Roos Tarpals

Ut Wikipedy
Roos Tarpals
personaazje út Star Wars
Roos Tarpals.jpg
persoanlike bysûnderheden
sekse manlik
soarte personaazje Gungaansk
nasjonaliteit Flag of the Galactic Republic.svg Galaktysk
berop/amt militêr
oare ynformaasje
besibbe
  personaazjes
Rugor Nass
Jar Jar Binks
Padmé Amidala
geastlike heit George Lucas
ûntstean 1999

Roos Tarpals (útspr.: [ˈɹuːs ˈtɑɹpɑlz], likernôch: "rûûs tar-pals") is in fiktyf personaazje fan minder belang út 'e Star Wars-franchise fan 'e Amerikaanske filmmakker George Lucas. Hy is militêr oanfierder fan 'e Gunganen, in ras fan bûtenierdske wêzens dat lânseigen is op 'e planeet Naboo. It personaazje waard yntrodusearre yn 'e film Star Wars: Episode I – The Phantom Menace (1999) en hie ek in gastrol yn 'e tekenfilmsearje Star Wars: The Clone Wars. Tarpals waard hielendal mei special effects staljûn; syn dialooch waard yn 'e film ynsprutsen troch Steve Speirs en yn 'e searje troch Fred Tatasciore.

Fiktive biografy[bewurkje seksje | boarne bewurkje]

Yn The Phantom Menace[bewurkje seksje | boarne bewurkje]

Roos Tarpals is berne op 'e planeet Naboo. Hy begjint al jong in karriêre as militêr yn it leger fan 'e Gunganen en klimt troch de rangen op ta kaptein fan 'e wacht yn 'e ûnderwetterstêd Otoh Gunga, op 'e boaiem fan 'e Paongamar. As sadanich fiert er de opdracht fan 'e Gungaanske foaroanman baas Nass út om 'e knoffelige Jar Jar Binks omreden fan syn ûnopsetlike fernielsucht út 'e stêd te warjen. As dyselde ûnder de ynvaazje fan Naboo troch de Hannelsfederaasje weromkeart as gids foar de Jedi-ridders Qui-Gon Jinn en Obi-Wan Kenobi, nimt Tarpals him yn 'e hechten. Mar Jar Jar wurdt neitiid troch baas Nass oerdroegen oan master Qui-Gon.

Nei't se de minsklike stêden op it drûge fan Naboo beset hawwe, keare de androïdelegers fan 'e Hannelfederaasje har tsjin 'e Gungaanske stêden ûnder wetter, nettsjinsteande de neutraliteit fan 'e Gunganen. Baas Nass lûkt him mei syn folk werom op harren hillige plak, djip yn 'e sompen. Dêr is Tarpals oanwêzich by de ûnderhannelings tusken Nass en de Nabooaanske keninginne Padmé Amidala, dêr't in militêr bûnsgenoatskip tsjin 'e Hannelsfederaasje út berne wurdt.

Om Jar Jar Binks te earjen foar syn rol yn it gearbringen fan harren beide folken, beneamt Nass him ta generaal fan it Gungaanske leger. As dat leger letter opmarsjearret tsjin 'e oarlochsandroïden fan 'e Hannelsfederaasje, is de knoffelige Jar Jar lykwols inkeld yn namme de oanfierder. De wiere lieding is yn 'e hannen fan Tarpals, dy't de fijân yn 'e Slach op 'e Gerzige Fjilden dwaande hâldt oant de jonge Anakin Skywalker it flaggeskip fan 'e float fan 'e Hannelsfederaasje ferneatiget, mei as gefolch dat alle androïden yn 'e sliepstân geane. Underwilens nimt keninginne Padmé yn it keninklik paleis yn 'e Nabooaanske haadstêd Theed Nute Gunray, de ûnderkening fan 'e Hannelsfederaasje, kriichsfinzen, wêrmei't de oarloch einiget.

Neitiid nimt kaptein Tarpals diel oan in oerwinningsparade troch de strjitten fan Theed, dêr't hy, Jar Jar, baas Nass en de Gungaanske soldaten lûd tajûchheid wurde troch de Nabooaanske befolking.

Yn The Clone Wars[bewurkje seksje | boarne bewurkje]

Under de Kloane-oarloggen jout Tarpals, dy't tsjin dy tiid opklommen is ta de rang fan generaal, gehoar oan 'e oprop fan 'e Jedi-master Yoda, dy't freget om Gungaanske frijwilligers foar de striid op 'e planeet Mon Cala. Om't de Gunganen amfibyen binne, kinne se op 'e oseaanwrâld Mon Cala nammentlik better út 'e fuotten as minsken of in hiel soad oarsoartige bûtenierdske wêzens. Tarpals jout him by in detasjemint Gunganen, dat ûnder de nominale lieding fan ôffurdige Jar Jar Binks op Mon Cala meifjochtet mei de kloansoldatedûkers út it Grutte Leger fan 'e Republyk en de lânseigen Mon Calamari en Quarren tsjin 'e androïdelegers fan 'e separatistyske Konfederaasje fan Unôfhinklike Stelsels.

Letter yn 'e oarloch fiert de Konfederaasje fan Unôfhinklike Stelsels in nije ynvaazje fan Naboo út, wêrby't besocht wurdt om op snoade wize de Gunganen tsjin 'e minsklike Nabooanen op te setten. Tarpals en Jar Jar Binks binne nau belutsen by it foarkommen fan dat plan. Yn 'e striid slute Tarpals en ferskate oare Gunganen generaal Grievous yn, de fijannige befelhawwer. Dyselde weeft handich ôf mei de oaren en nimt it dan yn in man-tsjin-mangefjocht op tsjin Tarpals. Hoewol't de Gungaanske generaal deadlik ferwûne rekket, wit er Grievous langernôch út te skeakeljen dat er kriichsfinzen nommen wurde kin. Letter moat Grievous lykwols wer frijlitten wurde as greve Dooku it libben fan Anakin Skywalker bedriget.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.

 
personaazjes út Star Wars
 yntrodusearre yn A New Hope Raymus Antilles • Wedge Antilles • C-3PO • Chewbacca • Biggs Darklighter • Jan Dodonna • Obi-Wan Kenobi • Beru Lars • Owen Lars • prinsesse Leia Organa • R2-D2 • Luke Skywalker • Han Solo • Wilhuff Tarkin • Darth Vader
 yntrodusearre yn The Empire Strikes Back  Lando Calrissian • Boba Fett • keizer Palpatine • Firmus Piett • Yoda
 yntrodusearre yn Return of the Jedi Gial Ackbar • Bib Fortuna • Jabba de Hutt • Mon Mothma • Anakin Skywalker • Wicket
 yntrodusearre yn The Phantom Menace Saché Adova • Mas Amedda • Eirtaé Ballory • Sio Bibble • Depa Billaba • Jar Jar Binks • Adi Gallia • Nute Gunray • Qui-Gon Jinn • Ki-Adi-Mundi • Eeth Koth • Plo Koon • Darth Maul • Rugor Nass • Padmé Amidala • Quarsh Panaka • Even Piell • Yarael Poof • Oppo Rancisis • Sabé • Sebulba • Shmi Skywalker • Darth Sidious • Aurra Sing • Roos Tarpals • Saesee Tiin • Rabé Tonsort • Finis Valorum • Watto • Mace Windu • Yaddle
 yntrodusearre yn Attack of the Clones greve Dooku • Jango Fett • Kit Fisto • Agen Kolar • Cliegg Lars • Bail Organa • Poggle de Mindere • Aayla Secura • Shaak Ti • Darth Tyranus • Luminara Unduli
 yntrodusearre yn Revenge of the Sith Stass Allie • generaal Grievous
 yntrodusearre yn The Force Awakens BB-8 • Kaydel Ko Connix • Poe Dameron • Finn • Armitage Hux • Maz Kanata • kaptein Phasma • Kylo Ren • Rey • Snoke
 yntrodusearre yn The Last Jedi  Larma D'Acy • DJ • Amilyn Holdo • Rose Tico
 yntrodusearre yn The Rise of Skywalker Zorii Bliss • D-O • Jannah • Enric Pryde • Ben Solo
 yntrodusearre yn The Clone Wars (film) Ahsoka Tano • Asajj Ventress • Ziro de Hutt
 yntrodusearre yn Rogue One Cassian Andor • Galen Erso • Jyn Erso • Saw Gerrera • Chirrut Îmwe • K-2SO • Orson Krennic • Baze Malbus • Raddus • Bodhi Rook
 yntrodusearre yn Solo Tobias Beckett • L3-37 • Enfys Nest • Qi'ra • Dryden Vos
 yntrodusearre yn oare media  Din Djarin • Cara Dune • Grogu • Bo-Katan Kryze • Satine Kryze • de Mandaloriaan • Savage Opress • Fennec Shand • Sifo-Dyas • Hera Syndulla • Paz Vizsla • Sabine Wren