Alternative Alvestêdetocht

De Alternative Alvestêdetocht is in reedrydtocht fan 200 kilometer dy't alle jierren holden wurdt as alternatyf foar de Alvestêdetocht. De organisaasje fan de oarspronklike tocht is útelkoar gongen sadat der no twa tochten holden wurde, op de Kallavesi Mar by Kuopio yn Finlân en op de Weissensee yn Eastenryk.

Skiednis

Om't de Alvestêdetocht net alle jierren riden wurde kin wurdt der sûnt 1974 in alternative tocht holden yn in lân dêr't se al natueriis hawwe. It earste jier wie dat op it Mjøsa by Lillehammer, yn Noarwegen. Yn 1975 wie der dêr gjin goed iis, dat de grutte tocht gong net troch en de organisaasje socht nei in oar plak. Yn 1976 waard dat de Vesijärvi Mar by Lahti yn Finlân, dat in sukses waard.

Foar 1976 hie it KNSB him ôfsidich holden wat dy tocht oanbelange, lykas de measte sportbûnen dogge as der lju mei in nij idee oankomme. Doe't de tocht in sukses wie, woe it bûn ynienen ek part hawwe oan de organisaasje. It bûn en de organisaasje koenen beide de diplomatike oanpak net fine, wat it gefolch hie dat it noch jierren duorje soe eart de gearwurking yn oarder wie.

In probleem yn Lahti wie al dat der wetter op it iis kaam wie, dat der waard fierder socht. Fan 1977 oant en mei 1980 waard de tocht holden by Oulu yn Finlân, op it iis fan de Botnyske Golf. Yn 1981 waard dochs wer yn Lathi riden. Yn 1983 gong de alternative alvestêdetocht nei Newport, yn Fermont yn de Feriene Steaten fan Amearika, en in jier letter nei Ottawa yn Kanada.

Nei dizze alternative lokaasjes kaam der in ferskil yn ynsicht yn de organisaasje. Guon woenen werom nei Finlân, wylst oaren dêr perfoarst net mear hinne woenen. Krekt yn it jier dat der wer in echte Alvestêdetocht hâlden waard foel de organisaasje dy't it alternatyf fersoarge hie útelkoar. De iene helte organisearret sûnt 1985 de alternative alvestêdetocht yn Finlân, yn Kuopio of Oulu. De oare helte gong yn 1985 en 1986 nei de Mazuryske Marren yn Poalen. Nei't in tredde Poalske tocht yn 1987 mislearre, gong de organisaasje yn 1989 nei de Weissensee yn Eastenryk.

De Finske tocht waard al in skoftke ûnder auspysjes fan de KNSB organisearre, mar sûnt 2000 waard de tocht yn gearwurking mei de KNSB organisearre. Ein 2005 luts de Stifting Alternative Alvestêdetocht Finlân him tebek út de Finske organisaasje, nei't it Finske organisaasjekomitee mear gearwurking mei de KNSB socht hie.

Hjoeddeiske situaasje

Der wurde op it stuit alle jierren twa Alternative Alvestêdetochten organisearre, troch twa organisaasjes, yn twa lannen. Mannich kranteman dy't it net mear folgje koe hat al skreaun oer De Weissensee yn Finlân, mar de organisaasjes liken net fan doel de nuvere situaasje te ferbetterjen.

Stifting Alternative Alvestêdetocht

De tocht yn Finlân wurdt sûnt ein 2005 organisearre troch in Finsk organisaasjekomitee yn gearwurking mei de KNSB. Hy wurdt holden as in kombinearre toertocht en wedstriid. De tocht wurdt riden yn meardere omgongen, mei in totale langte fan 200 kilometer.

Der wurdt ek in tocht oer 100 kilometer organisearre. By de froulju is net altiten genôch oanmelding foar in wedstriid oer 200 kilometer, dat somtiden ride dy ek de 100 kilometer. De tocht wurdt holden oan de ein fan it wedstrydseizoen, yn de lêste wike fan febrewaris of de earste wike fan maart. Om de tocht hinne binne ferskate oare wedstriden en oare iissporten, dy't tegearre in wike fan wintersport foarmje.

Yn 2001 wie de tocht bysûnder. Fanwege min iis wienen de omgongen koarter as oars, 10 kilometer yn stee fan 25, wêrtroch de riders tichter opelkoar kamen. Om't de organisaasje dan net mear sjen koe wa yn hokfoar omgang ride, moasten de dielnimmers echt stimpelje, wat oars by de alternatyve alvestêdetocht net dien wurdt.

Stifting Wintermaraton

De tocht yn Eastenryk wurdt organisearre troch de Stifting Wintermaraton. De datum is altiten yn de lêste wike fan jannewaris of de earste wike fan febrewaris. De tocht wurdt riden yn meardere omgongen, mei in totale langte fan 200 kilometer. Der wurde apart in wedstriid foar wedstriidriders, toertochten en in iepen wedstriid organisearre. Tegearre mei oare reedrydeveneminten foarmje dizze tochten in wike reedriden op de Weissensee.

Utslaggen

In ûnfolsleine list fan útslaggen:

Mienskiplike organisaasje

1980	Jan Roelof Kruithof	Havelte
1979	Jan Roelof Kruithof	Havelte
1978	Jan Roelof Kruithof	Havelte
1977	Jan Roelof Kruithof	Havelte
1976	Jan Roelof Kruithof	Havelte
1974	Jan Roelof Kruithof	Havelte

Finlân

Froulju

2005	Belinda Hirsh	Grut-Brittanje	112,5
2004	Miranda van der Haring	Seewâld	100
2003	Nauta Nynke	Amsterdam	200
2002	Daniëlle Bekkering	De Ham	100
2001	Petra de Boer	Amsterdam	100
2000	Kathalijne Oudhoff	Heiloo	200
1999	Kathalijne Oudhoff	Heiloo	200
1998	Baukje Bron	Aldeberkeap	200

Manlju

2006	Tristan Loy	Frankryk	120
2005	Yoeri Takken	Amsterdam
2004	Casper Helling	Wageningen
2003	Jan Maarten Heideman	Aldebroek
2002	Bas van Hest	Alfen
2001	Jan Maarten Heideman	Aldebroek
2000	Ruud Borst	Sint Nyk
1999	Bert Verduin	Hiemtsjerkerdun
1998	Rob van Meggelen	Amsterdam
1987	Jan Kooiman	Ammerstol

Eastenryk

Froulju

2006	Elma de Vries	De Haule
2005	Petra Grimbergen	Nij Beets
2004	Petra Grimbergen	Nij Beets
2003	Petra Grimbergen	It Hearrenfean
2002	Petra Grimbergen	It Hearrenfean
2001	Gretha Smit	Warmenhuzen
2000	Gretha Smit	Warmenhuzen
1999	Klasina Seinstra	Sint Jansgea
1998	Gretha Smit	Warmenhuzen
1997	Klasina Seinstra	Sint Jansgea
1996	Klasina Seinstra	Sint Jansgea
1995	Klasina Seinstra	Sint Jansgea
1994	Dukke Zijlstra	Baarlo
1993	Neeke Smit	Skylge
1992	Jopie van Wegen	Eemnes
1991	Neeke Smit	Skylge
1990	Alida Pasveer	Grins
1989	Alida Pasveer	Grins

Manlju

2006	Bertjan van der Veen	De Jouwer
2005	Jeroen de Vries	Sint Nyk
2004	Henk Angenent	Woubrêge
2003	Ruud Borst	Sint Nyk
2002	Miel Roozendaal	Warmenhuzen
2001	Erik Hulzebosch	Loazen
2000	Arjan Schreuder	Den Ilp
1999	Peter Baars	Nij-Fennep
1998	Peter de Vries	It Hearrenfean
1997	Ruud Borst	Sint Nyk
1996	Peter de Vries	It Hearrenfean
1995	Lammert Huitema	Roaden
1994	Erik Hulzebosch	Gramsbergen
1993	Jan Kooiman	Ammerstol
1992	Egbert Vossebelt	Ermelo
1991	Hylke Boerstra	Bremen
1990	Jan Oliemans	Amsterdam
1989	Dries van Wijhe	Easterwâlde

Keppelings om utens

• Webstee fan de Finske Iismaraton
• Webstee fan de Stifting Wintermaraton (Nederlânsk)
• Webstee foar it maratonreedriden (Nederlânsk)