The Jungle Book (film út 2016)

	The Jungle Book
	film
	(Filmposter yn 'e Ingelske Wikipedy)
	makkers
regisseur	Jon Favreau
produsint	Jon Favreau; Brigham Taylor
senario	Justin Marks
basearre op	● The Jungle Book ; fan Rudyard Kipling; ● The Jungle Book (1967)
kamerarezjy	Bill Pope
muzyk	John Debney
filmstudio	Walt Disney Pictures; Fairview Entertainment
distribúsje	Walt Disney Studios; Motion Pictures
	spilers
haadrollen	Neel Sethi; Ben Kingsley ; Bill Murray
byrollen	Idris Elba ; Christopher Walken; Lupita Nyong'o; Scarlett Johansson; Giancarlo Esposito
	skaaimerken
lân/lannen	Feriene Steaten
premiêre	4 april 2016
foarm	langspylfilm
sjenre	fantasy-aventoerefilm
taal	Ingelsk
spyltiid	106 minuten
	budget en resultaten
budget	$175 miljoen
opbringst	$966,6 miljoen
prizen	1 × Oscar; 1 × BAFTA; 1 × Saturn Award; 2 × Satellite Award; 1 × Annie Award

The Jungle Book is in Amerikaanske fantasy-aventoerefilm en famyljefilm út 2016 ûnder rezjy fan Jon Favreau, mei yn 'e haadrollen Neel Sethi, Ben Kingsley en Bill Murray. De film is in remake fan 'e klassiker mei deselde namme dy't yn 1967 troch de Walt Disney Animation Studios makke waard. Wylst dat in tekenfilm wie, waarden yn 'e nije film live-action en animearre fotoreälistyske special effects mei-inoar kombinearre. De titel betsjut "It Oerwâldboek" en ferwiist nei de boarne foar de plot: de ferneamde ferhalebondel The Jungle Book fan Rudyard Kipling út 1894.

De film folget Mowgli, in wyld bern dat opgroeid is yn it tropysk reinwâld fan Britsk-Ynje. Wannear't de tiger Shere Khan beslút dat er it 'minskejong' deadzje wol, besykje Mowgli syn freonen him yn feilichheid te bringen yn in minskedoarp oan 'e râne fan it wâld. Dat is noch net sa maklik, mei't Mowgli sels út noch yn net út it wâld wei wol. The Jungle Book krige fan 'e filmkritisy oer it algemien loovjende resinsjes en wûn in Oscar, in BAFTA, in Saturn Award, twa Satellite Awards en in Annie Award. Yn 'e bioskopen groeide de film boppedat út ta in reuseftich kommersjeel súkses. Al rillegau waard dêrom besletten in ferfolchfilm te meitsjen, dy't anno 2023 noch yn preproduksje is.

Plot

Yn it tropysk reinwâld fan Britsk-Ynje libbet oan 'e ein fan 'e njoggentjinde iuw in wyld bern. Hy is de weesjonge Mowgli, dy't grutbrocht wurdt troch in wolveridel ûnder lieding fan 'e alfawolf Akela. Op in dei oan 'e ein fan 'e drûge tiid komme de bisten fan it oerwâld gear om mei-inoar fan it bytsje oerbleaune wetter te drinken yn it ramt fan in oerâld ûnderling ferdrach. Dat ferdrach wurdt ferbrutsen wannear't de ûnmeilydsume Bingaalske tiger Shere Khan arrivearret en oanseit dat er Mowgli deadwaan sil nei't de reintiid begjint om't minsken altyd alles stikken meitsje en der dêrom gjin romte is foar harren yn it wâld. Wannear't de rein komt, beriedslagje de Akela, syn alfawolvinne Raksha en de oare wolven oft se Mowgli by harren hâlde moatte of net. Se beslute dat Mowgli foar syn eigen feilichheid it wâld ferlitte moat en nei in minskedoarp oan 'e wâldsigge ta brocht wurde moat. De swarte panter Bagheera, dy't in soarte fan mentor foar de minskejonge is, biedt oan om him dêr te bringen.

Tink derom: Yn de tekst hjirûnder wurdt de ôfrin fan de film beskreaun.
As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze.

Bagheera syn taak wurdt dreger makke om't Mowgli hielendal net nei it minskedoarp ta wol en oan ien wei troch tsjinakselet. Underweis rinne se yn in mûklaach fan Shere Khan, mar de folle lytsere Bagheera falt de tiger oan en wit him langernôch op te hâlden dat Mowgli ûntkomme kin. Op syn flecht moetet Mowgli de Yndyske pyton Kaa, dy't him hypnotisearret. Wylst er ûnder har ynfloed ferkeart, komme syn ierste oantinkens boppe, fan syn minsklike heit dy't ferskuord waard troch Shere Khan. Kaa besiket Mowgli te ferslinen, mar de jonge wurdt rêden troch de loaie brune bear Baloo. Dyselde manipulearret him om hunich foar him te garjen fan plakken dêr't er sels net by kin. Baloo slacht foar dat Mowgli by him bliuwe sil oant it winter wurdt, en dat liket Mowgli mar skoan ta, mei't er net troch hat dat Baloo him as helpke brûkt. Underwilens ferskynt Shere Khan yn it territoarium fan 'e wolveridel en deadet Akela as dy net sizze wol wêr't Mowgli bedarre is.

Lang om let fynt Bagheera Mowgli werom by Baloo. Hy is poerlulk dat Mowgli it wâld net ferlitten hat, sa't se ôfpraat hiene. Hy is ek nidich op Baloo, om't dy it jonkje foar syn eigen doelen brûkt sûnder lykfol hokker omtinken om syn feilichheid. Mowgli seit dat er wol foar himsels soargje kin, mar Bagheera hâldt út dat der foar syn minsklike keunsten gjin plak is yn it oerwâld. Baloo wit harren beiden del te bêdzjen, en om't it jûn is, stelt er foar om der earst mar ris in nachtsje oer te sliepen. Dy nachts wurdt Mowgli wekker fan it trompetterjen fan in keppel Yndyske oaljefanten, dy't om in djip gat hinne stiet. Mowgli, dy't fan Bagheera leard hat dat der mei oaljefanten net te spotten falt, wifket earst oft er derhinne sil, mar syn nijsgjirrigens wurdt him oermânsk. As er sjocht dat in oaljefantekeal yn it gat fallen is en der net mear útkomme kin, hellet er in rôle lianen op dy't er earder gearfandele hie om by in klif del te gean dêr't healwei in bijenêst wie wêrfan't Baloo de hunich hawwe woe. Hy springt yn it gat en bynt de lianen om it keal hinne, wêrnei't er de folwoeksen oaljefanten de úteinen yn 'e slurven jout om har jong omheech te skuorren. Underwilens binne Baloo en Bagheera ek wekker wurden en se sjogge it tafriel fan in ôfstân oan. Bagheera moat tajaan dat guon fan 'e minsklike keunsten fan 'e jonge soms dochs wol goed fan pas komme.

De oare moarns leit Bagheera oan Baloo út dat Mowgli bejage wurdt troch Shere Khan. De bear beseft dan dat er Mowgli syn feilichheid net garandearje kin en beslút Bagheera te helpen en bring de jonge nei it minskedoarp. Dat, trijeresom sette se de reis fuort. Mar Mowgli wurdt ûntfierd troch in binde apen dy't him yn 'e troch minsken ferlitten ruïne fan in âlde timpel by harren lieder bringe. Dat is in geastlik steurde, op in reuseftige orang-oetan lykjende gigantopithecus dy't himsels Kening Louie neamd. Kening Louie nimt oan dat alle minsken fjoer meitsje kinne, krekt sa't bisten ynstinktyf witte hoe't se dingen dwaan moatte. Hy wol dat Mowgli him it geheim fan it fjoermeitsjen sjen lit en yn ruil dêrfoar ûnthjit er om 'e jonge te beskermjen tsjin Shere Khan. As Mowgli, dy't as wyld bern yn it wâld opgroeit is en noch nea fjoer makke hat, seit dat er net wit hoe't er fjoer meitsje moat, ûntstekt Kening Louie yn grutte grime om't er mient dat de jonge him foarliicht. Hy begjint drigeminten te uterjen, mar foar't er dy wiermeitsje kin, arrivearje Bagheera en Baloo. Wylst de bear de apen ôfliedt, besiket Bagheera en rêd Mowgli. Dat slagget net hielendal en der ûntstiet in gefjocht wêrby't Bagheera en Baloo de apen fan har ôfslane sadat Mowgli ûntsnappe kin. Kening Louie set him lykwols troch de timpelruïne efternei en bringt it geheim fan 'e dea fan Akela oan 'e jonge út. Hy rjochtet by syn efterfolging lykwols sa'n skea oan dat de hiele timpel úteinlik boppe op him ynstoart.

Mowgli is poer op Bagheera en Baloo om't se de dea fan Akela foar him stilholden hawwe. Hy naait út om wraak te nimmen op Shere Khan. Dêrfoar stelt er in toartse út it minskedoarp, mar as er dêrmei yn it wâld weromkeart, stekt er by fersin in boskbrân oan. Wannear't de bisten fan it wâld foar de flammen allegearre nei itselde plak flechtsje, daget Mowgli dêr Shere Khan út. De tiger ferkundiget triomfantlik dat Mowgli himsels ta in fijân fan it wâld en al syn bewenners makke hat troch brân te feroarsaakjen. As er sjocht hoe't de wolven, dy't er as syn famylje beskôget, no foar him tebekskrilje, smyt er de toartse yn 'e rivier. Hy naait út foar Shere Khan, dy't fan in direkte efterfolging wjerholden wurdt om't er oanfallen wurdt troch Bagheera, Baloo en de wolveridel ûnder lieding fan Raksha. As Shere Khan harren úteinlings fan him ôfslacht en efter Mowgli oan giet, lokket dy him yn it baarnende wâld yn in deade beam en op in útstykjende tûke, dy't brekt ûnder it gewicht fan 'e mânske tiger. Shere Khan falt yn 'e flammen en komt om, wylst Mowgli oan syn lianen tou feilich hingjen bliuwt. Neitiid freget en kriget Mowgli de help fan 'e oaljefantekeppel om 'e rivier ôf te damjen, sadat it wetter it wâld yn streamt en de brân dwêstget.

As alle opskuor foarby is, wurdt Raksha de nije lieder fan 'e wolveridel. Mowgli beslút om syn minsklike keunsten tenei yn te setten foar it goederbêst fan alle wâldbewenners. Mei Bagheera en Baloo tsjocht er it wâld wer yn.

Rolferdieling

haadrollen

personaazje	akteur/aktrise
Mowgli	Neel Sethi
Bagheera, in swarte panter	Ben Kingsley (stim)
Baloo, in brune bear	Bill Murray (stim)

byrollen

personaazje	akteur/aktrise
Shere Khan, in Bingaalske tiger	Idris Elba (stim)
Kening Louie, in reuseftige orang oetan-eftige gigantopithecus	Christopher Walken (stim)
Raksha, in wolvinne	Lupita Nyong'o (stim)
Kaa, in Yndyske pyton	Scarlett Johansson (stim)
Akela, in wolf	Giancarlo Esposito (stim)
Ikki, in wytsturtkjifstikelbaarch	Garry Shandling (stim)
Mowgli as pjut	Kendrick Reyes
heit fan Mowgli	Ritesh Rajan
Grize Broer, in wolvejong	Brighton Rose (stim)
Fred, in dwerchswyn	Jon Favreau (stim)
Pangolin, in Yndysk skobdier	Sam Raimi (stim)
Rocky, in Yndyske noashoarn	Russell Peters (stim)
Raquel, in Yndyske noashoarn	Madeleine Favreau (stim)
in nylgau	Sara Arrington (stim)

Produksje en distribúsje

Produksje

The Jungle Book waard regissearre troch Jon Favreau nei in senario fan Justin Marks. Dat wie basearre op twa boarnen: de ferneamde ferhalebondel The Jungle Book út 1894, fan 'e Britske skriuwer Rudyard Kipling, en de tekenfilm The Jungle Book, fan 'e Walt Disney Animation Studios út 1967. Yn july 2013 waard troch Disney oankundige dat der in remake fan 'e klassiker út 1967 makke wurde soe, diskear gjin tekenfilm mar in live-actionfilm oanfolle mei fotoreälistyske animearre special effects.

Regisseur Favreau, dy't as bern de orizjinele film sjoen hie, wie him der bewust fan dat it tige nau lústere om mei de remake de juste toan oan te slaan. Hy behold dêrom it meastepart fan it ferhaal fan 'e oarspronklike film en foege ek ferskate ferskes út it orizjineel ta, dat ommers in musical wie. Sa sjonge Mowgli (Neel Sethi) en Baloo (Bill Murray) yn 'e film The Bare Necessities (skreaun troch Terry Gilkyson), wylst I Wan'na Be Like You en Trust in Me (beide skreaun troch de bruorren Sherman) yn 'e film songen wurde troch Kening Louie (Christopher Walken), resp. Kaa (Scarlett Johansson). Favreau keas der lykwols foar om fan syn film gjin musical te meitsjen.

Twa grutte oanpassings dy't Marks yn oerlis mei Favreau oan it ferhaal oanbrocht, binne it geslacht fan 'e Yndyske pyton Kaa en de ein fan 'e film. Favreau fûn dat de orizjinele film tefolle manlike personaazjes en te min frouliken hie, dat hy makke fan Kaa, oarspronklik in manlik personaazje, in wyfke en caste Scarlett Johansson yn dy rol. Oan 'e ein fan 'e oarspronklike film wurdt Mowgli troch Bagheera en Baloo einlings en te'n lêsten by it minskedoarp ôflevere. Hy akselet noch altyd tsjin en wol wer werom nei it wâld. Yn ien fan 'e memorabelste passaazjes fan 'e film sjocht er dan lykwols in famke fan syn eigen jierren dat wetter hellet by de rivier. Hy rekket er op slach fereale, en folget har nei it doarp. Yn 'e remake bliuwt Mowgli by Bagheera en Baloo yn it wâld, in feroaring dy't nei alle gedachten ynjûn waard om in ferfolchfilm mooglik te meitsjen.

As produsinten wiene Favreau en Brigham Taylor by it remakeprojekt belutsen foar de filmstudio Walt Disney Pictures en Fairview Entertainment. Foar de film wie in mânsk budget beskikber fan $175 miljoen. De kamerarezjy wie yn 'e hannen fan Bill Pope, en de filmmuzyk waard fersoarge troch John Debney.

Opnamen

De opnamen foar The Jungle Book waarden yn 2015 beävensearre en fûnen yn har gehiel plak yn 'e Los Angeles Center Studios yn 'e binnenstêd fan Los Angeles. De iennichste live-action-akteurs yn 'e film wiene Neel Sethi as Mowgli, en, yn in flashback, Ritesh Rajan as Mowgli syn heit en Kendrick Reyes as de jonge(re) Mowgli. Alle dierlike personaazjes waarden folslein mei special effects kreëarre op basis fan motion-capturetechniken. Eksimplaren fan krapoan santich ûnderskate bistesoarten út Yndia komme yn 'e film foar, wêrfan't ferskaten 150% grutter foarsteld wurde as dat se eins binne. De special effects waarden produsearre troch de Moving Picture Company (MPC) en it Nijseelânske bedriuw Weta Digital.

Distribúsje

De distribúsje fan The Jungle Book waard fersoarge troch Walt Disney Studios Motion Pictures, de distribúsjepoat fan The Walt Disney Company. De film gie op 4 april 2016 yn it El Capitan Theatre yn Hollywood yn premiêre, en iepene dêrnei op 15 april yn 'e Amerikaanske bioskopen. It byhearrende soundtrackalbum ferskynde op dyselde dei by platemaatskippij Walt Disney Records. The Jungle Book kaam op 9 augustus 2016 beskikber as digitale download en waard op 16 augustus fan dat jier útbrocht op dvd en blu-ray. Der ferskynde ek in ferboeking fan 'e film, skreaun troch Joshua Pruett en Scott Peterson, dy't op 1 maart 2016 útkaam by Disney Publishing Worldwide.

Untfangst

Fan 'e filmkritisy krige The Jungle Book oer it algemien tige loovjende resinsjes. Sa skreau Todd McCarthy fan The Hollywood Reporter dat de film "útsûnderlik moai om te sjen" wie, mei "in stjerrecast fan stimakteurs". Yn 'e Britske krante The Guardian joech Robbie Collin de film 4 fan 5 stjerren en omskreau it as "in oprjochte en hertlike adaptaasje dy't weromgiet nei Kipling foar farske ynspiraasje." Syn kollega Peter Bradshaw, ek fan The Guardian, parte oan The Jungle Book ek 4 fan 5 stjerren ta en fûn dat de film wol in bytsje wei hie fan Mel Gibson syn Apocalypto en mear as in bytsje fan Disney's klassiker The Lion King. Alonso Duralde fan TheWrap fûn dat "dit 'Boek' de post-vaudeville-healwizens fan syn foargonger mist, mar regisseur Jon Favreau en in team fan special effects-tsjoenders batse út yn ien fan 'e meast yn beslach nimmende keunstmjittige wrâlden sûnt Avatar."

Op 'e webside Deadline Hollywood skreau Pete Hammond dat The Jungle Book humor, spanning en in útsûnderlike cast fan stimakteurs omfette, mar, en dat wie neffens him wichtiger, ek in klopjend hert hie. Yn 't bysûnder priizge er Bill Murray foar syn aktearprestaasje as Baloo de bear, wylst er de special effects "ienfâldichwei bjusterbaarlik" fûn. Chris Nashawatay fan it tydskrift Entertainment Weekly parte de film in 9¹/₂ ta op in skaal fan 1 oant 10, en kwalifisearre it as ien fan 'e grutste ferrassings yn 'e bioskoop fan 2016. Dêrby murk er lykwols op dat wat him oanbelange de ferskes wol hielendal weilitten wurde kinnen hiene, en foar bern fûn er de film in bytsje te beëangstigjend. Yn 'e Chicago Sun-Times joech Richard Roeper oan The Jungle Book 3¹/₂ fan 4 stjerren. Hy omskreau de film as "prachtich útfierd" en "fisueel boeiend", mar hy wie it mei Nashawatay iens dat de musicallieten "triviaal" wiene en skreau dat de film sûnder de ferskes in spannender en mear streamline aventoer west hie.

Kenneth Turan fan 'e Los Angeles Times woe hawwe dat The Jungle Book it soarte famyljefilm wie, dat meitsje soe dat sels minsken sûnder gesin wol wolle soene dat se ien hiene om mei derhinne te nimmen. Yn it blêd Rolling Stone joech Peter Travers de film 3¹/₂ fan 4 stjerren. Hy kwalifisearre The Jungle Book as "grizelich en spannend, mar dochs unyk en ûnferjitlik". Matt Zoller Seitz fan 'e webside RogerEbert.com hie fral lof foar Idris Elba yn 'e (stim)rol fan 'e antagonist Shere Khan: "[Dyselde] wurdt mei safolle macht staljûn, dat er hoe dan ek om bang fan te wurden wêze soe, mar syn personaazje wurdt in swide smjunt troch ferbyldingsrike empaty. Wy begripe en wurdearje syn miening, sels al soe it útfieren dêrfan de dea fan Mowgli betsjutte."

Yn it blêd Variety skreau Andrew Barker dat de remake "de wollige lossichheid fan Disney's tekenfilmklassiker út 1967 net belykje kin, mar fansels slagget er sa goed op eigen manneboet dat sokke ferlikings amper nedich ["barely necessary"] binne" (in wurdboarterij dy't ferwiist nei it liet The Bare Nacessities). Der wiene ek resinsinten dy't in ynkonsekwinte toansetting yn 'e film bespeurden en krityk hiene op wat se seagen as it gebrek oan beslútfeardigens fan 'e regisseur om mei it ferhaal ien kant út te gean. Ien fan deselden dy't dy miening fentilearren, wie Manohla Dargis fan The New York Times, dy't net botte entûsjast wie oer The Jungle Book. Neffens Sam C. Mac fan Slant Magazine stipe Jon Favreau yn syn remake swier op 'e "animearre foargonger fan dizze film foar plot, karakterisearrings, lieten en foarfallen", mar "wit er net hoe't er dy bekende eleminten omfoarmje moat ta syn eigen gearhingjende fisy." En yn 'e Miami Herald skreau René Rodriguez dat de film foar him "sielleas" oanfielde: "Wat better dy pratende bisten derútsjogge, wat mear oft de film op in prachtich ûntwurpen screensaver liket. Je bewûnderje The Jungle Book, mar kinne je der net yn ferlieze."

Op 'e webside Rotten Tomatoes, dy't resinsjes sammelet, hat The Jungle Book in tige heech goedkarringspersintaazje fan 94%, basearre op 330 ûnderskate resinsjes. De konsensuskrityk fan 'e webside, gearstald út al dy resinsjes, stelt: "Mei't [de film] like prachtich as spannend is om te sjen, is it dy seldsume remake dy't wrachtich better út 'e ferve komt as syn foargonger – en tagelyk ek noch in nije mjitstêf ynstelt foar special effects." Op Metacritic, de wichtichste konkurrint fan Rotten Tomatoes, behellet The Jungle Book in goedkarringspersintaazje fan 77%, basearre op 49 resinsjes.

Resultaat

Opbringst

The Jungle Book brocht yn 'e bioskopen yn 'e Feriene Steaten en Kanada $364,0 miljoen op, en yn alle oare lannen en territoaria $602,5 miljoen. Wrâldwiid kaam de opbringst dêrmei út op $966,6 miljoen. Ofset tsjin it budget fan $175 miljoen betsjut dat in winst fan $791,6 miljoen, hoewol't dêr de sûnder mis mânske marketingkosten noch wol ôf moatte. Dêrmei wie The Jungle Book de op fjouwer nei meast opbringende film fan 2016, nei Captain America: Civil War, Rogue One: A Star Wars Story, Finding Dory en Zootopia. De webside Deadline Hollywood berekkene de netto winst fan 'e film op $258 miljoen.

Prizen

Yn 2017 wûn The Jungle Book by de Oscars de priis yn 'e kategory bêste fisuele effekten (Robert Legato, Dan Lemmon, Andrew R. Jones en Adam Valdez). By de BAFTA's, de wichtichste Britske filmprizen, wûn de film ek de priis foar bêste special effects. By de Saturn Awards waard The Jungle Book nominearre foar 6 prizen, wêrûnder bêste regisseur, bêste byrol fan in akteur (Christopher Walken), bêste optreden fan in jongere akteur (Neel Sethi), bêste filmmontaazje en bêste special effects. De film wûn de Saturn Award foar bêste fantasyfilm. By de Satellite Awards waard The Jungle Book nominearre yn 7 kategoryen, wêrûnder bêste animearre of mingde langspylfilm, bêste lûd, bêste adaptearre senario, bêste orizjinele soundtrack en bêste artdirection en produksje-ûntwerp. De film wûn de Satellites foar bêste kamerarezjy (Bill Pope) en bêste fisuele effekten.

By de Annie Awards, de wichtichste Amerikaanske prizen foar animaasjefilms, wûn The Jungle Book de priis yn 'e kategory bêste personaazje-animaasje yn in live-actionproduksje. Ek wûn de film de Critics' Choice Movie Award foar bêste fisuele effekten en de NAACP Image Award foar bêste stimakteur (Idris Elba). The Jungle Book waard fierders nominearre foar de Empire Award foar bêste special effects, de People's Choice Awards foar favorite famyljefilm en favorite stimakteur (Bill Murray), en de Teen Choice Awards foar favorite aksjefilm, favorite akteur yn in aksjefilm (Neel Sethi) en favorite trochbraak fan in nije stjer (Neel Sethi).

Ferfolchfilm

Nei it grutte súkses fan The Jungle Book kundige Walt Disney Pictures al rillegau oan dat der in ferfolchfilm makke wurde soe. Koarte tiid letter waard bekendmakke dat foar it ferfolch Jon Favreau, Justin Marks en Brigham Taylor weromkeare soene yn 'e funksjes fan regisseur, resp. senarioskriuwer en filmprodusint. Men tocht doe dat de nije film earne yn 2019 yn 'e bioskopen komme soe. Mar yn maart 2017 waard buorkundich makke dat it ferfolch op The Jungle Book foarearst op 'e lange baan skood wie, sadat Favreau de hannen frij hie foar in remake fan The Lion King. Yn jannewaris 2018 sei Marks dat er foar it senario fan 'e ferfolchfilm putte soe út it fierdere wurk fan Rudyard Kipling en út 'e ôfwiisde kladferzjes fan it senario fan Bill Peet foar de film út 1967. Yn oktober 2018 befêstige Neel Sethi dat er as haadrolspiler yn 'e ferfolchfilm weromkeare soe. Anno 2023 is de nije film lykwols noch altyd yn preproduksje en is der fierders neat mear fan fernommen.

Keppelings om utens

(in) Ynformaasje oer The Jungle Book yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.