Froubuorren

Froubuorren
Herfoarme tsjerke
Emblemen
Bestjoer
Lân	Nederlân
provinsje	Fryslân
gemeente	Waadhoeke
Sifers
Ynwennertal	700 (1 jannewaris 2023)
Oerflak	13,02 km², wêrfan: - lân: 12,95 - wetter: 0,07 km²
Befolkingsticht.	54 ynw./km²
Oar
Koördinaten	53° 16' N 5° 42' E
Offisjele webside
Side MFS Froubuorren FB-side Froubuorren
Kaart

Froubuorren (Biltsk: Froubuurt) is in doarp dat yn de gemeente De Waadhoeke leit. Froubuorren leit eastlik fan Sint-Anne, noardwestlik fan Stiens en súdwestlik fan Alde Leie en Aldebiltsyl. De doarpskearn fan Froubuorren leit om de Waling Dijkstrastrjitte en J.P. van der Bildtstrjitte hinne.

De buorskip Buerstermûne (diel) heart ek by Froubuorren. Earder hearden Aldebiltsyl, Nijebiltsyl en Alde Leie (diel) ek by Froubuorren. Alde Leie is sûnt 1984 in selstannich doarp en Aldebiltsyl sûnt 1948. Nijebiltsyl heart no by Aldebiltsyl.

Froubuorren hat 700 (1 jannewaris 2023) ynwenners.

Skiednis

Froubuorren is yn 1505 stifte by it bedykjen fan it Bilt. It wie doe it eastlike fan de trije doarpen fan it Bilt en it hiet Kijfhoeck, nei it plakje yn Hollân. Letter waarden de Biltske doarpen ferneamd nei de nammen fan de parochys.

Froubuorren hiet ynearsten Onse Vrouwen nei Us Leaffrou. Dêrnei hiet it plak Lefrouwebuert (1626) en L. Vrouwen Parochie (1700). De L. stie foar 'Leaf', mar rekke nei it begjin fan de 20e iuw yn ûnbrûk, sadat it Vrouwenparochie (Froubuorren) waard.

Buerstermûne

Om de Buerstermûne eastlik fan it doarp groeide yn 'e rin fan 'e tiid de buorskip Buerstermûne. Ek de eardere buorskip Aldebiltsyl en parten fan Nijebiltsyl en Alde Leie waarden ta de himrik fan Froubuorren rekkene.

Sûnt 2018 leit Froubuorren yn de gemeente De Waadhoeke, dêrfoar lei it doarp yn sawol de gritenij as de gemeente It Bilt.

Mienskip

Yn 2019 waard útein set mei de bou fan in nij doarpshûs, tagelyk in akkommodaasje foar ferskillende sportferienings.

Tsjerke

• Bordenatsjerke (herfoarme PKN tsjerke)

Pastorij

Skoalle

• Gearwurkingsskoalle De Fierljepper
  De gearwurkingsskoalle ûntstie yn 2012 mei de fúzje fan de iepenbiere skoalle De Hânwizer en de prot.-kristlike skoalle De Barte. Foar de gearfoeging fan de skoallen waard it âlde gebou fan De Hânwizer útwreide, dat yn 2014 iepene waard.

Ferienings

• Fuotbalferiening CVO
• Iisklub EMM
• Keatsferiening 'Klaine Izak'
• Stifting Wolwêzen Alderein

(Sjoch foar de meast aktuele ynformaasje oer ferienings op dy hiemside)

Befolkingsferrin

Jier	1848	1913	1954	1959	1964	1969	1973	2006	2015	2022
Ynwenners	1.892	2.419	947	940	817	747	792	620	687	693

Eveneminten

• Frou Rock

Berne yn Froubuorren

18e-iuws wen- en wurkhûs Waling Dykstrastrjitte 21 mei betinkingsstien foar Waling Dykstra

• Jan Pieters van der Bildt (1709), útfiner
• Waling Dykstra (1821-1914), skriuwer
• Gerben van Tuinen (1849), fakbûnslieder
• Evert Johannes Brinkhuis (1862-1908), boargemaster
• Auke Johannes Vleer (1911-1981), boargemaster

Ynfrastruktuer

Ferbinings

Froubuorren leit oan N393, de Middelwei, dy't nei it westen nei Sint Anne giet en nei it súdeasten nei Stiens. Oer in opfeart hat Froubuorren ferbining mei de Ouwe Rij en de Súdhoekster Faart en fierder nei Berltsum en it âldlân.

Op 2 desimber 1902 waard yn Froubuorren in stasjon iepene fan it spoar fan Stiens nei Harns fan de NFLS. De stasjonskoade wie Vrou. It waard sletten op 1 desimber 1940.

Strjitten

't eerste Morn, Atteswei, Brungerstrjitte, Froubuorstermole, Hamerenwei, J.P. van der Bildtstrjitte, Klaine Izakstrjitte, Langhústerwei, Leyester Hegedyk, M Beckstrjitte, Middelwei-East, Ouwe Griepstrjitte, Readpaad, Steertster, Stienzer Hegedyk, Súdhoekstermiddelwei, Tsjerkeplein, Waling Dykstrastrjitte.

Boarnen, noaten en referinsjes

Boarnen, noaten en/as referinsjes:

Webstee oer Froubuorren. Commons Wikimedia Commons  Ofbylden dy't by dit ûnderwerp hearre, binne te finen yn de kategory Froubuorren fan Wikimedia Commons.