johannes G. Dijkstra Karel Nijman Folkert van der Wei	Huzum Ljouwert Wytmarsum	Johannes G. Dijkstra
151	2004	Johan Abma Pieter Scharringa Daniël Iseger	Gau Dronryp Huzum	Daniël Iseger
152	2005	Rutmer van der Meer, Jacob Wassenaar Chris Wassenaar	Ljouwert Minnertsgea Minnertsgea	Chris Wassenaar
153	2006	Johan van der Meulen Taeke Triemstra Kor Zittema	Damwâld Sint-Jabik Bitgum	Taeke Triemstra
154	2007	Johan van der Meulen Taeke Triemstra Auke van der Graaf	Broeksterwâld Sint-Jabik Berltsum	Johan van der Meulen
155	2008	Jochum Bouma Auke van der Graaf Douwe Groenendijk	Easterlittens Berltsum It Hearrenfean	Douwe Groenendijk
156	2009	Gert-Anne van der Bos Folkert van der Wei Daniël Iseger	Holwert Wytmarsum Ljouwert	Gert-Anne van der Bos
157	2010	Gert-Anne van der Bos Taeke Triemstra Daniël Iseger	Holwert Sint-Jabik Ljouwert	Gert-Anne van der Bos
158	2011	Gert-Anne van der Bos Taeke Triemstra Daniël Iseger	Holwert Sint-Jabik Ljouwert	Daniël Iseger
159	2012	Hendrik Tolsma René Anema Thomas van Zuiden	Goutum Balk Tsjerkwert	Thomas van Zuiden
160	2013	Johan van der Meulen Renze Pieter Hiemstra Hylke Bruinsma	Bitgummole Sint-Jabik Minnertsgea	Renze Pieter Hiemstra
161	2014	Gert-Anne van der Bos Jacob Wassenaar Daniël Iseger	Holwert Minnertsgea Ljouwert	Daniël Iseger
162	2015	Gert-Anne van der Bos Taeke Triemstra Daniël Iseger	Mantgum Sint-Jabik Ljouwert	Gert-Anne van der Bos
163	2016	Jan-Dirk de Groot Renze Pieter Hiemstra Hans Wassenaar	Driezum Sint-Jabik Ljouwert	Hans Wassenaar
164	2017	Bauke Triemstra Alle Jan Anema Hendrik Kootstra	Sint-Jabik Grou Minnertsgea	Hendrik Kootstra
165	2018	Peter van Zuiden Allard Hoekstra Thomas van Zuiden	Boalsert Frjentsjer Boalsert	Allard Hoekstra
166	2019	Marten Bergsma Renze Pieter Hiemstra Hans Wassenaar	Minnertsgea Deinum Ljouwert	Hans Wassenaar
(167)	2020	gjin PC fanwegen koroana
168	2021	Gert-Anne van der Bos Taeke Triemstra Erwin Zijlstra	Mantgum Sint-Jabik Easterlittens	Erwin Zijlstra
169	2022	Tjisse Steenstra Hans Wassenaar Renze Pieter Hiemstra	Bitgummole Ljouwert Deinum	Tjisse Steenstra
170	2023	Tjisse Steenstra Hans Wassenaar Renze Pieter Hiemstra	Bitgummole Bitgummole Deinum	Tjisse Steenstra
171	2024	Menno van Zwieten Gabe-Jan van Popta Tsjisse Steenstra	It Hearrenfean Boalsert Bitgummole	Tjisse Steenstra

Keppelings om utens

• (ned) Offisjele webside fan 'e PC

Sjoch ek

Tema:Keatsen – De Wikipedy hat ek in temaside oer it keatsen

Boarnen, noaten en referinsjes

Boarnen, noaten en/as referinsjes:

Commons Wikimedia Commons  Ofbylden dy't by dit ûnderwerp hearre, binne te finen yn de kategory Frisian handball fan Wikimedia Commons.