Héctor Elizondo

Ut Wikipedy
Jump to navigation Jump to search
Héctor Elizondo
Filmklapper.png akteur
HéctorElizondoApr09.jpg
persoanlike bysûnderheden
echte namme Héctor Elizondo
nasjonaliteit Flag of the United States.svg Amerikaansk
berne 22 desimber 1936
berteplak New York (New York)
etnisiteit Flag of the Basque Country.svg Baskysk
Flag of the Canary Islands.svg Kanarysk
Flag of Puerto Rico.svg Portorikaansk
jierren aktyf 1963 – no
prizen Emmy Award 1997
offisjele webside
gjint

Héctor Elizondo (New York, 22 desimber 1936) is in Amerikaansk akteur fan mingd Baskysk, Kanarysk en Portorikaansk etnysk komôf. De measte lju sille him kenne as de pleage mar behelpsume hotelmanager yn 'e film Pretty Woman. Dêrnjonken is er it bekendst wurden troch syn optredens yn 'e tillefyzjesearjes Chicago Hope (dêr't er in Emmy Award foar wûn), en Last Man Standing.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Elizondo waard yn 1936 berne yn New York, as de soan fan Martín Echevarría Elizondo, in notaris en boekhâlder, en dy syn frou Carmen Medina Reyes. Syn pake oan heitekant wie in Bask út Spaansk-Baskelân, wylst syn pake en beppe oan memmekant fan 'e Kanaryske Eilannen kamen. Syn âlden emigrearren út Porto Riko nei de Feriene Steaten, op 'e siik nei in better libben.

As jonge wie Elizondo goed yn sport en song er jierrenlang yn in jongeskoar. Nei't er yn 1954 de middelbere skoalle ôfmakke hie, liet er him ynskriuwe oan it Stedskolleezje fan New York, mei de bedoeling om skiednislearaar te wurden. Doe't ûnder syn earste jier dêre syn freondinne swier rekke, joech er lykwols syn stúdzje deroan om in foltiidbaan te sykjen sadat er trouwe en syn gesin ûnderhâlde koe.

Karriêre[bewurkje seksje | boarne bewurkje]

Fan 1962 oant 1963 folge Elizondo in dûnsoplieding, wêrnei't er úteinsette mei in nije karriêre as toaniel- en musicalakteur. Syn earste grutte súkses boekte er yn 1971, mei de rol fan God (yn 'e momkape fan in Portorikaanske badhûsassistint) yn it stik Steambath. Foar dat optreden wûn er in Obie Award. Yn 'e measte stikken hied er in ûnderstypjende rol, as de freon of meistanner fan 'e haadpersoan. Syn earste filmrol hied er yn 1963, yn The Fat Black Pussycat, en syn earste tillefyzjerol folge yn 1967, yn 'e rige The Edge of Night. Yn 1975 en 1976 hied er foar it earst in fêste rol op 'e tillefyzje, as in Portorikaanske widner yn 'e rige Popi. Hoewol't dêrfan mar alve ôfleverings makke waarden, wie it ien fan 'e earste Amerikaanske tillefyzjesearjes wêryn't in Latino in fêst lid fan 'e cast wie. In oare tillefyzjerige dêr't Elizondo in fêste rol yn hie, wie Foley Square (1985-1986).

Héctor Elizondo yn 2012.

Yn 'e tachtiger jierren rekke Elizondo befreone mei regisseur Garry Marshall, dy't him neitiid gauris frege foar rollen yn syn films. Elizondo syn ynternasjonale trochbraak kaam troch syn rol as de pleage mar freonlike hotelmanager yn 'e kaskreaker Pretty Woman, mei Julia Roberts en Richard Gere. Hoewol't Elizondo yn dy film yn totaal mar tsien minuten yn byld is, waard er foar syn byrol nominearre foar in Golden Globe. Oare bekende films wêryn't er spile, wiene bygelyks Frankie and Johnny (1991), mei Michelle Pfeiffer en Al Pacino, en Beverly Hills Cop III (1994), mei Eddie Murphy, en Runaway Bride, op 'e nij mei Julia Roberts en Richard Gere. Elizondo make der ek wat in gewoante fan om kameoroltsjes te dwaan, lykas yn Overboard (1987), mei Kurt Russell en Goldie Hawn.

As tillefyzje-akteur hie Elizondo gastrollen yn fiif desennia oan Amerikaanske searjes, wêrûnder All in the Family, Kojak, Baretta, Kolumbo, Hill Street Blues, Matlock, Early Edition, The West Wing, Without a Trace en Grey's Anatomy. Fan 1994 oant 2000 hied er ien fan syn bekendste rollen yn 'e sikehûsrige Chicago Hope, as dokter Phillip Watters. Dêrfoar wûn er yn 1997 in Emmy Award (de wichtichste Amerikaanske tillefyzjepriis). Yn 2011 waard Elizondo cast yn 'e rol fan 'e eksintrike Baskyske suvivalwinkeleigner Ed Alzate, de baas fan it personaazje fan Tim Allen, yn 'e komeedzjesearje Last Man Standing, dy't mids 2015 noch altyd rint.

Priveelibben[bewurkje seksje | boarne bewurkje]

Héctor Elizondo hat trije kear troud west. Ut syn earste houlik, dat er al tige jong oangie, hat er in soan, Rodd. Sûnt 1969 is er mei syn trêde frou, de aktrise, fotografe en útjouster Carolee Campbell. Hja wenje yn Sherman Oaks, in wyk fan Los Angeles.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.