Zendaya

Ut Wikipedy
(Trochferwiisd fan Zendaya Coleman)
Zendaya
akteur
persoanlike bysûnderheden
echte namme Zendaya Maree Stoermer
   Coleman
nasjonaliteit Amerikaansk
berne 1 septimber 1996
berteplak Oakland (Kalifornje)
etnisiteit Afro-Amerikaansk
Dútsk
jierren aktyf 2009 – no
offisjele webside
zendaya.com

Zendaya Coleman (útspr.: [zɛn'de:jə], likernôch: "zèn-dee-juh"; folút: Zendaya Maree Stoermer Coleman; Oakland (Kalifornje), 1 septimber 1996) is in Amerikaansk aktrise, model, sjongster en dûnseresse fan mingd Afro-Amerikaansk en Dútsk etnysk komôf. Se lit har efternamme faak falle en brûkt dan har selden foarkommende foarnamme as artystenamme. Zendaya begûn al tige jong op te treden as dûnseresse en aktrise en briek yn 2009 troch mei de haadrol fan Rocky Blue yn 'e tillefyzjesearje Shake It Up.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Zendaya waard yn 1996 berne yn Oakland, yn 'e Amerikaanske steat Kalifornje. Har heit, Kazembe Coleman, is in Afro-Amerikaan, wylst har mem, Claire Stoermer, blank en fan Dútsk komôf is. Neffens Zendaya har offisjele webside komt har foarnamme út it Sjona, in Bantoe-taal út Simbabwe, en betsjut it safolle as "tankjewol".

Zendaya wie al fan jongs ôf oan belutsen by it California Shakespeare Theater yn Orinda, dêr't har mem manager fan wie. Yn 't earstoan holp se dêr as ûvreuze en kaartsjeferkeapster, mar neigeraden dat se belangstelling blike liet foar aktearjen, waard se opnommen yn it treningsprogramma dat it teäter foar bern oanbea. Sadwaande spile se al ier yn stikken fan Shakespeare, lykas Richard III, Trijekeningejûn en Nei Jim Beleavjen. Har âlden skreaune har yn oan 'e Oakland School for the Arts, dêr't se in profesjonele aktearoplieding folge. Dêrnjonken wie Zendaya ek al ier lid fan 'e dûnsgroep Future Shock Oakland, wêrmei't optredens fersoarge fan hiphop-dûnsen, mar ek fan 'e tradisjonele Hawaïaanske hûla.

Zendaya yn 2012.

Karriêre[bewurkje seksje | boarne bewurkje]

As jonge tiner begûn Zendaya har karriêre as model foar kleanmerken as Macy's, Mervyns en Old Navy. Se figurearre ek as eftergrûndûnseresse yn in reklamespotsje fan it warehûs Sears mei sjongster Selena Gomez yn 'e haadrol. Yn 2009 wie se te sjen yn 'e fideoklip fan it nûmer Hot n Cold fan Katy Perry. Yn novimber fan dat jier die se audysje foar de haadrol fan Rocky Blue yn 'e Disney-tillefyzjesearje Shake It Up. Dy rol waard har trochbraak en se fertolke him trije seizoenen lang, fan 2010 oant 2013. Zendaya waard dêrfoar trije kear nominearre foar in Young Artist Award: yn 2011 en 2012 yn 'e kategory bêste cast yn in tillefyzjesearje, en yn 2012 yn 'e kategory bêste aktrise yn in tillefyzjesearje. Fierders waard hja foar har fertolking fan 'e rol fan Rocky Blue yn 2011 en 2014 ek nominearre foar in NAACP Image Award.

Yn 2011 wie Zendaya as stimaktrise belutsen by de koarte tekenfilm Pixie Hollow Games, fan Disney, wêrfoar't se ek de titelsong song. Yn 2012 spile Zendaya yn har earste film, Frenemies, wêrfoar't se fannijs nominearre waard foar in Young Artist Award foar bêste aktrise. Underwilens wie se yn 2011 ek úteinset mei in wurkpaad as sjongster, troch har debútsingle Swag It Out út te bringen. Watch Me, har duët mei Bella Thorne, behelle yn 'e simmer fan 2011 it 86ste plak yn 'e Amerikaanske top 100. Nei't se yn 2012 har twadde solosingle, Something to Dance For, útbrocht hie, sleat Zendaya in eksklusyf kontrakt mei de platemaatskippij Hollywood Records. Yn maart 2013 die se mei oan it sechstjinde seizoen fan it realitytillefyzjeprogramma Dancing with the Stars, mei as profesjonele dûnspartner Val Chmerkovskiy. Hja wie, mei 16 jier, de jongste dielnimster ea, en behelle úteinlik it twadde plak.

Yn july 2013 brocht Zendaya it nûmer Replay út, de lead-single fan har earste album Zendaya. Dat liet waard sertifisearre as platina en helle se it 40e plak yn 'e top 100. Neitiid kaam it album Zendaya op 17 septimber 2013 út. Dat brocht it ta it 51e plak yn 'e Amerikaanske album-top 100. Koarte tiid earder, yn augustus, hie Zendaya boppedat it autobiografyske boek Between U and Me: How to Rock Your Tween Years with Style en Confidence publisearre. Datselde jiers brocht se ek in eigen moadekolleksje út mei famkesklean, skonkwaarmers, koarte broeken, jaskes, holbannen en assessoires, dy't ynspirearre wie op 'e klean dy't se yn 'e searje Shake It Up droech.

Zendaya yn 2016.

De twadde single fan it album Zendaya, mei as titel My Baby, kaam begjin 2014 út. Frijwol tagelyk waard de Disney-tillefyzjefilm Zapped, mei Zendaya yn 'e haadrol, útstjoerd op 'e tillefyzje. Yn juny 2014 waard oankundige dat Zendaya de yn 2001 by in fleantúchûngemak omkommen sjongster Aaliyah spylje soe yn 'e biografyske film Aaliyah: The Princess of R&B. Dy beslissing smiet in protte krityk op, mei't Aaliyah har fans fûnen dat Zendaya alhiel net op harren idoal liek en boppedat in fiersten te ljochte hûdskleur hie. In pear wiken letter besleat Zendaya om 'e eare oan harsels te hâlden en fan 'e rol ôf te sjen. Yn jannewaris 2015 sette Zendaya útein mei it spyljen fan 'e titelrol fan K.C. Cooper yn 'e nije Disney-searje K.C. Undercover. Dat is in rige dy't ein 2016 noch altyd rûn. Yn dyselde snuorje sleat se in nij muzykkontrakt ôf mei de platemaatskippij Republic Records. Yn 2015 figurearre se yn 'e fideoklip fan it nûmer Bad Blood, fan sjongster Taylor Swift.

Bibliografy[bewurkje seksje | boarne bewurkje]

  • 2013 – Between U and Me: How to Rock Your Tween Years with Style en Confidence

Diskografy[bewurkje seksje | boarne bewurkje]

singles
  • 2011 – Swag It Out
  • 2011 – Watch Me (duët mei Bella Thorne)
  • 2012 – Something to Dance For
  • 2013 – Replay
  • 2014 – My Baby
albums
  • 2013 – Zendaya

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.