Derek de Lint

Derek de Lint
akteur
persoanlike bysûnderheden
echte namme	Dick Hein de Lint
nasjonaliteit	Nederlânsk
berne	17 july 1950
berteplak	De Haach (Súd-Hollân)
etnisiteit	Nederlânsk
jierren aktyf	1975 – no
offisjele webside
Derek de Lint yn 'e IMDb

Derek de Lint (folút: Dick Hein de Lint; De Haach, 17 july 1950) is in Nederlânsk tillefyzje- en filmakteur, dy't yn Nederlân benammen bekend waard troch syn rollen yn films as Soldaat van Oranje en it mei in Oskar bekroande De Aanslag. Hy boude ek in súksesfolle ynternasjonale karriêre op, wêrby't er it bekendst waard mei syn rol yn 'e dramarige Poltergeist: The Legacy.

Libben en karriêre

Jonkheid en oplieding

De Lint waard yn 1950 berne yn De Haach. Fan 1970 oant 1972 studearre er fotografy en grafysk ûntwerpen yn Ynskedee, oan wat no de AKI ArtEZ Academie voor Art & Design is, folge troch nochris twa jier oan 'e Amsterdamske Toanielskoalle en Lytskeunstakademy. Under en fuort nei syn stúdzje ûnderhold De Lint himsels mei in bybaantsje as fotomodel.

Aktearkarriêre

Yn 1975 makke De Lint syn debút as akteur mei de rol fan Rik Vandaele yn it toanielstik Thuis fan 'e Flaamske skriuwer Hugo Claus. Dêr kaam er oan trochdat syn learaar Spaanske dûns, in Marino Westra, kunde hie oan Claus en dy syn frou, aktrise Sylvia Kristel. Sadwaande mocht De Lint foar de rol audysje dwaan yn in leech Keninklik Teäter Carré yn Amsterdam, yn in dekôr fan it stik Cyrano de Bergerac, foar Claus sels en Guus Oster. Neitiid sei Oster tsjin him: "Kinst skielk yn elts gefal sizze dat dyn karriêre begûn is yn Carré."

Nei in lyts roltsje yn it Amerikaanske tillefyzjeprogramma The Rocky Horror Show en in pear rollen yn Nederlân dy't net folle mear as figuranteroltsjes wiene, mocht De Lint yn 1976 audysje dwaan foar ien fan 'e haadrollen yn 'e film Soldaat van Oranje, fan regisseur Paul Verhoeven. Foarôf hied er in petear mei produksje-assistinte Ineke van Weezel, dy't him fertelde dat it in projekt fan ƒ5 miljoen wie, en dêrmei de djoerste Nederlânske film ea. De Lint skrok him dea, waard sa senuweftich as wat, en ferprutste de audysje. Mar Van Weezel en filmprodusint Rob Houwer hiene him yn Thuis sjoen en wiene fan syn spyljen ûnder de yndruk. Sadwaande krige er yn 1977 dochs de rol fan Alex yn Soldaat van Oranje. Dat bestjutte foar De Lint daliks syn Nederlânske trochbraak.

Nei Soldaat van Oranje hie De Lint yn 1979 de haadrol yn 'e film Kort Amerikaans, nei de roman mei deselde namme fan Jan Wolkers. Koart nei't dy film útkaam, hie De Lint in moeting mei Paul Verhoeven, dy't him frege en doch audysje foar de rol fan Rien yn syn nije film Spetters. Doe't er dat dien hie, sei Verhoeven tsjin him dat er de rol hie, mar in pear dagen letter krige er in bryfke fan Hans Kemna, de assistint fan Verhoeven, dêr't yn stie dat Kort Amerikaans harren film foar de fuotten rûn, en dat se fierders net mear mei De Lint gearwurkje woene.

Nettsjinsteande dy snútslach wie it begjin fan 'e jierren '80 in súksesfolle tiid foar De Lint. Hy spile yn bekende dramasearjes as Herenstraat 10 (1983) en Willem van Oranje (1984), en yn grutte Nederlânske films, lykas Van de Koele Meren des Doods (1982) en Bastille (1984). Dy lêste film wie basearre op in boek fan skriuwer Leon de Winter, en De Lint hie de rol fan Paul de Wit, in 37-jierrige Joadske Amsterdamske skiednisdosint dy't hjitfolge wurdt troch de oantins oan syn yn 'e Holokaust fermoarde famylje. Yn 1986 hie De Lint yn it mei in Oskar foar bêste bûtenlânske film bekroande De Aanslag noch sa'n grutte rol, en dat wie wer ien dy't weromsloech op 'e Twadde Wrâldoarloch. De film wie basearre op 'e roman De Aanslag, fan Harry Mulisch, en De Lint spile Anton Steenwijk, dy't as jonge troch in oanslach fan it ferset op in kollaborateur by harren foar de doar syn âlden en broer kwytrekke is oan in repressaille fan 'e besetter.

Hoewol't De Lint al earder yn it bûtenlân wurke hie, krige er troch De Aanslag in beskate bekendheid yn ynternasjonale filmfermiddens. Dêrop fuortbouwend hied er yn 1987 in lyts roltsje yn 'e komeedzjefilm Three Men and a Baby, spile er datselde jiers yn 'e film Mascara, mei Charlotte Rampling, en yn 1988 hied er in rol yn Philip Kaufman syn The Unbearable Lightness of Being, mei Daniel Day-Lewis en Juliette Binoche, oer de Praachske Maityd fan 1968, nei in boek fan Milan Kundera. Yn Nederlân wie De Lint yn lettere jierren noch te sjen yn films as Rituelen (1989) en Lang Leve de Koningin (1995), mar fierders wurke er yn 'e 1990-er jierren benammen yn 'e Feriene Steaten.

De Lint mei Tingue Dongelmans yn Kort Amerikaans, út 1979.

Dêr hied er yn it tillefyzjeseizoen 1989-1990 10 ôfleverings lang in weromkearende rol as dokter Gerard Bernard, de frijer fan haadrolspylster Dana Delany yn 'e dramasearje China Beach. Ek spile er de Russyske KGB-agint Abramov yn 'e tillefyzjefilm The Endless Game (1990), en hied er as Bertrand de Roujay de haadrol yn 'e seisdielige minysearje The Free Frenchman (1989), oer in briljante Frânske aristokraat dy't ûnder de Twadde Wrâldoarloch belutsen rekket by it Frânske ferset. Yn 1991 waard De Lint cast yn 'e (haad)rol fan Conner Macleod yn 'e rige Highlander: The Series, mar om ûndúdlike redens loek er him út dat projekt werom. Yn 1994 hied er in gastrol yn in ôflevering fan 'e Amerikaanske plysjesearje NYPD Blue.

De rol wêrmei't De Lint yn it bûtenlân de measte bekendheid wûn, wie dy fan Derek Rayne, yn 'e searje Poltergeist: The Legacy, dy't fjouwer seizoenen rûn, fan 1996 oant 1999. Nei de iuwwiksel spile er benammen yn tillefyzjesearjes, sawol Amerikaanske as Nederlânske. Sa hied er gastrollen yn 'e plysjesearjes NCIS en Baantjer, spile er yn 'e westernminysearje Into the West, en wied er ek te sjen yn The L Word, Bloedverwanten en Silent Witness. Fan 2006 oant 2009 fertolke er de rol fan dokter Ed Rossi yn 'e dramasearje Gooische Vrouwen, in rol dy't er op 'e nij spile yn 'e films Gooische Vrouwen (2011) en Gooische Vrouwen 2 (2014). Fierders hied er yn dyselde tiid rollen yn 'e Nederlânske films Zwartboek (2006) en De Brief voor de Koning (2008).

Yn 'e film Nova Zembla (2011), oer de oerwintering op Nova Zembla, spile De Lint de Skylger seefarder Willem Barents. Yn 2013 hied er in rol yn 'e film Tula: The Revolt, oer de slave-opstân fan 'e histoaryske Kurasauske slavelieder Tula. Yn 2016 wie De Lint as stimakteur belutsen by de Nederlânsktalige neisyngronisearring fan 'e Amerikaanske tekenfilm The Secret Life of Pets. Yn 2015 wie De Lint te sjen as Johan Kievit yn 'e histoaryske film Michiel de Ruyter fan regisseur Roel Reiné, oer de santjinde-iuwske seeheld Michiel de Ruyter. Yn 2018 wurke er fannijs gear mei Reiné, doe't er de rol fan 'e ferrieder Eibert hie yn 'e aventoerefilm Redbad, oer de achtste-iuwske kening fan 'e Friezen mei deselde namme.

Priveelibben

Derek de Lint is sûnt 1979 troud mei Dorith Jessurun.

Filmografy

Filmografy as akteur
jier	titel	rol of funksje	opmerkings
films
1976	Barocco	propagandaman #1
1977	Blindgangers	Mark
1977	Soldaat van Oranje	Alex
1978	Dag Dokter	Theo van Delft
1979	De Grens	?	koarte film
1979	Kort Amerikaans	Erik van Poelgeest
1979	Dat Moet Toch Kunnen	?
1980	The Lucky Star	luitenant Steiner
1981	Come-Back	Vriend Marij
1982	Van de Koele Meren des Doods	Ritsaart
1983	Een Zaak van Leven of Dood	Jack de Graaf
1984	Bastille	Paul de Wit / Nathan Blum
1985	Mata Hari	knappe reizger
1986	De Aanslag	Anton Steenwijk
1987	Mascara	Chris Brine
1987	Dagboek van een Oude Dwaas	Philippe
1987	Three Men and a Baby	Jan Clopatz
1988	Stealing Heaven	Abelard
1988	The Unbearable Lightness of Being	Franz
1989	Rituelen	Inni Wintrop
1992	Die Sonne über dem Dschungel	Peter
1993	Angie	Peter Koudbier
1994	Venti dal Sud	Peter
1995	Affair Play	Alex Witsen
1995	Lang Leve de Koningin	Bob Hooke (heit fan Sara)
1995	All Men Are Mortal	Bertus
1998	Deep Impact	ynterviewde astronoom op 'e tillefyzje	cameo
2000	The Artist's Circle	?	koarte film
2001	Soul Assassin	Karl Jorgensen
2001	Mon Amour, Mon Parapluie	swalker	koarte film
2001	Superstition	Allessandro Censi
2002	Tom & Thomas	Bancroft
2003	The Big Charade	Vlad
2006	Moonlight Serenade	Terence Hill
2006	When a Stranger Calls	dokter Mandrakis
2006	Zwartboek	Gerben Kuipers
2008	De Brief voor de Koning	kening Dagonaut
2010	Villa Joséphine	Levi	koarte film
2011	Anatole	Anatole Deibler	koarte film
2011	Gooische Vrouwen	dokter Ed Rossi
2011	Nova Zembla	Willem Barents
2011	All That Way for Love	Casper / oarehelte	koarte film
2011	U & Eye	timmerman	koarte film
2012	Tears of Steel	Alde Thom
2012	Insensibles	dokter Holzmann
2013	Midden in de Winternacht	de krystman
2013	Valentino	Karel
2013	Daglicht	Twan van Benschop
2013	Tula: The Revolt	baron Van Westerholt
2013	Aan de Overkant	?	koarte film
2014	Gooische Vrouwen 2	dokter Ed Rossi
2014	Snijbonen	Jules	koarte film
2015	Michiel de Ruyter	Johan Kievit
2015	Code M	pake Ber
2016	The White King	Silver Hair
2016	Familieweekend	Pieter
2016	The Secret Life of Pets	Tiberius	as stimakteur, Nederlânsktalige neisyngronisaasje
2018	Redbad	Eibert
2018	Spider-Man: Into the Spider-Verse	Kingpin
2019	Lili	man	koarte film
20??	The Blue Mauritius	Jack Bernard
tillefyzje
1978	Uit de Wereld van Guy de Maupassant: De Vlieg	?	tillefyzjefilm
1978	Kant aan m'n Broek	luitenant Chamiroux	weromkearende rol; 4 ôfl.
1979	Voor Koningin en Vaderland	Alex	minysearje
1984	Willem van Oranje	kening Hindrik II fan Frankryk	minysearje
1983	Dolly Dots	Mike Burger / Maarten Flick	weromkearende rol; 4 ôfl.
1983	Herenstraat 10	Karel van Laar	minysearje
1985	Slippers	Rob	tillefyzjefilm
1986–1987	Dossier Verhulst	Eric Hoogland	minysearje
1988	The Great Escape II: The Untold Story	dokter Thost	tillefyzjefilm
1989	The Free Frenchman	Bertrand de Roujay	minysearje
1989–1990	China Beach	dokter Gerard Bernard	weromkearende rol; 9 ôfl.
1990	The Endless Game	Abramov	gastrol; ôfl. 1.2
1990	Burning Bridges	Gus Morgan	tillefyzjefilm
1991	Mountain of Diamonds	tillefyzjefilm	Lothar de la Rey
1992	Secrets	Paul Rodier	minysearje
1993	Civil Wars	?	gastrol; ôfl. A Liver Runs Through It
1993	Remember	Charles Devereaux	tillefyzjefilm
1994	Pointman	Jacob Razak	tillefyzjefilm
1994	NYPD Blue	Serge	gastrol; ôfl. Serge the Concierge
1994	A Perry Mason Mystery: The Case of the Lethal Lifestyle	dokter Estes	tillefyzjefilm
1995	Eindeloos Leven	boargemaster	gastrol; ôfl. Oude Botten Breken Niet
1996	The Little Riders	Dirk Petersen	tillefyzjefilm
1997	The Man Who Made Husbands Jealous	Roberto Rannaldini	minysearje
1999	The Outer Limits	sinturion Sulat Ray	gastrol; ôfl. Star Crossed
1996–1999	Poltergeist: The Legacy	dokter Derek Rayne	fêste rol; 87 ôfl.
2000	The Outer Limits	Carl van der Meer	gastrol; ôfl. Breaking Point
2002	Mevrouw de Minister	premier Staal	minysearje
2002	Alias	Gerard Cuvée	gastrol; ôfl. Passage: Part 2
2003	Veritas: The Quest	lieder grize mannen	gastrol; ôfl. Reunion
2003	Baantjer	Georges van Baaren	gastrol; ôfl. De Cock en de Moord met een Swing
2004	NCIS	dokter Stephen Brauer	gastrol; ôfl. Left for Dead
2004	Dunya en Desie	menear Govers	gastrol; ôfl. Persoonlijke Vragen
2005	The L Word	Manfredi Ferrer	gastrol; Lap Dance
2005	Into the West	predikant Hobbes	minysearje
2005–2009	Gooische Vrouwen	dokter Ed Rossi	fêste rol; 42 ôfl.
2008 & 2010	Deadline	Rogier Lankhorst	weromkearende rol; 24 ôfl.
2010–2014	Bloedverwanten	Anton Zwager	fêste rol; 32 ôfl.
2011	Silent Witness	Nederlânske ambassadeur	gastrol
2013	Sinterklaasjournaal	menear Zilverwerk	gastrol; ôfl. 2013 nû. 4
2015	Flikken Maastricht	Peter Fontein	gastrol; ôf. Het Dispuut
2015	Crossing Lines	Victor DuBois	gastrol; ôfl. Obscura
2016	Zwarte Tulp	Nick de Ruyter	minysearje
2018	Berlin Station	de âlde Henrik Viiding	gastrol; ôfl. Aut Concilio Aut Ense
2019	Geub	William van Bronckhorst	minysearje
2019	Redbad: The Legend	Eibert	minysearje

Keppelings om utens

• (in) Folsleine filmografy fan Derek de Lint yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Derek de Lint fan Wikimedia Commons.