Q (James Bond)

Q personaazje út 'e James Bond-searje
Akteur Desmond Llewelyn spile Q yn op twa nei alle James Bond-films fan Eon Productions oant syn ferstjerren yn 1999.
persoanlike bysûnderheden
bynamme	Q
sekse	manlik
soarte personaazje	minske
nasjonaliteit	Britsk
berop/amt	kertiermaster fan MI6
oare ynformaasje
besibbe   personaazjes	James Bond M Miss Moneypenny Felix Leiter
geastlike heit	Richard Maibaum
ûntstean	1963

Q is yn 'e James Bond-filmsearje de koadenamme fan 'e kertiermaster (Ingelsk: quartermaster, dêrfandinne "Q") fan 'e Britske ynljochtingetsjinst MI6. Likemin as by M, it haad fan MI6, is dizze oantsjutting persoanspesifyk; ynstee giet er fan persoan nei persoan oer mei de funksje. Q stiet oan it haad fan 'e (fiktive) research and development-ôfdieling fan MI6 dy't Q Branch hjit, en it is sadwaande syn taak om geheim agint James Bond ta te rissen mei nije útfinings en technologyske snufkes dy't him by steat stelle syn misjes ta in goede ein te bringen.

Untstean en ynspiraasje

It personaazje Q spilet gjin rol yn 'e oarspronklike James Bond-romans fan Ian Fleming, hoewol't der wol ferskate kearen nei him en syn ôfdieling ferwiisd wurdt. Sa wurdt yn 'e roman Casino Royale tsjin Bond sein: "Freegje Q mar om alle gereid dêr'tst ferlet fan hast", en yn Diamonds Are Forever: "Dêr giet Q Branch oer." Charles Fraser-Smith, dy't yn 'e Twadde Wrâldoarloch it Britske Special Operation Executive (SOE) tariste mei nije útfinings, wurdt rûnom beskôge as de ynspiraasjeboarne foar Q en de Q Branch.

Yn 'e earste James Bond-film komt in personaazje foar dat majoar Boothroyd hjit en dat Bond fan in nij pistoal foarsjocht. Senarioskriuwer Richard Maibaum wurke dat personaazje foar de ferfolchfilm From Russia with Love (1963) út ta Q. Under ynfloed fan 'e ferfilmings waard Q letter wol opnommen yn 'e autorisearre James Bond-romans fan Christopher Wood, John Gardner en Raymond Benson.

Foarkommen

It personaazje Q komt foar yn alle James Bond-films fan Eon Productions útsein Dr. No, Live and Let Die, Casino Royale (2006) en Quantum of Solace. Q kaam ek foar yn twa films dy't net fan Eon wiene: Casino Royale (1967) en Never Say Never Again. De Welske akteur Desmond Llewelyn spile de rol yn alle Eon-films (behalven Live and Let Die) fan 1963 oant syn ferstjerren yn 1999. Hy rekke sa mei de rol ferklibbe dat it neitiid dreech wie om him te ferfangen. Dat waard oplost troch syn opfolger, komyk John Cleese, al foar de dea fan Llewelyn te yntrodusearjen as R, de assistint fan Q. Yn 'e James Bond-romans fan John Gardner waard mei Ann Reilly de earste froulike Q yntrodusearre, dy't fan Bond fuortendaliks de bynamme "Q'ute" kriget (cute, mei deselde útspraak, betsjut "skattich" yn it Ingelsk).

Spilers

jierren	film	akteur
films fan Eon Productions
1962	Dr. No	n.f.t. (personaazje ûntbrekt)
1963 – 1971	From Russia with Love	Desmond Llewelyn
	Goldfinger
	Thunderball
	You Only Live Twice
	On Her Majesty's Secret Service
	Diamonds Are Forever
1973	Live and Let Die	n.f.t. (personaazje ûntbrekt)
1974 – 1999	The Man with the Golden Gun	Desmond Llewelyn
	The Spy Who Loved Me
	Moonraker
	For Your Eyes Only
	Octopussy
	A View to a Kill
	The Living Daylights
	Licence to Kill
	GoldenEye
	Tomorrow Never Dies
	The World Is Not Enough
1999 – 2002	The World Is Not Enough (as R)	John Cleese
	Die Another Day
2006 – 2008	Casino Royale	n.f.t. (personaazje ûntbrekt)
	Quantum of Solace
2012 – 2021	Skyfall	Ben Whishaw
	Spectre
	No Time to Die
films fan oare studio's
1954	Casino Royale	n.f.t. (personaazje ûntbrekt)
1967	Casino Royale	Geoffrey Bayldon
1983	Never Say Never Again	Alec McCowen

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.