Pam Grier

Ut Wikipedy
Jump to navigation Jump to search
Pam Grier
Filmklapper.png akteur
An Evening With Pam Grier (6830131549).jpg
persoanlike bysûnderheden
echte namme Pamela Suzette Grier
nasjonaliteit Flag of the United States.svg Amerikaansk
berne 26 maaie 1949
berteplak Winston-Salem (Noard-Karolina)
etnisiteit Flag of the UNIA.svg Afro-Amerikaansk
Flag of the Philippines.svg Filipynsk
Flag of Aztlan.svg Latino
Flag of China (1912–1928).svg Sineesk
Flagge fan de Noardlike Sjajinne Stamme.PNG Sjajinsk
jierren aktyf 1970 – no
offisjele webside
gjint

Pam Grier (folút: Pamela Suzette Grier; Winston-Salem (Noard-Karolina), 26 maaie 1949) is in Amerikaansk film-, tillefyzje- en toanielaktrise fan mingd etnysk komôf. Hja briek yn 'e iere santiger jierren troch mei films as Coffy, Foxy Brown en Sheba, Baby. Ein jierren santich rekke se yn it ferjit, mar yn 'e jierren tachtich makke se in comeback, en yn 1997 krige har karriêre in nije ympuls doe't se de titelrol spile yn 'e misdiefilm Jackie Brown, fan regisseur Quentin Tarantino.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Grier waard yn 1949 berne yn Winston-Salem, yn 'e súdlike Amerikaanske steat Noard-Karolina, as de dochter fan Clarence Ransom Grier jr., in serzjant en technikus by de Amerikaanske Loftmacht, en dy syn frou Gwendolyn Sylvia Samuels, in ferpleechster. Hja hat ien suster en ien broer. Oer har etnyske eftergrûn hat Grier yn in fraachpetear sein: "Ik bin in ferminging fan ferskate rassen: Latino, Sineesk, Filipynsk. Us heit wie swart en ús mem wie in Sjajinne."

Doe't se seis jier wie, waard Grier troch twa jonges ferkrêfte doe't se ris allinnich thús wie yn it hûs fan har muoike. Yn in fraachpetear fertelde se yn 2010 hoelang't it har koste hie om dat trauma te boppe te kommen. Ek har famylje hie neitiid te krijen mei in protte lulkens en skuldgefoelens om't der net goed op har past wie. Fanwegen har heite wurkpaad by de loftmacht ferhuze it gesin gauris, mar úteinlik setten se harren nei wenjen yn Denver, yn 'e steat Kolorado, dêr't Grier de middelbere skoalle trochrûn en dielnaam om skientmewedstriden om fan it prizejild har stúdzje oan it Metropolitan State College te beteljen.

Aktearkarriêre[bewurkje seksje | boarne bewurkje]

Mei achttjin jier ferfear Grier yn 1967 nei Los Angeles, yn Kalifornje, dêr't se earst wurk fûn as resepsjoniste by de filmstudio American International Pictures (AIP). Nei't it skynt waard hja dêr 'ûntdutsen' troch regisseur Jack Hill, dy't har caste yn syn films The Big Doll House (1971) en The Big Bird Cage (1972), beide oer froulju yn it tichthûs.

Yn 'e tiid dat se by AIP ûnder kontrakt stie, briek Grier troch yn 'e saneamde blaxploitation-films, wêryn't se assertive froulju spile fan in soarte dat foartiid mar komselden yn Amerikaanske films te sjen west hie. Dat begûn yn 1973, mei Coffy, op 'e nij regissearre troch Jack Hill. Dy film, dy't grôtfol siet mei seksuële en gewelddiedige eleminten dy't typearjend wiene foar it blaxploitation-sjenre, waard in grut súkses yn 'e Amerikaanske bioskopen. Grier wie de earste frou dy't yn sa'n film de haadrol spile, en regisseur Quentin Tarantino soe har letter oantsjutte as mooglik de earste froulike aksjeheld út 'e filmskiednis. Neitiid hie Grier soartgelikense haadrollen yn 'e AIP-films Foxy Brown (1974), Sheba, Baby (1975) en Friday Foster (1975).

Doe't it blaxploitation-sjenre yn 'e twadde helte fan 'e jierren santich stadichoan weiwaard, spile Grier ferskate jierren lytsere rollen, mar geandewei de jierren tachtich wist se almar gruttere karakterrollen te bemachtigjen. Sa spile se in drugsferslaafde prostituee yn Fort Apache, The Bronx (1981), in heks yn Something Wicked this Way Comes (1983) en de partner-resjersjeur fan Steven Seagal yn Above the Law (1988). Op 'e tillefyzje hie Grier yn dyselde snuorje tusken 1985 en 1989 in weromkearende gastrol yn 'e ferneamde plysjesearje Miami Vice, en teffens wie se as gastakteur te sjen yn searjes as The Cosby Show, Night Court en The Fresh Prince of Bel Air. Har rol yn 'e film Rocket Gibraltar (1988) waard der by de montaazje lykwols út snien troch regisseur Daniel Petrie, dy't bang wie foar "reperkusjes fan ynterrasiale frijsênes".

Pam Grier yn 2013 mei presintator Jarrett Crippen op 'e Wizard World New York Experience.

Yn 'e jierren njoggentich hie Grier rollen yn films as de a-typyske western Posse (1993), de science fiction-komeedzje Mars Attacks! (1996) en de post-apokalyptyske aksjefilm Escape from L.A. (1996). Ek wurke se yn 1994 mei oan 'e fideoklip fan it nûmer Doggy Dogg World, fan rapper Snoop Dogg. Doe't regisseur Quentin Tarantino oan Grier yn 1997 de titelrol taparte yn syn film Jackie Brown, brocht er dêrmei in oade oan har blaxploitation-ferline. Foar har karriêre betsjutte dy rol in sterke nije ympuls, en se waard dermei nominearre foar ferskate prizen, wêrûnder in Golden Globe yn 'e kategory bêste aktrise.

Yn 2000 waard Grier nominearre foar in Emmy Award foar har wurk as stimaktrise foar de tekenfilm Happily Ever After: Fairytales for Every Child. Fan 2004 oant 2009 hie Grier in fêste rol as Kate 'Kit' Porter yn 'e tillefyzjerige The L Word. Ek hie se gastrollen yn oare tillefyzjesearjes, wêrûnder in weromkearende gastrol yn Law & Order: Special Victims Unit. Yn 2010 fertolke se yn trije ôfleverings fan 'e searje Smallville de rol fan 'e smjunt Amanda Waller. Yn 2010 ferskynde Grier har autobiografy Foxy: My Life in Three Acts, dat se skreaun hie mei help fan ghostwriter Andrea Cagan.

Priveelibben[bewurkje seksje | boarne bewurkje]

Yn 'e iere jierren santich hie Grier in relaasje mei basketballer Kareem Abdul-Jabbar, en yn 1976/1977 gie se oardel jier lang om mei komyk Richard Pryor. Ek mei akteur en komyk Fredde Prinze soe se yn 'e jierren santich in ferhâlding hân hawwe. Yn 1998 ferloofde Grier har mei muzykprodusint Kevin Evans, mar dy relaasje rekke yn 1999 út. Fan 2000 oant 2008 gie se om mei sakeman Peter Hempel. Yn 2011 ûntfong se in earedoktoraat yn 'e letteren fan 'e Universiteit fan 'e Marylânske Eastkust en dêropta in earedoktoraat yn 'e wittenskippen fan 'e Universiteit fan Langston, yn Langston (Oklahoma). Grier is in fûleindich beoefenster fan ferskate Easterske fjochtsporten, wêrûnder karate, jiu jitsu en aikido.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.