Star Wars: Resistance

Star Wars: Resistance
tillefyzjesearje
makkers
ûntwikkele troch	Dave Filoni
produsint	Jack Liang (2018-2019) Daisy Fang (2019-2020)
útfierend    produsint	Dave Filoni Athena Yvette Portillo Justin Ridge Brandon Auman
basearre op	de Star Wars-ferfolchtrilogy
muzyk	Michael Tavera
tillefyzjestudio	Lucasfilm Lucasfilm Animation Polygon Pictures
distribúsje	Disney-ABC Domestic TV
spilers
haadrollen	Christopher Sean Scott Lawrence Josh Brener Suzie McGrath Donald Faison Myrna Velasco Jason Hightower Nazneen Contractor Liam McIntyre Sumalee Montano
skaaimerken
foarm	tekenfilmsearje
sjenre	militêre science fiction, fantasy, aksje, aventoer
seizoenen	2
jierren	2018 – 2020
tal ôfl.	40
spyltiid (ôfl.)	22 min.
lân/lannen	Feriene Steaten
taal	Ingelsk
prizen	1 × Saturn Award
webside	www.starwars.com/tv-shows/star-wars-resistance
besibbe searjes	Star Wars: The Clone Wars Star Wars: Rebels Star Wars: The Bad Batch

Star Wars: Resistance is in Amerikaanske tekenfilmsearje foar bern dy't rûn fan 2018 oant en mei 2020. De searje makket diel út fan 'e Star Wars-franchise en heart ta de sjenres fan militêre science fiction, fantasy, aksje en aventoer. Star Wars: Resistance waard basearre op 'e Star Wars-ferfolchtrilogy. De searje kin as sadanich sjoen wurde as in ferfolch op 'e eardere tekenfilmsearjes Star Wars: The Clone Wars en Star Wars: Rebels. De titel betsjut: "Stjerre-oarloggen: It Ferset". De searje folget Kazuda Xiono, in jonge romtepiloat fan 'e Nije Republyk, dy't troch it Ferset rekrutearre wurdt om 'e faksistyske Earste Oarder te bespionearjen, dy't in oanboazjende bedriging foar de frede en demokrasy yn it Stjerrestelsel foarmet. Yn 'e ynterne gronology fan Star Wars moat Star Wars: Resistance pleatst wurde krekt foàr en ûnder de films fan 'e ferfolchtrilogy. Yn totaal waarden der 40 ôfleverings makke. Star Wars: Resistance waard troch de tillefyzjekritisy mei positive resinsjes ûntfongen en wûn yn 2019 in Saturn Award.

Produksje

Star Wars: Resistance waard oankundige op 26 april 2018, om yn 'e hjerst fan dat jier foar it earst op 'e tillefyzje te kommen. De searje waard ûntwikkele troch Dave Filoni op basis fan 'e Star Wars-ferfolchtrilogy. Filoni wie yn in jier earder, yn 2017, haad fan 'e tekenfilmstudio Lucasfilm Animation wurden en sei dat er him by de skepping fan Star Wars: Resistance ynspirearje litten hie troch Japanske anime en troch de ûnderfinings fan syn eigen pake yn 'e Twadde Wrâldoarloch. Jack Liang wie fan 2018 oant 2019 as tillefyzjeprodusint by it projekt belutsen foar Lucasfilm, dochterûndernimming Lucasfilm Animation, en Polygon Pictures, en fan 2019 oant 2020 naam Daisy Fang dy funksje fan him oer. Star Wars: Resistance waard eins produsearre troch Polygon, dat in diel fan it wurk útbestege oan in ûnderoannimmer, de Sineeske tekenfilmstudio CGCG Inc., in dochterûndernimming fan Wang Film Productions.

Yn 'e mande mei Athena Yvette Portillo, Justin Ridge en Brandon Auman hie Filoni as útfierend produsint it tafersjoch oer de hiele produksje. De titelmuzyk en de soundtrack wiene it wurk fan Michael Tavera, dy't dêrfoar gebrûk makke fan tema's út 'e filmmuzyk dy't John Williams komponearre hie foar de films fan 'e Skywalker Saga. De distribúsje fan Star Wars: Resistance waard fersoarge troch Disney-ABC Domestic Television. De searje waard útstjoerd op 'e tillefyzjestjoerders The Disney Channel en Disney XD. Star Wars: Resistance rûn twa seizoenen, fan oktober 2018 oant en mei jannewaris 2020. Der waarden yn totaal 40 ôfleverings makke fan elts 22 minuten. Beide seizoenen fan Star Wars: Resistance binne útbrocht op dvd, en se binne ek te sjen op 'e streamingtsjinst Disney+.

Utgongspunt fan 'e plot

Star Wars: Resistance folget de aventoeren fan Kazuda "Kaz" Xiono (Christopher Sean), in romtepiloat út 'e striidkrêften fan 'e Nije Republyk, dy't troch Poe Dameron (Oscar Isaac), in foaroanman fan it Ferset, rekrutearre wurdt om 'e faksistyske Earste Oarder te bespionearjen. De lieders fan it Ferset binne nammentlik bang dat de Earste Oarder út is op it ferdylgjen fan 'e demokrasy yn it Stjerrestelsel, dy't tritich jier earder mei grutte muoite weromwûn waard doe't it Rebelleferbûn de diktatuer fan it Galaktysk Keizerryk ûnder fuotten helle.

Dameron pleatst Kaz as monteur op 'e Colossus, in ûnbidich grut tankskip foar stjerrejagers by de oseaanplaneet Castilon. De bêste piloaten fan it Stjerrestelsel kloftsje dêr gear, en Kaz moat útsykje wa fan harren ûnder ien tekken skûlje mei de Earste Oarder. Hy wurket oan board fan 'e Colossus by in bedriuw dat spesjalisearre is yn it reparearjen fan romteskippen. Dat is eigendom fan Jarek Yeager (Scott Lawrence), in freon fan Dameron. Kaz komt yn 'e kunde mei Neeku Vozo (Josh Brener), in talintearre Nikto-technikus; Tam Ryvora (Suzie McGrath), in monteur dy't piloate wurde wol; Hype Fazon (Donald Faison), de lieder fan it Ace Squadron dat de Colossus beskermet; Imanuel Doza (Jason Hightower), de kaptein fan 'e Colossus; en dy syn dochter Torra Doza (Myrna Velasco), in piloate by it Ace Squadron. Oare haadpersoanen út 'e searje binne Synara San (Nazneen Contractor), in romtepirate fan 'e Kriichsfûgelbinde; kommandant Pyre (Liam McIntyre), in heechpleatste ofsier binnen de Earste Oarder; en agint Tierney (Sumalee Montano), dy't wurket foar de feilichheidstsjinst fan 'e Earste Oarder.

Star Wars: Resistance set útein likernôch in healjier foarôfgeande oan 'e foarfallen út 'e film Star Wars: Episode VII – The Force Awakens. Yn ôflevering 17 fan seizoen 1 hellet de searje dy film yn.

Rolferdieling

haadrollen

personaazje	akteur/aktrise
Kazuda "Kaz" Xiono	Christopher Sean
Jarek Yeager	Scott Lawrence
Neeku Vozo	Josh Brener
Tamara "Tam" Ryvora	Suzie McGrath
Hype Fazon	Donald Faison
Torra Doza	Myrna Velasco
kaptein Imanuel Doza	Jason Hightower
Synara San	Nazneen Contractor
kommandant Pyre	Liam McIntyre
agint Tierney	Sumalee Montano

weromkearende byrollen

personaazje	akteur/aktrise
Poe Dameron	Oscar Isaac
BB-8	lûdseffekten
Orka	Bobby Moynihan
Flix	Jim Rash
Muoike Z	Tovah Feldshuh
R1-J5	Justin Ridge
Freya Fenris	Mary Elizabeth McGlynn
Griff Halloran	Dave Filoni
Bo Keevil	Stephen Stanton
Jace Rucklin	Elijah Wood
kaptein Kragan Gorr	Gary Anthony Williams
Drell	David Shaughnessy
majoar Elrik Vonreg	Lex Lang
luitenant Galek	Christine Dunford
Kel	Antony Del Rio
Eila	Nikki SooHoo
Venisa Doza	Tasia Valenza
Jak Sivrak	Greg Poops
Bolza Grool	Fred Tatasciore
Grevel	Dee Bradley Baker
Jooks	Mary Elizabeth McGlynn
Garma	Greg Poops
Glem	Dee Bradley Baker

gastrollen

personaazje	akteur/aktrise
kaptein Phasma	Gwendoline Christie (seiz. 1) Ellen Dubin (seiz. 2)
generaal Hux	Domhnall Gleeson (seiz. 1) Ben Prendergast (seiz. 2)
C-3PO	Anthony Daniels
prinsesse Leia Organa	Carolyn Hennesy
senator Hamato Xiono	Tzi Ma
alle Chelidae	Frank Welker
Ello Asty	Matthew Wood
Ax Tagrin	Joe Manganiello
de keninginne fan 'e Aeosianen	Lucy Lawless
Vranki de Blauwe	John DiMaggio
Hugh Sion	Sam Witwer
Mia Gabon	Cherami Leigh
Lin Gaava	Rachael MacFalane
Mika Grey	Tudi Roche
Norath Kev	Daveed Diggs
Leoz	Steve Blum

Seizoenen

seizoen	tal ôfl.	rûn fan	rûn oant	netwurk
1	21	7 oktober 2018	17 maart 2019	The Disney Channel & Disney XD
2	19	6 oktober 2019	26 jannewaris 2020

Untfangst en resultaat

Resinsjes

Star Wars: Resistance krige oer it algemien tige positive resinsjes fan 'e tillefyzjekritisy. Sa skreau William Hughes fan The A.V. Club dat de searje "oan 'e ein fan ['e dûbellange pilotôflevering] oangenaam fol liket te sitten mei potinsjeel". Hy parte de rige in 8 ta op in skaal fan 1 oant 10. Brian Lowry fan CNN murk op dat Star Wars: Resistance dúdlik rjochte wie op in jonger publyk. Hy skreau ek dat, hoewol't de searje "kleuret mei in folle ljochter, kleurriker palet", der dochs "alteast yn 't earstoan" keazen waard foar "blekere personaazjes en sitewaasjes – it soarte dat net fuortendaliks suggerearret dat dit de tekenfilmsearje is dy't jo sykje."

Op 'e webside Rotten Tomatoes, dy't resinsjes sammelet, hat seizoen 1 fan Star Wars: Resistance in tige heech goedkarringspersintaazje fan 92%, basearre op 13 ûnderskate resinsjes. De konsensuskrityk fan 'e webside, gearstald út al dy resinsjes, stelt: "It streamline ferhaal fan Star Wars: Resistance makket alles ree foar spannende aventoeren – en liket op it punt te stean om in kanvas te ferkennen dat foltroppe is mei fuortendaliks werkenbere personaazjes en potinsjeel by 't folop."

Prizen

Star Wars: Resistance waard yn 2019 en 2020 nominearre foar de Emmy Award, de wichtichste Amerikaanske priis op it mêd fan tillefyzje, yn 'e kategory bêste berneprogramma. De searje wûn yn 2019 de Saturn Award foar bêste tekenfilmsearje.

Keppelings om utens

• (in) Offisjele webside fan Star Wars: Resistance
• (in) De titelmuzyk fan Star Wars: Resistance op YouTube
• (in) Ynformaasje oer Star Wars: Resistance yn 'e Internet Movie Database

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.