D-O
| D-O personaazje út Star Wars | ||
| ||
| persoanlike bysûnderheden | ||
| soarte personaazje | robot | |
| nasjonaliteit |  Galaktysk
| |
| oare ynformaasje | ||
| besibbe personaazjes |
BB-8 Rey Poe Dameron | |
| geastlike heit | J.J. Abrams Chris Terrio | |
| ûntstean | 2019 | |
D-O is in fiktyf personaazje fan minder belang út 'e Star Wars-franchise. Hy waard yntrodusearre yn Star Wars: Episode IX – The Rise of Skywalker, it ôfslutende diel fan 'e Star Wars-ferfolchtrilogy. It personaazje waard betocht troch de senarioskriuwers fan dy film, J.J. Abrams en Chris Terrio. D-O is in robot bedoeld foar data-opslach, dy't lang eigendom west hat fan 'e Sith-agint Ochi fan Bestoon, mar no by it Ferset bedarret.
Uterlik en spraak
[bewurkje seksje | boarne bewurkje]D-O is in lyts robotsje mei in hichte fan 46 sm, dat griis kleure is mei hjir en dêr inkele dûnkergriene stikjes. It bestiet út in tsjil mei dêrboppe in soartemint nei ûnderen ta taps tarinnende toeter mei in griene útein dat wol in snút liket en swarte skreven dy't wol wat weihawwe fan eagen. Oan 'e wide kant fan 'e 'toeter' stykje antennes skean nei boppen ta út. Oars as in protte oare robots yn Star Wars (lykas R2-D2 en BB-8) is D-O by steat om yn Basaalsk, de lingua franca fan it Stjerrestelsel, te sprekken, hoewol't syn wurdskat frij beheind is en syn útspraken faak ferknoeid binne, mei in dúdlik stammerjen.
Eftergrûn en fertolking
[bewurkje seksje | boarne bewurkje]It personaazje D-O waard betocht troch J.J. Abrams en Chris Terrio, de senarioskriuwers fan Star Wars: Episode IX – The Rise of Skywalker, en basearre op George, de hûn fan Terrio, dy't er rêden hie fan in eardere eigner dy't it bist mishannele. It personaazje waard hielendal makke mei special effects, en de dialooch waard ynsprutsen troch regisseur en senarioskriuwer J.J. Abrams sels. Oarspronklik wie dat bedoeld as in tydlike oplossing, mar nei't Terrio in pear opnamen mei de stim fan Abrams sjoen/heard hie, fûn er de eangstige beleefdheid dy't dêrút spriek, perfekt passend foar D-O en beprate er Abrams om it sa te hâlden.
Fiktive biografy
[bewurkje seksje | boarne bewurkje]Eftergrûn
[bewurkje seksje | boarne bewurkje]Neffens it companionboek Ultimate Star Wars: New Edition soe D-O makke wêze troch de robotsmid Babu Frik fan Kijimi, mar yn 'e film The Rise of Skywalker is dat dúdlik net sa. Yn it companionboek fan dy film, Star Wars: The Rise of Skywalker: The Visual Dictionary, stiet dat D-O makke wie troch in ûnbekende robotsmid dy't fermoarde waard troch Ochi fan Bestoon. It idee dat D-O fan Babu Frik wie, kaam út in iere ferzje fan it filmsenario, wêryn't BB-8 de stikkene D-O yn it wurkplak fan Babu Frik oantreffe en reparearje soe, wêrnei't de lytsere robot as in soarte fan einepyk ymprintsje soe op BB-8 om dyselde tenei oeral te folgjen.
Yn The Rise of Skywalker
[bewurkje seksje | boarne bewurkje]Yn Star Wars: Episode IX – The Rise of Skywalker (2019) wurdt D-O yntrodusearre as in team fan it Ferset, besteande út Poe Dameron, Finn, Rey, de Wookiee Chewbacca en de robots C-3PO en BB-8 yn 'e woastyn op 'e planeet Pasaana it al jierren ferlitten romteskip yngeane fan Ochi fan Bestoon. Dyselde wie in spion en hiermoardner yn 'e emploai fan 'e Sith, dy't it team earder dea oantroffen hat yn in ûndergrûnsk gongestelsel. BB-8 fynt yn it skip de de-aktivearre D-O, laadt syn akku op en re-aktivearret him.
It docht bliken dat D-O hiel min behannele is troch Ochi, en dêrom no tige skruten is foar minsken oer. Rey, dy't it om it robotsje begruttet, besiket him derfan te bewissigjen dat er no by harren heart en dat nimmen him noch kweadwaan sil. D-O bliuwt fan dat punt ôf hieltyd yn 'e neite fan BB-8, dy't syn gids yn in fernuverjende wrâld wurdt. Hy reizget mei nei de planeet Kijimi, dêr't it ûnthâld fan C-3PO tydlik wiske wurdt troch de robotsmid Babu Frik, sadat er in ynskripsje yn 'e taal fan 'e Sith oersette kin, wat syn programmatuer him oars ferbiedt. Dy ynskripsje hawwe Rey-en-dy fûn op in artefakt dat se by it bonkerak fan Ochi oantroffen hawwe.
Neitiid is D-O belutsen by de ynfiltraasje fan in stjerreslachskip fan 'e faksistoïde Earste Oarder om 'e finzen nommen Chewbacca te befrijen, en teffens by de misje nei Kef Bir, dat neffens de ynskripsje de lokaasje is fan 'e 'weifiner' dy't it Ferset siket. Dy weifiner is in apparaat dat it paad wiist nei de ferburgen Sith-wrâld Exegol, dêr't de boasaardige, út 'e dea opstiene keizer Palpatine in reuseftige float stjerreslachskippen bouwe litten hat troch syn tawijde folgelingen fan 'e kultus fan 'e Ivige Sith. Op Kef Bir docht bliken dat D-O beskikt oer alle ynformaasje dy't Ochi sammele hie oer Exegol en de Ivige Sith. It robotsje is mear as ree om alles dat er wit mei syn nije freonen te dielen, wat it Ferset by steat stelt om in strategy te bepalen foar de oanfal op Exegol.
Keppelings om utens
[bewurkje seksje | boarne bewurkje]| Boarnen, noaten en/as referinsjes: |