The Revenant (film út 2015)

	The Revenant
	film
	(Filmposter yn 'e Ingelske Wikipedy)
	makkers
regisseur	Alejandro González Iñárritu
produsint	Amon Milchan; Steve Golin; Alejandro González Iñárritu; Mary Parent; Keith Redmon; James W. Skotchdopole
senario	Mark L. Smith; Alejandro González Iñárritu
basearre op	de roman fan Michael Punke
kamerarezjy	Emmanuel Lubezki
muzyk	Ryuichi Sakamoto; Alva Noto
filmstudio	Regency Enterprises; RatPac Entertainment; New Regency Productions; Anonymous Content; M Productions; Appian Way Productions
distribúsje	20th Century Fox
	spilers
haadrollen	Leonardo DiCaprio; Tom Hardy
byrollen	Domhnall Gleeson; Will Poulter; Forrest Goodluck; Arthur Redcloud; Duane Howard; Melaw Nakehk'o
	skaaimerken
lân/lannen	Feriene Steaten
premiêre	16 desimber 2015
foarm	langspylfilm
sjenre	westernaventoerefilm
taal	Ingelsk (ek in bytsje Frânsk, ; Arikara en Pâny)
spyltiid	156 minuten
	budget en resultaten
budget	$135 miljoen
opbringst	$532,9 miljoen
prizen	3 × Oscar; 3 × Golden Globe; 5 × BAFTA; 1 × SAG Award; 1 × Satellite Award

The Revenant is in Amerikaanske iere western en aventoerefilm út 2015 ûnder rezjy fan Alejandro González Iñárritu, mei yn 'e haadrollen Leonardo DiCaprio en Tom Hardy. De titel betsjut "De Skym" of "De Geast". De film is foar in diel basearre op 'e roman mei deselde namme út 2002 oer it wierbarde ferhaal fan 'e Amerikaanske frontiersman Hugh Glass út 1823. It is ek in remake fan 'e film Man in the Wilderness út 1971. De plot folget Glass, dy't as gids in groep pelsjagers troch de Dakota's liedt. As er troch in oanfal fan in grizzlybear swierferwûne rekket, beslute syn reisgenoaten him efter te litten. Ien fan harren, in John Fitzgerald, fermoardet syn soan Hawk foar syn eagen. Troch poere wilskrêft klaut de foar dea efterlitten Glass fan syn stjerbêd en set útein mei in lange efterfolging om wraak te nimmen. The Revenant krige oer it algemien positive resinsjes fan 'e filmkritisy, hoewol't der wat krityk wie op 'e spyldoer fan 156 minuten. Yn 'e bioskopen wie de film ek in grut kommersjeel súkses. The Revenant wûn trije Oscars, trije Golden Globes (wêrûnder de Golden Globe foar Bêste Dramafilm), fiif BAFTA's, in Screen Actors Guild Award, in Satellite Award en gâns oare prizen.

Plot

Ein 1823 tsjocht in groep fan likernôch fyftich pelsjagers ûnder lieding fan kaptein Andrew Henry troch it gebiet dat hjoed de dei de Dakota's foarmet. Se wurde laat troch de gids Hugh Glass, dy't it gebiet ken as syn eigen broeksbûse. Wylst Glass en syn healbloed-Yndiaanske soan Hawk op jacht binne, wurdt it kamp fan 'e pelsjagers oanfallen troch in kliber Arikara-krigers oanfierd troch it opperhaad Wapityhûn (Elk Dog), waans dochter Powaqa troch blanken ûntfierd is. In oare groep pelsjagers, Frânsk-Kanadeeske coureurs des bois ûnder lieding fan in Toussaint, hawwe him wiismakke dat de Amerikanen dêrfoar ferantwurdlik binne. By de oanfal fine sa'n fjirtich pelsjagers de dea. Mar in stik as njoggen witte yn in boat te ûntkommen, de rivier de Missouri op.

Glass bepraat kaptein Henry om in ein fierderop de boat efter te litten en de djoere pelzen te bedobjen, sadat se se fierder te foet troch de wyldernis nei Fort Kiowa gean kinne. Neffens him is dat de iennichste manear om oan 'e Arikara te ûntkommen, mei't hynsteridende Yndianen yn it foardiel binne as se in boat neisitte dy't de bochten en slingers fan 'e rivier folgje moat. De pelsjagers lizze har protteljend en foeterjend by it beslút del, fral de rasistyske John Fitzgerald, dy't dochs al in grouwéligen hekel oan Glass hat omreden fan syn healbloedsoan. Wylst er op ferkenning út is, komt Glass by fersin in grizzlybear oer it mad. Om't it in bearinne mei jongen is, falt dy him oan. Glass ferdigenet him mei syn musket en syn jachtmês, wat úteinlings de dea fan 'e bear wurdt, mar net foar't dy Glass sa slim ferwûne hat dat er de dea it neist is.

Nei't se Glass inkele dagen op in provisoaryske brankaar meitôge hawwe, beslute de pelsjagers dat se sa net trochgean kinne, om't se sa stadich foarútkomme dat de Arikara wol rûntsjes om harren hinne ride kinne. Fitzgerald oppenearret dat Glass syn ferwûnings doch net oerlibje sil, dat it is net mear as genede om him út syn lijen te ferlossen. Glass kin himsels dêr net tsjin ferwarre, want de bearinne hat him in klau oer de kiel helle, sadat er it fermogen om te praten tydlik kwytrekke is. Hawk en in oare jonge pelsjager, Jim Bridger, kantsje har tsjin it foarstel fan Fitzgerald oan, mar kaptein Henry lit him beprate. Hy kin himsels der lykwols net ta bringe om Glass in kûgel troch de holle te jeien, en hy wegeret om dat troch in oar dwaan te litten om't it syn ferantwurdlikheid is. Ynstee betinkt er wat oars: hy biedt oan om frijwilligers te beteljen dy't by Glass bliuwe wolle oant de man oan syn wûnen beswykt. Hawk en Bridger biede fuort oan om it fergees te dwaan, en Fitzgerald beslút it jild oan te nimmen om it ferlies fan syn efterlitten pelzen goed te meitsjen.

Tink derom: Yn de tekst hjirûnder wurdt de ôfrin fan de film beskreaun.
As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Nei't kaptein Henry en de oaren ôfset binne, bliuwe de trije mannen inkele dagen by Glass. Wannear't Hawk op jacht is en Bridger om wetter, besiket Fitzgerald wat feart efter it spul te setten troch Glass te smoaren. Hy wurdt lykwols tsjinkeard troch de hommels weromkearende Hawk, dy't om help oan Bridger begjint te roppen. Om him stil te krijen lûkt Fitzgerald syn jachtmês en stekt de jonge foar de eagen fan syn helpleaze heit dea.

Neitiid ferberget er it lyk en beart er tsjin Bridger dat Hawk nea weromkommen is fan 'e jacht. De oare moarns ier makket Fitzgerald Bridger wiis dat er in groep Arikara-krigers yn 'e neite fan it kamp gewaarwurden is. Dat se moatte sjen dat se fuortkomme as se it faaie libben derôf rêde wolle, ek al betsjut dat dat se Glass efterlitte moatte. Bridger wol dêr earst neat fan witte, mar Fitzgerald wit him sa bang te praten, dat er Glass úteinlings heal begroeven yn it ûndjippe grêf efterlit dat Fitzgerald de foargeande dagen dobbe hat. Ear't er ôfset, jout de mei skuldgefoelens wrakseljende Bridger syn fjildflesse oan Glass, dêr't er in opfallend spiraalsymboal yn gravearre hie.

In dei as wat nei't se Glass efterlitten hawwe, begjint Bridger twifels te krijen oer de ferhalen fan Fitzgerald, mei't de man fertize rekket yn syn eigen leagens. Nei in heechoprinnende konfrontaasje jout Fitzgerald ta dat er hielendal gjin Arikara yn 'e neite fan harren kamp sjoen hie, en dat er dat mar sei om't it him ynbaarnde dat se safolle tiid ferdiene trochdat de koppige Glass mar net stjerre woe. Hy kin Bridger mei wurden wol oer en wit it sa te draaien dat Bridger de haadskuldige is. Mei in ûnoangename ûnderlinge ferhâlding reizgje de beide mannen fierder. As se lang om let te Fort Kiowa arrivearje, fertelt Fitzgerald oan kaptein Henry dat Glass stoarn en Hawk ferdwûn is. Om foar te kommen dat Bridger harren geheim útbringe sil, seit er dat hysels Glass foar de wylde bisten lizze litte woe, mar dat Bridger derop stie om him in kristlike begraffenis te jaan, wat se doe dien hawwe. Bridger wurdt dan priizge troch de kaptein, wat it foar him psychologysk ûnmooglik makket om 'e wierheid op te bychtsjen.

Underwilens klaut de foar dea efterlitten Glass himsels in wei út syn grêf. Nei't er it lyk fan syn soan fûn hat en ôfskie nommen hat, set er krûpendeweis útein mei de efterfolging fan Fitzgerald. Mei fjoer en de ynhâld fan syn krûdhoarn wit er op primitive wize de wûnen yn syn kiel ticht te skroeien. As er finzen nommen driget te wurden troch Wapityhûn en syn Arikara, lit er him yn in rivier meislepe troch streamfersnellings en oer in wetterfal hinne. As er wer út 'e rivier klaud is, sjocht er in ridel wolven in bizon oerweldigjen en oanfretten. Hy ferhongeret suver, mar doar der net by yn 'e buert te kommen. De oare moarns hat in ienlike Yndiaanske kriger de wolven mei fjoer by it kadaver fan 'e bizon ferdreaun. Glass biddelet om wat fleis en de Yndiaan kriget begrutsjen mei him en lit him mei-ite. Hy blykt Hikuc te wêzen, in Pâny (Pawnee) waans doarp útmoarde is troch de Arikara. Hy soe wol om wraak út wolle, seit er, mar "wraak is yn 'e hân fan 'e Skepper". As bliken docht dat Glass syn frou silger ek in Pâny wie, nûget Hikuc him út om mei him te reizgjen.

Tegearre tsjogge se op it hynder fan Hikuc troch de wyldernis. De wûnen fan 'e klauwen en tosken fan 'e bear op it skouder en de rêch fan Glass reitsje ûntstutsen, dat yn in stoarm rûgelet er fan it hynder ôf. Hikuc spandearret in protte tiid en muoite om in primitive swithutte foar him te bouwen, dêr't er syn koarts yn útswitte kin. Wylst er yn 'e swithutte leit, hallusinearret Glass oer syn deade frou. Inkele dagen letter sakket de koarts en komt Glass mei genêzende wûnen út 'e hutte foar it ljocht. Hikuc is blykber sûnder him fierder reizge, dat hy ferfettet syn tocht wer rinnende.

In ein fierderop fynt Glass Hikuc werom, dy't troch de Frânsk-Kanadeeske pelsjagers fan Toussaint lyncht is troch him op te hingjen oan in beam. Glass beslút it hynder fan Hikuc fan 'e pelsjagers werom te stellen en wachtet oant it tsjuster wurdt. It docht bliken dat Toussaint-en-dy sels efter de ûntfiering fan Powaqa sitte, dêr't se de Amerikaanske pelsjagers de skuld fan op 'e lea skood hiene. Yn 'e jûnsskimer sjocht Glass hoe't Toussaint Powaqa meinimt út it kamp om har (op 'e nij) te ferkrêftsjen. Hy beslúpt de pelsjager fan efteren en ûntstelt him syn pistoalen. Dêrnei oermasteret er him en jout er Powaqa syn jachtmês. Hy besiket it hynder fan Hikuc op te heljen sadat se tegearre útnaaie kinne, mar Powaqa brûkt it mês om Toussaint te kastrearjen en op eigen manneboet út te piken. Yn 'e opskuor dy't dêrtroch ûntstiet, wit Glass ferskaten fan 'e pelsjagers dea te sjitten en op it hynder te ûntkommen. Om efterfolging foar te kommen, jaget er dêrby ek alle oare hynders op 'e rin. Syn fjildflesse mei de spiraal dy't Bridger deryn gravearre hie, ferliest Glass lykwols yn alle drokte.

De oare deis komme Wapityhûn en syn krigers, dy't net witte dat Glass Powaqa holpen hat, him moarns ier oer it mad. Glass ûntkomt op it hynder fan Hikuc, mar moat syn mantel efterlitte. De Arikara driuwe him oer de râne fan in heech klif. It hynder falt te pletter, mar de fal fan Glass wurdt brutsen troch de tûken fan in nullebeam. Hy rekket bewusteleas, en as er wer by besleur komt, is er alhiel ferklomme. Om yn libben te bliuwen, snijt er it kadaver fan it hynder iepen, hellet it yngewant derút en klimt der sels yn, sadat er de kâlde nacht oerlibbet troch de lichemswaarmte fan it bist.

De oerbleaune leden fan 'e groep Frânsk-Kanadeeske pelsjagers, dy't no ek rinnende de beskaving sjen moatte te berikken, fergiet it minder as Glass. Uteinlings wit de lêste oerlibbene fan it hiele espel Fort Kiowa te berikken, dêr't er fertelt dat de swierrichheden fan syn groep begûnen doe't se oanfallen waarden troch in wyldeman. Hy lit de fjildflesse sjen dy't Glass by it kamp fan 'e pelsjagers ferlern is, en dy kenne Bridger en Fitzgerald daliks werom. Bridger ornearret dat it Hawk wêze moat, dy't dochs noch libbet, en Fitzgerald seit dat dat skoan sa wêze kin. Hy wit lykwols dat Hawk dea is en dat dit dus betsjutte moat dat Glass syn ferwûnings tsjin alle ferwachting yn oerlibbe hat en efter him oankomt om wraak te nimmen. Kaptein Henry organisearret in syktocht nei Hawk, dêr't Bridger oan dielnimt, mar Fitzgerald net. De kaptein is alhiel feralterearre as er ynstee Glass fynt. Hy beseft dat dit betsjut dat er foarliigd is. Poerrazen jout er opdracht om Bridger finzen te nimmen, wylst er sels halje-trawalje weromriidt nei it fort. Fitzgerald is lykwols útnaaid en hat dêrby de ynhâld fan Henry syn klûs meinommen.

As er einlings yn Fort Kiowa oankomt, kriget Glass fersoarging fan syn wûnen. Hy fertelt Henry krekt wat der bard is yn 'e wyldernis en bewissiget de kaptein dat Bridger inkeld skuldich is oan naïviteit en eangst. Henry set ôf om Fitzgerald op te spoaren en foar berjochting nei Fort Kiowa werom te bringen. Hy wol Glass eins net mei hawwe, mar Glass lit him net tsjinhâlde. Yn 'e wyldernis rinne de beide mannen op Fitzgerald yn. Se geane útinoar om him yn te sluten, mar kaptein Henry rint yn in mûklaach en wurdt troch Fitzgerald fermoarde en skalpearre. Glass fynt it lyk fan 'e kaptein werom en set dan in eigen mûklaach op, troch it lyk mei in tûke oerein yn it seal fan it foarste hynder te setten en sels oer de rêch fan it efterste hynder lizzen te gean, as wied er it lyk fan Henry. Fitzgerald rint deryn en sjit Henry nochris "dea". As er deunby komt om te bewissigjen dat er Glass deade hat, springt Glass ynienen fan it efterste hynder ôf en sjit him yn it skouder.

Glass efterfolget de flechtsjende Fitzgerald by in riviersigge lâns, dêr't in man-tsjin-mangefjocht folget mei mês en bile. Glass stiet op it punt om in swier ferwûne Fitzgerald te deadzjen, wannear't er op 'e foaroerlizzende rivierwâl Wapityhûn en syn krigers oankommen sjocht. De wurden fan Hikuc komme him wer yn 't sin, dat wraak inkeld oan 'e Skepper is, dat hy triuwt Fitzgerald yn 'e rivier, en de stream spielt him nei de Arikara ta. Wapityhûn skalpearret en deadet Fitzgerald, wêrnei't de Arikara, mei de ûnderwilens weromfûne Powaqa by harren, de rivier oerstekke en yn stilte Glass foarby ride sûnder him tenei te kommen. Glass klaut himsels in paad werom troch de snie nei it plak dêr't er de hynders efterlitten hat en kriget ûnderweis in fizioen fan syn frou dy't him farwol seit om nei it hjirneimels te gean.

Rolferdieling

haadrollen

personaazje	akteur/aktrise
Hugh Glass	Leonardo DiCaprio
John Fitzgerald	Tom Hardy

byrollen

personaazje	akteur/aktrise
kaptein Andrew Henry	Domhnall Gleeson
Jim Bridger	Will Poulter
Hawk	Forrest Goodluck
Hikuc	Arthur Redcloud
Wapityhûn (Elk Dog)	Duane Howard
Powaqa	Melaw Nakehk'o
Toussaint	Fabrice Adde
Anderson	Paul Anderson
Murphy	Kristoffer Joner
Jones	Lukas Haas
Fryman	Brendan Fletcher
Billy Brother	Tom Guiry
frou fan Hugh Glass	Grace Dove

Produksje en distribúsje

Produksje

The Revenant waard regissearre troch de Meksikaanske filmmakker Alejandro González Iñárritu nei in senario fan himsels en Mark L. Smith. Dat wie alteast foar in part basearre op 'e roman The Revenant fan Michael Punke, út 2002, wêryn't de wierbarde ûnderfinings fan 'e frontiersman Hugh Glass út 1823 beskreaun wurde. De roman is basearre op it gedicht The Song of Hugh Glass út 1915, in ûnderdiel fan 'e Cycle of the West fan 'e Amerikaanske dichter, skriuwer, histoarikus en etnograaf John G. Neihardt. The Revenant is ek in remake fan 'e film Man in the Wilderness, út 1971.

De tarieding foar The Revenant sette al yn 2001 útein, doe't film- en tillefyzjemakker Akiva Goldsman de filmrjochten op it doe noch net publisearre manuskript fan Punke oankocht. De Súdkoreaanske regisseur Park Chan-wook soe it ferhaal earst ferfilmje neffens in senario fan David Rabe, mei opmerklikernôch de negroïde akteur Samuel L. Jackson as spiler fan 'e titelrol. Doe't Park de produksje ferliet, waard de film oant 2010 op 'e lange baan skood. Dat jiers skreau Mark L. Smith in nij skript, dat ferfilme wurde soe troch John Hillcoat, mei Christian Bale as haadrolspiler. Hillcoat hold it lykwols yn oktober fan dat jier foar besjoen. De Frânske filmmakker Jean-François Richet waard troch de produsinten yn omtinken nommen om him te ferfangen, mar úteinlings foel harren kar op González Iñárritu. Dyselde lei himsels yn augustus 2011 kontraktueel fêst om 'e film te regissearjen en makke bekend dat er Leonardo DiCaprio en Sean Penn as de haadrolspilers hawwe woe.

As produsinten wiene González Iñárritu, Amon Milchan, Steve Golin, Mary Parent, Keith Redmon en James W. Skotchdopole by it projekt belutsen foar de filmstudio's Regency Enterprises, RatPac Entertainment, New Regency Productions, Anonymous Content, M Productions en Appian Way Productions. Foar de film wie in budget beskikber fan $60 miljoen. Under de opnamen rûn dat út oant $95 miljoen, en tsjin 'e tiid dat de postproduksje berêden wie, hie it de $135 miljoen berikt. De kamerarezjy wie yn 'e hannen fan Emmanuel Lubezki, en de filmmuzyk waard fersoarge troch Ryuichi Sakamoto en Alva Noto. De special effects waarden foar it meastepart oanlevere troch Industrial Light & Magic (ILM) fan George Lucas.

Opnamen

De opnamen foar The Revenant setten yn oktober 2014 útein en duorren oant yn augustus 2015. De film waard alhiel op lokaasje filme. De sênes yn it tuskenbeiden reinwâld waarden opnommen yn 'e Kanadeeske provinsje Britsk-Kolumbia. Oare sênes waarden filme yn 'e neite fan Calgary, yn Alberta. De sêne mei de wetterfal waard opnommen by de Kootenaiwetterfal by Libby, yn 'e Amerikaanske steat Montana. It wie de bedoeling dat de klimaktyske winterske sênes oan 'e ein fan 'e film opnommen wurde soene yn Kanada, mar dêr bliek it waar te waarm te wêzen. Sadwaande moast útwykt wurde nei de krite fan 'e rivier de Olivia op Fjoerlân, yn it uterste suden fan Argentynje.

De filmmakkers diene war om 'e Yndiaanske kultueren dy't yn 'e film portrettearre wurde, sa sekuer mooglik ôf te byldzjen. Dêrta waarden ferskate kultureel konsultanten yn 'e earm nommen, wylst twa taalkundigen de akteurs bystiene by it sa sekuer mooglik sprekken fan 'e dialooch yn it Arikara en it Pâny (Pawnee) dy't yn 'e film foarkomt.

De omstannichheden dêr't de opnamen fan The Revenant ûnder plakhiene, wiene tige dreech. Gâns leden fan 'e filmcrew klagen dêroer en in opmerklike protte fan harren waarden ûntslein of stapten út eigen beweging op. Haadrolspiler Leonardo DiCaprio sei letter oer syn ûnderfinings op 'e set fan The Revenant: "Ik kin tritich of fjirtich [dingen] opneame dy't guon fan 'e dreechsten wiene dy't ik ea dwaan moatten haw. Oft it no is it yn en út heal beferzen rivieren kladderjen, of it sliepen yn bistekarkassen, of wat ik op 'e set iet… [Ik] krige oan ien wei troch izige kjeld en potinsjele ûnderkuolling te ferduorjen."

Distribúsje

De distribúsje fan The Revenant waard fersoarge troch 20th Century Fox. De film gie op 16 desimber 2015 yn Grauman's Chinese Theatre yn Hollywood yn premiêre, en iepene dêrnei op 25 desimber yn 'e Amerikaanske bioskopen. It byhearrende soundtrackalbum ferskynde op 8 jannewaris 2016 by platemaatskippij Milan Records. The Revenant waard op 12 april 2016 útbrocht op dvd en blu-ray.

Historisiteit

Hoewol't The Revenant basearre hjit te wêzen op it wierbarde ferhaal fan 'e Amerikaanske frontiersman Hugh Glass, fûnen dy syn besikings plak by 't simmer en net yn 'e winter. Ek barde dat op 'e Grutte Flakten fan wat no Súd-Dakota is, dêr't gjin bergen binne, sa't de film suggerearret. Fierdersoan wie it eftergrûnferhaal fan 'e haadpersoan yn 'e film poere fiksje: der bestiet gjin bewiis dat Glass ea in relaasje mei in Yndiaanske squaw ûnderhold en likemin dat er in soan hie.

Yn Kanada ûntstie fierders frijwat trelit om The Revenant hinne omreden fan 'e negative portrettearring fan Frânsk-Kanadeeske coureurs des bois yn 'e film, as in kliber omdoarmjende moardners en ferkrêfters. De Kanadeeske akteur Roy Dupuis waard in rol oanbean as ien fan 'e Frânsk-Kanadezen, mar hy stegere de castingdirector ôf om't er, sa seid er letter yn in fraachpetear, yn 'e film anty-Frânske foaroardielen bespeurde. Neffens de heechlearaar skiednis Allan Greer, in ekspêr op it mêd koloniaal Noard-Amearika, hiene "de Amerikaanske pelshannelers oer it algemien in mindere reputaasje as de Kanadezen".

Bruce Bradley fan it tydskrift True West Magazine murk yn The Revenant ferskate anagronismen op, mei as meast steurende it praat fan John Fitzgerald oer syn heit, dy't freonen by de Texas Rangers hân hawwe soe, en oer syn winsk om werom te kearen nei Teksas, sadat er dêr tsjinst nimme koe by it Amerikaanske Leger. Mei't de film yn 1823 spilet, wie Teksas doe noch in provinsje fan Meksiko, dat der wie gjin Amerikaansk Leger om tsjinst by te nimmen, en alhielendal gjin Texas Rangers, dy't pas yn 1835 oprjochte waarden, yn 'e Teksaanske Unôfhinklikheidsoarloch.

Untfangst

Fan 'e filmkritisy krige The Revenant oer it algemien positive resinsjes, hoewol't ien weromkearend punt fan krityk de lange spyldoer fan 156 minuten wie. Peter Travers fan it tydskrift Rolling Stone priizge it aktearjen fan Leonardo DiCaprio as "in prestaasje fan in firtuoas, sikestûkjend yn syn brute krêft en stilswijende wolsprekkendheid". Yn it blêd Time skreau Stephanie Zacharek dat DiCaprio "de film in klopjend hert jout". Ek fûn se DiCaprio "it effektyfste special effect yn The Revenant". David Edelstein kwalifisearre The Revenant yn it blêd New York as "in poepetoer" en "sa somber as de hel, mar in stik moaier fan oansjen". In negatyf punt wie neffens him lykwols dat de film "tradisjonele manlikheid" omfette "ynstee fan in syktocht nei wat minskene ûnminsklikheid foar minsken oer ferljochtet".

Justin Chang fan it tydskrift Variety wie kritysker. Hy skreau dat Alejandro González Iñárritu "almar mear te sink giet oan in foarkommen fan grimmitige oerresolútheid dat in protte fan [syn] eardere wurk bedoarn hat". De film sels neamde er "in ymposante fisy […], mar ek ien dy't blastich is en emosjoneel yn 'e groei efterbleaun." Yn The New Yorker hie Richard Brody net folle mei The Revenant op. Hy fûn dat de bylden fan kameraregisseur Emmanuel Lubezki mar "byldzjende fersiersels" wiene fan 'e "smaakleaze toanielsênes" fan González.

Slant Magazine wie tige min oer The Revenant te sprekken, dy't yn it blêd troch Ed Gonzalez ûngeunstich ferlike waard mei in lyksoartige film, The New World fan regisseur Terrence Malick. Jaime N. Christley, in oare meiwurker fan Slant, skreau yn in resinsje dat The Revenant in "feest fan ellinde" wie, dat "like soargeleas yninoar flânzge is as in kaskreaker fan Roland Emmerich". Dat garandearre neffens him in sjochûnderfining dy't like útputtend wie as de swierrichheden dy't it personaazje fan Leonardo DiCaprio op it skerm oerwinne moast. Spesjale krityk hied er op 'e iepeningssêne, wêryn't de Arikara-krigers it kamp fan 'e pelsjagers ûnder de foet rinne. "Nei in plichtmjittige falske kalmte is de echte iepeningssêne fan The Revenant in sikestûkjend bloedbad yn it pelsjagerkamp. Dat is it soarte sêne dat Howard Hanks behannele hawwe koe – en dat ek die, yn The Big Sky – yn minder as njoggentich sekonden, mei de measte aksje bûten it sicht fan 'e kamera en minimale special effects, mar González forsearret in likenis mei de sênesekwinsje op it strân fan Normanje yn Saving Private Ryan […]".

Op 'e webside Rotten Tomatoes, dy't resinsjes sammelet, hat The Revenant in goedkarringspersintaazje fan 78%, basearre op 399 ûnderskate resinsjes. De konsensuskrityk fan 'e webside, gearstald út al dy resinsjes, stelt: "[De film] is like sombere prachtich as er wreedaardige neatûntsjend is, en brûkt de tawijde aktearprestaasje fan Leonardo DiCaprio as branje foar in meislepend drama mei útputtende útdagings mar rike beleannings." Op Metacritic, de wichtichste konkurrint fan Rotten Tomatoes, behellet The Revenant in goedkarringspersintaazje fan 76%, basearre op 50 resinsjes.

Resultaat

Opbringst

The Revenant brocht yn 'e bioskopen yn 'e Feriene Steaten en Kanada $183,6 miljoen op, en yn alle oare lannen en territoaria $349,3 miljoen. Wrâldwiid kaam de opbringst dêrmei út op $532,9 miljoen. Ofset tsjin it budget fan $135 miljoen betsjut dat in winst fan $214,9 miljoen, hoewol't dêr de marketingkosten noch wol ôf moatte. De webside Deadline Hollywood berekkene de skjinne winst fan The Revenant op $61,8 miljoen.

Prizen

Yn 2016 waard The Revenant by de Oscars nominearre foar prizen yn mar leafst 12 kategoryen, wêrûnder bêste film, bêste byrol fan in akteur (Tom Hardy), bêste filmmontaazje, bêste lûdsmontaazje, bêste lûdsmixing, bêste produksje-ûntwerp, bêste kostúmûntwerp, bêste fisazjy en hierstilearring en bêste fisuele effekten. De film wûn 3 Oscars, foar bêste regisseur, bêste akteur (Leonardo DiCaprio) en bêste kamerarezjy. By de Golden Globes waard The Revenant nominearre foar 4 prizen, wêrûnder bêste orizjinele filmmuzyk. De film wûn 3 Golden Globes, foar bêste film (drama), bêste regisseur en bêste akteur yn in dramafilm (Leonardo DiCaprio).

By de BAFTA's, de wichtichste Britske filmprizen, waard The Revenant nominearre yn 8 kategoryen, wêrûnder bêste filmmuzyk, bêste filmmontaazje en bêste fisazjy en hierstilearring. De film wûn 5 BAFTA's, foar bêste film, bêste regisseur, bêste akteur (Leonardo DiCaprio), bêste kamerarezjy en bêste lûd. The Revenant wûn ek de priis foar bêste akteur (Leonardo DiCaprio) by de Australyske AACTA International Awards, njonken nominaasjes foar bêste film en bêste rezjy.

By de Screen Actors Guild Awards wûn DiCaprio ek de priis foar bêste akteur. By de Saturn Awards waard The Revenant nominearre yn 'e kategoryen bêste aksje- of aventoerefilm en bêste akteur (DiCaprio). By de Satellite Awards waard de film nominearre yn 5 kategoryen, wêrûnder bêste film, bêste regisseur, bêste adaptearre senario en bêste kamerarezjy. De film wûn de Satellite Award foar bêste akteur (DiCaprio). Fierders wiene der 9 nominaasjes foar Critics' Choice Awards (2 wûn); 5 foar Empire Awards (1 wûn); en 4 foar MTV Movie Awards (1 wûn). De film wûn ek de Annie Award foar bêste personaazje-animaasje yn in live-actionproduksje (foar de bear), en de Teen Choice Award foar favorite akteur yn in dramafilm (DiCaprio).

Keppelings om utens

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.