Tatjana Šimić

Ut Wikipedy
(Trochwiisd fan Tatjana Simic)
Jump to navigation Jump to search
Tatjana Šimić
Filmklapper.png akteur
Tatjana Šimić yn 1992.
Tatjana Šimić yn 1992.
persoanlike bysûnderheden
echte namme Tatjana Šimić
nasjonaliteit Flag of Croatia.svg Kroätysk
Flag of the Netherlands.svg Nederlânsk
berne 9 juny 1963
berteplak Zagreb (Kroaasje)
etnisiteit Flag of Croatia.svg Kroätysk
jierren aktyf 1986 – no
offisjele webside
www.tatjana.nl

Tatjana Šimić (Zagreb, 9 juny 1963) is in Nederlânsk model, aktrise en sjongster fan Kroätysk komôf. Har efternamme heart útsprutsen te wurden as ['ʃimiʧ] ("sjimytsj"), mar wurdt yn Nederlân ornaris sûnder diakrityske tekens skreaun (as Simic), wêrfan't de útspraak ferbastere wurdt ta ['simɪk] ("simik"). Hja wurdt lykwols ek faak koartwei Tatjana neamd.

Libben en karriêre[bewurkje seksje | boarne bewurkje]

Tatjana is hikke en tein yn 'e Kroätyske haadstêd Zagreb, mar mei sechstjin jier emigrearre hja mei har âlden nei Nederlân ta, dêr't it gesin him nei wenjen sette yn Rotterdam. Har karriêre begûn Tatjana doe't se yn 'e earste helte fan 'e tachtiger jierren in modellewedstryd fan it tydskrift Panorama wûn. Neitiid makke de rûnboarstige perokside-blondine namme mei neakenreportaazjes yn 'e Nederlânske (12 kear) en de Dútske edysje (4 kear) fan 'e Playboy, en teffens posearre se fan 1994 oant 2003 as neakenmodel foar har eigen kalinders. Yn 2009 stie se mei 45 jier noch mei in sensuële fotoreportaazje yn it tydskrift FHM.

By it grutte publyk briek Tatjana yn 1986 troch mei har rol as de sletterige dochter Kees yn 'e film Flodder, oer de asosjale famylje mei deselde namme. Dat waard in daverjend súkses, en sadwaande koe hja deselde rol op 'e nij fertolkje yn 'e ferfolchfilms Flodder in Amerika! (1992) en Flodder 3 (1995), en teffens yn 'e spin-off-tillefyzjesearje Flodder, dy't yn 1993 begûn. Oan 'e Flodder-saga kaam yn 1997 lykwols definityf in ein troch it hommelse ferstjerren fan akteur Coen van Vrijberghe de Coningh (dy't de rol fan Sjonnie Flodder spile) yn it bywêzen fan Tatjana en Stefan de Walle (soan Kees Flodder). Dêrtroch waard de lêste "nije" ôflevering yn 1998 útstjoerd, al wurdt de hiele searje noch altyd (2015) geregeldwei werhelle.

Njonken har aktearkarriêre wie Tatjana ek aktyf as sjongster en dûnseresse. Yn 1987 brocht se, nei ferskate jierren sjonglessen nommen te hawwen, har earste single út, mei as titel Baby Love. Har twadde liet, Chica Cubana, waard yn in grut diel fan Jeropa in top 10-hit, en yn 1989 skoarde se op 'e nij in hit mei Awaka Boy. Nei't har earste album útkommen wie, gie Tatjana op toernee, net inkeld yn Nederlân en oangrinzgjende lannen, mar sels yn Súd-Amearika en it Fiere Easten. Neitiid brocht se noch ferskate singles út, lykas Ik Laat Je Gaan, út 2007, dat in cover wie fan it Kroätyske Blago Onom Ko Te Ima, fan Tony Četinski, mar se behelle nea wer itselde soarte súkses.

Tatjana hat fierders meidien oan ferskate programma's, lykas de realitydûnswedstryd Dancing with the Stars, yn 2005, en de kwis Ranking the Stars, yn 2008, en teffens siet se yn 2009 en 2010 yn 'e faksjuery fan it Nasjonaal Songfestival. Fanôf 2011 wie se mei Patty Brard en Patricia Paay ien fan 'e haadpersoanen yn it realityprogramma Diva's Draaien Door. Yn 2006 publisearre se fierders in itensiedersboek mei Kroätyske resepten en anekdoates út har libben, ûnder de titel Tatjana's Studentenkookboek.

Priveelibben[bewurkje seksje | boarne bewurkje]

Yn 2007 kaam Tatjana yn it nijs fanwegen in koarte relaasje mei miljardêr en sakeman Marcel Boekhoorn. Begjin 2008 krige hja in relaasje mei miljonêr Ronny Rosenbaum, in ûndernimmer út 'e tekstyl- en ûnreplik goed-wrâld, mei wa't hja úteinlik in hoart gearwenne en ek in skoftke ferloofd wie. Yn septimber 2010 waard lykwols bekendmakke dat se de relaasje ôfbrutsen hiene. Yn 2011 die Tatjana mei oan it tillefyzjeprogramma Wie Kiest Tatjana?, wêryn't se út in stikmannich kandidaten in man keas om in relaasje mei oan te gean. Dat waard in Peter Mijnen, mar ein febrewaris 2012 waard bekend dat ek dy relaasje foarby wie.

Diskografy[bewurkje seksje | boarne bewurkje]

albums (ûnfolslein)
  • 1997 – New Look
  • 2000 – Tatjana Baila Baila
singles
  • 1987 – Baby Love
  • 1988 – Chica Cubana
  • 1988 – Awaka Boy
  • 1992 – Can't Take My Eyes Off You (duët mei Gerard Joling)
  • 1993 – Feel Good
  • 1995 – Santa Maria
  • 1996 – Calendar Girl
  • 1997 – The First Time
  • 1999 – Wait and Wonder
  • 2000 – Baila Baila
  • 2000 – Be There in Time
  • 2000 – Beautiful
  • 2007 – Ik Laat Je Gaan
  • 2010 – Ga Nu Maar

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: Voetnoten, op dizze side.