Pam Grier

Pam Grier
akteur
persoanlike bysûnderheden
echte namme	Pamela Suzette Grier
nasjonaliteit	Amerikaansk
berne	26 maaie 1949
berteplak	Winston-Salem (Noard-Karolina)
etnisiteit	Afro-Amerikaansk Filipynsk Latino Sineesk Sjajinsk
jierren aktyf	1970 – no
offisjele webside
Pam Grier op Twitter

Pam Grier (folút: Pamela Suzette Grier; Winston-Salem (Noard-Karolina), 26 maaie 1949) is in Amerikaansk film-, tillefyzje- en toanielaktrise fan mingd etnysk komôf. Hja briek yn 'e iere 1970-er jierren troch mei blaxploitationfilms as Coffy, Foxy Brown en Black Mama, White Mama. Ein jierren santich rekke se yn it ferjit, mar yn 'e 1980-er jierren makke se in comeback, en yn 1997 krige har karriêre in nije ympuls doe't se de titelrol spile yn 'e misdiefilm Jackie Brown fan regisseur Quentin Tarantino.

Libben en karriêre

Jonkheid en oplieding

Pam Grier waard yn 1949 berne yn Winston-Salem, yn 'e súdlike Amerikaanske steat Noard-Karolina, as de dochter fan Clarence Ransom Grier jr., in sersjant en technikus by de Amerikaanske Loftmacht, en dy syn frou Gwendolyn Sylvia Samuels, in ferpleechster. Hja hat ien suster en ien broer. Oer har etnyske eftergrûn hat Grier yn in fraachpetear sein: "Ik bin in ferminging fan ferskate rassen: Latino, Sineesk, Filipynsk. Us heit wie swart en ús mem wie in Sjajinne."

Doe't se seis jier wie, waard Grier troch twa jonges ferkrêfte doe't se ris allinnich thús wie yn it hûs fan har muoike. Yn in fraachpetear fertelde se yn 2010 hoelang't it har koste hie om dat trauma te boppe te kommen. Ek har famylje hie neitiid te krijen mei in protte lulkens en skuldgefoelens om't der net goed op har past wie. Fanwegen har heite wurkpaad by de loftmacht ferhuze it gesin gauris, mar úteinlik setten se harren nei wenjen yn Denver, yn 'e steat Colorado, dêr't Grier de middelbere skoalle trochrûn en dielnaam om skientmewedstriden om mei it prizejild har stúdzje oan it Metropolitan State College te bekostjen.

Pam Grier yn 1976.

Aktearkarriêre

Mei achttjin jier ferfear Grier yn 1967 nei Los Angeles, yn Kalifornje, dêr't se earst wurk fûn as resepsjoniste by de filmstudio American International Pictures (AIP). Nei't it skynt waard hja dêr 'ûntdutsen' troch regisseur Jack Hill, dy't har caste yn syn films The Big Doll House (1971), The Big Bird Cage (1972), allebeide oer froulju yn it tichthûs. Yn 1973 spile se foar regisseur Eddie Romero yn in soartgelikense film, Black Mama, White Mama.

Yn 'e tiid dat se by AIP ûnder kontrakt stie, briek Grier troch yn 'e saneamde blaxploitationfilms, wêryn't se assertive froulju spile fan in soarte dat foartiid mar komselden yn Amerikaanske films te sjen west hie. Dat begûn yn 1973, mei Coffy, op 'e nij regissearre troch Jack Hill. Dy film siet grôtfol mei seksuele en gewelddiedige eleminten dy't karakteristyk binne foar it blaxploitationsjenre en waard in grut súkses yn 'e Amerikaanske bioskopen. Grier wie de earste frou dy't yn sa'n film de haadrol spile, en regisseur Quentin Tarantino soe har letter oantsjutte as de earste froulike aksjeheld út 'e filmskiednis (hoewol't guon oaren folhâlde dat dy ear oan Cheng Pei-pei takomt). Neitiid hie Grier soartgelikense haadrollen yn 'e AIP-films Foxy Brown (1974), Sheba, Baby (1975) en Friday Foster (1975).

Doe't it blaxploitationsjenre yn 'e twadde helte fan 'e 1970-er jierren stadichoan weiwaard, spile Grier ferskate jierren lytsere rollen, mar geandewei de 1980-er jierren wist se almar gruttere karakterrollen te bemachtigjen. Sa spile se in drugsferslaafde prostituee yn Fort Apache, The Bronx (1981), in hekse yn Something Wicked this Way Comes (1983) en de partner-resjersjeur fan Steven Seagal yn Above the Law (1988). Op 'e tillefyzje hie Grier yn dyselde snuorje tusken 1985 en 1989 in weromkearende gastrol yn 'e ferneamde plysjesearje Miami Vice, en teffens wie se as gastakteur te sjen yn populêre komeedzjesearjes as The Cosby Show, Night Court en The Fresh Prince of Bel Air. Har rol yn 'e film Rocket Gibraltar (1988) waard der by de montaazje lykwols út snien troch regisseur Daniel Petrie, dy't bang wie foar "reperkusjes fan ynterrasiale frijsênes".

Yn 'e 1990-er jierren hie Grier rollen yn films lykas de a-typyske western Posse (1993), de science fiction-komeedzje Mars Attacks! (1996) en de post-apokalyptyske aksjefilm Escape from L.A. (1996). Ek wurke se yn 1994 mei oan 'e fideoklip fan it nûmer Doggy Dogg World, fan rapper Snoop Dogg. Doe't regisseur Quentin Tarantino oan Grier yn 1997 de titelrol taparte yn syn film Jackie Brown, brocht er dêrmei in oade oan har blaxploitation-ferline. Foar har karriêre betsjutte dy rol in sterke nije ympuls, en se waard dermei nominearre foar ferskate prizen, wêrûnder in Golden Globe yn 'e kategory bêste aktrise.

Yn 2000 waard Grier nominearre foar in Emmy Award foar har wurk as stimaktrise foar de tekenfilm Happily Ever After: Fairytales for Every Child. Fan 2004 oant 2009 hie Grier in fêste rol as Kate 'Kit' Porter yn 'e tillefyzjesearje The L Word. Ek hie se gastrollen yn oare searjes, wêrûnder in weromkearende rol yn 'e plysjesearje Law & Order: Special Victims Unit. Yn 2010 fertolke se yn trije ôfleverings fan 'e superheldesearje Smallville de rol fan 'e smjunt Amanda Waller. Yn 2010 ferskynde Grier har autobiografy Foxy: My Life in Three Acts, dat se skreaun hie mei help fan ghostwriter Andrea Cagan.

Pam Grier yn 2013 mei presintator Jarrett Crippen op 'e Wizard World New York Experience.

Priveelibben

Relaasjes

Yn 'e iere 1970-er jierren hie Grier in relaasje mei basketballer Kareem Abdul-Jabbar, mar dat rûn op 'e non om't hy woe dat sy har, lykas him, ta de islaam bekeare soe. Yn 1976/1977 gie se oardel jier lang om mei komyk Richard Pryor. Se holp Pryor, dy't analfabeet wie, om lêzen te learen en besocht him fan 'e drugs ôf te krijen. Nei in healjier clean west te hawwe, krige er lykwols in weromfal. Yn dyselde tiid troude er mei aktrise Deborah McGuire.

Ek mei akteur en komyk Fredde Prinze soe Grier yn 'e jierren santich in ferhâlding hân hawwe. Letter hie se relaasjes mei bokspromoater Jimmie "Big Wheel" Wheeler, Soul Train-presintator Don Cornelius en basketballer Wilt Chamberlain. Yn 1998 ferloofde Grier har mei muzykprodusint Kevin Evans, mar dy relaasje rekke yn 1999 út. Fan 2000 oant 2008 gie se om mei sakeman Peter Hempel.

Oare saken

Yn 1988 waard by Grier limoerhalskanker fêststeld. Der waard har ferteld dat se noch heechút oardel jier te libjen hie, mar troch in yngeande behanneling rekke se kankerfrij, wat se sûnt altyd bleaun is.

Yn 2011 ûntfong se in earedoktoraat yn 'e letteren fan 'e Universiteit fan 'e Marylânske Eastkust en dêropta in earedoktoraat yn 'e wittenskippen fan 'e Universiteit fan Langston, yn Langston (Oklahoma).

Grier is in fûleindich beoefenster fan ferskate Easterske fjochtsporten, wêrûnder karate, jiu jitsu en aikido.

Bibliografy

• 2010 – Foxy: My Life in Three Acts

Filmografy

Filmografy as aktrise
jier	titel	rol of funksje	opmerkings
films
1970	Beyond the Valley of the Dolls	feestgongster
1971	The Big Doll House	Grear
1971	Women in Cages	Alabama
1972	The Twilight People	Ayesa
1972	Cool Breeze	Mona
1972	The Big Bird Cage	Blossom
1972	Hit Man	Gozelda
1973	Black Mama White Mama	Lee Daniels
1973	Coffy	Flower Child 'Coffy' Coffin
1973	Scream Blacula Scream	Lisa Fortier
1974	The Arena	Mamawi
1974	Foxy Brown	Foxy Brown
1975	Sheba, Baby	Sheba Shayne
1975	Bucktown	Aretha
1975	Friday Foster	Friday Foster
1976	Drum	Regine
1977	Twilight of Love	Sandra
1977	Greased Lightning	Mary Jones
1981	Fort Apache, The Bronx	Charlotte
1983	Tough Enough	Myra
1983	Something Wicked This Way Comes	stofheks
1985	Stand Alone	Cathryn Bolan
1986	The Vindicator	Hunter
1986	On the Edge	Cora
1987	The Allnighter	brigadier McLeesh
1988	Above the Law	resjersjeur Delores 'Jacks' Jackson
1989	The Package	Ruth Butler
1990	Class of 1999	frou Connors
1991	Bill & Ted's Bogus Journey	frou Wardroe
1993	Posse	Phoebe
1996	Original Gangstas	Laurie Thompson
1996	Escape from L.A.	Jack 'Carjack' Malone / Hershe Las Palmas
1996	Mars Attacks!	Louise Williams
1997	Strip Search	Janette
1997	Fakin' da Funk	Annabelle Lee
1997	Jackie Brown	Jackie Brown	nom. Golden Globe foar bêste aktrise yn in musical of komeedzje nom. Screen Actors Guild Award foar bêste aktrise nom. Satellite Award foar bêste aktrise nom. Saturn Award foar bêste aktrise nom. Empire Award foar bêste aktrise
1999	Jawbreaker	resjersjeur Vera Cruz
1999	No Tomorrow	Diane
1999	In Too Deep	resjersjeur Angela Wilson
1999	Holy Smoke!	Carol
2000	Snow Day	Tina
2000	Fortress 2: Re-Entry	Susan Mendenhall
2000	Wilder	resjersjeur Della Wilder
2001	3 A.M.	George
2001	Love the Hard Way	Linda
2001	Ghosts of Mars	luitenant-kolonel Helena Braddock
2001	Bones	Pearl
2002	The Adventures of Pluto Nash	Flura Nash
2002	Baby of the Family	frou Williams
2005	Back in the Day	frou Cooper
2010	Just Wright	Janice Wright
2010	The Invited	Zelda
2010	Machete Maidens Unleashed!	n.f.t.	dokumintêre
2011	Larry Crowne	Frances
2011	Corman's World: Exploits of a Hollywood Rebel	n.f.t.	dokumintêre
2012	Woman Thou Art Loosed: On the 7th Day	resjersjeur Barrick
2012	The Man with the Iron Fists	Jane
2012	Mafia	James Womack
2017	Bad Grandmas	Coralee
2017	Being Rose	Lily
2019	Poms	Olive
tillefyzje
1979	Roots: The Next Generations	Francey	gastrol; ôfl. Part IV (1917–1921)
1980	The Love Boat	Cynthia Wilbur	weromkearende rol, 6 ôfl.
1985	Badge of the Assassin	Alexandra Horn	tillefyzjefilm
1985–1990	Miami Vice	Valerie Gordon	weromkearende rol yn seizoen 1–2, 5
1986	Night Court	Benet Collins	gastrol; ôfl. Hurricane: Part 1 & 2
1986–1988	Crime Story	Suzanne Terry	weromkearende rol
1987	The Cosby Show	Samantha	gastrol; ôfl. Planning Parenthood
1988	Frank's Place	Neema Sharone	gastrol; ôfl. Frank's Place – The Movie
1989	Midnight Caller	Susan Province	gastrol; ôfl. Blood Red
1990	Knots Landing	ynspekteur Guthrie	weromkearende rol yn seizoen 12
1991	Monsters	Matilde	gastrol; ôfl. Hostile Takeover
1992	Pacific Station	Grace Ballard	gastrol; ôfl. My Favorite Dad
1992	A Mother's Right: The Elizabeth Morgan Story	Linda Holman	tillefyzjefilm
1994	In Living Color	harsels	gastrol; ôfl. Mrs. Ikefire
1994	The Sinbad Show	Lynn Montgomery	gastrol; ôfl. The Telethon
1994	The Fresh Prince of Bel-Air	Janice Robertson	gastrol; ôfl. M is for the Many Things She Gave Me
1995	The Marshal	marshal Vanetta Brown	gastrol; ôfl. Rainbow Comix
1995	Martin	harsels	gastrol; ôfl. All the Players Came
1996	Sparks	frou Grayson	gastrol; ôfl. Pillow Talk
1996	The Wayans Bros.	Erica	gastrol; ôfl. Goin' to the Net
1998	Mad TV	n.f.t.	as presintatrise, ôfl. 3.25
1998	Pinky and the Brain	Julie Auburn	as stimaktrise; gastrol; ôfl. Inherit the Wheeze
1998	Family Blessings	frou Quincy	tillefyzjefilm
1998–2000	Linc's	Eleanor Winthrop	fêste rol
1999	The Wild Thornberrys	Mem Springbok	as stimaktrise; gastrol; ôfl. Stick Your Neck Out
1999	Happily Ever After: Fairy Tales for Every Child	it gealtsje fan 'e keizerinne	as stimaktrise; gastrol; ôfl. The Empress' Nightingale nom. Emmy Award foar bêste stimakteur yn in animearre tillefyzjeprogramma
1999	Hayley Wagner, Star	Sam	tillefyzjefilm
1999	For Your Love	Brenda	gastrol; ôfl. The Sins of the Mother and... the Boyfriend
2001	Strange Frequency	ûnbekend	gastrol; ôfl. Time Is on My Side
2001	The Feast of All Saints	Suzzette Lermontant	tillefyzjefilm
2002	Night Visions	dokter Lewis	gastrol; ôfl. Switch
2002	Justice League	My'ria'h	as stimaktrise; weromkearende rol yn seizoen 1
2002–2003	Law & Order: Special Victims Unit	ofsier fan justysje Claudia Williams	weromkearende rol; 2 ôfl.
2003	First to Die	Claire Washburn	tillefyzjefilm
2004–2009	The L Word	Kit Porter	fêste rol; 70 ôfl.
2008	Ladies of the House	Roberta "Birdie" Marchand	tillefyzjefilm
2010	Smallville	Amanda Waller	weromkearende rol yn seizoen 9
2015	Cleveland Abduction	ferpleechster Carla	tillefyzjefilm
2018–2019	This Is Us	beppe	weromkearende rol; 2 ôfl.
2019	A Christmas Wish	Mary	tillefyzjefilm
2019–2020	Bless This Mess	Constance Terry	fêste rol; 26 ôfl.
2022	The Great North	Neckbone	as stimaktrise; gastrol; ôfl. Slide & Wet-Judice Adventure
fideoclips
1994	Doggy Dogg World	Foxy Brown	in nûmer fan Snoop Dogg
fideospultsjes
2013	Grand Theft Auto V	harsels as radiopresintatrise
2017	Call of Duty: Infinite Warfare	harsels

Keppelings om utens

• (in) Pam Grier op Twitter
• (in) Folsleine filmografy fan Pam Grier yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Pam Grier fan Wikimedia Commons.