Kevin Sorbo

Ut Wikipedy
Gean nei: navigaasje, sykje
Kevin Sorbo
Kevin Sorbo 03.jpg
persoanlike bysûnderheden
echte namme Kevin David Sorbo
nasjonaliteit Flag of the United States.svg Amerikaansk
berne 24 septimber 1958
berteplak Mound (Minnesota)
etnisiteit Flag of Norway.svg Noarsk
Flag of Germany.svg Dútsk
Flag of England.svg Ingelsk
Flag of Scotland.svg Skotsk
jierren aktyf 1986 – no
offisjele webside
www.kevinsorbo.net

Kevin Sorbo (folút: Kevin David Sorbo; Mound (Minnesota), 24 septimber 1958), is in Amerikaansk akteur, regisseur, tillefyzjeprodusint en autobiografysk skriuwer fan etnysk Noarsk komôf, dy't benammentlik bekend wurden is troch syn titelrol yn 'e fantasytillefyzjesearje Hercules: The Legendary Journeys en troch syn rol as kaptein Dylan Hunt yn 'e science fictionsearje Andromeda.

Jonkheid en oplieding[bewurkje seksje | boarne bewurkje]

Sorbo is hikke en tein yn Mound, yn 'e steat Minnesota. Hy is de soan fan Ardis en Lynn Sorbo, in ferpleger en in wiskunde- en biologyleararesse. Syn famylje is fan Noarsk komôf, mei dêropta noch wat Ingelsk, Dútsk en Skotsk bloed, en hy is luthersk grutbrocht. Sorbo folge de middelbere skoalle oan 'e Mound Westonka High School en studearre dêrnei marketing en reklamekunde oan 'e Minnesota State University Moorhead te Moorhead. As bybaan begûn er doe as model te wurkjen. Fia dat modellewurk rûgele er min of mear by fersin de aktearwrâld yn, begjinnende yn 1986 mei in stikmannich gastroltsjes yn tillefyzjesearjes as Murder, She Wrote en The Commish.

Karriêre[bewurkje seksje | boarne bewurkje]

Sorbo wie kandidaat foar de rol fan Superman yn 'e rige Lois and Clark: The New Adventures of Superman, dy't úteinlik nei Dean Cain gie, en ek foar de rol fan Fox Mulder yn The X Files, wêrfoar't úteinlik David Duchovny oannommen waard. Mar yn 1994 krige er bekendheid mei in fiiftal súksesfolle tillefyzjefilms wêryn't er de Grykske held en healgod Herkules (of Heraklês) spile: Hercules and the Amazon Women, Hercules and the Lost Kingdom, Hercules and the Circle of Fire, Hercules in the Underworld en Hercules in the Maze of the Minotaur. Dy tsjinnen as pilots foar de tillefyzjesearje Hercules: The Legendary Journeys, dy't fan 1995 oant 1999 rûn, en dêr't Sorbo withoe populêr mei waard. Hy spile Herkules ek ferskate kearen yn in gastrol yn 'e spin-off-searje Xena: Warrior Princess, mei Lucy Lawless yn 'e titelrol.

Kevin Sorbo yn 2008.

Yn 1997 hie Sorbo de haadrol yn 'e fantasyfilm Kull the Conqueror, en fan 2000 oant 2005 spile er kaptein Dylan Hunt yn 'e science fiction-rige Andromeda. Njonken syn aktearkarriêre wurke Sorbo ek as stimakteur foar ferskate tekenfilms en fideospultsjes, regissearre er ferskate ôfleverings fan Hercules: The Legendary Journeys, en wied er fan 2001 oant 2005 produsint fan Andromeda. Sûnt 2005 hat er fral gast- en byrollen hân yn searjes lykas The O.C. en Two and a Half Men, hoewol't er ek spile yn films as Walking Tall: The Payback (2007), Avenging Angel (2007) en Meet the Spartans (2008).

Priveelibben[bewurkje seksje | boarne bewurkje]

Sûnt 5 jannewaris 1998 is Sorbo troud mei aktrise Sam Jenkins, dy't er in jier earder met hie doe't se in gastrol yn Hercules hie. Se hawwe trije bern: Braedon Cooper Sorbo (2001), Shane Haaken Sorbo (2004) en Octavia Flynn Sorbo (2005).

Yn 1997 ûntwikkele Sorbo in aneurisma yn syn skouder, dêr't er trije oerhalen efterinoar fan krige. Fan gefolgen wie syn sûnens de earstfolgjende jierren swak, mar dat hold er geheim foar it publyk. Dit wie ek de reden dat yn 'e beide lêste seizoenen fan Hercules (1998 en 1999), om Sorbo te ûntsjen, de rol fan Herkules wat belytse waard en der mear en gruttere gastrollen tafoege waarden. De oerhalen waarden nei alle gedachten feroarsake troch it loslitten fan bloedpropkes út it aneurisma, doe't Sorbo sûnder euvelmoed foar in sear skouder nei de fysioterapeut gie. Se makken dat er foargoed 10% fan syn gesichtsfermogen ferlear, en him lange tiid slop fielde en lykwichtsstoarnissen en migrênes hie. Yn syn autobiografy True Strength, dy't yn 2011 útkaam, brocht Sorbo dit allegear foar it earst oan it ljocht, en dêryn fertelde er ek hoe't syn nije frou Sam him holpen hie om wer op te betterjen.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.