Yarael Poof
| Yarael Poof personaazje út Star Wars | ||
| ||
| persoanlike bysûnderheden | ||
| sekse | manlik | |
| soarte personaazje | Quermiaan | |
| nasjonaliteit |  Galaktysk
| |
| berop/amt | Jedi-master | |
| oare ynformaasje | ||
| besibbe personaazjes |
Mace Windu Yoda Ki-Adi-Mundi Oppo Rancisis Plo Koon | |
| geastlike heit | George Lucas | |
| ûntstean | 1999 | |
Yarael Poof (útspr.: [ˈjaraɛl ˈpuːf], likernôch: "ja-ra-el pûûf") is in fiktyf personaazje fan minder belang út 'e Star Wars-franchise fan 'e Amerikaanske filmmakker George Lucas. Hy is in Jedi-master fan it bûtenierdske ras fan 'e Quermianen, en teffens in lid fan 'e Hege Jedi Ried, it bestjoer fan 'e Jedi Oarder. Yarael Poof waard yntrodusearre yn Star Wars: Episode I – The Phantom Menace (1999). It personaazje waard yn dy film spile troch Michelle Taylor.
Fiktive biografy[bewurkje seksje | boarne bewurkje]
Eftergrûn[bewurkje seksje | boarne bewurkje]
Yarael Poof wurdt berne as in Quermiaan op 'e planeet Quermia, wierskynlik earne yn 'e trêde iuw f.Sl.Y. Omreden fan syn oanberne Krêftgefoeligens wurdt er al jong nei de Jedi Timpel ta brocht, it haadkertier fan 'e Jedi Oarder op Coruscant, dêr't er oplaat wurdt ta Jedi-ridder. Poof ûntjout him ta in foaroansteande Jedi en in ekspêr op it mêd fan ferstânstrúks en yllúzjes. Dêrnjonken wurdt er ek in feardich diplomaat en learaar. Tsjin 232 f.Sl.Y. is er al beneamd ta lid fan 'e Hege Jedi Ried, it bestjoersorgaan fan 'e Jedi Oarder.
Iere jierren[bewurkje seksje | boarne bewurkje]
Koarte tiid letter, nei de Grutte Hyperromteramp, wurdt Poof troch Lina Soh, de kânselier fan 'e Galaktyske Republyk, frege om te helpen by it ûndersyk nei dat foarfal. Poof spilet in wichtige rol by de ûntdekking dat de ramp feroarsake is troch ynfallers dy't harsels de Nihil neame. As Soh dêrnei de Jedi Oarder om help freget by it útrûgjen fan 'e Nihil, bestiet dêr frijwat wjerstân tsjin yn 'e Hege Jedi Ried, mei't soks in militêre operaasje is en de Jedi gjin militêren binne. Mei û.o. Oppo Rancisis sprekt Poof him yn dizze kwestje út foar stipe oan 'e Republyk. Uteinlik wurdt it foarstel om help te bieden mei ien stim ferskil oannommen.
Nabookrisis[bewurkje seksje | boarne bewurkje]
Yn 32 f.Sl.Y., as de Nabookrisis útbrekt, tsjinnet Yarael Poof noch altyd as lid fan 'e Hege Jedi Ried. Hy is behelle yn 'e rieplachtings fan 'e ried oer de krisis sels, mar ek oer it wer opdûken fan 'e Sith, de âlde aartsfijannen fan 'e Jedi, fan wa't oannommen waard dat se tûzenen jierren lyn al útrûge wiene.
Poof is fierders oanwêzich as master Qui-Gon Jinn de njoggenjierrige Anakin Skywalker foar de Ried bringt, dy't sa sterk yn de Krêft is dat Qui-Gon derfan oertsjûge rekke is dat er de Utkarde is dêr't de oerâlde profesijen fan 'e Jedi gewach fan meitsje. De leden fan 'e Ried, ûnder wa Poof, binne it deroer iens dat in leeftyd fan njoggen jier fierstente let is om noch oan in oplieding ta Jedi te begjinnen, en master Yoda wurdt grutte eangst yn 'e jonge gewaar, wat in negative emoasje is. De Ried beslút Qui-Gon syn fersyk om Anakin dochs noch oan 'e Jedi-training begjinne te litten, ôf te wizen.
Nei it ferstjerren fan Qui-Gon yn 'e Slach om Naboo by in konfrontaasje mei de Sith Darth Maul, kundiget Qui-Gon syn eardere padawan Obi-Wan Kenobi oan dat er hoe dan ek gehoar jaan sil oan 'e lêste wurden fan syn âlde master, wêrmei't dyselde him frege hat om Anakin ta Jedi te trainen. De Ried beslút mei tsjinnichheid om dêr tastimming foar te jaan.
Dea[bewurkje seksje | boarne bewurkje]
Yarael Poof behâldt syn sit yn 'e Hege Jedi Ried oant er omkomt by in ûnspesifisearre misje, koart foar it útbrekken fan 'e Kloane-oarloggen yn 22 f.Sl.Y. Syn plak yn 'e ried wurdt neitiid ynnommen troch Jedi-master Coleman Trebor.
Keppelings om utens[bewurkje seksje | boarne bewurkje]
| Boarnen, noaten en/as referinsjes: |