Britsum

Ut Wikipedy
Gean nei: navigaasje, sykje
lizzing fan Britsum.
De himrik fan Britsum.

Britsum is in terpdoarp yn de gemeente Ljouwerteradiel, mei 1.085 ynwenners (1 jannewaris 2004), dat Britsum is nei Stiens it twadde doarp fan de gemeente neffens grutte. It doarp leit besúdeasten Stiens, oan de súdkant fan de Stienzer Feart, dy't ferbining jout mei de Dokkumer Ie. De Menno van Coehoornwei jout ferbining mei de N357.

Skiednis[bewurkje seksje | boarne bewurkje]

It doarp is stifte op in kwelderwâl dy't eartiids de eastkant fan de Middelsee wie. Yn de 13e iuw krige it doarp der oan de westkant in stik nijlân by.

Sa lei Britsum der hinne.

Twadde helte 20e iuw hat Britsum in grutte nijbouwyk op de eardere Weversterp delsette kinnen, dy't it doarp hurd waakse litten hat. Troch de lûdsoerlêst fan de Fleanbasis Ljouwert wienen Koarnjum en Jelsum minder oantreklik wurden foar nije minsken, dy't ynstee dêrfan nei Britsum gongen.

Namme[bewurkje seksje | boarne bewurkje]

De betsjutting fan de namme Britsum is net dúdlik. It -um soe tsjutte op -hiem. Guon geane der dan fan út dat de earste part dan in persoansnamme Britte of Britto wêst hat, it hiem fan Britte. Oaren wize op in âldere foarm Bruggiheem, dy't al foar it jier 1000 foarkomt yn de boeken fan it kleaster Fulda. Dat soe dan it hiem by de brêge wêze. Noch in oare útlis komt út op it sompige lân.

De folksferklearring is in reuzeteltsje fan twa reuzen dy't ôfhierd wienen om de Dokkumer Ie te slatten. Op in stuit waarden se wurch. Se woenen doe efkes rêstich útpûste. Se gienen dêr tsjin in tsjerke oan sitten mar dy koe harren gewicht net hâlde en foel om. Doe seinen se tsjininoar: 'Dy is britsen.'

De Staten[bewurkje seksje | boarne bewurkje]

Alear hie Britsum in protte staten. Der wurdt tocht dat de âldste Tsjessingastate west hat. De namme Tiesinga komt al yn 1431 foar yn in akte. De ferneamdste is faaks Lettingastate. Fierder wienen der noch de staten Jornsma, Jeltinga en Eringa of Geringa.

Der wurdt ek noch sprutsen fan Britsenburg, dat oan de Middelsee lein hawwe soe.

Tsjerken[bewurkje seksje | boarne bewurkje]

De herfoarme Jehannestsjerke fan Britsum.

Britsum hat twa tsjerken. De romaansk-goatyske herfoarme Jehannestsjerke datearret likernôch út 1250. By in restauraasje yn 1990 waarden yn dit gebou âlde, oerskildere fresko's oantroffen. De âlde grifformearde tsjerke is fan 1867; yn 1968 waard der in nije grifformearde tsjerke boud, dy't De Hoekstien kaam te hjitten.

De âlde grifformearde tsjerke.

Stasjon[bewurkje seksje | boarne bewurkje]

Britsum hie in stasjon oan it spoar fan Ljouwert nei Eanjum. It doarp wie de halte tusken Koarnjum en Stiens, mei de geografyske ferkoarting Bts. It stasjon waard iepene 22 april 1901, doe't it spoar fan Ljouwert nei Ferwert iepene waard en waard wer sletten op 1 desimber 1940 doe't hiel it spoar opheft waard.

Mienskip[bewurkje seksje | boarne bewurkje]

Britsum hat de basisskoallen, 'De Foarikker' en 'De Hommeie'. Fjouwer kear jiers ferskynt doarpskrante 'De Troffel'. Buertferienings binne Menno’s Paed, 'Finne De TrochsettersFiif Strjitten', Aldlânsdyk, 'De Kamp', Lieuwe Wever , 'It Greidenselskip' en 'Sillân'.

Ferieningen[bewurkje seksje | boarne bewurkje]

Bekende Britsumers[bewurkje seksje | boarne bewurkje]

Untwikkeling ynwennertal[bewurkje seksje | boarne bewurkje]

  • 2009 - 1.020
  • 2008 - 1.020
  • 2004 - 1.085
  • 2003 - 1.091
  • 2002 - 1.104
  • 2001 - 1.112
  • 1999 - 1.112
  • 1973 - 686
  • 1969 - 641
  • 1964 - 597
  • 1959 - 610
  • 1954 - 583
  • 1900 - 486
  • 1848 - 326

Strjitten[bewurkje seksje | boarne bewurkje]

Aldlânsdyk, De Greiden, De Kamp, Efter de Wâl, Finne, Grutte Buorren, Lange Hage, Lieuwe Jellingastrjitte, Lytse Buorren, Lytse Dyk, Menno van Coehoornwei, Sillân, Sillânsreed, Stêdpaad, Swynserreed, Weversterp.

Sjoch ek[bewurkje seksje | boarne bewurkje]

Keppeling om utens[bewurkje seksje | boarne bewurkje]