Christopher Lee

	Christopher Lee
	akteur
	persoanlike bysûnderheden
echte namme	Christopher Frank Carandini Lee
nasjonaliteit	Britsk
berne	27 maaie 1922
berteplak	Londen (Ingelân)
stoarn	7 juny 2015
stjerplak	Londen (Ingelân)
etnisiteit	Ingelsk ; Italjaansk
jierren aktyf	1948 – 2015
prizen	BAFTA 2011
	offisjele webside
	christopherleeweb.com

Sir Christopher Lee (folút: Christopher Frank Carandini Lee; Londen, 27 maaie 1922 – dêre, 7 juny 2015) wie in Ingelsk akteur, skriuwer en sjonger fan mingd Ingelsk-Italjaansk etnysk komôf. Yn syn hast santichjierrich wurkpaad as akteur makke er karriêre troch faak de smjunt te spyljen. Hy krige yn 'e 1950-er jierren bekendheid mei syn fertolkings fan 'e fampier greve Dracula, yn 'e searje fan Hammer Horror-films. Letter spile er de krimineel Francisco Scaramanga yn 'e James Bond-film The Man with the Golden Gun. Resinter makke er himsels by in hiele nije generaasje filmfans populêr mei syn rol as de boaze tsjoender Saruman, yn de Lord of the Rings-filmsearje en as greve Dooku yn 'e Star Wars-prequeltrilogy. Lee, dy't sawol yn 'e Winteroarloch as yn 'e Twadde Wrâldoarloch fochten hie, wie dêrnjonken ek aktyf as stimakteur, publisist en hardrock-sjonger.

Libben en karriêre

Jonkheid en oplieding

Lee waard yn 1922 berne yn 'e Londenske wyk Belgravia, as de soan fan Geoffrey Trollope Lee (1879-1941), in luitenant-kolonel yn it Britske leger, en dy syn frou, grevinne Estelle Marie Carandini di Sarzano (1889-1981). Syn heit focht yn 'e Twadde Boere-oarloch en de Earste Wrâldoarloch, wylst syn mem bekendstie om har skientme en ferivige waard troch de keunstskilders sir John Lavery, Oswald Birley en Olive Snell en ek troch de byldhouster Clare Frewen Sheridan. Lee, dy't ôfstamme fan Italjaanske adel, wie in betoerpakesizzer fan greve Francesco Carandini di Sarzano (1773-1839), in balling dy't ûnder de Napoleontyske Oarloggen syn heil yn Ingelân socht. Dy syn skoandochter (en Lee syn oerbeppe) wie de Ingelske opera sjongster Marie Carandini (famkesnamme Burgess; 1826-1894). Oan syn heitekant wie Lee yn 'e fierte besibbe oan 'e Amerikaanske generaal Robert E. Lee en oan 'e astronoom John Lee.

Lee hie ien suster, Xandra Carandini Lee (1917-2002). Syn âlden giene útinoar doe't er fjouwer jier wie, en skieden doe't er seis jier wie. Syn mem naam de bern mei nei Switserlân, dêr't Lee yn Wengen op skoalle kaam. It wie dêr dat er syn earste aktearûnderfining opdie, as Oegemantsje yn it mearke mei deselde namme. Nei harren weromkear yn Londen wertroude Lee syn mem mei de bankier Harcourt George St-Croix Rose, de omke fan Ian Fleming (de geastlike heit fan geheim agint James Bond).

Mei njoggen jier waard Lee nei in ynternaat yn Oxford stjoerd, om him klear te steamen foar de prestizjeuze priveeskoalle fan Eton. Hoewol't Lee dêr yndie in talittingseksamen foar ôflei, koed er troch syn minne skoare op it mêd fan wiskunde gjin stúdzjebeurs besette. Om't syn styfheit net ree wie om 'e hege kosten fan in oplieding yn Eton te beteljen, learde Lee ynstee fierder oan it Wellington Kolleezje, in minder prestizjeuze priveeskoalle, dêr't er him ûnderskate yn 'e stúdzje fan 'e klassiken, Latyn en Gryksk. Oan 'e oare kant wied er net goed yn sport, en briek er gauris mei sin de regels, wat him faak op in wan bruien kaam te stean (ynklusyf ien kear foar it feit dat er te faak in wan bruien krige). Mei santjin jier moast er yn 1939 syn stúdzje oan it Wellington Kolleezje in jier foartidich ôfbrekke doe't syn styfheit fallyt gie. Koarte tiid letter skiede syn mem fan syn styfheit, en moasten Lee en syn suster wurk sykje om harsels te ûnderhâlden. Hy fûn in baantsje as klerk op it kantoar fan 'e rederij United States Lines, dat er lykwols mar koart hold.

Militêre tsjinst

Doe't de Sovjet-Uny ein 1939 Finlân binnenfoel en de Winteroarloch útbriek, reizge Lee nei Skandinaavje om as frijwilliger tsjinst te nimmen yn it Finske Leger. Hy en oare Britske frijwilligers waarden op in feilige ôfstân fan it front ynset foar bewekking, dat Lee naam nea diel oan 'e gefjochten. Nei't er weromkeard wie nei syn heitelân, koed er fannijs oan it wurk by United States Lines. Yn 'e rin fan 1940 joech er him by de Home Guard, de Britske boargerwacht. Nei it ferstjerren fan syn heit, op 12 maart 1941, dy't wollen hie dat syn soan krekt as hysels yn 'e Britske lânmacht tsjinne, melde Lee him ynstee oan by de loftmacht, de Royal Air Force.

Fan de simmer fan 1941 ôf wied er earst in hoart stasjonearre yn Súd-Rodeezje, it tsjintwurdige Simbabwe, dêr't er syn oplieding ta piloat ôfmeitsje soe. Op syn ien nei lêste trainingsflecht waard er lykwols oerfallen troch pineholle en begûn er dûbeld te sjen, wêrnei't by him in ôfwiking oan 'e eachsenuw fêststeld waard dy't makke dat er nea wer sels fleane meie soe. Foar Lee, dy't alhiel ferslingere rekke wie oan fleanen, kaam dat nijs as in slimmen klap, en in skoft lang hong er mar wat doelleas om. Uteinlik dreau syn wil om wat konstruktyfs te dwaan him derta dat er him oanmelde by de ynljochtingedifyzje fan 'e RAF.

Nei stasjonearrings yn Salisbury (no Harare), it Súdafrikaanske Durban en it Egyptyske Suëz, waard er ynset yn 'e Noardafrikaanske Kampanje, wêryn't de Britten en harren bûnsgenoaten it opnamen tsjin it Afrikakorps fan 'e Dútske fjildmaarskalk Erwin Rommel. Yn it lêst fan dy fjildtocht, yn Tuneezje, kaam Lee hast om doe't it fleanfjild fan it squadron dêr't er oan tafoege wie, bombardearre waard. Neitiid naam er diel oan 'e Alliëarde ferovering fan Sisylje, dêr't er malaria oprûn, en letter wied er belutsen by de Alliëarde ynfaazje fan Itaalje, dêr't er ûnder de slepende Slach om Monte Cassino taheakke waard oan 'e Nepaleeske Goerka's fan 'e Britsk-Yndyske 8ste Ynfanterydifyzje. Doe't er in pear dagen mei ferlof wie yn Napels, beklom er de fulkaan de Fesuvius, dy't trije dagen dêrnei útbarste.

Under de lêste dagen fan 'e Slach om Monte Cassino ûntsnapte Lee op 'e nij oan 'e dea doe't ien fan 'e fleantugen fan syn squadron by it opstiigjen delstoarte, en hy delknoffele boppe-op in op skerp steande bom. Nei ôfrin fan 'e slach, dy't útrûn op 'e befrijing fan Rome, besocht Lee dy stêd, dêr't er in moeting hie mei Nicolò Carandini, in neef fan syn memmes, dy't yn it Italjaanske ferset fochten hie. De lêste trijefearns jier fan 'e oarloch brocht Lee yn noardlik Itaalje troch. Nei eigen sizzen tsjinne er yn syn tiid yn Noard-Afrika ek in hoart by it Special Operations Executive (SOE) en de Long Range Desert Patrol, de foarrinner fan 'e hjoeddeiske kommando-ienheid SAS, mar dêroer hat er nea details jaan wold. Nei de Alliëarde oerwinning wied er fanwegen it feit dat er floeiend Frânsk en Dútsk spriek, belutsen by de opspoaring fan nazy-oarlochsmisdiedigers, oant er yn 1946 ôfswaaide mei de rang fan flight lieutenant (ekwifalint mei de rang fan kaptein yn 'e Keninklike Loftmacht).

Aktearkarriêre

Nei't er weromkeard wie nei Londen, koe Lee himsels net mear as kantoarklerk sjen, en in oanbod om 'e klassiken te ûnderwizen sloech er ôf om't er syn Latyn te roastich fûn. Uteinlik wie it syn efterneef Nicolò Carandini, dy't tsjin dy tiid de nije Italjaanske ambassadeur yn it Feriene Keninkryk wurden wie, dy't him oanrette om akteur te wurden. Carandini stjoerde him nei syn freon Filippo del Giudice, it haad fan 'e filmstudio Two Cities Films, en dy bea Lee in sânjierrich kontrakt oan. Lee makke syn debút as filmakteur yn 'e Goatyske românse Corridor of Mirrors, út 1947, dêr't er wolteld ien regel tekst yn hie. Syn "tiid as learjonge", sa't er it letter sels neamde, duorre tsien jier, wêryn't er meast ûnderstypjende rollen en eftergrûnpersonaazjes spile. Sa wie Lee û.m. te sjen (faak sûnder yn 'e begjintitels neamd te wurden) yn ferneamde films as Hamlet (1948), Captain Horatio Hornblower R.N. (1951), Quo Vadis? (1951) en Moulin Rouge (1952).

Yn 1957 spile Lee foar it earst yn in film foar de studio Hammer Film Productions, te witten The Curse of Frankenstein, as it Meunster fan Frankenstein. Dy rol late derta dat him in jier letter yn 'e film Dracula de titelrol oanbean waard. Dat wie sa'n súkses dat er neitiid almar wer yn deselde rol cast waard. Sa fertolke er de fampier greve Dracula yn 1965 op 'e nij yn Dracula: Prince of Darkness. Yn dy film seit Lee gjin wurd, mar sizet er allinnich mar. Sels woed er hawwe dat de tekst dy't foar him skreaun wie, fan sa'n minne kwaliteit wie dat er wegere hie om dy út te sprekken, mar senarioskriuwer Jimmy Sangster bewearde dat it skript nea tekst foar it personaazje fan Dracula omfetten hie. Lee sei ek dat Hammer him suver "sjantearre" om neitiid noch yn fierdere Dracula-films te spyljen, troch op him yn te praten en him foar te rekkenjen hoefolle minsken oft wurkleas wurde soene as hy, de stjer fan 'e filmrige, opstapte. Yn Dracula Has Risen from the Grave (1968), Taste the Blood of Dracula (1969) en Scars of Dracula (1970) hie Lee op 'e nij frijwol gjin tekst en ek los dêrfan net folle omhâns. Hy klage: "Se joegen my neat om te dwaan! Ik smeekte Hammer suver om my in diel fan 'e tekst brûke te litten dy't Bram Stoker skreaun hie. Ut en troch wist ik der sa'n tekstregel yn te smokkeljen." Nettsjinsteande Lee syn ûntefredenens wiene de films kommersjeel grutte súksessen, en makken se him ta in wiere filmstjer.

Tsjin 'e iere 1970-er jierren rekke de formule lykwols útwurke, en de beide foarlêste films fan 'e searje, Dracula A.D. 1972 (1972) en The Satanic Rites of Dracula (1973), brochten net folle jild mear yn 't laadsje. Tsjin dy tiid wie Lee sa dwers wurden dat er him op parsekonferinsjes iepentlik tsjin Hammer kearde. Neitiid makke de studio noch ien Dracula-film, The Legend of the 7 Golden Vampires (1974), mar dêr waard Lee net mear foar frege. Oare films dêr't Lee yn 'e 1950-er en 1960-er jierren yn meispile, wiene bgl. The Mummy (1959) en Raputin, the Mad Monk (1966), wêryn't er de titelrol fan Grigorij Raspûtin hie. Teffens died er trije Sherlock Holmes-ferfilmings: The Hound of the Baskervilles (1959), as sir Henry Baskerville, Sherlock Holmes and the Deadly Necklace (1962), as de grutte privee-detektive sels, en The Private Life of Sherlock Holmes (1970), as Holmes syn sels noch skranderder broer Mycroft. Teffens hied er in haadrol yn 'e Dútske (en Dútsktalige) film Das Rätsel der Roten Orchidee (1962). Hy die audysje foar The Longest Day (1962), oer de Alliëarde lânings op 'e kust fan Normanje op D-Day, mar waard dêrfoar ôfwiisd om't er "der net útseach as in militêr".

Yn 'e 1970-er jierren spile Lee û.m. Jekyll en Hyde yn I, Monster (1971), Lord Summerisle yn The Wicker Man (1973), dat syn persoanlike leaflingsfilm wie, de greve fan Rochefort yn The Three Musketeers (1973) en yn it ferfolch dêrop The Four Musketeers (1974), en de hiermoardner Francisco Scaramanga yn 'e James Bond-film The Man with the Golden Gun (1974). Fierders wurke er as ferteller-yn-byld sûnder euvelmoed mei oan 'e softcore-pornofilm Eugenie (1970): "Ik hie gjin idee dat dat wie wat it wie, doe't ik ôfspriek om 'e rol te dwaan. Se fertelden my dat it oer markys De Sade gie. Ik fleach nei Spanje foar ien dei wurk [...] Der wiene withoefolle lju efter my [yn byld]. Dy hiene allegear de klean oan. Der wie neat aparts of nuvers oan. In freon sei: 'Witst eins wol datst yn in film spilest dy't op Old Compton Street draait?' Dat wie yn dy tiid wêr't sokke lju har films besochten. 'Grappich, hear,' sei ik. Dat ik gloep dêrsanne hinne yn in swiere momkape mei in dûnkere sinnebril op en in sjaal om, en fûn de bioskoop en dêr stie myn namme. Ik wie poerlulk! Der folge in heechoprinnende rûzje. Doe't ik dy deis út Spanje ôfreizge wie, hie eltsenien efter my fuort de klean útdien!"

Behalven yn it Feriene Keninkryk spile Lee ek op 'e nij yn ferskate Dútsktalige films op it Jeropeeske fêstelân. Dêrnjonken wied er yn 1972 filmprodusint fan 'e horrorfilm Nothing But the Night; dat wurk hied er lykwols gjin aardichheid oan en sadwaande wie dat foar him ien kear mar nea wer. Yn 1977, doe't er der skjin syn nocht fan hie dat er yn syn heitelân almar wer typecast waard as de smjunt yn horrorfilms, ferfear Lee nei de Feriene Steaten. Syn earste Amerikaanske film wie de rampefilm Airport '77, dy't noch datselde jiers útkaam. Hy ferraste freon en fijân troch op útnûging mei te dwaan oan it komyske sketcheprogramma Saturday Night Live, op 'e Amerikaanske tillefyzje. Dêr siet regisseur Steven Spielberg yn it publyk, dy't him op basis fan syn optreden dêre in rol taparte yn 'e komeedzje 1941 (1978).

Yn 'e 1980-er jierren spile Lee û.o. de rol fan in faksist dy't de Feriene Steaten ûntdwaan wol fan alle net-blanken yn The Return of Captain Invincible (1982). Ek wied er te sjen yn Howling II: Stirba – Werewolf Bitch (1985). Yn 1991 en 1992 spile er nochris de rol fan Sherlock Holmes yn Incident at Victoria Falls, resp. Sherlock Holmes and the Leading Lady. Yn Police Academy: Mission to Moscow (1994) fertolke er de rol fan in Russyske plysjekommandant. De kwalitatyf bêste rol fan syn karriêre fûn er sels dy fan Muhammed Ali Jinnah, de stifter fan Pakistan, yn 'e biografyske film Jinnah (1998).

Christopher Lee dielt hantekenings út, yn 2008.

Nei de milenniumwiksel wist Lee in hiel nij publyk te berikken mei syn rol as de boaze tsjoender Saruman yn 'e Lord of the Rings-films: The Lord of the Rings: The Fellowship of the Ring (2001), The Lord of the Rings: The Two Towers (2002) en The Lord of the Rings: The Return of the King (2003). Yn 'e lêste film ferskynde Lee trouwens inkeld yn 'e extended cut, mar net yn 'e bioskoopferzje. Yn deselde snuorje wied ek te sjen yn twa Star Wars-films: Star Wars: Episode II – Attack of the Clones (2002) en Star Wars: Episode III – Revenge of the Sith (2005). Ek dêryn spile er in smjunt, nammentlik greve Dooku. Yn 'e âlderdom fan mear as tachtich jier die Lee it measte skermjen yn dy rol sels (dat hied er al leard oan it Wellington Kolleezje), mar foar de útzoomde bylden mei de enerzjikere aksje moast der in stunt double oan te pas komme. Oer it feit dat er gauris de smjunt spile, seid er sels: "Jawis, ik haw mear as genôch swiere jonges spile, mar sa't Anthony Hopkins seit: 'Ik spylje gjin smjunten, ik spylje minsken.'"

Neitiid wie Lee noch te sjen yn films as Sleepy Hollow (2005), Sweeney Todd: The Demon Barber of Fleet Street (2007), Triage (2009) en Hugo (2011). Ek yn 2011 wurke er mei oan 'e film The Hobbit: An Unexpected Journey, in prequel fan 'e Lord of the Rings-trilogy. Dêryn spile er nochris de tsjoender Saruman, mar no as in guodlik âldman, foàr't er troch de demon Sauron korrumpearre waard. Om't Lee op syn jierren net mear nei Nij-Seelân ta doarst te fleanen (dêr't de film opnommen waard), brocht regisseur Peter Jackson de filmset nei Lee ta, yn Londen.

Njonken syn filmwurk spile Lee yn syn karriêre ek in protte yn tillefyzjesearjes, lykas yn 1967 yn in ôflevering fan The Avengers (yn Nederlân op 'e tillefyzje brocht as "De Wrekers") en yn 1997 yn in BBC-ferfilming fan Ivanhoe. Op 'e Frânske tillefyzje spile er yn 1989 yn 'e rige La Révolution Française de rol fan Charles-Henri Sanson, de boal dy't sawol Loadewyk XVI as Maximilien de Robespierre ûnthalze. Fierders wie Lee ek in protte oan it wurk as stimakteur, sawol yn tekenfilms as yn kompjûter- en fideospultsjes. Yn 2011 krige Lee einlings en te'n lêsten de wichtichste Britske oeuvrepriis op it mêd fan film takend, de BAFTA Academy Fellowship Award. Lee hold oan mei aktearjen oan syn dea ta; in moanne foartiid hied er noch in kontrakt tekene om yn 'e Deenske film The 11th te spyljen.

Sjongkarriêre

Lee, mei syn djippe basstim, gie sjongen nea út 'e wei, mar pas op jierren ûntjoech er him ta in sjonger. Syn meast opfallende ierdere optreden op dat mêd wie syn rol yn 'e komeedzje anneks rock musical The Return of Captain Invincible (1983), wêryn't er û.m. it nûmer Name Your Poison song. Syn earste kontakt mei it heavy metal-subsjenre fan 'e hardrock hied er yn 2004, doe't er mei de Italjaanske metalartyst Fabio Lione in duët song foar de single The Magic of the Wizard's Dream, fan it album Symphony of Enchanted Lands II fan 'e band Rhapsody of Fire.

Nei ferskate oare gearwurkings mei dy band brocht Lee yn 2010, yn 'e âlderdom fan 88 jier, syn earste eigen heavy metal-album út, mei as titel Charlemagne: By the Sword and the Cross. Dat waard yn metal-fermiddens mei loovjende kritiken ûntfongen, en itselde jiers noch bekroand mei de Spirit of Medal-priis op 'e Metal Hammer Golden Gods-seremoanje. Yn juny 2012 brocht Lee syn earste fideoklip út foar it nûmer The Bloody Verdict of Verden (oer it Bloedbad fan Verden).

Yn 2013, doe't er 91 wie, kaam Lee syn twadde heavy metal-album út: Charlemagne: The Omens of Death. Dêrmei hied er mei-iens it rekôr yn 'e hannen de âldste metalartyst út 'e skiednis fan it sjenre te wêzen. Yn desimber 2013 krong Lee mei 91 jier en seis moannen de hitlisten binnen (oant it 22ste plak) mei it nûmer Jingle Hell fan syn EP A Heavy Metal Christmas Too. Dêrmei wied er de âldste artyst dy't ea yn 'e hitlisten stien hie (it rekôr wie dêrfoar yn 'e hannen fan Tony Bennett, dy't itselde yn 2011 mei 85 jier lapt hie). Lee gie troch mei sjongen oant yn 2015, mei't er sei: "Ik wit net hoelang't ik der noch wêze sil, dus eltse dei moat fierd wurde en dat wol ik diele mei myn fans."

Priveelibben

Christopher Lee stie bekend om syn lingte fan 1.95 m, wêrmei't er boppe de measte minsken fan syn generaasje úttuorre. Hy spriek floeiend Ingelsk, Frânsk, Dútsk, Italjaansk en Spaansk en koe him rêde yn it Sweedsk, Russysk en Gryksk. Yn in ynterview heakke er dêroan ta dat er in petear fiere koe yn it Mandarynsk. Hy wie in oanhinger fan 'e Britske Konservative Partij, en hie, oars as dat wol sein wurdt, net in grutte samling okkulte boeken.

Ein 1950-er jierren wie Lee ferloofd mei de Sweedske ealfrouwe Henriette von Rosen, dy't er met hie yn in Stokholmske nachtklub. Har heit, greve Fritz von Rosen, seach him lykwols as skoansoan net sitten, en kaam hieltyd mei nije easken om in houlik ûnmooglik te meitsjen. Earst moast der nei de ferloving in jier wachte wurde om te trouwen; doe hierde de man privee-detektives yn om Lee nei te gean; dêrnei moast Lee mei referinsjes op 'e lapen komme (dêrby ferwiisde Lee û.m. troch nei kollega-akteur Douglas Fairbanks jr.). Doe't der gjin lek of brek oan him bliek te wêzen, easke Von Rosen dat Lee foar it houlik de tastimming wûn fan 'e Sweedske kening Gustaaf VI Adolf. Tafalligerwize hie Lee de kening jierren tefoaren ris met op 'e set fan 'e film Tales of Hans Andersen, en wist er sadwaande de fereaske tastimming te bemachtigjen. Lykwols besleaten hy en Henriette neitiid dochs mar fan 'e hiele saak ôf te sjen (neffens Lee sels fanwegen de finansjele ûnwissichheid fan syn karriêre as akteur).

Yn 1960 kaam Lee fia-fia yn 'e kunde mei de Deenske keunstskilderesse (en it eardere model) Birgit "Gitte" Krøncke. Dat wie leafde op it earste gesicht, en se ferloofden har al koarte tiid letter. Se trouden op 17 maart 1961 en krigen ien bern, dochter Christina Erika Carandini Lee (1963), dy't yn 2001 troude mei Juan Francisco Aneiros Rodriguez.

Yn 1997 waard Lee beneamd ta kommandeur yn 'e Earbiedweardige Oarder fan Sint-Jan. As ûnderdiel fan 'e Queen's Birthday Honours waard er yn 2001 beneamd ta kommandeur yn 'e Oarder fan it Britske Ryk (OBE). Yn 2009 waard er yn dyselde oarder ferheft ta ridder, wêrby't er riddere waard troch prins Charles. Normaal heart men dêrby del te knibbeljen, mar om syn hege jierren waard datoangeande foar Lee in útsûndering makke.

Ferstjerren

Mids 2015 waard Lee mei hertproblemen en swierrichheden op it mêd fan sykheljen opnommen yn it Chelsea and Westminster Hospital yn Londen. Sadwaande fierde er dêr op 7 juny fan dat jier yn besletten fermidden syn 93ste jierdei. Koart nei dy fiering, noch deselde deis, kaam Lee yn it sikehûs te ferstjerren. Syn frou hold it bekendmeitsjen fan syn dea tsjin oant 11 juny, sadat de famylje earst ynljochte wurde koe. De persize oarsaak fan Lee syn dea is ûnbekend.

Filmografy

jier	titel	rol of funksje	opmerkings
Filmografy as akteur
films
1948	Corridor of Mirrors	Charles
1948	One Night with You	Pirelli's assistint
1948	Hamlet	skyldfeint	net fermeld op 'e ôftiteling
1948	A Song for Tomorrow	Auguste
1948	Penny and the Pownall Case	Jonathan Blair
1948	My Brother's Keeper	twadde plysjeman	sênes fuortknipt by filmmontaazje
1948	Saraband for Dead Lovers	figurant	net fermeld op 'e ôftiteling
1948	Scott of the Antarctic	Bernard Day
1949	Trottie True	Bongo
1950	They Were Not Divided	Chris Lewis
1950	Prelude to Fame	sjoernalist
1951	Captain Horatio Hornblower R.N.	Spaanske kaptein
1951	Valley of Eagles	resjersjeur Holt
1951	Quo Vadis	striidweinmenner	net fermeld op 'e ôftiteling
1952	The Crimson Pirate	Joseph	net fermeld op 'e ôftiteling
1952	Top Secret	Russyske spion
1952	Paul Temple Returns	sir Felix Raybourne
1952	Babes in Bagdad	slavekeapman
1952	Moulin Rouge	Georges Seurat	net fermeld op 'e ôftiteling
1953	Les Vacances de Monsieur Hulot	ûnbekend	as stimakteur; Frânsktalich; net fermeld op 'e ôftiteling
1953	Innocents in Paris	luitenant Whitlock	net fermeld op 'e ôftiteling
1954	Destination Milan	Svenson
1955	Cross-Roads	Harry Cooper	koarte film
1955	That Lady	kaptein
1955	Final Column	Larry Spence	op argyfbylden
1955	Man in Demand	Martell	op argyfbylden
1955	Contraband Spain	n.f.t.	ferteller; net fermeld op 'e ôftiteling
1955	The Dark Avenger	lieder Frânske patrûlje yn herberge	net fermeld op 'e ôftiteling
1955	The Cockleshell Heroes	kaptein-luitenant-op-see Dick Raikes
1955	Alias John Preston	John Preston
1955	Police Dog	plysjeman Johnny
1955	Storm Over the Nile	Karaga Pasja
1956	Private's Progress	majoar Schultz	net fermeld op 'e ôftiteling
1956	Alexander the Great	Nectenabus	as stimakteur; net fermeld op 'e ôftiteling
1956	Port Afrique	Franz Vermes
1956	Beyond Mombasa	Gil Rossi
1956	The Battle of the River Plate	Manolo
1957	Ill Met by Moonlight	Dútsk ofsier by de toskedokter
1957	Fortune Is a Woman	Charles Highbury
1957	The Traitor	dr. Neumann
1957	The Curse of Frankenstein	it Meunster fan Frankenstein
1957	Manuela	ûnbekend	as stimakteur; net fermeld op 'e ôftiteling
1957	Bitter Victory	sersjant Barney
1957	The Truth About Women	Francois Thiers
1958	A Tale of Two Cities	de markys fan St. Evremonde
1958	Dracula	greve Dracula	ek bekend as: Horror of Dracula
1958	Battle of the V-1	Brunner
1958	Corridors of Blood	Resurrection Joe
1959	The Hound of the Baskervilles	sir Henry Baskerville
1959	The Man Who Could Cheat Death	Pierre Gérard
1959	The Treasure of San Teresa	Jaeger
1959	The Mummy	Kharis / de Mummy
1959	Uncle Was a Vampire	baron Roderico da Frankurten
1960	Too Hot to Handle	Novak
1960	The Two Faces of Dr. Jekyll	Paul Allen	ek bekend as: House of Fright en Jekyll's Inferno
1960	Beat Girl	Kenny King	ek bekend as: Wild for Kicks
1960	The City of the Dead	perfester Alan Driscoll	ek bekend as: Horror Hotel
1960	The Hands of Orlac	Nero de Magiër
1961	The Terror of the Tongs	Chung King
1961	Taste of Fear	dr. Pierre Gerrard
1961	The Devil's Daffodil	Ling Chu
1961	Ercole al Centro della Terra	kening Licos	Italjaansktalich; ek bekend as: Hercules in the Haunted World
1962	The Puzzle of the Red Orchid	kaptein Allerman
1962	The Pirates of Blood River	kaptein LaRoche
1962	The Devil's Agent	baron Von Staub
1962	Sherlock Holmes and the Deadly Necklace	Sherlock Holmes
1963	Stranglehold	ûnbekend
1963	Katarsis	Mephistoles
1963	La Vergine di Norimberga	Erich	Italjaansktalich; ek bekend as: The Virgin of Nuremberg of Castle of Terror
1963	La Frusta e il Corpo	Kurt Menliff	Italjaansktalich; ek bekend as: The Whip and the Body of Night is the Phantom
1964	Terror in the Crypt	greve Ludwig Karnstein	ek bekend as: Crypt of the Vampire en Crypt of Horror
1964	The Devil-Ship Pirates	kaptein Robeles
1964	Il Castello dei Morti Vivi	greve Drago	ek bekend as: Castle of the Living Dead
1964	The Gorgon	perfester Karl Meister
1965	Dr. Terror's House of Horrors	Franklyn Marsh	segmint Disembodied Hand
1965	She	Billali
1965	The Face of Fu Manchu	dr. Fu Manchu
1965	The Skull	sir Matthew Phillips
1965	Ten Little Indians	U.N. Owen	as stimakteur; net fermeld op 'e ôftiteling
1966	Dracula: Prince of Darkness	greve Dracula
1966	Rasputin, the Mad Monk	Grigorij Raspûtin
1966	Circus of Fear	Gregor	ek bekend as: Psycho Circus
1966	The Brides of Fu Manchu	dr. Fu Manchu
1967	Five Golden Dragons	draak #4
1967	The Vengeance of Fu Manchu	dr. Fu Manchu
1967	Night of the Big Heat	Godfrey Hanson
1967	Theatre of Death	Philippe Darvas
1967	Die Schlangengrube und das Pendel	greve Frederic Regula / greve Von Andomai	Dútsktalichl ek bekend as: The Blood Demon
1968	Eve	kolonel Stuart	ek bekend as: The Face of Eve
1968	The Devil Rides Out	hartoch fan Richleau	ek bekend as: The Devil's Bride
1968	The Blood of Fu Manchu	dr. Fu Manchu
1968	Dracula Has Risen from the Grave	greve Dracula
1968	Curse of the Crimson Altar	Morley	ek bekend as: The Crimson Cult
1969	The Castle of Fu Manchu	dr. Fu Manchu
1969	The Oblong Box	dr. J. Neuhart
1969	The Magic Christian	fampier op it skip
1970	Scream and Scream Again	Fremont
1970	Eugenie… The Story of Her Journey into Perversion	Dolmance
1970	The Bloody Judge	baron George Jeffreys	ek bekend as: Night of the Blood Monster
1970	Count Dracula	greve Dracula
1970	Taste the Blood of Dracula	greve Dracula
1970	Julius Caesar	Artemidorus
1970	One More Time	greve Dracula	cameo
1970	The Private Life of Sherlock Holmes	Mycroft Holmes
1970	Scars of Dracula	greve Dracula
1971	The House That Dripped Blood	John Reid	segmint Sweets to the Sweet
1971	Cuadecuc, Vampir	greve Dracula / himsels
1971	I, Monster	dr. Charles Marlowe / Edward Blake
1971	Hannie Caulder	Bailey
1972	Umbracle	De Man
1972	Dracula A.D. 1972	greve Dracula
1972	Horror Express	sir Alexander Saxton
1972	Death Line	agint Stratton-Villiers, MI5	ek bekend as: Raw Meat
1973	Nothing But the Night	kolonel Charles Bingham
1973	The Creeping Flesh	James Hildern
1973	The Satanic Rites of Dracula	greve Dracula
1973	The Wicker Man	Lord Summerisle
1973	The Three Musketeers	Rochefort
1974	Dark Places	dr. Mandeville
1974	The Four Musketeers	Rochefort
1974	The Man with the Golden Gun	Francisco Scaramanga	James Bond-film
1975	Le boucher, la star et l'orpheline	Van Krig / himself	Frânsktalich
1975	Diagnosis Murder	Stephen Hayward
1975	The Story of Heidi	ûnbekend	as stimakteur by Ingelske neisyngronisaasje
1976	Killer Force	majoar Chilton	ek bekend as: The Diamond Mercenaries
1976	To the Devil, a Daughter	pastoar Michael Rayner
1976	Albino	Bill	ek bekend as: Whispering Death en Death in the Sun
1976	Dracula père et fils	greve Dracula	Frânsktalich; ek bekend as: Dracula and Son
1976	The Keeper	de warder
1977	Airport '77	Martin Wallace
1977	Meatcleaver Massacre	himsels	ek ferteller; ek bekend as: Evil Force en Revenge of the Dead
1977	End of the World	pastoar Pergado / Zindar
1977	Starship Invasions	kaptein Rameses
1978	Circle of Iron	Zetan	ek bekend as: The Silent Flute
1978	Return from Witch Mountain	Victor Gannon
1978	Caravans	Sardar Khan
1979	The Passage	Sigeuner
1979	Nutcracker Fantasy	ferskaat	as stimakteur
1979	Arabian Adventure	Alquazar
1979	Jaguar Lives!	Adam Caine
1979	Bear Island	Lechinski
1979	1941	kaptein Wolfgang von Kleinschmidt
1980	Serial	Luckman Skull
1980	Safari 3000	greve Borgia
1981	An Eye for an Eye	Morgan Canfield
1981	Desperate Moves	Carl Boxer
1981	The Salamander	prins Baldasar
1982	The Last Unicorn	kening Haggard	as stimakteur
1983	House of the Long Shadows	Corrigan
1983	The Return of Captain Invincible	Mr. Midnight
1983	New Magic	dhr. Kellar	koarte film
1984	The Rosebud Beach Hotel	Clifford King
1984	The Bengal Lancers!	sir James Hunter
1985	Howling II: Your Sister is a Werewolf	Stefan Crosscoe
1986	Jocks	presidint White
1987	Mio min Mio	Kato
1987	The Girl	Peter Storm
1988	Dark Mission	Luis Morel
1988	Mask of Murder	haadynspekteur Jonathan Rich
1988	Olympus Force: The Key	Filly
1989	The Return of the Musketeers	Rochefort
1989	La Révolution française	Sanson	Frânsktalich; segmint Les Années Terribles
1989	La chute des aigles	Walter Strauss	Frânsktalich
1989	Murder Story	Willard Hope
1989	Honeymoon Academy	Lazos
1990	L'Avaro	kardinaal Spinosi	Italjaansktalich
1990	Gremlins 2: The New Batch	dr. Catheter
1990	The Rainbow Thief	omke Rudolf
1991	Kabuto	kening Philip
1991	Curse III: Blood Sacrifice	dr. Pearson	ek bekend as: Panga
1991	Jackpot	Cedric
1994	Funny Man	Callum Chance
1994	Police Academy: Mission to Moscow	kommandant Aleksandr Nikolajevitsj Rakov
1994	A Feast at Midnight	V.E. Longfellow
1994	Flesh and Blood	n.f.t.	voice-over by in dokumintêre
1996	The Stupids	Sender
1996	Welcome to the Discworld	de Dea	as stimakteur; koarte film
1998	Tale of the Mummy	sir Richard Turkel
1998	Jinnah	Muhammad Ali Jinnah
1999	Sleepy Hollow	boargemaster
2001	The Lord of the Rings: The Fellowship of the Ring	Saruman
2002	Star Wars: Episode II – Attack of the Clones	greve Dooku / Darth Tyranus
2002	The Lord of the Rings: The Two Towers	Saruman
2003	The Lord of the Rings: The Return of the King	Saruman	allinne yn 'e extended cut
2004	Crimson Rivers II: Angels of the Apocalypse	Heinrich von Garten
2005	Star Wars: Episode III – Revenge of the Sith	greve Dooku / Darth Tyranus
2005	Charlie and the Chocolate Factory	dr. Wilbur Wonka
2005	The Adventures of Greyfriars Bobby	de Lord Provost
2005	Corpse Bride	pastoar Galswells	as stimakteur
2007	The Golden Compass	lid Hege Ried
2008	Star Wars: The Clone Wars	greve Dooku / Darth Tyranus	as stimakteur
2009	Boogie Woogie	Alfred Rhinegold
2009	The Heavy	Mason
2009	Triage	Joaquín Morales
2009	Glorious 39	Walter
2010	Alice in Wonderland	Jabberwock	as stimakteur
2010	Burke & Hare	Joseph
2011	Season of the Witch	kardinaal D’Ambroise
2011	The Resident	August
2011	The Wicker Tree	âldman
2011	Grave Tales	himsels	cameo
2011	Hugo	monsieur Labisse
2012	Dark Shadows	Silas Clarney
2012	The Hobbit: An Unexpected Journey	Saruman
2013	Night Train to Lisbon	pastoar Bartolomeu
2013	Extraordinary Tales	n.f.t.	ferteller; segmint The Fall of the House of Usher
2013	The Girl from Nagasaki	Pinkerton
2013	Necessary Evil	n.f.t.	voice-over by in dokumintêre
2014	The Hobbit: The Battle of the Five Armies	Saruman	lêste rol yn in film dy't útkaam by syn libben
2015	Angels in Notting Hill	God / de presidint	postúm útkommen
2017	The Hunting of the Snark	n.f.t.	ferteller; koarte film; postúm útkommen
2018	The Time War	n.f.t.	ferteller; postúm útkommen
tillefyzje
1953–1956	Douglas Fairbanks, Jr., Presents	ferskaat	13 ôfl.
1955	Moby Dick—Rehearsed	toanielmaster / Flask	tillefyzjefilm
1955	The Vise	ferskaat	3 ôfl.
1955	Tales of Hans Anderson	ferskaat	2 ôfl.
1956	Chevron of Fallen Stars	gûverneur	ôfl. Captain Kidd
1956	The Scarlet Pimpernel	Louis	ôfl. The Elusive Chauvelin
1956	Colonel March of Scotland Yard	Jean-Pierre	ôfl. At Night All Cats Are Grey
1956	Sailor of Fortune	ferskaat	2 ôfl.
1956	The Adventures of Aggie	ynspekteur Hollis	ôfl. Cut Glass
1956–1957	Assignment Foreign Legion	ferskaat	2 ôfl.
1957	The Errol Flynn Theatre	ferskaat	4 ôfl.
1957	The Gay Cavalier	kolonel Jeffries	ôfl. The Lady's Dilemma
1958	OSS	Dessinger	ôfl. Operation Firefly
1958	Ivanhoe	sir Otto	ôfl. The German Knight
1958	White Hunter	Mark Caldwell	ôfl. This Hungry Hell
1959	The Adventures of William Tell	prins Erik	ôfl. Manhunt
1960	Tales of the Vikings	Normandyske ridder	ôfl. The Bull
1961	Alcoa Presents: One Step Beyond	Wilhelm Reitlinger	ôfl. The Sorcerer
1964	The Alfred Hitchcock Hour	Karl Jorla	ôfl. The Sign of Satan
1967	The Avengers	perfester Stone	ôfl. Never, Never Say Die
1969	The Avengers	kolonel Mannering	ôfl. The Interrogators
1969	Light Entertainment Killers	ûnbekend	tillefyzjefilm
1973	Poor Devil	Lusifer	tillefyzjefilm
1973	Orson Welles Great Mysteries	Arnaud	ôfl. The Leather Funnel
1976	Space: 1999	kaptein Zandor	ôfl. Earthbound
1978	How the West Was Won	de gruthartoch	2 ôfl.
1978	The Pirate	Samir Al Fay	tillefyzjefilm
1978	Saturday Night Live	n.f.t.	presintator; ôfl. Christopher Lee/Meat Loaf
1978	Captain America II: Death Too Soon	Miguel	tillefyzjefilm
1978	Once Upon a Spy	Marcus Valorium	tillefyzjefilm
1978	Charlie's Angels	Dale Woodman	ôfl. Angel in Hiding
1981	Evil Stalks This House	gasthear	tillefyzjefilm
1981	Goliath Awaits	John McKenzie	tillefyzjefilm
1982	Massarati and the Brain	Victor Leopold	tillefyzjefilm
1982	Charles & Diana: A Royal Love Story	prins Philip	tillefyzjefilm
1984	The Far Pavilions	Kaka-ji Rao	3 ôfl.
1984	Faerie Tale Theatre	kening Vladimir V	ôfl. The Boy Who Left Home to Find Out About the Shivers
1986	Un métier du seigneur	Fog	Frânsktalige tillefyzjefilm
1986	The Disputation	kening Jakobus fan Aragon	tillefyzjefilm
1986	Shaka Zulu	greve Bathurst	10 ôfl.
1989	Around the World in 80 Days	Stuart	3 ôfl.
1990	The Care of Time	Karlis Zander	tillefyzjefilm
1990	Treasure Island	Bline Pew	tillefyzjefilm
1991	Sherlock Holmes and the Leading Lady	Sherlock Holmes	tillefyzjefilm
1992	Incident at Victoria Falls	Sherlock Holmes	tillefyzjefilm
1992	Beauty and the Beast	monsieur Renard	as stimakteur; tillefyzjefilm
1992	The Young Indiana Jones Chronicles	Ottokar greve Czerin	ôfl. Austria, March 1917
1992	Double Vision	dhr. Bernard	tillefyzjefilm
1993	Death Train	generaal Konstantin Benin	tillefyzjefilm
1995	The Tomorrow People	Rameses	5 ôfl.
1995	Moses	farao Ramses II	tillefyzjefilm
1995	Tales of Mystery and Imagination	n.f.t.	presintator; 2 ôfl.
1996	Sorellina e il Principe del Sogno	Azaret	tillefyzjefilm
1997	Ivanhoe	Lucas de Beaumanoir	4 ôfl.
1997	Soul Music	de Dea	as stimakteur; 7 ôfl.
1997	Wyrd Sisters	de Dea	as stimakteur; 6 ôfl.
1997	The Odyssey	Tiresias	2 ôfl.
1997–1998	The New Adventures of Robin Hood	Olwyn	6 ôfl.
2000	Gormenghast	Flay	4 ôfl.
2000	In the Beginning	farao Ramses I	tillefyzjefilm
2000	Ghost Stories for Christmas	M.R. James	ôfl. The Stalls of Barchester
2001	Les redoutables	de Dea	Frânsktalich; segmint Confession
2005	Pope John Paul II	kardinaal Stefan Wyszyński	2 ôfl.
2008	The Colour of Magic	de Dea	as stimakteur; 2 ôfl.
fideospultsjes
1994	Ghosts	dr. Marcus Grimalkin / himself
1999	The Rocky Interactive Horror Show	n.f.t.	ferteller
2001	Conquest: Frontier Wars	Anvil / haadkertier
2003	Freelancer	ûnbekend
2003	The Lord of the Rings: The Return of the King	Saruman
2004	EverQuest II	Lucan D'Lere
2004	GoldenEye: Rogue Agent	Francisco Scaramanga
2005	The Lord of the Rings: The Third Age	Saruman
2005	The Lord of the Rings: The Battle for Middle-earth	Saruman
2006	Kingdom Hearts II	DiZ / Ansem de Wize
2006	The Lord of the Rings: The Battle for Middle-earth II	Saruman
2007	Kingdom Hearts II Final Mix	DiZ / Ansem de Wize	op argyfbylden
2008	The Lord of the Rings: The Battle for Middle-earth II: The Rise of the Witch-king	Saruman
2009	Kingdom Hearts 358/2 Days	DiZ
2014	Lego: The Hobbit	Saruman	ek ferteller
2014	Kingdom Hearts HD 2.5 Remix	DiZ / Ansem de Wize	argyfbylden
2015	Deus Ex Machina 2	de programmeur	ek ferteller

Bibliografy

1966 – Christopher Lee's Treasury of Terror
1974 – Christopher Lee's New Chamber of Horrors
1975 – Christopher Lee's Archives of Terror, Volume 1
1976 – Christopher Lee's Archives of Terror, Volume 2
1977 – Tall, Dark and Gruesome (autobiografy; werprinte yn 1999)
2004 – Lord of Misrule (autobiografy, op 'e nij besjoene en útwreide ferzje fan Tall, Dark and Gruesome)

Diskografy

albums

1998 – Christopher Lee Sings Devils, Rogues & Other Villains
2006 – Revelation
2010 – Charlemagne: By the Sword and the Cross
2013 – Charlemagne: The Omens of Death

extended plays

2012 – A Heavy Metal Christmas
2013 – A Heavy Metal Christmas Too
2014 – Metal Knight

singles

2012 – Let Legend Mark Me as the King
2012 – The Ultimate Sacrifice
2014 – Darkest Carols, Faithful Sing

Keppelings om utens

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References en Bibliography, op dizze side.

Wikimedia Commons

Ofbylden dy't by dit ûnderwerp hearre, binne te finen yn de kategory Christopher Lee fan Wikimedia Commons.