Friens

Friens
Emblemen
Bestjoer
Lân	Nederlân
Provinsje	Fryslân
Gemeente	Ljouwert
Sifers
Ynwennertal	90 (2022)
Oerflak	3,17 km² lân: 3,09 km² wetter 0,07 km²
Befolkingsticht.	29 ynw./km²
Oar
Tiidsône	UTC +1
Simmertiid	UTC +2
Koördinaten	53° 05'N 5° 48'E
Offisjele webside
Side Reduzum-Fries-Idaerd-Eagum FB-side Doarpshûs
Kaart

Friens is ien fan de lytste fan de 17 doarpen yn de gemeente Ljouwert.

Friens leit noardwestlik fan Grou, noardeastlik fan Jirnsum en súdlik fan Reduzum tusken de Kromme Grou, de Mûzel, de Oeriselske Strjitwei, de N354 en de A32. Oan de westlike kant fan it doarpsgebiet rint it Swin, dat foar ferbining soarget fan de Kromme Grou yn it suden en it Ald Swin yn it noarden.

Skiednis

De namme komt fan Frea-inge, wat safolle betsjut as 'doarp fan it slachte fan Frea'. Friens leit tusken de doarpen Idaerd, Grou, Jirnsum ) en Raerd en is it lêste terpdoarp op de eastlike ouwer fan de Middelsee. Nei Friens rûn de âlde hearbaan oer de noardouwer fan De Boarn nei it kleaster en de brêge fan Nes. De tsjintwurdige wei giet oer de súdouwer.

Beslingastate

It meast opfallende oan it doarp is it tsjerkje út 1795, yn 1906 werboud, mei in rike samling roubuorden fan de Van Beslinga's en Van Sytzema's dy't yn Friens op de eardere Beslingastate wenne hawwe. Fan de state sels, dy't yn de perioade fan 1620 oant 1849 súdwestlik fan de tsjerke stien hat, is neat werom te finen: sels de terp dêr't de state op stien hat is ôfgroeven. Wol binne der noch stinzeplanten (û.o. nagelkrûd en wylde roazen) te finen op it hiem fan de pleatsen om Friens hinne.

Oant de gemeentlike weryndieling yn 1984 hearde Friens by de eardere gemeente Idaarderadiel. Idaarderadiel gie yn dat jier op yn de nije gemeente Boarnsterhim en sûnt de opheffing fan dy gemeente yn 2014 heart Friens by de gemeente Ljouwert.

Wapen

It doarpswapen wurdt as folget beskreaun: 'Yn sulver twa griene kneppels, skean oer elkoar hinne, dêrboppe en dêrûnder in reade roas.' De takken binne ûntliend oan it wapen fan de famylje fan Beslinga. De roazen stamme fan it wapen fan de famylje fan Sytzama.

Mienskip

Friens hat in eigen doarpsbelang en it doarpshûs hjit "It Lokaeltsje". It doarp hat tegearre mei Reduzum, Idaerd en Eagum in mienskiplike ynternetside. Ek it doarpskrantsje 'Linepraat' is in mienskiplike útjefte fan deselde doarpen.

Tsjerke

Tsjerke fan Friens

Protestantsk Friens is oansletten by de herfoarme gemeente Reduzum–Idaerd.

Skoalle

Yn 1934 waard as ûnderdiel fan de besunigings ûnder Hendrik Pieter Marchant de iepenbiere skoalle fan Friens mei dy fan Idaerd sletten. De bern geane yn 'e regel nei de Trije Doarpen Skoalle fan Reduzum.

Sicht op ferboude pleats oan de Van Sytzamawei

Ferienings

• Toanielklub Tusken Swin en Moezel
• Iisklub de izeren Wjuk.

Befolkingsferrin

Jier	1999	2002	2004	2005	2006	2007	2010	2016	2022
Ynwenners	92	87	88	89	91	92	89	75	90

Friens

Berne

• Clara Feyoena van Raesfelt-van Sytzama (1729-1807), dichteres
• Johannes Galenus Willem Hendrik van Sytzama (1830-1907), boargemaster fan Tytsjerksteradiel en rjochter

Ferskaat

• Friens leit oan it Jabikspaad.

Sjoch ek

• Tsjerke fan Friens
• Beslingastate

Boarnen, noaten en referinsjes

Boarnen, noaten en/as referinsjes:

Oer de tsjerke fan Friens Commons Wikimedia Commons  Ofbylden dy't by dit ûnderwerp hearre, binne te finen yn de kategory Friens fan Wikimedia Commons.