Mon Mothma
| Mon Mothma personaazje út Star Wars | ||
| persoanlike bysûnderheden | ||
| sekse | froulik | |
| soarte personaazje | minske | |
| nasjonaliteit |  Galaktysk
| |
| berop/amt | politika | |
| oare ynformaasje | ||
| besibbe personaazjes |
Bail Organa prinsesse Leia admiraal Ackbar | |
| geastlike heit | George Lucas | |
| ûntstean | 1983 | |
Mon Mothma is in fiktyf personaazje fan minder belang út 'e Star Wars-franchise fan George Lucas. Hja is in politika en ien fan 'e lieders fan it Rebelleferbûn.
Fertolkings
[bewurkje seksje | boarne bewurkje]Mon Mothma waard spile troch Caroline Blakiston yn 'e film Star Wars: Episode VI – Return of the Jedi (1983) en troch Genevieve O'Reilly yn 'e films Star Wars: Episode III – Revenge of the Sith (2005) en Rogue One: A Star Wars Story (2016) en de tillefyzjesearje Andor. Har dialooch waard yn tekenfilmsearjes ynsprutsen troch Kath Soucie yn Star Wars: The Clone Wars en troch Genevieve O'Reilly yn Star Wars: Rebels.
Fiktive biografy
[bewurkje seksje | boarne bewurkje]Foar de steatsgreep fan kânselier Palpatine, it ynstoarten fan 'e demokratyske Galaktyske Republyk en it ferfangen dêrfan troch de diktatuer fan it Galaktysk Keizerryk is Mothma in senator foar de planeet Chandrila. Mothma is temûk ien fan 'e lieders 'e opposysje yn 'e Galaktyske Senaat tsjin it him ta-eigenjen fan almar mear foech troch Palpatine. Nei de steatsgreep wit se har posysje te behâlden troch in uterlik fertoan fan hearrigens oan Palpatine yn syn nije hoedanichheid as keizer, hoewol't se efter de skermen, yn 'e mande mei Bail Organa fan Alderaan, yn 'e folgjende jierren behelle is yn 'e ierste organisaasje fan wapene ferset tsjin it Keizerryk.
Yn 2 f.Sl.Y. ûntkomt Mothma oan in oanslach op har libben troch Keizerlike aginten, nei't se it troch it Keizerryk oanrjochte Bloedbad fan Ghorman feroardiele hat. Se dûkt ûnder en bringt de ûnderskate fersetsgroepen gear ûnder in feriene lieding, in feit dêr't se in formele proklamaasje, de Ferklearring fan Opstân, oer útgean lit. Dat is de formele oprjochting fan it Rebelleferbûn. Under de Galaktyske Boargeroarloch tsjinnet Mothma as de polityk lieder fan it Rebelleferbûn.
Nei de oerwinnings fan 'e rebellen yn 'e Slach by Endor en de Slach by Jakku ûnderhannelet Mothma mei de Keizerlike grutfizier Mas Amedda oer de kapitulaasje fan 'e Keizerlike Striidkrêften. Neitiid is se oant har pinsjonearring de earste kânselier fan 'e Nije Republyk. Yn dy hoedanichheid hat se in protte ynfloed op 'e ferhuzing fan 'e Galaktyske haadstêd fan Coruscant nei oare planetestelsels dy't om bar gasthear foar it regear en de Senaat wurde.
| Boarnen, noaten en/as referinsjes: |
|
Foar boarnen en oare literatuer, sjoch ûnder: References, op dizze side. |