Nes (It Hearrenfean)

Nes (It Hearrenfean)
Wettertoer
Emblemen
Bestjoer
Lân	Nederlân
Provinsje	Fryslân
Gemeente	It Hearrenfean
Sifers
Ynwennertal	1.025 (1 jannewaris 2023)
Oerflak	8,43 km², wêrfan - lân: 7,87 km² - wetter 0,56 km²
Befolkingsticht.	132 ynw./km²
Oar
Tiidsône	UTC +1
Simmertiid	UTC +2
Koördinaten	53° 03' N 5° 51' E
Kaart fan Akkrum-Nes
Offisjele webside
Side Akkrum-Nes
Kaart

Nes is ien fan de doarpen yn 'e gemeente It Hearrenfean. It doarp leit mei de bebouwing oan Akkrum, sadat meast sprutsen wurdt oer Akkrum-Nes. It doarp leit op it plak dêr't de Nesker Sylroede op de Boarn útkomt. De namme, dy't yn 1243 foar it earst neamd wurdt, hat it krigen fan de punt lân tusken dizze twa wetters. Under it doarp falle ek de buorskippen Bokkum, Burstum, Pean en Soarremoarre.

It doarp hat 1.025 (1 jannewaris 2023) ynwenners.

Skiednis

De ruïne fan it konvint fan Nes yn 1722

Nes is ûntstien op in terp oan de noardkant fan de Boarn, eastlik fan de Nesker Sylroede. Op dy terp stie fan 1228 oant 1580 it Nesker Konvint, in kommanderij fan de Dútske Oarder. Nei de ynfiering fan de reformaasje ferfoel it gebou. Yn de 18e iuw wie dat sa slim wurden dat men om 1800 hinne de klok oerbrocht nei in apart klokhús. Op de terp binne no allinnich noch it klokhús en it tsjerkhôf oer.

Oant yn de 19e iuw lei it grutste part fan it doarp yn de hoeke tusken Boarn en Sylroede westlik fan de terp by de Neskersyl. Akkrum en Nes leine oarspronklik likernôch oardel kilometer fan inoar ôf. Yn de 20e iuw hat der in grutte útwreiding west oan de súdkant fan de Boarn en oan it begjin fan de 21e iuw is oan de westkant fan de Sylroede de grutte útwreiding Boarnstee byboud. Tsjintwurdich is der gjin iepen romte mear tusken Nes en Akkrum.

Oant de gemeentlike weryndieling fan 1984 hearde Nes by de eardere gemeente Utingeradiel. Dêrnei makke it plak diel út fan de gemeente Boarnsterhim en sûnt 2014 fan de gemeente It Hearrenfean.

Mienskip

Nes docht in soad yn 'e mande mei it westlik oangrinzgjende doarp Akkrum en hat sûnt 1950 in mienskiplik doarpsbelang. Nes en Akkrum hawwe ek in mienskiplike Mulfyfunksjonele Akkomodaasje. Sûnt 2019 hat it doarp mei Akkrum in doarpskeamer.

Tsjerke

• PKN Nes-Akkrum

Skoalle

MFA Akkrum-Nes

• Protestantsk-kristlike basisskoalle dûmny Hasper
• Iepenbiere basisskoalle Akkrum

Ferienings

It ferieningslibben fan Nes is mienskiplik mei Akkrum.

Badmintonferiening De Swiepers Fûgelwacht Akkrum Fuotbalferiening Akkrum Gymnastykferiening Hercules feriening Akkrum Ald en Nij Iisklub Foarút

Keatsferiening Akkrum-Nes Muzykferiening De Harmony Shantykoar De Kromme Knilles Tennisferiening Akkrum Wettersportferiening Iendracht

Befolkingsferrin

Jier	1840	1913	1954	1959	1964	1969	1973	1999
Ynwenners	98	198	205	195	202	168	163	199
Jier	2002	2005	2010	2015	2020
Ynwenners	575	1000	1107	1086	1060

(Boarnen: 1840: Plaatsengids.nl; 2015 en 2020: Alle Cijfers)

Ferbinings

Nes leit oan de âlde Leppedyk en de A32, dêr't it lykwols allinnich oer de N392 ferbining mei hat. De A32 giet hjir ûnder it Leppe-akwadukt troch om't ek de Boarn troch Nes rint. Dy rivier komt út it easten fan Aldeboarn en rint nei it westen nei Akkrum. Yn it doarp giet fan de Boarn de Nesker Sylroede troch de Neskersyl nei it noarden, nei de Peanster Ie en fierder nei Grou.

Ferskaat

Klokkestoel

• Op it begraafplak stiet ien fan de klokkestuollen yn Fryslân.
• De wettertoer fan Nes is in markant beaken yn it lânskip fan Mid-Fryslân.
• Oer it wetter komt troch Nes de lange Turfrûte. Oer lân is it doarp ûnderdiel fan it Jabikspaad.

Strjitten

Burstum, Bokkumerwâl, Burdinewei, De Harhammer, De Harke, De Iperen Poarte, De Oper, De Opstekker, De Reak, De Rolpeal, De Seine, De Strikel, De Syl, De Tiempeal, De Wurdze, It Harspit, It Swee, Kleasterwei, Pean, Soarremoarre, Sodumerdyk, Sylroedepaad.

Sjoch ek

• Fryske doarpen

Boarnen, noaten en referinsjes

Boarnen, noaten en/as referinsjes:

Commons Wikimedia Commons  Ofbylden dy't by dit ûnderwerp hearre, binne te finen yn de kategory Nes (It Hearrenfean) fan Wikimedia Commons.