Mariah Carey

Mariah Carey
sjonger en/of muzikant
persoanlike bysûnderheden
echte namme	Mariah Carey
nasjonaliteit	Amerikaansk
berne	27 maart 1969 of 1970
berteplak	Huntington (New York)
etnisiteit	Afro-Amerikaansk Fenezolaansk Iersk
wurkpaad
sjenre	R&B, pop, hiphop, soul
sjongtaal	Ingelsk, Spaansk
ynstrumint	piano
grutste hit(s)	I'll Be There Dreamlover Hero Without You All I Want for Christmas Is You
jierren aktyf	1988 – no
prizen	5x Grammy Award
offisjele webside
mariahcarey.com

Mariah Carey (Huntington (New York), 27 maart 1969 of 1970), is in Amerikaansk sjongster, lietsjeskriuwster, muzikante, aktrise, muzykprodusinte en filantrope fan mingd etnysk komôf, dy't bekend stiet om 'e hege noaten dy't se helje kin. Hja debutearre yn 1990 mei har nei harsels neamde earste album, dat yn 'e Feriene Steaten njoggen kear platina waard. Neitiid hat Carey noch mear as in tolvetal oare studio-albums útbrocht, wêrfan't de measten in tige súksesfol wiene. Guon fan har bekendste hits binne I'll Be There, Dreamlover, Hero, Without You en it noch altyd tige populêre krystnûmer All I Want for Christmas Is You. Hoewol't se úteinsette yn 'e R&B- en popsjenres, skode se ein jierren njoggentich stadichoan op nei hiphop. Oan it begjin fan 'e jierren 2000 waard se in hoart opnommen nei't se fysyk en emosjoneel ynstoart wie, wêr't troch de rabbersparse út en tenei oer berjochte waard. Neitiid rekke it mei har karriêre yn it neigean, oant se yn 2005 wer by de wâl opklaude en fannijs boppe-oan op 'e hitlisten stie. Underwilens hat Carey wrâldwiid mear as 200 miljoen platen ferkocht, wêrmei't se ien fan 'e bêst ferkeapjende muzykartysten aller tiden is. Har karriêre is bekroand mei fiif Grammy Awards en withoefolle oare prizen. Mariah krige yn 2015 in stjer op 'e Hollywood Walk of Fame.

Libben

Jonkheid

Mariah Carey waard berne op 27 maart 1969 of 1970 (dêroer binne de boarnen it ûniens), yn Huntington, op Long Island, yn 'e steat New York, in lyts foarstedsje fan 'e stêd New York. Har heit, Alfred Roy Carey, wie fan mingd Afro-Amerikaansk en Latino (Fenezolaansk) etnysk komôf, wylst har mem, Patricia Hickey, Iersk bloed hie. Carey wie de efternamme dy't Mariah har Fenezolaanske pake, Francisco Núñez, oannaam nei't er yn 'e earste helte fan 'e tweintichste iuw nei de Feriene Steaten ta emigrearre wie.

Mariah Carey ûnder in optreden yn it tillefyzjeprogramma Good Morning America, yn 2013.

Carey har mem wie in operasjongster en sjongleraresse dy't tsjin 'e wil fan har famylje mei Carey har heit, in loftfearttechnikus, útnaaide en troude. Neitiid woe de Hickey-famylje neat mear te krijen hawwe mei Carey har mem, harsels, har âldere suster Alison en har jongere broer Morgan, fanwegen de skande dat in blanke frou mei in swarte man troud wie. Sadwaande identifisearret Carey har sterk mei de Afro-Amerikaanske mienskip, hoewol't sysels sa'n ljochte hûdskleur hat, dat se wol foar blank trochgean kin.

Carey har âldelju wrakselen mei har plak yn 'e mienskip, en skieden úteinlik doe't Carey trije jier wie. Alison bleau by har heit, wylst Mariah en Morgan by har mem kamen. Meitiid groeiden Carey en har heit útinoar, en úteinlik soe hja de bannen mei him hielendal ferbrekke. Nei ferskate drege jierren ferfear it gesin nei in mear woltierige buert fan New York, dêr't Carey fierder opgroeide. Op 'e legere skoalle begûn hja al gedichten te skriuwen en dêr meldijkes by te betinken, en blonk hja út by muzykles. Har stim trainde se fan bern ôf oan mei help fan har mem. Dy brocht har yn 'e kunde mei har eigen grutte leafde, de klassike opera, mar doe't dat Carey net folle dearde, sette se har net ûnder druk om dy kant út te gean, eat dêr't Carey har letter tige tankber foar wie. Op 'e middelbere skoalle kaam Carey yn 'e kunde mei de lettere sjonger en muzikant Gavin Christopher en de lettere muzykprodusint Ben Margulies. Mei-inoar wurken se oan Carey har lieten en makken se in demo-tape wêrmei't Carey in foet tusken de doar besocht te krijen by de grutte platelabels, wat kear op kear mislearre.

Mariah Carey yn 1990.

Sjongkarriêre

Iere jierren

Koart nei't Carey in lyts appartemintsje yn New York belutsen hie dat se dielde mei fjouwer oare studintes, rekke hja befreone mei de begjinnende popsjongster Brenda K. Starr. Yn desimber 1988 beselskippe se Starr nei in galajûn fan 'e muzykyndustry, dêr't se muzykprodusint Tommy Mottola, de baas fan platemaatskippij Columbia Records, har demotape yn 'e hannen treau. Dy besleat letter dy jûns, mear út ferfeling as om wat oars, om der ûnderweis nei hûs nei te lústerjen. Nei't er twa fan 'e fjouwer nûmers heard hie, kearde er de auto en gie werom nei it feest om Carey te sykjen, mar dy wie ûnderwilens al op hûs oan gien. Yn wat ornaris opdist wurdt as in moderne ferzje fan it bekende mearke Jiskepûster, sette Mottola útein mei in twa wiken duorjende siiktocht nei de ûnbekende sjongster, en doe't er har einlings en te'n lêsten fûn hie, liet er har daliks in kontrakt tekenje.

Carey har earste studio-album, Mariah Carey, kaam út yn 1990. Columbia joech mer as $1 miljoen út oan promoasje en reklame, en nei in trage start klom it album úteinlik nei de top fan 'e Amerikaanske Billboard 200-list. Carey waard dermei nominearre foar in Grammy Award (de wichtichste Amerikaanske muzykpriis) foar album fan it jier en wûn sels in Grammy foar bêste nije artyst, wylst de single Vision of Love in Grammy foar bêste popoptreden fan in sjongster wûn en noch foar trije oaren nominearre waard. Behalven Vision of Love berikten ek de singles Love Takes Time, Someday en I Don't Wanna Cry it earste plak op 'e hitlisten, en dêrmei wie Carey de earste artyst sûnt The Jackson 5 yn 'e jierren sechtich, dy't mei sawol de debútsingle as de trije dêropfolgjende singles it earste plak helle. It album Mariah Carey waard njoggen kear platina yn 'e Feriene Steaten, sân kear platina yn Kanada, fjouwer kear platina yn Nij-Seelân, trije kear platina yn Japan en ien kear platina yn Austraalje en Grut-Brittanje. Wrâldwiid waarden der mear as 15 miljoen eksimplaren fan ferkocht.

Carey mei Boyz II Men ûnder in útfiering fan One Sweet Day, yn it Newyorkske Madison Square Garden.

Carey har twadde studio-album, Emotions, kaam út yn 1991. Dêrfoar wurke se gear mei Walter Afanasieff, in muzykprodusint fan namme. Yn dyselde snuorje krigen Carey en har âlde freon Ben Margulies spul om 'e hichte fan 'e royaltys dêr't hy as mei-skriuwer fan har iere lieten rjocht op hie. De rjochter kaam deroan te pas en de freonskip einige mei rûzje. Emotions die it ûnderwilens tige goed, al koe it it súkses fan Carey har debútalbum net belykje. Der waarden wrâldwiid 8 miljoen eksimplaren fan ferkocht, en inkeld de titelsong helle it earste plak op 'e hitlisten.

In grut oandiel yn har súkses hie Carey har stimberik, dat fiif oktaven beslacht, en dêr't se (hege) noaten foarby de sânde oktaaf mei helje kin. Letter soe har dat in fermelding yn it Guinness Book of Records opsmite, mar om't se nea live optrede, giene der yn it begjin fan har karriêre geruchten dat Carey in "studiowjirm" wie, dy't inkeld mei help fan studiotechnyk sa sjonge koe. Carey sels hold út dat it om plankekoarts gie, mar om 'e geruchten foar iens en foar altyd te ûntsenuwen boekte Columbia Records in optreden op MTV Unplugged, in tillefyzjeprogramma op 'e muzykstjoerder MTV. Dêr song hja û.m. I'll Be There, dat oarspronklik yn 1970 populêr makke wie troch The Jackson 5. Hoewol't Carey en Afanasieff pas op it lêste momint besleaten om dat nûmer yn it optreden yn te passen, waard dat in grut súkses.

Carey yn 1998, ûnder in konsert op 'e Loftmachtbasis Edwards.

Ein augustus 1993 brocht Carey har trêde studio-album út, dat de titel Music Box krige. Nei't Emotions, dat in oade wie oan 'e Motown-muzyk dêr't Carey mei opgroeid wie, it net sa goed dien hie as har debútalbum, waard besletten om mei Music Box mear op 'e pop-toer te gean. Dat die fertuten, want it album waard in ûnbidich súkses, dat Carey yn Amearika har earste diamanten plaat opsmiet. Uteinlik giene der mear as 32 miljoen eksimplaren fan oer de toanbank, wêrmei't it ien fan 'e bêst ferkeapjende albums aller tiden wie. Boppedat besoarge Music Box Carey ek har definitive ynternasjonale trochbraak, mei grutte súksessen yn Japan, Kanada, Austraalje, Nij-Seelân, Grut-Brittanje, Frankryk, Dútslân, Nederlân, Sweden en ferskate oare Jeropeeske lannen. Fan 'e singles diene fral Hero en Without You it bûtenwentige goed. Nei it útbringen fan Music Box gie Carey foar it earst op in koart toernee, dat trouwens beheind bleau ta Noard-Amearika en wêrby't se mar seis konserten joech. Likegoed wie dat foar har in grutte stap.

Neitiid kaam men by Columbia Records mei it idee op 'e lapen om in krystalbum te meitsjen. Carey wie dêr wol foar te finen, en der waard besletten dat de cd in mjuks fan traysjonele hymnen en nije lieten befetsje soe. Mei Afanasieff, dy't ek in grut oandiel hân hie yn it skriuwern fan 'e lieten foar Music Box, sette Carey har oan it wurk. It album, dat de titel Merry Christmas krige, kaam yn novimber 1994 út. It rûn tige goed en waard mei 15 miljoen eksimplaren it bêstferkochte krystalbum aller tiden. De lead-single wie ien fan 'e nijskreaune lieten, All I Want for Christmas Is You. Dat ûntjoech him ta Carey har grutste ynternasjonale hit, al die it it iroanysk genôch yn 'e Feriene Steaten sels wat minder goed.

Mariah Carey sjongt Hero ûnder in konsert yn 2003.

Middeljierren en sûnensswierrichheden

Mei har fyfde studio-album, Daydream, dat yn 1995 útkaam, begûn Carey de popmuzyk fan Music Box te fermingen mei R&B- en hiphop-ynfloeden. Fan dit album waarden wrâldwiid 25 miljoen eksimparen ferkocht, en it wie Carey har bêst ferkeapjende album yn 'e Feriene Steaten. De twadde single wie One Sweet Day, in liet dat ynspirearre wie troch de dea fan muzykprodusint David Cole en troch Carey har suster Alison, dy't mei AIDS oanhelle rekke wie. One Sweet Day bleau yn 'e Feriene Steaten sechtsjin wiken lang op it earste plak op 'e hitlisten stean en ferbriek dêrmei alle rekôrs. Nei it útbringen fan Daydream gie Carey wer op toernee, wêrby't se diskear û.m. Tokio oandie.

Mei har folgjende beide albums, Butterfly (1997) en Rainbow (1999), sette Carey har súkses fuort, wêrby't se yn tanimmende mjitte hiphop-eleminten yn har muzyk bemjukse. Teffens begûn se mear gear te wurkjen mei hiphopartysten as Jermaine Dupri, Mystikal en Snoop Dogg. Oan 'e oare kant song se yn 1998 it duët When You Believe, dat in grutte hit waard, mei Whitney Houston, foar de soundtrack fan 'e tekenfilm The Prince of Egypt. Yn 2000 briek Carey nei tsien jier mei Columbia en tekene se in kontrakt foar $100 miljoen mei Virgin Records.

Mariah Carey mei Island Records-platebaas L.A. Reid, yn 2005.

Yn 2001 sette se ek foar it earst útein mei te akearjen, yn 'e film Glitter, dy't spesjaal foar har skreaun wie. Yn july fan dat jier begûn se lykwols ynkoherinte berjochten op har offisjele webside te setten, en op 26 july waard se ynienen opnommen mei útputtingsferskynsels en om't se lichaamlik en geastlik ynstoart wêze soe. De publikaasje fan sawol de film as de byhearrende soundtrack waarden fersteld, mar doe't se úteinlik dochs útbrocht waarden, flopten se raar. Neitiid kocht Carey har kontrakt mei Virgin Records ôf mei $50 miljoen, en fleach se nei Itaalje, dêr't se fiif moannen lang yn Capri ferbleau om op te knappen. Hoewol't se letter dat jier in kontrakt oangie mei Island Records en dêrnjonken in eigen label, MonarC Entertainment, oprjochte, die har folgjende album, Charmbracelet (2002), it lang sa goed net as syn foargongers. Yn 'e media waard de ein fan Carey har karriêre al foarsein.

Lettere jierren

Mar yn 2005 klaude Carey wer by de wâl op mei har njoggende studio-album, The Emancipation of Mimi. Dêrfoar wurke hja benammentlik gear mei hiphop-artyst Jermaine Dupri, mar ek wol mei oaren, wêrûnder R&B-stjer Kanye West. Dit album kaam yn ferskate lannen boppe-oan op 'e albumlisten binnen en waard waarm ûnthelle troch de resinsinten. De twadde single, We Belong Together, wûn û.m. twa Grammy Awards, twa Radio Music Awards en fiif Billboard Music Awards, en wie krúsjaal foar it wer op 'e rails krijen fan Carey har karriêre. Mei The Emancipation of Mimi, wêrfan't yn totaal wrâldwiid rom 12 miljoen eksimplaren ferkocht waarden, helle se nochris in Grammy binnen foar bêste contemporary R&B-album. Carey har tsiende album, E=MC² (2008), die it minder goed mei "mar" 2½ miljoen ferkochte eksimplaren, hoewol't se mei de lead-single Touch My Body har achttjinde nûmer 1-hit helle, wêrmei't se it rekôr fan 'e artyst mei de measte nûmer 1-hits yn 'e Feriene Steaten yn 'e hannen krige (dat earder fan Elvis Presley west hie, mei santjin earste plakken).

Mariah Carey yn 2008.

Nei't Carey yn 'e foargeande jierren al ferskate kearen as aktrise wurksum west hie, briek se yn 2009 op dat mêd troch mei har rol as maatskiplik wurkster yn 'e film Precious. Se foel dermei yn 'e prizen op sawol it Amerikaanske Sundance Film Festival as op it Filmfestival fan Toronto, en wûn de Breakthrough Actress Performance Award op it Ynternasjonale Filmfestival fan Palm Springs. Datselde jiers (2009) kaam Carey har album Memoirs of an Imperfect Angel út, dat it lang sa goed net die as har eardere cd's, en dêr't net mear as 2 miljoen fan ferkocht waarden, ek al neamde muzykresinsint Stephen Thomas Erlewine, fan AllMusic, it "har ynteressantste album yn tsien jier." Neitiid brocht Carey noch in nij krystalbum út, Merry Christmas II You (2010), en inkele studio-albums, Me. I Am Mariah... The Elusive Chanteuse (2014) en Caution (2018), dy't it likemin al te goed diene. Dat wie oars mei har duët fan All I Want for Christmas Is You mei tineridoal Justin Bieber, út 2011, dat in grutte hit waard. Njonken har sjongen leit Carey har de lêste jierren ek almar mear ta op aktearwurk yn films en op 'e tillefyzje, ynklusyf wurk as stimaktrise.

Yn totaal hat Mariah Carey ûnder har karriêre wrâldwiid mear as 200 miljoen platen ferkocht, wat har ta ien fan 'e bêst ferkeapjend muzykartysten aller tiden makket. Yn 'e Feriene Steaten is se neffens de gegevens fan 'e Recording Industry Association of America (RIAA) de op twa nei bêst ferkeapjende artyst ea, mei 63½ miljoen ferkochte platen. Carey hat û.m. 5 Grammy Awards wûn, 19 World Music Awards, 11 American Music Awards en 31 Billboard Music Awards. Neffens it tydskrift Forbes wie se yn 2007 de op fjouwer nei rykste frou yn 'e showbusiness, mei in fermogen fan $270 miljoen. Yn 2011 waard har fermogen skat op $500 miljoen. Njonken har sjong- en aktearwurk is Carey ek aktyf as muzykprodusinte, en yn 2010 brocht se in kolleksje juwiellen, skuon en rûkersguod op 'e merk.

Mariah Carey mank bern út 'e binnenstêd fan New York, dy't op kamp binne yn it nei har ferneamde Camp Mariah, yn Fishkill.

Priveelibben

Wylst hja har album Music Box oan it opnimmen wie, begûn Carey om te gean mei har ûntdekker, platebaas Tommy Mottola. Hja trouden op 5 juny 1993. Mar fan 1995 ôf gie it berchôf mei harren relaasje, wat neffens de ferhalen foar in grut part oan Mottola syn besitterige hâlding te witen wie en fierder ek kaam troch saaklike ûnienichheden oer de kant dy't Carey mei har karriêre út woe. Uteinlik einige it houlik yn 1998 yn in skieding. Dêrnei hie se fan 1999 oant 2001 in relaasje mei Latino-sjonger Luis Miguel. Mei akteur en komyk Nick Cannon kaam Carey yn 'e kunde doe't se op in eilantsje foar de kust fan Antigua de fideoklip fan it nûmer Bye Bye opnamen. Op 30 april 2008 troude se mei Cannon op 'e Bahama's, wêrnei't se op 30 april 2011 in twilling te wrâld brocht, de jonkjes Monroe en Moroccan. Yn augustus 2014 befêstige Cannon dat Carey en hy in pear moanne earder útinoar gien wiene.

Op it mêd fan godstsjinst hat Carey oanjûn dat se kristlik is. Se is ek in filantrope, dy't troch de jierren hinne finansjele stipe jûn hat en aktyf belutsen west hat by in ferskaat oan goeddiedichheidsorganisaasjes. Sa hat se har û.m. ynset foar it yn oanrekking bringen fan 'e ûnderbedielde jongerein út 'e binnenstêd fan New York mei de skiene keunsten en mei karriêremooglikheden; foar it útkomme litten fan 'e winsken fan terminaal sike bern fia de Make-A-Wish Foundation; en foar de slachtoffers fan 'e oanslaggen fan 9/11, fan orkaan Katrina, fan kanker en fan 'e ierdbeving fan 2010 yn Haïty. Ek hat se ferskate kearen benefytkonserten holden. Yn 2008 waard hja beneamd ta hongerambassadrise fan it World Food Programme fan 'e Feriene Naasjes.

Diskografy

Albums

Studio-albums

Jier	Titel	Prizen en nominaasjes	Resultaat
1990	Mariah Carey	Billboard Music Award foar bêste album fan in froulike artyst Billboard Music Award foar bêste album fan in popartyst Billboard Music Award foar bêste album Soul Train Music Award foar bêste R&B/soulalbum fan in froulike artyst nom. foar in Grammy Award foar album fan it jier	Feriene Steaten: 9x platina Kanada: 7x platina Nij-Seelân: 4x platina Japan: 3x platina Austraalje: platina Grut-Brittanje: platina wrâldwiid: goud
1991	Emotions	Billboard Music Award foar bêste album fan in froulike artyst nom. foar in Soul Train Music Award foar bêste R&B/soulalbum fan in froulike artyst	Feriene Steaten: 4x platina Kanada: 4x platina Japan: 4x platina Austraalje: platina Grut-Brittanje: platina Nij-Seelân: platina Frankryk: goud wrâldwiid: goud
1993	Music Box	ARIA Music Award foar populêrste album fan it jier ARIA Music Award foar bêste prestaasje fan in album yn 'e histlisten nom. foar in Billboard Music Award foar bêste album fan in froulike artyst nom. foar in Billboard Music Award foar bêste Billboard 200-album nom. foar in Soul Train Music Award foar bêste R&B/soulalbum fan in froulike artyst	Japan: 2x diamant Feriene Steaten: diamant Frankryk: diamant Austraalje: 12x platina Kanada: 7x platina Grut-Brittanje: 5x platina Nij-Seelân: 5x platina Dútslân: 2x platina wrâldwiid: 4x platina
1994	Merry Christmas	n.f.t.	Japan: 2x diamant Feriene Steaten: 5x platina Austraalje: 5x platina Nij-Seelân: 2x platina Jeropa: platina Kanada: platina Dútslân: goud Grut-Brittanje: goud wrâldwiid: goud
1995	Daydream	Japanske Gouden Skiifpriis foar ynternasjonaal popalbum fan it jier nom. foar in Grammy Award foar bêste songen popalbum nom. foar in Grammy Award foar album fan it jier nom. foar in American Music Award foar favorite pop/rockalbum nom. foar in American Music Award foar favorite soul/R&B-album nom. foar in Soul Train Music Award foar bêste R&B/soulalbum fan in froulike artyst	Japan: 2x diamant Feriene Steaten: diamant Kanada: 7x platina Austraalje: 5x platina Nij-Seelân: 5x platina Jeropa: 3x platina Frankryk: 2x platina Grut-Brittanje: 2x platina Dútslân: platina
1997	Butterfly	Japanske Gouden Skiifpriis foar ynternasjonaal popalbum fan it jier	Japan: diamant Feriene Steaten: 5x platina Austraalje: 2x platina Kanada: 2x platina Nij-Seelân: platina Jeropa: platina Frankryk: 2x goud Grut-Brittanje: goud wrâldwiid: goud
1999	Rainbow	Japanske Gouden Skiifpriis foar ynternasjonaal popalbum fan it jier	Japan: 4x platina Feriene Steaten: 3x platina Kanada: 2x platina Austraalje: goud Dútslân: platina Frankryk: platina Jeropa: platina Nij-Seelân: platina Grut-Brittanje: goud wrâldwiid: platina
2002	Charmbracelet	Japanske Gouden Skiifpriis foar ynternasjonaal popalbum fan it jier	Feriene Steaten: platina Japan: platina Frankryk: goud Grut-Brittanje: goud Kanada: goud Jeropa: goud wrâldwiid: goud
2005	The Emancipation of Mimi	Grammy Award foar bêste contemporary R&B-album Billboard R&B/Hip-Hop Award foar bêste R&B-hiphopalbum Soul Train Music Award foar bêste R&B/soulalbum fan in froulike artyst nom. foar in Grammy Award foar album fan it jier nom. foar in American Music Award foar favorite pop/rockalbum (2005) nom. foar in American Music Award foar favorite soul/R&B-album (2005 & 2006) nom. foar in Billboard Music Award foar bêste Billboard 200-album nom. foar in Billboard Music Award foar bêste R&B/hiphopalbum	Feriene Steaten: 6x platina Kanada: 3x platina Grut-Brittanje: 2x platina Austraalje: platina Japan: platina Jeropa: platina Nij-Seelân: platina Frankryk: goud
2008	E=MC²	nom. foar in American Music Award foar bêste soul/R&B-album	Feriene Steaten: platina Kanada: platina Austraalje: goud Grut-Brittanje: goud Japan: goud
2009	Memoirs of an Imperfect Angel	nom. foar in Soul Train Music Award foar aldertreflikst album	Feriene Steaten: goud Grut-Brittanje: sulver
2010	Merry Christmas II You	n.f.t.	Feriene Steaten: goud
2014	Me. I Am Mariah... The Elusive Chanteuse	n.f.t.	n.f.t.
2018	Caution	n.f.t.	n.f.t.

Soundtrack-albums

Jier	Titel	Prizen en nominaasjes	Resultaat
2001	Glitter	n.f.t.	Feriene Steaten: platina Japan: platina Frankryk: goud wrâldwiid: goud

Live-albums

Jier	Titel	Prizen en nominaasjes	Resultaat
1992	MTV Unplugged	American Music Award foar favorite adult contemporary-album nom. foar in Grammy Award foar bêste popoptreden fan sjongster nom. foar in American Music Award foar favorite soul/R&B-album nom. foar in Soul Train Music Award foar bêste R&B/soulalbum fan in froulike artyst	Feriene Steaten: 3x platina Nij-Seelân: 2x platina Austraalje: platina Kanada: platina Frankryk: 2x goud Grut-Brittanje: goud wrâldwiid: goud

Kompilaasje-albums

Jier	Titel	Prizen en nominaasjes	Resultaat
1998	#1's	Japanske Gouden Skiifpriis foar ynternasjonaal popalbum fan it jier	Japan: 3x diamant Feriene Steaten: 5x platina Kanada: 3x platina Frankryk: 2x platina Grut-Brittanje: 2x platina Jeropa: 2x platina Nij-Seelân: 2x platina Austraalje: platina Dútslân: goud
2001	Greatest Hits	n.f.t.	Austraalje: 2x platina Grut-Brittanje: 2x platina Feriene Steaten: platina Japan: platina Nij-Seelân: platina Frankryk: goud
2008	The Ballads	n.f.t.	Grut-Brittanje: goud
2010	Playlist: The Very Best of Mariah Carey	n.f.t.	n.f.t.
2011	The Essential Mariah Carey	n.f.t.	n.f.t.
2015	#1 to Infinity	n.f.t.	Grut-Brittanje: sulver
2018	Japan Best	n.f.t.	n.f.t.

Extended plays

Jier	Titel	Prizen en nominaasjes	Resultaat
2000	Valentines	n.f.t.	n.f.t.

Remix-albums

Jier	Titel	Prizen en nominaasjes	Resultaat
2003	The Remixes	nominearre foar in Billboard Music Award foar bêste elektroanyske album	n.f.t.

Singles

Eigen singles

Jier	Titel	Prizen en nominaasjes	Resultaat
1990	Vision of Love	Grammy Award foar bêste popoptreden fan in sjongster Billboard Music Award foar bêste single fan in froulike artyst Soul Train Music Award foar bêste R&B/soul-single fan in froulike artyst Soul Train Music Award foar bêste R&B/soul-liet fan it jier BMI Pop Music Award foar bêste lietsjeskriuwer nom. foar in Grammy Award foar plaat fan it jier nom. foar in Grammy Award foar liet fan it jier	Feriene Steaten: goud Austraalje: goud Nij-Seelân: goud
	Love Takes Time	BMI Pop Music Award foar bêste lietsjeskriuwer BMI Pop Music Award foar liet fan it jier	Feriene Steaten: goud Nij-Seelân: goud
1991	Someday	BMI Pop Music Award foar bêste lietsjeskriuwer nom. foar in American Music Award foar bêste dance-single	Feriene Steaten: goud
	I Don't Wanna Cry	BMI Pop Music Award foar bêste lietsjeskriuwer	n.f.t.
	There's Got to Be a Way	n.f.t.	n.f.t.
	Emotions	Billboard Music Award foar bêste single fan in froulike artyst BMI Pop Music Award foar bêste liet nom. foar in Grammy Award bêste popoptreden fan in sjongster	Feriene Steaten: goud Austraalje: goud Nij-Seelân: goud
	Can't Let Go	BMI Pop Music Award foar bêste liet	n.f.t.
1992	Make It Happen	BMI Pop Music Award foar bêste lietsjeskriuwer	Nij-Seelân: goud
	I'll Be There (mei in gastoptreden fan Trey Lorenz)	nom. foar in Grammy Award foar bêste R&B-sjongoptreden fan in duo of groep nom. foar in American Music Award foar favorite pop/rock-single	Feriene Steaten: goud Nij-Seelân: goud Grut-Brittanje: sulver
	If It's Over	n.f.t.	n.f.t.
1993	Dreamlover	Billboard Music Award foar bêste Hot 100 Airplay-nûmer ASCAP Award foar bêste poplietsjeskriuwer BMI Pop Music Award foar bêste lietsjeskriuwer fan it jier BMI Pop Music Award foar bêste poplietsjeskriuwer nom. foar in Grammy Award foar bêste popoptreden fan in sjongster nom. foar in American Music Award foar bêste soul/R&B-single nom. foar in Billboard Music Award foar bêste single fan in froulike artyst	Feriene Steaten: platina Austraalje: goud Nij-Seelân: goud Grut-Brittanje: sulver
	Hero	ASCAP Award foar Rhythm & Soul-lietsjeskriuwer (1994 & 1995) ASCAP Award foar poplietsjeskriuwer (1995) BMI Pop Music Award foar bêste poplietsjeskriuwer nom. foar in Grammy Award foar bêste popoptreden fan in sjongster nom. foar in Billboard Music Award foar bêste Hot 100-single nom. foar in Billboard Music Award foar bêste Hot 100 Airplay-nûmer	Feriene Steaten: platina Austraalje: platina Nij-Seelân: platina Noarwegen: platina Grut-Brittanje: goud Frankryk: sulver wrâldwiid: platina
1994	Without You	n.f.t.	Feriene Steaten: platina Austraalje: platina Dútslân: platina Eastenryk: platina Nederlân: platina Frankryk: goud Grut-Brittanje: goud Nij-Seelân: goud Switserlân: goud
	Never Forget You	n.f.t.	Feriene Steaten: goud
	Anytime You Need a Friend	ASCAP Award foar bêste poplietsjeskriuwer BMI Pop Music Award foar bêste poplietsjeskriuwer (1995 & 1996)	Austraalje: goud Nij-Seelân: goud Grut-Brittanje: sulver
	All I Want for Christmas Is You	n.f.t.	Japan: diamant Feriene Steaten: 2x platina Austraalje: 2x platina Denemark: platina Grut-Brittanje: platina Itaalje: platina Spanje: goud Nij-Seelân: goud
	Joy to the World	n.f.t.	n.f.t.
1995	Fantasy	International Dance Music Award foar dance-plaat fan it jier BMI Pop Music Award foar bêste poplietsjeskriuwer nom. foar in Grammy Award foar bêste popoptreden fan in sjongster nom. foar in Billboard Music Award foar bêst ferkeapjende Hot 100-single nom. foar in Billboard Music Award foar bêst ferkeapjende Hot Dance Maxi-single	Feriene Steaten: 2x platina Austraalje: platina Nij-Seelân: platina Frankryk: sulver Grut-Brittanje: sulver
	One Sweet Day (mei Boyz II Men)	Billboard Music Award spesjale priis foar 16 wiken op nû. 1 ASCAP Award foar bêste Rhythm & Soul-lietsjeskriuwer BMI Pop Music Award foar liet fan it jier BMI Pop Music Award foar bêste lietsjeskriuwer nom. foar in Grammy Award foar plaat fan it jier nom. foar in Grammy Award foar bêste popgearwurking mei sang nom. foar in Billboard Music Award foar bêste 100 Hot-single nom. foar in MTV Video Music Award foar bêste R&B-fideoklip	Feriene Steaten: 2x platina Austraalje: platina Nij-Seelân: platina Noarwegen: platina Frankryk: sulver Grut-Brittanje: sulver
	Open Arms	n.f.t.	n.f.t.
1996	Always Be My Baby	Billboard Music Award foar bêste 100 Hot Airplay-nûmer BMI Pop Music Award foar bêste poplietsjeskriuwer (1997 & 1998) nom. foar in Grammy Award foar bêste R&B-optreden fan in sjongster nom. foar in Billboard Music Award foar bêste 100 Hot-single	Feriene Steaten: 2x platina Austraalje: goud Nij-Seelân: goud Grut-Brittanje: sulver
	Forever	BMI Pop Music Award foar bêste poplietsjeskriuwer	n.f.t.
	Underneath the Stars	n.f.t.	n.f.t.
1997	Honey	ASCAP Award foar bêste poplietsjeskriuwer BMI Pop Music Award foar bêste poplietsjeskriuwer nom. foar in MTV Video Music Award foar bêste fideoklip fan in froulike artyst nom. foar in ALMA Award foar aldertreflikste fideoklip nom. foar in Grammy Award foar bêste R&B-optreden fan in sjongster nom. foar in Grammy Award foar bêste R&B-liet	Feriene Steaten: platina Austraalje: goud Nij-Seelân: goud Grut-Brittanje: sulver
	Butterfly	BMI Pop Music Award foar bêste poplietsjeskriuwer nom. foar in Grammy Award foar bêste popoptreden fan in sjongster	n.f.t.
1998	The Roof	n.f.t.	n.f.t.
	Breakdown (mei in gastoptreden fan Krayzie Bone en Wish Bone)	n.f.t.	Nij-Seelân: goud
	My All	BMI Pop Music Award foar bêste poplietsjeskriuwer nom. foar in MOBO Award foar bêste ynternasjonale single nom. foar in Billboard Music Award foar bêst ferkeapjende Hot Dance Maxi-single	Feriene Steaten: platina Frankryk: sulver Grut-Brittanje: sulver
	Sweetheart (mei Jermaine Dupri)	n.f.t.	n.f.t.
	When You Believe (mei Whitney Houston)	nom. foar in Grammy Award foar bêste popgearwurking mei sang nom. foar in ALMA Award foar aldertreflikste fideoklip nom. foar in ALMA Award foar aldertreflikste útfiering fan in liet foar in spylfilm	Belgje: platina Noarwegen: platina Sweden: platina Switserlân: platina Feriene Steaten: goud Austraalje: goud Dútslân: goud Frankryk: goud Grut-Brittanje: sulver
1999	I Still Believe	n.f.t.	Feriene Steaten: platina
	Heartbreaker (mei in gastoptreden fan Jay-Z)	nom. foar in Soul Train Music Award foar bêste R&B/soul-single fan in froulike artyst	Austraalje: platina Nij-Seelân: platina Feriene Steaten: goud Frankryk: goud Grut-Brittanje: sulver
2000	Thank God I Found You (mei in gastoptreden fan Joe en 98 Degrees)	BMI Urban Music Award foar bêste lietsjeskriuwer fan it jier nom. foar in Grammy Award foar bêste popgearwurking mei sang	Feriene Steaten: goud
	Crybaby (mei in gastoptreden fan Snoop Dogg)	n.f.t.	n.f.t.
	Can't Take That Away (Mariah's Theme)	n.f.t.	n.f.t.
	Against All Odds	n.f.t.	Grut-Brittanje: goud
2001	Loverboy (mei in gastoptreden fan Cameo)	Billboard R&B/Hip-Hop Award foar bêst ferkeapjende R&B/hiphop-single nom. foar in Billboard Music Award foar bêst ferkeapjende Hot 100-single	Feriene Steaten: goud Austraalje: goud
	Never Too Far	n.f.t.	n.f.t.
	Don't Stop (Funkin' 4 Jamaica) (mei in gastoptreden fan Mystikal)	n.f.t.	n.f.t.
	Reflections (Care Enough)	n.f.t.	n.f.t.
	Never Too Far/Hero Medley	n.f.t.	n.f.t.
2002	Through the Rain	nom. foar in Billboard Music Award foar bêst ferkeapjende Hot Dance Maxi-single	Austraalje: goud Kanada: goud
2003	Boy (I Need You) (mei in gastoptreden fan Cam'ron)	nom. foar in MTV Video Music Award Brazil foar bêste ynternasjonale fideoklip	n.f.t.
	Bringin' On the Heartbreak	n.f.t.	n.f.t.
2005	It's Like That	nom. foar in Grammy Award foar bêste popoptreden fan in sjongster	Feriene Steaten: goud Austraalje: goud
	We Belong Together	Grammy Award foar bêste R&B-optreden fan in sjongster Grammy Award foar bêste R&B-liet World Music Award foar meast draaide single Billboard Music Award foar bêste 100 Hot-single Billboard Music Award foar bêst ferkeapjende Hot 100 Airplay-nûmer Billboard Music Award foar bêste rhymthmic-liet Billboard Music Award foar Hot 100-liet fan it desennium Billboard Music Award foar radioliet fan it desennium Radio Music Award foar liet fan it jier (mainstream-hitradio) Radio Music Award foar liet fan it jier (Urban & Rhythmic-radio) Soul Train Music Award foar bêste R&B/soul-single fan in froulike artyst ASCAP Award foar liet fan it jier ASCAP Award foar liet fan it desennium BMI Pop Music Award foar bêste hitlistliet BMI Pop Music Award foar meast draaide nûmer BMI Urban Music Award foar liet fan it jier Vibe Award foar bêste R&B-liet Teen Choice Award foar bêste leafdesliet nom. foar in Grammy Award foar plaat fan it jier nom. foar in Grammy Award foar liet fan it jier nom. foar in MTV Video Music Award foar bêste fideoklip fan in froulike artyst nom. foar in MTV Video Music Award foar bêste R&B-fideoklip nom. foar in MTV Japan Video Music Award foar bêste R&B-fideoklip nom. foar in MTV Japan Video Music Award foar bêste fideoklip fan in froulike artyst nom. foar in Billboard Music Award foar bêste Pop 100-liet nom. foar in Billboard Music Award foar bêste Pop 100 Airplay-nûmer nom. foar in Billboard Music Award foar bêste Hot R&B/Hip-Hop-liet nom. foar in Billboard Music Award foar bêste Hot R&B/Hip-Hop Airplay-nûmer nom. foar in Billboard Music Award foar bêste Adult R&B-liet nom. foar in Billboard Music Award foar bêste Hot Dance Club Play-single nom. foar in Billboard R&B/Hip-Hop Award foar bêste R&B/hiphop-liet nom. foar in Billboard R&B/Hip-Hop Award foar bêste R&B/Hip-Hop Airplay-nûmer	Feriene Steaten: platina Austraalje: platina Nij-Seelân: platina Grut-Brittanje: sulver
	Shake It Off	BMI Pop Music Award foar bêste poplietsjeskriuwer BMI Pop Music Award foar meast draaide nûmer nom. foar in MTV Video Music Award foar bêste R&B-fideoklip nom. foar in MTV Australia Video Music Award foar bêste R&B-fideoklip	Feriene Steaten: 4x platina Austraalje: goud
	Get Your Number (mei in gastoptreden fan Jermaine Dupri)	n.f.t.	n.f.t.
	Don't Forget about Us	BMI Pop Music Award foar bêste poplietsjeskriuwer BMI Pop Music Award foar meast draaide liet BET Award-publykspriis nom. foar in Grammy Award foar bêste popoptreden fan in sjongster nom. foar in Grammy Award foar bêste R&B-liet nom. foar in Billboard Music Award foar bêste Hot Dance Club Play-single	Feriene Steaten: goud Austraalje: goud
2006	Say Somethin' (mei in gastoptreden fan Snoop Dogg)	n.f.t.	n.f.t.
2007	Touch My Body	BMI Pop Music Award foar bêste poplietsjeskriuwer nom. foar in MTV Video Music Award foar bêste fideoklip fan in froulike artyst nom. foar in MTV Video Music Award Japan foar bêste karaoke-liet nom. foar in BET Award foar bêste komyske fideoklip	Feriene Steaten: platina Japan: goud
	Bye Bye	nom. foar in Teen Choice Award foar bêste R&B-nûmer	n.f.t.
	I'll Be Lovin' U Long Time	n.f.t.	n.f.t.
	I Stay in Love	n.f.t.	n.f.t.
2009	Obsessed	ASCAP Award foar meast draaide liet nom. foar in Billboard Music Award foar bêst ferkeapjende 100 Hot-single	Feriene Steaten: platina Austraalje: goud
	I Want To Know What Love Is	n.f.t.	n.f.t.
	H.A.T.E.U.	n.f.t.	n.f.t.
2010	Up Out My Face (mei in gastoptreden fan Nicki Minaj)	n.f.t.	n.f.t.
	Angels Cry (mei in gastoptreden fan Ne-Yo)	n.f.t.	n.f.t.
	Oh Santa!	n.f.t.	n.f.t.
2011	When Christmas Comes (mei John Legend)	n.f.t.	n.f.t.
2012	Triumphant (Get 'Em) (mei in gastoptreden fan Rick Ross en Meek Hill)	n.f.t.	n.f.t.
2013	Almost Home	nom. foar in World Music Award foar wrâlds bêste liet nom. foar in World Music Award foar wrâlds bêste fideoklip	n.f.t.
	#Beautiful (mei in gastoptreden fan Miguel)	nom. foar in World Music Award foar wrâlds bêste liet nom. foar in World Music Award foar wrâlds bêste fideoklip	Feriene Steaten: platina Austraalje: platina Denemark: goud Nij-Seelân: goud
	The Art of Letting Go	nom. foar in World Music Award foar wrâlds bêste liet	n.f.t.
2014	You're Mine (Eternal)	nom. foar in World Music Award foar wrâlds bêste liet nom. foar in World Music Award foar wrâlds bêste fideoklip	n.f.t.
	You Don't Know What to Do (mei in gastoptreden fan Wale)	n.f.t.	n.f.t.
2015	Infinity	n.f.t.	n.f.t.
2017	I Don't (mei in gastoptreden fan YG)	n.f.t.	n.f.t.
2018	With You	n.f.t.	n.f.t.
2019	A No No	n.f.t.	n.f.t.
	In the Mix	n.f.t.	n.f.t.

Gastsingles

Jier	Titel	Prizen en nominaasjes	Resultaat
1994	Endless Love (mei Luther Vandross)	nom. foar in Grammy Award foar bêste popgearwurking mei sang	Austraalje: platina Feriene Steaten: goud Nij-Seelân: goud Grut-Brittanje: sulver
2000	Against All Odds (mei Westlife)	n.f.t.	Grut-Brittanje: sulver
	Things That U Do (mei Jay-Z)	n.f.t.	n.f.t.
2003	I Know What You Want (mei Busta Rhymes)	nom. foar in MTV Video Music Award foar bêste hiphop-fideoklip	Austraalje: goud Nij-Seelân: goud
2004	U Make Me Wanna (mei Jadakiss)	n.f.t.	n.f.t.
2007	Lil' L.O.V.E. (mei Bone Thugs-n-Harmony)	n.f.t.	n.f.t.
2008	Just Stand Up (mei oare artysten tsjin kanker)	n.f.t.	n.f.t.
2009	My Love (mei The-Dream)	n.f.t.	n.f.t.
2010	Everybody Hurts (mei oare artysten foar Haïty)	n.f.t.	n.f.t.
2011	All I Want for Christmas Is You (Superfestive!) (mei Justin Bieber)	n.f.t.	n.f.t.

Prizen en nominaasjes

Foar in folsleine list mei alle prizen en nominaasjes fan Mariah Carey, sjocht op dizze side, op 'e Ingelske Wikipedy.

Keppelings om utens

• (in) Offisjele webside fan Mariah Carey
• (in) Mariah Carey yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons  Ofbylden dy't by dit ûnderwerp hearre, binne te finen yn de kategory Mariah Carey fan Wikimedia Commons.