Solo: A Star Wars Story

Ut Wikipedy
Solo
A Star Wars Story
film
(Filmposter yn 'e Ingelske Wikipedy)
makkers
regisseur Ron Howard
produsint Kathleen Kennedy
Allison Shearmur
Simon Emanuel
útfierend
   produsint
Lawrence Kasdan
Jason McGatlin
senario Jonathan Kasdan
Lawrence Kasan
basearre op wurk fan George Lucas
kamerarezjy Bradford Young
muzyk John Powell
filmstudio Lucasfilm
distribúsje Walt Disney Studios
   Motion Pictures
spilers
haadrollen Alden Ehrenreich
Joonas Suotamo
Emilia Clarke
Woody Harrelson
byrollen Donald Glover
Phoebe Waller-Bridge
Paul Bettany
Erin Kellyman
Thandie Newton
skaaimerken
lân/lannen Feriene Steaten
premiêre 10 maaie 2018
foarm langspylfilm
sjenre science fiction-film
taal Ingelsk (ek guon optochte talen)
spyltiid 135 minuten
budget en resultaten
budget $275 miljoen
opbringst $392,9 miljoen
filmsearje
filmsearje Star Wars
● foarich diel Star Wars: Episode III –
   Revenge of the Sith
(gron.)
● folgjend diel Rogue One (gronologysk)

Solo: A Star Wars Story, ek wol koartwei Solo neamd, is in Amerikaanske science fiction-film út 2018 mei eleminten fan aventoerefiksje, aksjefiksje, heistfiksje en fantasy. It wie de twadde op himsels steande live-actionfilm yn it ramt fan 'e saneamde antologysearje fan 'e Star Wars-mediafranchise. Yn 'e ynterne gronology fan 'e Star Wars-filmsearje folget it nei Star Wars: Episode III – Revenge of the Sith (2005) en giet it foarôf oan Rogue One: A Star Wars Story (2016). De film waard regissearre troch Ron Howard, mei yn 'e haadrollen Alden Ehrenreich as Han Solo en Joonas Suotamo as Chewbacca.

De film is it oarsprongsferhaal fan 'e smokkelder Han Solo, dy't letter in held wurde sil yn 'e striid fan it Rebelleferbûn tsjin it diktatoriale Galaktysk Keizerryk. Hy groeit op ûnder minne omstannichheden op 'e planeet Corellia, dêr't misdiesyndikaten foar master opslane. Om dêrwei te kommen, nimt er tsjinst as ynfanterist by de Keizerlike Striidkrêften. In moeting mei de Wookiee Chewbacca liedt ta in libbenslange freonskip. Tegearre jouwe se har by de binde fan Tobias Beckett, dy't wurket foar it ûnderwrâldfiguer Dryden Vos. Dy syn rjochterhân blykt Qi'ra te wêzen, it famke oan wa't Han syn hert ferpâne hat.

Solo: A Star Wars Story krige fan 'e filmkritisy oer it algemien positive resinsjes, hoewol't der wat krityk wie op 'e kamerarezjy en de toansetting. De film waard fierders nominearre foar de Oscar foar bêste special effectss. Yn 'e bioskopen brocht Solo: A Star Wars Story lykwols 'mar' krapoan $400 miljoen op tsjin in (tige heech) budget fan $275 miljoen. De bykommende marketingkosten yn oanmerking nommen, betsjutte dat dat de film net út 'e kosten kaam en beskôge waard as in flop. Solo: A Star Wars Story waard opdroegen oan 'e neitins fan filmprodusinte Allison Shearmur, dy't ûnder de produksje kaam te ferstjerren.

Plot[bewurkje seksje | boarne bewurkje]

Under it diktatoriale rezjym fan it Galaktysk Keizerryk hearsket op 'e planeet Corellia in tastân fan anargy, wêrby't misdiesyndikaten foar master opslane. De binde fan 'e Wite Wjirmen, fan 'e aaklike frouwe Proxima, rûpelet strjitbern út troch se wurkje te litten yn in steat dy't slavernij deun benei komt. Yn dy sitewaasje groeie de weesjonge Han en syn faam Qi'ra op. As se in jier as santjin binne, drukt Han in fleske 'coäxium', tige djoere romteskipbrânstof, efteroer om foar de ôfreis fan himsels en Qi'ra fan Corellia te beteljen. Efternei sitten troch de trewanten fan frouwe Proxima witte se tegearre de romtehaven te berikken, dêr't se twongen binne it fleske coäxium te brûken om in Keizerlike dûanebeämte mei om te keapjen. It frommes lit harren troch, mar Qi'ra wurdt fuort neitiid finzen nommen troch ien fan harren efterfolgers, en Han wurdt fan har skaat troch in tichtklapte feilichheidsdoar.

Han hat gjin oare kar as om sûnder Qi'ra fierder te gean, mar hy swart dat er foar har weromkomme sil. Mei't de trewanten fan frouwe Proxima him noch altyd sykje en om't er sûnder it coäxium gjin manear hat om foar passaazje op in romteskip te beteljen, beslút er him oan te melden foar militêre tsjinst de romtemacht fan 'e Keizerlike Striidkrêften. As de rekrutearringsofsier him nei syn efternamme freget, antwurdet er dat er dy net hat, likemin as famylje. De ofsier tinkt eefkes nei en skriuwt him dan yn ûnder de namme 'Han Solo'.

Trije jier letter, nei't er omreden fan oerhearrigens fuortstjoerd is fan 'e oplieding ta piloat, tsjinnet Han as in ynfanterist op 'e planeet Mimban, dêr't it Galaktysk Keizerryk it ferset fan 'e lânseigen befolking de kop besiket yn te drukken. Under in fjildslach yn dridzige rinfuorgen moetet er dêre in trio kriminelen ûnder lieding fan Tobias Beckett, dy't har foardogge as Keizerlike militêren. Han, dy't besletten hat te desertearjen, besiket Beckett te sjantearjen om him mei te nimmen, mar Beckett, dy't it unifoarm fan in luitenant draacht, lit him arrestearje. Neitiid wurdt Han troch in pear sadistyske soldaten yn in soartemint tsjerker smiten, dêr't in Wookiee finzen holden wurdt, mei as bedoeling dat de Wookiee him opfrette sil. No wol it tafal dat Han Shyriiwook, de taal fan 'e Wookiees, ferstiet en sels in bytsje sprekke kin, en dêrmei wit er de Wookiee, dy't Chewbacca hjit, te bepraten om tegearre te ûntsnappen.

Se sette nei de romtehaven ta, dêr't Beckett-en-dy dwaande binne om in militêr transportskip te stellen. Beckett beslút harren mei te nimmen om't er beseft dat de ûnbidige lichemskrêft fan 'e Wookiee noch wolris fan pas komme kin. Neitiid nimme Han en Chewbacca mei Beckett, dy syn frou Val en de fjouwerearmige Ardennyske piloat Rio diel oan 'e stellerij fan in grutte lading coäxium dat oer it spoar ferfierd wurdt op 'e planeet Vandor. Beckett syn soarchfâldich úttochte plan wurdt alhiel yn 'e bulten jage as de Wolkeriders arrivearje, in binde plonderders ûnder lieding fan 'e maskere Enfys Nest, dy't deselde lading coäxium kape wolle. De resultearjende gaos liedt ta de ferneatiging fan it coäxium en de dea fan Val, Rio en ferskate Wolkeriders.

Tink derom: Yn de tekst hjirûnder wurdt de ôfrin fan de film beskreaun.
As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Beckett is neitiid bot oerstjoer oer de dea fan Val, mar hy sit suver noch mear mei de hannen yn it hier oer it ferlies fan 'e lading coäxium. It plan foar de dieverij wie nammentlik net syn eigen, sa bychtet er no op oan Han en Chewbacca, mar dat fan Dryden Vos, in heechpleaatst ûnderwrâldfiguer yn 'e Karmozinen Dage, in wiidferneamd en rûnom freze misdiesyndikaat. Han en Chewbacca biede oan om Beckett te helpen by it goedmeitsjen fan it ferlies fan it coäxium, sadat Vos him foar syn falen net fermoardzje sil. Se geane oan board fan it romtejacht fan Vos, dêr't Han Qi'ra weromsjocht. It docht bliken dat sy nei har skieding fan Han troch frouwe Proxima ferkocht is oan in oare binde, dy't har wer trochferkocht hat oan 'e Karmozinen Dage. Binnen dy organisaasje is hja troch har yntelliginsje opklommen ta assistinte fan Vos.

Han tinkt mei Beckett en Chewbacca in riskant plan op om rou coäxium te stellen út 'e minen op 'e planeet Kessel. Vos giet dêr akkoart mei, mar stiet derop dat Qi'ra harren beselskipje sil om foar him in eachje yn it seil te hâlden. Mei't rou coäxium ynstabyl is en mar beheind hâldber foar't it ûntploft, hawwe se ferlet fan in tige fluch romteskip om 'e lading op 'e tiid nei de raffinaderij op 'e planeet Savareen te bringen. Qi'ra liedt de oaren nei Lando Calrissian ta, in smokkelder en piloat dy't oer ien fan 'e fluchste romteskippen yn it Stjerrestelsel beskikt: de Millennium Falcon. Han daget Lando út ta in potsje sabacc, in kaartspul, wêrby't de ynset de Falcon is. Mar Lando spilet falsk trochdat er in hege spylkaart yn 'e mouwe ferburgen hat, en wint sa it spul. Nettsjinsteande dat seit er syn meiwurking oan 'e misje ta yn ruil foar in oansjenlik diel fan 'e winst.

Dat, mei Lando en syn eksintrike androïde mei feminine programmearring L3-37 set it selskip yn 'e Millennium Falcon koers nei Kessel, in planeet dy't inkeld berikber is fia it Kesselfliet, in nauwe trochgong troch de Akkadeeske Draaistream. Dat is in tichte, ûnferkende dize, dy't ûnfeilich makke wurdt troch los omfleanende asteroïden en planetoïden. Nei't se op Kessel oankommen binne, ynfiltrearje se de troch it Pyke-syndikaat behearske coäxiummyn as in fertsjintwurdiger fan in nije klant (Qi'ra) mei har robot (L3-37) en liifwacht (Beckett), dy't as bewiis fan goede wil in pear slaven (Han en Chewbacca) leveret om yn 'e myn te wurkjen. Wannear't Qi'ra en Beckett de Pykes yn 'e kontrôlekeamer útskeakele hawwe, befrijt L3-37 in robot fan syn twangklem om't er har yn it paad stiet. Op 'e fraach fan 'e robot wat er no moat, antwurdet se mei in sydlingse opmerking dat er de oare robots mar befrije moat. Min ofte mear by fersin ynstigearret L3-37 dêrmei in slave-opstân, mei't de befrijde robots ek de slaven befrije dy't yn 'e myn wurkje.

It is de bedoeling dat Chewbacca en Han, dy't harrensels yn 'e myn ûntdien hawwe fan har bewekkers, it coäxium stelle sille, mar Chewbacca wurdt ôflaat as er guon Wookiees mank de mynslaven sjocht, dat Han langet him syn wapen oer om harren te helpen. Dat betsjut dat it swiere wurk op Han delkomt. It slagget him it coäxium te stellen, en op 'e weromweis nei de Millennium Falcon jout Chewbacca him wer by him. Yn 'e gaos dy't de slave-opstân feroarsake hat, sjitte de bewekkers yn it wylde wei, wêrby't L3-37 op fatale wize skansearre rekket. Lando, fan wa't L3-37 sels earder oan Qi'ra ferteld hat dat er temûk fereale op har (L3-37) is, weaget syn libben om har te rêden, mar hy wit inkeld it boppeste part fan har lichem mei te skuorren. Hy wurdt dêrby yn it skouder sketten, sadat er sels troch Chewbacca rêden wurde moat.

It hiele selskip pykt út yn 'e Millennium Falcon en lit de slaven en de bewekkers it fierders sels útfjochtsje. Op it berjocht fan in slave-opstân op Kessel hat it Keizerryk lykwols in stjerreslachskip stjoerd om it Kesselfliet te blokkearjen, dat Han, dy't de piloat is no't L3-37 útskeakele en Lando ferwûne is, moat útwike yn 'e ûnferkende dize. Efterfolge troch Keizerlike TIE-jagers en in reuseftich wêzen mei tentakels dat yn 'e dize libbet, kinne se op it nipperke ûntkomme oan in swart gat trochdat Beckett de motors fan 'e Falcon opfiert mei in dripke coäxium. Mei help fan Qi'ra slút Lando it ûnthâld fan L3-37 oan op 'e boardkompjûter fan 'e Millennium Falcon, wêrmei't er dy beiden mei-inoar ferraant. Troch it gebrûk fan 'e navigaasjedatabase fan L3-37, dy't neffens Lando de bêste yn it Stjerrestelsel wêze soe, slagget it Han om in paad werom út 'e dize te finen en dêrby de Keizerlike blokkade alhiel te omsilen.

Slim skansearre komt de Millennium Falcon oan op Savareen, dêr't it proses om it folatile coäxium te raffinearjen, halje-trawalje úteinset. De Wolkeriders ûnder lieding fan Enfys Nest arrivearje om it coäxium te stellen, mei't se de binde fan Beckett fan Vandor ôf folge binne. Lando pykt út yn 'e Millennium Falcon en lit alle oaren oan har lot oer. Mar efter it masker fan Enfys blykt in teenagefamke beskûl te gean, dat nei eigen sizzen it masker urven hat fan har mem, in eardere Enfys Nest. Hja bringt út dat de Wolkeriders allegearre ôfkomstich binne fan planeten dy't slim te lijen hân hawwe ûnder it skrikbewâld fan 'e Karmozinen Dage, en dat se eins rebellen binne dy't weromslaan wolle tsjin it misdiesyndikaat en it Galaktysk Keizerryk, dat de opkomst fan it misdiesyndikaat mooglik makke hat. Se hawwe ferlet fan it coäxium om harren opstân mei te finansieren.

Han, dy't sympaty hat foar Enfys-en-dy, beslút om te besykjen Dryden Vos te bedragen en it coäxium oan 'e Wolkeriders ta te spyljen. Beckett fynt dat te riskant, dat hy winsket Han-en-dy it bêste en set ôf. As Han, Qi'ra en Chewbacca letter yn it jacht fan Vos arrivearje, wit dy al ôf fan Han syn plan om it coäxium oan 'e Wolkeriders te jaan en Vos ôf te konfoaien mei in substânsje dy't inkeld op coäxium liket. It docht bliken dat Beckett streekrjocht nei Vos ta gien is om Han te ferrieden. Vos hat sadwaande al syn liifwachten op twa nei stjoerd om Enfys en de Wolkeriders finzen te nimmen en, nei't se it coäxium feilichsteld hawwe, te fermoardzjen. De fetten dy't de Wolkeriders by har hawwe, blike lykwols leech te wêzen, en as it masker fan Enfys ôfgiet, blykt dêrefter in doarpeling fan Savareen beskûl te gean. Han hie nammentlik al rekkene op Beckett syn ferrie, dat hy hat it echte coäxium meinommen nei it jacht fan Vos om him te fluch ôf te wêzen.

Wylst de echte Wolkeriders de liifwachten fan Vos oer it mad komme en oermânsk wurde, lûkt Beckett, oan board fan it jacht fan Vos, syn ploffer en sjit Vos syn lêste beide liifwachten dea. Hy sjocht no nammentlik syn kâns skoan om sels as winner út 'e bus te kommen, dat hy pykt út mei it coäxium mei Chewbacca as gizelder om it guod foar him te dragen. Han en Qi'ra bliuwe efter mei Vos, dy't Han besiket te fermoardzjen. Qi'ra grypt de sabel fan ien fan 'e beide liifwachten dy't Beckett om hals brocht hat en beart dat se har trou oan Vos bewize sil troch Han foar him te deadzjen. Ynstee deadet se Vos sels. Han en Qi'ra tútsje inoar. Hy moat efter Beckett en Chewbacca oan, en sy seit dat se him folgje sil sadree't se Vos syn rykdommen byinoar fandele hat.

Op in klif by see wachtet Han Beckett en Chewbacca op. Beckett, dy't himsels as in soarte fan mentor foar Han opwurpen hat, seit dat er Han no noch ien lêste les leare sil, wylst er temûk risselwearret om Han dea te sjitten. Mar Han bewiist dat er in flugge learder is: ear't Beckett útsprutsen is, sjit Han hìm ynstee del. Oan board fan it jacht makket Qi'ra ûnderwilens gjin risselwaasje om har by Han te jaan, mei't se wit dat as se útnaait, de Karmozinen Dage nea rêste sil foar't sy opspoard en deade is. Om Han te beskermjen, nimt se dêrom fia holografyske kommunikaasje kontakt op mei de heechste baas fan 'e Karmozinen Dage, de eardere Sith-ridder Darth Maul. Se ynformearret him dat Vos fermoarde is troch Beckett, dy't neitiid útpykt is mei it coäxium. Maul oarderet har om har by him te jaan op 'e planeet Dathomir, sadat se tenei nauwer gearwurkje kinne. Qi'ra set mei it jacht fan Vos ôf fan Savareen. Han sjocht har gean.

Alden Ehrenreich.
Emilia Clarke.
Woody Harrelson.
Donald Glover.

Neitiid jouwe Han en Chewbacca it coäxium oan Enfys, dy't harren freget om har by de rebûlje te jaan. Han betanket foar de ear. By wize fan tank jout Enfys him in lyts fleske coäxium, dat genôch wurdich is om in eigen romteskip te keapjen. Ynstee spoare Han en Chewbacca Lando op. By harren weriening krûpt Han him oan en set syn âlde feardichheiden as bûsehifker yn om Lando te ûntdwaan fan 'e spylkaart yn syn mouwe. Dêrnei brûkt er it fleske coäxium as ynset foar in nij spultsje sabacc om it besit fan 'e Millennium Falcon. Diskear ferslacht er Lando, dy't op it moment suprème ta ûntdekking komt wat Han dien hat. Neitiid sette Han en Chewbacca yn 'e Millennium Falcon ôf nei Tatooine, dêr't, sa hat Beckett har earder ferteld, in machtige maffiabaas in grutte winstjaande operaasje gearstalt.

Rolferdieling[bewurkje seksje | boarne bewurkje]

haadrollen
personaazje akteur/aktrise                    
Han Solo Alden Ehrenreich
Chewbacca Joonas Suotamo
Qi'ra Emilia Clarke
Tobias Beckett Woody Harrelson


byrollen
personaazje             akteur/aktrise
Lando Calrissian Donald Glover
L3-37 Phoebe Waller-Bridge (motion-capture en stim)
Dryden Vos Paul Bettany
Enfys Nest Erin Kellyman
Val Thandie Newton
Rio Durant Jon Favreau (stim)
frouwe Proxima Linda Hunt (stim)
Rebolt Ian Kenny
Ralakili Clint Howard
Quay Tolsite Dee Tails
Darth Maul Ray Park (fysyk) en Sam Witwer (stim)
Tak Anthony Daniels (cameo)
Karjj Kiran Shah
Weazel Warwick Davis (cameo)

Produksje en distribúsje[bewurkje seksje | boarne bewurkje]

Produksje[bewurkje seksje | boarne bewurkje]

It idee om it oarsprongsferhaal fan 'e protagonist Han Solo te ferfilmjen, wie net nij. Yn 'e preproduksje fan Star Wars: Episode III – Revenge of the Sith (2005) wiene der plannen om in jonge Han meidwaan te litten oan 'e Slach om Kashyyyk, in treffen út 'e Kloane-oarloggen dat yn dy film toand waard. Dat idee helle lykwols it úteinlike senario net. Letter hie in ôflevering fan 'e troch Star Wars-betinker George Lucas plande tillefyzjesearje Star Wars: Underworld de earste moeting tusken Han en de Wookiee Chewbacca ôfskilderje moatten, mar dy searje waard nea makke.

Yn 2012 joech Lucas oan senarioskriuwer Lawrence Kasdan opdracht om in skript te skriuwen foar in film oer in jonge Han Solo. Datselde jiers die Lucas lykwols syn filmstudio Lucasfilm mei alle rjochten op Star Wars oer oan The Walt Disney Company. Neitiid waard Kasdan ynset foar it senario fan 'e sânde film út 'e Skywalker Saga, te witten: Star Wars: Episode VII – The Force Awakens. Oant er dêrmei klear wie, krige syn soan Jonathan Kasdan doe de lieding oer it skriuwen fan it skript foar wat úteinlik Solo: A Star Wars Story wurde soe. De film hie yn 'e preproduksjefaze as opsetlik misliedende wurktitel Harry and the Boy, en oarspronklik wie it de bedoeling dat er makke wurde soe nei't The Force Awakens klear wie. Letter waard besletten om fan 'e op harsels steande Star Wars-films earst Rogue One: A Star Wars Story te meitsjen. Dêrnei wie it achtste diel fan 'e Skywalker Saga (Star Wars: Episode VIII – The Last Jedi) oan bar, en pas dêrnei waard Solo: A Star Wars Story makke.

De film soe oarspronklik regissearre wurde troch Phil Lord en Christopher Miller, mar healwei de opnamen ferlieten dyselden it projekt omreden fan in kreätyf skeel mei Disney. Yn harren plak waard doe Ron Howard oansteld, dy't earder û.m. Willow (1988) en The Da Vinci Code (2006) makke hie. Hy wurke op basis fan it senario fan heit en soan Kasdan. As produsinten wiene Kathleen Kennedy, Allison Shearmur en Simon Emanuel by it projekt belutsen foar Lucasfilm. Lawrence Kasdan en Jason McGatlin hiene as útfierende produsinten it tafersjoch oer de hiele produksje. Foar Solo: A Star Wars Story wie in budget beskikber fan $275 miljoen, wêrmei't it ien fan 'e djoerste films aller tiden wie. De kamerarezjy wie yn 'e hannen fan Bradford Young, en de filmmuzyk waard fersoarge troch John Powell, dy't dêrfoar yngeand gebrûk makke fan it tema foar Han Solo dat John Williams foar de soundtrack fan Star Wars: Episode IV – A New Hope (1977) ûntwikkele hie.

Casting[bewurkje seksje | boarne bewurkje]

As Chewbacca kearde akteur Joonas Suotamo werom, dy't dy rol doe al yn twa dielen fan 'e Skywalker Saga spile hie, nei't er him oernommen hie fan 'e yn 'e minnichte rekke Peter Mayhew. Foar de casting fan 'e titelrol fan Han Solo passearren mear as 3.000 jonge akteurs de revu, ûnder wa Miles Teller, Dave Franco, Rami Malek, Aaron Taylor-Johnson, Nick Robinson en Scott Eastwood. Meitiid waard der in shortlist gearstald, dy't bestie út trije nammen: Jack Reynor, Taron Egerton en Alden Ehrenreich. De kar foel úteinlik op Ehrenreich.

Foar de rol fan Qi'ra waarden û.o. Tessa Thompson, Naomi Scott, Zoë Kravitz en Emilia Clarke yn omtinken nommen. De rol gie nei Clarke, dy't bekendheid krigen hie mei har optreden as prinsesse Daenerys Targaryen yn 'e fantasysearje Game of Thrones. Woody Harrelson waard cast yn 'e rol fan 'e krimineel Tobias Beckett, dy't troch de senarioskriuwers basearre wie op 'e seerôver Long John Silver út 'e roman Treasure Island, fan 'e Skotske skriuwer Robert Louis Stevenson.

Regisseur Ron Howard.

Opnamen[bewurkje seksje | boarne bewurkje]

De opnamen foar Solo: A Star Wars Story setten op 30 jannewaris 2017 útein en duorren oant en mei 17 oktober fan dat jier. It regisseursduo Phil Lord en Christopher Miller hie de lieding oant harren ûntslach op 20 juny, wêrnei't Ron Howard it oernaam. It 'kreätive skeel' dat oanlieding joech ta de brek, hie der nei't it skynt mei te krijen dat senarioskriuwer en útfierend produsint Lawrence Kasdan en studiobaas by Lucasfilm Kathleen Kennedy it net iens wiene mei de filmstyl fan Lord en Miller. De beide regisseurs wiene fan miening dat se in komeedzjefilm oan it meitsjen wiene, wylst de produsinten in serieus ferhaal hawwe woene dat mei gefoel foar humor yn byld brocht waard.

Dêrnjonken fûnen de produsinten dat de regisseurs tefolle ymprovisaasje oanfiteren by de akteurs, mei as gefolch dat "it ferhaal fan 'e koers ôf skode". Lord en Miller besochten Kasdan, dy't woe dat syn skript wurd foar wurd ferfilme waard, tefreden te stellen troch hieltyd earst in take te dwaan wêrby't de akteurs har dialooch wurd foar wurd útsprieken, om dêrnei ferskate takes mei ymprovisaasje op te nimmen. Se wegeren fierder wetter by de wyn te dwaan, wêrnei't Lucasfilm Kasdan nei de filmset ta stjoerde om persoanlik tafersjoch te hâlden. Dat late ta oanboazjende spannings, mei't Lord en Miller Kasdan wat langer wat mear as in 'regisseur yn it skaad' begûnen te sjen, dy't oer harren skouders hinne de úteinlike film makke. Op 't langelêst besleat de studio om Lord en Miller oan 'e dyk te setten, yn 'e mande mei filmeditor Chris Dickens, dy't ferfongen waard troch Pietro Scalia.

De binnendoarsênes foar Solo: A Star Wars Story waarden foar it meastepart filme yn 'e Pinewood Studios yn it Ingelske Buckinghamshire. De sênes op Vandor waarden opnommen yn 'e Dolomiten, yn 'e Italjaanske regio's Trentino-Súd-Tiroal en de Feneto. De sênes op Savareen waarden filme op 'e Kanaryske Eilannen.

De rol fan it personaazje Dryden Vos wie oarspronklike ferjûn oan Michael K. Williams, mar doe't der nei it ûntslach fan Lord en Miller reshoots fan 'e sênes nedich wiene dy't troch Lord en Miller opnommen wiene, wie hy dêrfoar net beskikber om't er op dat stuit de film The Red Sea Diving Resort opnaam. De opnamen fan dy film duorren oant novimber 2017, en sa lang koe Howard net wachtsje. Dat, de rol fan Vos waard wercast, en Williams waard ferfongen troch Paul Bettany, dy't earder mei Ron Howard gearwurke hie oan A Beautiful Mind en The Da Vinci Code. Dyselde siet op dat stuit sûnder wurk, en doe't er hearde dat Howard de rezjy fan Solo: A Star Wars Story oernommen hie, hied er him in tekstberjocht stjoerd mei de fraach oft er ek in lyts roltsje foar him hie. Fjirtjin dagen letter siet er yn it fleantúch nei Ingelân.

Leden fan 'e cast, regisseur Ron Howard en produsint Simon Emanuel mei akteurs yn 'e kostúms fan Chewbacca en in trio stoarmtroepers by it promoatsjen fan Solo op it Ynternasjonaal Filmfestival fan Cannes yn 2018.

Distribúsje[bewurkje seksje | boarne bewurkje]

De distribúsje fan Solo: A Star Wars Story waard fersoarge troch Walt Disney Studios Motion Pictures, de distribúsjedifyzje fan The Walt Disney Company. De film gie op 10 maaie 2018 yn Los Angeles yn premiêre, en waard op 15 maaie ek fertoand op it Ynternasjonaal Filmfestival fan Cannes. Op 25 maaie iepene er yn 'e Amerikaanske bioskopen. It byhearrende soundtrackalbum ferskynde dyselde deis by platemaatskippij Walt Disney Records. Solo: A Star Wars Story kaam op 14 septimber 2018 beskikber as digitale download en waard op 25 septimber fan dat jier útbrocht op dvd en blu-ray.

Untfangst[bewurkje seksje | boarne bewurkje]

Fan 'e filmkritisy krige Solo: A Star Wars Story oer it algemien positive resinsjes. Der wie yn it bysûnder lof foar de aktearprestaasjes fan Alden Ehrenreich as Han Solo en Donald Glover as Lando Calrissian, de special effects, de soundtrack en de aksjesênes, mar der wie krityk op 'e kamerarezjy en de toan fan 'e film. De Amerikaanske krante USA Today hie grutte lof foar Glover en skreau dat er yn 'e rol fan Calrissian it titelpersonaazje fan 'e film yn syn skaad stelde.

A.O. Scott fan The New York Times skreau dat Solo: A Star Wars Story "himsels net al te serieus nimt, mar ek eltse ûnearbiedige, anargistyske ympuls dy't er besitte mei soarchfâldich yn betwang hâldt." Hy kwalifisearre de film as "in nuveraardich op feilich spyljende kaskreaker, eins in ferfilme Wikipedia-artikel." Yn it tydskrift Rolling Stone joech Peter Travers de film 21/2 fan 4 stjerren. Hy priizge de cast, mar hie krityk op it gebrek oan kreätiviteit: "Han Solo, dy skelmeftige duvel út Star Wars dy't der berucht om is dat er alle regels brekt, fynt himsels no werom yn in film dy't de sjoggers in goed gefoel jaan wol en him dêrom krekt sekuer oan 'e regels hâldt."

Michael Rechtshaffen fan The Hollywood Reporter hie ek lof foar de cast en it produksje-ûntwerp fan Solo: A Star Wars Story, mar hy wie fan miening dat de film oer it gehiel te feilich holden wie. Hy skreau: "Hoewol't de Solo fan Ehrenreich de Millennium Falcon behindich út 'e problemen manûvrearret, folget de film sels in feilich foarsisbere koers. Wat ik hjir mis binne it soarte plotrelatearre of fisuele ferrassings dy't The Last Jedi fan Rian Johnsoon en Rogue One fan Gareth Edwards ús joegen."

Op 'e webside Rotten Tomatoes, dy't resinsjes sammelet, hat Solo: A Star Wars Story in goedkarringspersintaazje fan 70%, basearre op 482 ûnderskate resinsjes. De konsensuskrityk fan 'e webside, gearstald út al dy resinsjes, stelt: "[De film] is, hoewol't er swakke plakken hat, in fermaaklik romte-aventoer mei in heech tempo, en is sadwaande befredigjend foar lju dy't net mei de franchise bekend binne, likegoed as foar langjierrige fans, salang't dyselden har ferwachtings mar ôfjouwe by de doar." Op Metacritic, de wichtichste konkurrint fan Rotten Tomatoes, behellet Solo: A Star Wars Story in goedkarringspersintaazje fan 62%, basearre op 54 resinsjes.

Resultaat[bewurkje seksje | boarne bewurkje]

Opbringst[bewurkje seksje | boarne bewurkje]

Solo: A Star Wars Story brocht yn 'e bioskopen yn 'e Feriene Steaten en Kanada $213,8 miljoen op, en yn alle oare lannen en territoaria $179,2 miljoen. Wrâldwiid kaam de opbringst dêrmei út op $392,9 miljoen. Ofset tsjin it budget fan $275 miljoen betsjut dat in winst fan $117,9 miljoen. Dat is foar in protte films in resultaat om fan te dreamen, mar omreden fan 'e mânske marketingkosten, dy't dêr noch ôf moatte, kaam Solo: A Star Wars Story by lange nei út 'e kosten en draaide er eins in ferlies fan (neffens Deadline Hollywood) $76,9 miljoen. De film wurdt dêrom beskôge as in flop.

Prizen[bewurkje seksje | boarne bewurkje]

Solo: A Star Wars Story waard nominearre foar de Oscar yn 'e kategory bêste fisuele effekten, de Grammy Award foar bêste ynstrumintale komposysje (Mine Mission), de Saturn Award foar bêste science fiction-film en de Teen Choice Awards foar favorite simmerfilm, twaris foar favorite simmerfilmakteur (Alden Ehrenreich en Donald Glover) en favorite simmerfilmaktrise (Emilia Clarke).

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.


 
Star Wars
 
filmsearje
 Skywalker Saga Episode IV: A New Hope (1977) • Episode V: The Empire Strikes Back (1980) • Episode VI: Return of the Jedi (1983) • Episode I: The Phantom Menace (1999) • Episode II: Attack of the Clones (2002) • Episode III: Revenge of the Sith (2005) • Episode VII: The Force Awakens (2015) • Episode VIII: The Last Jedi (2017) • Episode IX: The Rise of Skywalker (2019)
 oare Star Wars-films Star Wars Holiday Special (1978) • Caravan of Courage: An Ewok Adventure (1984) • Ewoks: The Battle for Endor (1985) • The Clone Wars (2008) • Rogue One (2016) • Solo (2018)
 
tillefyzjesearjes
 live-actionsearjes The Mandalorian (2019–20??) • The Book of Boba Fett (2021–20??) • Obi-Wan Kenobi (2022) • Andor (2022–2024) • Ahsoka (2023) • Skeleton Crew (2023–20??) • The Acolyte (2024)
 tekenfilmsearjes          Droids (1985–1986) • Ewoks (1985–1986) • Clone Wars (2003–2005) • The Clone Wars (2008–2020) • Rebels (2014–2018) • Blips (2017) • Forces of Destiny (2017–2018) • Galaxy of Adventures (2018–2020) • Resistance (2018–2020) • Roll Out (2019–2020) • Galaxy of Creatures (2021) • Visions (2021) • The Bad Batch (2021–20??) • Galactic Pals (2022) • Tales of the Jedi (2022)