Ald-Meiers Partij

	Ald-Meiers Partij
	plak en tiid
lân	Nederlân
provinsje	Fryslân
gemeente	De Waadhoeke
plak	Hitsum
datum	1e sneon fan augustus
	bysûnderheden
soarte evenemint	sportevenemint (keatsen)
bestean	2000 – no
oprjochter	Pieter Winsemius
org. troch	K.F. De Iendracht
	offisjele webside
	www.hitzum.com/ald-meiers-partij

De Ald-Meiers Partij is in keatswedstryd dy't alle jierren op 'e earste sneon fan augustus holden wurdt yn it Fryske doarp Hitsum. Der kinne allinne partoeren oan meidwaan dy't besteane út famkes yn 'e leeftyd fan 14 oant en mei 16 jier. Dêrmei is de Ald-Meiers Partij de froulike wjergader fan 'e Freulepartij yn Wommels. De wedstryd waard yn 2000 foar it earst holden en de organisaasje is yn 'e hannen fan 'e Hitsumer Keatsferiening De Iendracht. Yn 2019 wurdt it tweintichjierrich jubileum fan it evenemint fierd.

Skiednis[bewurkje seksje | boarne bewurkje]

De grûnslach foar de oprjochting fan 'e Ald-Meiers Partij waard yn 1997 lein troch in keatsdemonstraasje dy't troch Keatsferiening De Iendracht organisearre waard op Westerhitsum, ta gelegenheid fan 'e famyljereüny fan it laach Winsemius. Dy famylje hat nammentlik syn woartels yn Hitsum. Om dyselde tiid hinne waard it frouljuskeatsen hieltyd wichtiger, en yn Hitsum wie dêr mear oandacht foar as yn 'e measte Fryske doarpen, om't Hitsum krekt in hiel sterk frouljuspartoer hie. Sadwaande bestie der al in idee foar de oprjochting fan in wedstryd foar famkes as tsjinfuotter fan wat de Freulepartij yn Wommels foar jonges is. Troch yntinsive gearwurking mei de eardere minister fan Miljeu Pieter Winsemius slagge it De Iendracht om sa'n wedstryd yndie fan 'e grûn te krijen. De earste edysje fan 'e Ald-Meiers Partij waard op 5 augustus 2000 ferkeatst.

Dielname[bewurkje seksje | boarne bewurkje]

Dielname oan 'e Ald-Meiers Partij stiet iepen foar famkespartoeren fan alle by it KNKB oansletten keatsferienings. Eltse feriening mei ien partoer foar dizze partij ynskriuwe. Keatsters dy't de wedstryd al in kear wûn hawwe, meie net wer meidwaan. De regels foar dielname binne dêrmei fierhinne gelyk oan dy fan 'e Freulepartij yn Wommels.

Tradysjes[bewurkje seksje | boarne bewurkje]

Mei it doel in toppartij te organisearjen is de Ald-Meiers Partij opset as in wedstryd mei tradysjes.

It lotsjen wurdt de deis tefoaren holden yn it doarpshûs fan Hitsum, en it wurdt dien troch de keninginne fan 'e Frouljus-PC fan in jier earder. Op 'e dei fan 'e partij komme de ferienings mei harren findels yn Hitsum. Se geane yn optocht nei it fjild, dêr't de spylsters foar de partij oan it publyk foarsteld wurde.

De winneressen winne klokjes, mei gouden klokjes foar de earste priis. De wikselpriis is de 'Sulveren Pong', oanbean troch de famyljes Winsemius en Fockema Adreae, neikommelingen fan twa meiers yn Hitzum. Dat is ek wêr't de namme fan 'e partij weikomt. De priis stelt in ponge foar sa't de meiers dy brûkten as se de hier betelje moasten. Ynsafier mooglik wurdt de útrikking fan 'e prizen ferrjochte troch in spesjale gast en de frou fan 'e kommissaris fan de Kening. Ta einbeslút wurde de winneressen troch it doarp riden yn in iepen reau lutsen troch Fryske hynders.

Status[bewurkje seksje | boarne bewurkje]

Mei dizze opset is de Ald-Meiers Partij gau in wichtige partij yn it frouljuskeatsen wurden. Sadwaande wurdt de ôfdielingspartij fan Skettens sûnt 2002 oantsjut as de 'Revâns Ald-Meiers Partij'. De Ald-Meiers Partij heart mei de Jong Famme Partij yn Mantgum, de Frouljus-PC yn Weidum en it NK Dames fan it KNKB ta de wedstriden dy't meitelle foar de 'Fjouwer Wimpels' fan it frouljuskeatsen.

Winneressen fan 'e Ald-Meiers Partij[bewurkje seksje | boarne bewurkje]

Hjirûnder in list mei de winneressen fan 'e Ald-Meiers Partij.^[1]

jier	plak	keatsters
2000	Boalsert	Fenna Zeinstra Leonie Zeinstra as in twafammepartoer
2001	Hallum	Nynke Ponne Janke Stienstra Jindra ten Kate
2002	Minnertsgea	Esther Groeneveld Jannine Klaver Maaike Joostema
2003	Ie	Klaske de Jong Sjoukje Visser Aukje van Kuiken
2004	Penjum	Marieke de Jong Maaike Osinga Maaike Wind
2005	Boalsert	Melissa van der Wei Afke Walstra Feikje Bouwhuis
2006	Goaiïngea	Wiljo Sybrandy Marije vd Meer as in twafammepartoer
2007	Easterein	Jildou Jorritsma Marije Hiemstra Anke Marije Pompstra
2008	Frjentsjer	Manon Scheepstra Rianne Vellinga Marit Kuperus
2009	Frjentsjer	Joukje Salverda Lisanne Moraal Iris van der Veen
2010	Grou	Renske Kalsbeek Marte Altenburg Nynke Sinnema
2011	Easterein	Tineke Dijkstra Martine Tiemersma Jelien Pompstra
2012	Minnertsgea	Nieke Wateler Jildou van Dijk Lusanne Klaver
2013	Peins	Hiske Zeinstra Marrit Zeinstra Leentsje Bootsma
2014	Wommels	Hedwich de Boer Martzen Deinum Sjanet Wijnia
2015	Makkum	Boukje-Ellen Bosma Lobke Vlasbloem Kim Dijkstra
2016	Wytmarsum	Sjoukje Stuiver Selma van der Molen Anneke Smid
2017	Easterein	Roelie Kroondijk Selma de Boer Jeska Terpstra
2018	Makkum	Anouk Smink Larissa Smink Chantal de Witte
2019	Warkum	Nynke Kuipers Naomi Wiersma Gerde Lycklama à Nijeholt
2020	oergien fanwegen de koroanafiruspandemy
2021	Boalsert	Noa Elzinga Rixt Blanke Inge Blanke
2022	Dronryp	Iris Veltman Lisanne Scharringa Senne Idsardi
2023	Lollum-Waaksens	Britt Joustra Lisanne Venema Jeldau Koopmans