Coen van Vrijberghe de Coningh

Ut Wikipedy
Jump to navigation Jump to search
Coen van Vrijberghe de Coningh
Filmklapper.png akteur
Coen van Vrijberghe de Coningh yn 1978.
Coen van Vrijberghe de Coningh yn 1978.
persoanlike bysûnderheden
echte namme Coenraad Lodewijk Dirk
     van Vrijberghe de Coningh
nasjonaliteit Flag of the Netherlands.svg Nederlânsk
berne 12 novimber 1950
berteplak Amsterdam (Noard-Hollân)
stoarn 15 novimber 1997
stjerplak Almeare (Flevolân)
etnisiteit Flag of the Netherlands.svg Nederlânsk
jierren aktyf 19721997
offisjele webside
gjint

Coen van Vrijberghe de Coningh (folút: Coenraad Lodewijk Dirk van Vrijberghe de Coningh; Amsterdam, 12 novimber 1950Almeare, 15 novimber 1997) wie in Nederlânsk akteur, muzykprodusint, sjonger, komponist en presintator, dy't by it grutte publyk benammen bekend wurden is troch syn fertolking fan 'e rol fan Sjonnie Flodder yn 'e tillefyzjesearje Flodder.

Libben en karriêre[bewurkje seksje | boarne bewurkje]

Van Vrijberghe de Coningh wie de lêste manlike telch út in âld Siuwsk aadlik laach dat oarspronklik ôfkomstich wie út it ferdronken doarpke Vrijberghe. Syn heit wie de akteur Cruys Voorbergh (eins Ernest van Vrijberghe de Coningh), en syn mem wie Ada van Geel. Van Vrijberghe de Coningh hie in suster, Emmy van Vrijberghe de Coningh, dy't keunstneresse wie. Nei in jier ULO folge er fan 1963 oant 1968 in oplieding oan it konservatoarium, dêr't er foar gitarist learde, en dêrnei oan 'e Lytskeunstakademy, dêr't er syn stúdzje yn 1972 ôfrûne. Hy gie mei sin net nei de toanielskoalle, om't er net as kloan fan syn heit sjoen wurde woe. Tuskentroch died er noch wol in fjouwer jier duorjende balletoplieding.

Yn 1977 rjochte Van Vrijberghe de Coningh syn eigen teätergroep Splinter op, wêrfan't hy de artistyk lieder waard. Yn 'e dêropfolgjende jierren brocht er mei dat selskip ferskate kabaretfoarstellings op 'e planken. Ek yn 1977 makke er syn tillefyzjedebút as presintator, by it NCRV-programma Showroom, dêr't hy it ûnderdiel De Studiogasten die. Yn dy funksje bleau er wurksum oant 1980. Syn alderearste ferskining op 'e tillefyzje hie lykwols as yn 1967 west, doe't er as ien fan 'e jeugdbestjoersleden fan 'e Wild Life Rangerset yn petear gie mei prins Bernhard.

Yn 'e tachtiger jierren wurke Van Vrijberghe de Coningh fiif jier lang by de platemaatskippij Bovema, en produsearre er muzyk foar artysten lykas de band Drukwerk. Yn 1985 wied er ien fan 'e inisjatyfnimmers fan 'e teätergroep Sweat Produkties. As sjonger trede er fan 1987 oant 1996 op mei syn band The Shooting Party, en wûn mei it nûmer Kaal de Annie M.G. Schmidt-priis foar it bêste Nederlânsktalige teäterliet fan 1995.

Van Vrijberghe de Coningh spile yn 1989 de haadrol yn 'e film Alaska, dêr't er ek de soundtrack foar komponearre. Dy film wûn in Gouden Keal foar de bêste koarte film. Datselde jiers wurke er mei Karin Bloemen mei oan it programma Spijkers met Koppen. Fierders wûn er faam as toanielakteur mei de rol fan Ebeneezer Scrooge yn in foarstelling dy't basearre wie op A Christmas Carol fan Dickens, en spile er koart njonken Liesbeth List yn 'e musical Eindeloos. Oant doe ta wie Van Vrijberghe de Coningh by it grutte publyk fierhinne ûnbekend bleaun, mar dat feroare doe't er yn 1993 de rol fan 'e asosjale mar ynnimlike liddichgonger Sjonnie Flodder oernaam fan akteur Huub Stapel. Stapel hie Sjonnie yn in pear films spile, mar seach gjin heil yn in ferfolch op 'e tillefyzje. Dêr wied er lykwols goed mis mei, want de searje Flodder waard in trochslaand súkses, wêrfan't de ôfleveringen noch altyd (2015) geregeldwei werhelle wurde. Njonken syn live-aktearwurk wie Van Vrijberghe de Coningh ek aktyf as stimakteur; sa spile er yn 1995 Buzz Lightyear yn 'e Nederlânsktalige ferzje fan 'e tekenfilm Toy Story.

Op 15 novimber 1997, trije dagen nei syn 47ste jierdei, spilen Van Vrijberghe de Coningh en syn kollega's Stefan de Walle en Tatjana Šimić yn 'e Flodder-studio's yn Almeare by in besletten feest in sêne út 'e searje nei, doe't Van Vrijberghe de Coningh ynienen efteroer foel en stil lizzen bleau. De gasten tochten dat dit ûnderdiel útmakke fan it optreden en hja begûnen te klappen, mar De Walle en Šimić hiene daliks troch dat der wat mis wie, en bellen in ambulânse. It bliek om in hertstilstân te gean, en doe't reänimaasje net mear bate mocht, stoar Van Vrijberghe de Coningh ûnderweis nei it sikehûs. Hertproblemen rûnen by him yn 'e famylje; sa ferstoar syn heit mei 64 jier ek oan in hertstilstân, wylst syn suster Emmy yn 1992 mei 44 jier kaam te ferstjerren nei de iepening fan in tentoanstelling fan har wurk. De hommelse dea fan Van Vrijberghe de Coningh makke foargoed in ein oan 'e ambysjes fan regisseur Dick Maas om in sechsde seizoen fan Flodder te meitsjen, om't noch hysels, noch de produsinten ynseagen hoe't in oare akteur de rol oernimme kinne soe dy't Van Vrijberghe de Coningh him sa eigen makke hie.

Priveelibben[bewurkje seksje | boarne bewurkje]

Coen van Vrijberghe de Coningh hie oant syn ferstjerren in relaasje mei aktrise Wivineke van Groningen, mei wa't er gearwenne oan 'e Korte Leidsedwarsstraat yn Amsterdam. Hja hiene gjin bern.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: Bronnen, noten en/of referenties, op dizze side.