Star Wars: Tales of the Jedi

	Star Wars: Tales of the Jedi
	tillefyzjesearje
	makkers
ûntwikkele troch	Dave Filoni
produsint	Alex Spotswood; Josh Rimes
útfierend; produsint	Dave Filoni; Athena Yvette Portillo; Carrie Beck
basearre op	● de Star Wars-prequeltrilogy ; fan George Lucas; ● Star Wars: Ahsoka ; fan E.K. Johnston
muzyk	Kevin Kiner
tillefyzjestudio	Lucasfilm; Lucasfilm Animation
distribúsje	Disney Platform Distribution
	spilers
haadrollen	Ashley Eckstein ; Corey Burton
	skaaimerken
foarm	tekenfilmsearje
sjenre	science fiction, fantasy,; aksje, aventoer
seizoenen	1
jierren	2022
tal ôfl.	6
spyltiid (ôfl.)	13-17 min.
lân/lannen	Feriene Steaten
taal	Ingelsk
besibbe searjes	Star Wars: The Clone Wars

Star Wars: Tales of the Jedi, ek wol koartwei Tales of the Jedi neamd, is in Amerikaanske tekenfilmsearje fan 6 ôfleverings, dy't yn oktober 2022 fia Disney+ útbrocht waard. De searje makket diel út fan 'e Star Wars-franchise en heart ta de sjenres fan science fiction, fantasy, aksje en aventoer. De titel betsjut: "Stjerre-oarloggen: Ferhalen fan 'e Jedi". Star Wars: Tales of the Jedi kin yn 'e ynterne gronology fan Star Wars pleats wurde foarôfgeande, ûnder en nei de films fan 'e Star Wars-prequeltrilogy. Der wurde twa ferhaallinen folge: ien oer Ahsoka Tano, dy't har ta Jedi-ridder ûntjout, en in oarenien oer de fal fan greve Dooku nei de dûnkere kant fan de Krêft. De slotôflevering is loskes basearre op 'e roman Star Wars: Ahsoka, fan E.K. Johnston út 2016.

Untstean

Wylst er reizen makke nei de opnamelokaasjes fan 'e live action-Star Wars-tillefyzjesearje The Mandalorian, begûn Dave Filoni, it haad fan 'e tekenfilmstudio Lucasfilm Animation, koarte ferhalen te skriuwen oer ferskate Jedi-personaazjes út it tiidrek fan 'e Star Wars-prequeltrilogy. Carrie Beck, de ûnderdirektrise foar ûntwikkeling en produksje by Lucasfilm, frege him oft er dy ferhalen net omsette woe yn in tekenfilmsearje. Der wie nammentlik jild beskikber foar in nije produksje, foar Disney+, fan Filoni syn eardere searje Star Wars: The Clone Wars, dy't oer itselde tiidrek yn it Star Wars-hielal giet. Yn april 2022 waard sadwaande de produksje fan Star Wars: Tales of the Jedi oankundige.

Produksje

Star Wars: Tales of the Jedi waard ûntwikkele troch Dave Filoni. Alex Spotswood en Josh Rimes wiene as tillefyzjeprodusinten by it projekt belutsen foar Lucasfilm en dochterûndernimming Lucasfilm Animation. Yn 'e mande mei Athena Yvette Portillo en Carrie Beck hie Filoni as útfierend produsint it tafersjoch oer de hiele produksje. De titelmuzyk en de soundtrack wiene it wurk fan Kevin Kiner, dy't dêrfoar gebrûk makke fan tema's út 'e filmmuzyk dy't John Williams komponearre hie foar de films fan 'e Skywalker Saga. De distribúsje fan Star Wars: Tales of the Jedi waard fersoarge troch Disney Platform Distribution. Alle 6 ôfleverings fan it earste seizoen fan 'e searje waarden op 26 oktober 2022 yn ien kear útbrocht fia de streamingtsjinst Disney+.

Utgongspunt fan 'e plot

Dave Filoni omskreau Star Wars: Tales of the Jedi as in searje dy't "twa paden en twa [ferskillende] karren" ferkent. De seis ôfleverings omfetsje sadwaande twa ferhaallinen, mei trije ôfleverings oer Ahsoka Tano en de oare trije oer greve Dooku. Dêrby wurde de beide personaazjes op ûnderskate punten fan harren libbens toand. Ahsoka Tano en greve Dooku beskikke allebeide oer Krêftgefoelige fermogens en ûntjouwe har allebeide ta Jedi-ridders. Ek reitsje se allebeide op in stuit desyllúzjonearre mei de Jedi Oarder en keare se dy organisaasje de rêch ta. Mar wylst greve Dooku him oerjout oan 'e dûnkere kant fan 'e Krêft en de learling en hantlanger fan 'e boasaardige Sith-master Darth Sidious wurdt, hâldt Ahsoka oan mei it neistribjen fan it goede, al siket se dêrfoar har eigen paad bûten de Oarder.

Rolferdieling

haadrollen

personaazje	akteur/aktrise
Jedi-ridder Ahsoka Tano	Ashley Eckstein
Sith-ridder greve Dooku	Corey Burton

byrollen

personaazje	akteur/aktrise
Pav-ti Tano, Ahsoka har mem	Janina Gavankar
Jedi-master Mace Windu	T.C. Carson
Jedi-master Qui-Gon Jinn	Liam Neeson
de jonge Qui-Gon Jinn	Micheál Richardson
Jedi-master Yaddle	Bryce Dallas Howard
Sith-master Darth Sidious	Ian McDiarmid
Jedi-master Anakin Skywalker	Matt Lanter
Jedi-master Obi-Wan Kenobi	James Arnold Taylor
senator Bail Organa	Phil LaMarr
kaptein Rex	Dee Bradley Baker
in ynkwisiteur	Clancy Brown
senator Dagonet	Mark Rolston
Dagonet jr.	Josh Keaton
Nak-il	Sunil Malhotra
Gantika	Toks Olagundoye
Jedi-master Ki-Adi-Mundi	Brian George
argiviste Jocasta Nu	Flo Di Re
Semage	Terrell Tilford
senator Larik	Theo Rossi
Hanel	Andrew Kishino
doarpsâldste	Vanessa Marshall
alle kloansoldaten	Dee Bradley Baker

N.B.: Jedi-masters Yoda, Plo Koon, Saesee Tiin en Depa Billaba, Billaba har padawan Caleb Dume en senator Mon Mothma komme wol yn 'e searje foar, mar hawwe gjin dialooch.

Seizoenen

seizoen	tal ôfl.	útbrocht op	netwurk
1	6	26 oktober 2022	Disney+

Untfangst en resultaat

Fan 'e tillefyzjekritisy krige Star Wars: Tales of the Jedi oer it algemien tige positive resinsjes. Sa neamde Kevin Fox jr. yn it tydskrift Paste de searje "ferrassend en krêftich", en joech er der in 8,2 op in skaal fan 1 oant 10 foar. Jamie Lovett fan 'e webside ComicBook.com parte Star Wars: Tales of the Jedi in 4 ta op in skaal fan 1 oant 5. Hy neamde de seis ôfleverings "moai, oangripend en mei in ferrifeljende djipgong yn ferhâlding ta de koarte spyldoer".

Keppelings om utens

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.

Star Wars
filmsearje
Skywalker Saga	Episode IV: A New Hope (1977) • Episode V: The Empire Strikes Back (1980) • Episode VI: Return of the Jedi (1983) • Episode I: The Phantom Menace (1999) • Episode II: Attack of the Clones (2002) • Episode III: Revenge of the Sith (2005) • Episode VII: The Force Awakens (2015) • Episode VIII: The Last Jedi (2017) • Episode IX: The Rise of Skywalker (2019)
oare Star Wars-films	Star Wars Holiday Special (1978) • Caravan of Courage: An Ewok Adventure (1984) • Ewoks: The Battle for Endor (1985) • The Clone Wars (2008) • Rogue One (2016) • Solo (2018)
tillefyzjesearjes
live-actionsearjes	The Mandalorian (2019–20??) • The Book of Boba Fett (2021–20??) • Obi-Wan Kenobi (2022) • Andor (2022–2024) • Ahsoka (2023) • Skeleton Crew (2023–20??) • The Acolyte (2024)
tekenfilmsearjes	Droids (1985–1986) • Ewoks (1985–1986) • Clone Wars (2003–2005) • The Clone Wars (2008–2020) • Rebels (2014–2018) • Blips (2017) • Forces of Destiny (2017–2018) • Galaxy of Adventures (2018–2020) • Resistance (2018–2020) • Roll Out (2019–2020) • Galaxy of Creatures (2021) • Visions (2021) • The Bad Batch (2021–20??) • Galactic Pals (2022) • Tales of the Jedi (2022)