Paralympyske Winterspullen 2018

XIIe Paralympyske Winterspullen
holden yn	Pyeongchang (Súd-Koreä)
jier	2018
data	9-18 maart
organisator	IPC
dielnimmende lannen	49
dielnimmende atleten	>570
eveneminten	80 yn 6 sporten
iepeningsseremoanje	9 maart
slutingsseremoanje	18 maart
edysjes
foarige	Sotsji 2014
folgjende	Peking 2022
Temaside  Sport

De Paralympyske Winterspullen 2018 (Koreaansk: 평창 동계 패럴림픽; transliteraasje: Pyeongchang Donggye Paereollimpik) wiene in grut ynternasjonaal sportevenemint foar atleten mei in lichaamlike beheining, yn 'e tradysje fan 'e Paralympyske Spullen, dat begjin 2018 holden waard yn it Súdkoreaanske Pyeongchang. Hjiroan namen 49 lannen en mear as 570 sporters diel. It wie de tolfde kear dat de Paralympyske Simmerspullen organisearre waarden. De iepeningsseremoanje fûn plak op 9 maart en de ôfslutingsseremoanje op 18 maart. It sportbarren omfieme 80 ûnderdielen yn 6 ûnderskate sporten. It snowboarden, dat op 'e foarrige edysje fan 'e Paralympyske Winterspullen, yn 2014 yn Sotsji, noch út twa ûnderdielen bestie en ûnderbrocht wie by it alpineskyen, waard yn Pyeongchang foar it earst yn tsien ferskillende ûnderdielen en as in selsstannige sport beoefene. Foar de Paralympyske Winterspullen fan Pyeongchang waarden deselde fasiliteiten brûkt dy't earder, yn febrewaris, brûkt wiene foar it hâlden fan 'e Olympyske Winterspullen.

Organisaasje

As ûnderdiel fan 'e offisjele oerienkomst tusken it Ynternasjonaal Paralympysk Komitee (IPC) en it Ynternasjonaal Olympysk Komitee (IOC) dy't sletten waard yn 2001, organisearret it gastlân fan 'e Olympyske Winterspullen ek de Paralympyske Winterspullen. Sadwaande waard dit sportevenemint yn maart 2018 holden yn Pyeongchang, yn Súd-Koreä, dêr't gebrûk makke wurde koe fan 'e fasiliteiten en akkomodaasjes fan 'e Olympyske Winterspullen dy't in moanne earder, yn febrewaris 2018, ek yn Pyeongchang holden wiene.

Yn 'e oanrin ta de Paralympyske Winterspullen fan 2018 spilen de organisaasje guon fan deselde problemen parten dêr't ek de Olympyske Winterspullen mei te krijen hân hiene. Dêrby gie it û.m. om 'e politike ynstabiliteit op it Koreaanske Skiereilân troch de spannings tusken Noard- en Súd-Koreä. Dy swierrichheden waarden glêdstrutsen doe't de beide lannen yn jannewaris, in pear wiken foar it begjin fan 'e Olympyske Spullen, ta oerienstimming kamen om alteast foar de perioade fan 'e beide sporteveneminten de striidbile te begraven. Fierders spile op 'e nij de neisleep fan it Russysk dopingskandaal fan 'e spullen yn Sotsji, krekt sa't dat ek in probleem west hie foarôfgeande oan 'e Paralympyske Simmerspullen fan 2016, yn Rio de Janeiro. Doe wie it lidmaatskip fan Ruslân troch it Ynternasjonaal Paralympysk Komitee opskoarre, en foar de spullen yn Pyeongchang kaam dêr gjin feroaring yn. Wol waard guon Russyske sporters tastien en doch mei as 'neutrale' atleten.

De iepeningsseremoanje fan 'e Paralympyske Spullen fan Pyeongchang.

Sporten

Op 'e Paralympyske Winterspullen fan 2018 waard troch de atleten dielnommen oan yn totaal 80 ûnderdielen dêr't medaljes foar útrikt waarden, ferdield oer 6 offisjele sporten. It snowboarden, dat op 'e Paralympyske Winterspullen fan 2014, yn Sotsji, noch by it alpineskyen ûnderbrocht wie, waard no foar it earst erkend as selsstannige sport. Boppedat waard it tal ûnderdielen fan it snowboarden útwreide fan 2 nei 10.

• alpineskyen
• biatlon
• rolstoelcurling
• skyrinnen
• slidehockey
• snowboarden

Kalinder

IS

iepeningsseremoanje

●

groeps- en kwalifikaasjewedstriden

1

finales (mei oantal op dy dei)

OS

ôfslutingsseremoanje

maart	freed 9	sneon 10	snein 11	moan 12	tiis 13	woa 14	tong 15	freed 16	sneon 17	snein 18	finales
seremoanjes	IS									OS
alpineskyen		6	6		6	3	3		3	3	30
biatlon		6			6			6			18
rolstoelcurling		●	●	●	●	●	●	●	1		1
skyrinnen			2	4		6			6	2	20
slidehockey		●	●	●	●	●	●	●	●	1	1
snowboarden				5				5			10
totaal tal finales	0	12	8	9	12	9	3	11	10	6	80
finales dien	0	12	20	29	41	50	53	64	74	80	80

Dielnimmende lannen

Hjirûnder de dielnimmende lannen oan 'e Paralympyske Winterspullen fan 2018, mei it tal yndividuële sporters werjûn. Ruslân wie as lân útsletten fan dielname fanwegen it dopingskandaal op de Olympyske Winterspullen 2014. Wol diene der 29 yndividuële Russyske sporters mei as 'neutrale' atleten ûnder de Paralympyske flagge. Trije lannen (Georgje, Noard-Koreä en Tadzjikistan) namen yn Pyeongchang foar it earst diel oan 'e Paralympyske Winterspullen.

• Andorra: 1
• Argentynje: 2
• Armeenje: 1
• Austraalje: 12
• Belgje: 2
• Bosnje-Hertsegovina: 1
• Brazylje: 3
• Bulgarije: 1
•   Denemark: 1
• Dútslân: 20
• Eastenryk: 13
• de Feriene Steaten: 68

• Finlân: 13
• Frankryk: 12
• Georgje: 2
• Grikelân: 1
• Grut-Brittanje: 14
• Hongarije: 2
•   Iislân: 1
• Iraan: 5
• Itaalje: 26
• Japan: 38
• Kanada: 52
• Kazachstan: 6

• Kroaasje: 7
• Meksiko: 1
• Mongoalje: 1
• Nederlân: 9
• Nij-Seelân: 3
• Noard-Koreä: 2
•   Noarwegen: 32
• de Oekraïne: 20
• Oezbekistan: 1
• Poalen: 9
• Roemeenje: 1
• Servje: 1

• Sily: 4
• Sina: 26
• Sloveenje: 1
• Slowakije: 11
• Spanje: 3
• Súd-Koreä: 36 (gastlân)
• Sweden: 24
•    Switserlân: 13
• Tadzjikistan: 1
• Tsjechje: 21
• Turkije: 1
• Wyt-Ruslân: 14
• neutrale atleten (Ruslân): 29

Medaljespegel

rang	lân	goud	sulver	brûns	totaal
1	Feriene Steaten	13	15	8	36
2	neutrale atleten (Ruslân)	8	10	6	24
3	Kanada	8	4	16	28
4	Frankryk	7	8	5	20
5	Dútslân	7	8	4	19
6	Oekraïne	7	7	8	22
7	Slowakije	6	4	1	11
8	Wyt-Ruslân	4	4	4	12
9	Japan	3	4	3	10
10	Nederlân	3	3	1	7
11	Switserlân	3	0	0	3
12	Itaalje	2	2	1	5
13	Grut-Brittanje	1	4	2	7
14	Noarwegen	1	3	4	8
15	Austraalje	1	0	3	4
16	Finlân	1	0	2	3
	Nij-Seelân	1	0	2	3
	Súd-Koreä (gastlân)	1	0	2	3
19	Kroaasje	1	0	1	2
20	Kazachstan	1	0	0	1
	Sina	1	0	0	1
22	Eastenryk	0	2	5	7
23	Spanje	0	1	1	2
24	Sweden	0	1	0	1
25	Belgje	0	0	1	1
	Poalen	0	0	1	1

Keppelings om utens

• (in) Offisjele webside fan 'e Olympyske en Paralympyske Simmerspullen fan 2018
• (in) Offisjele webside fan it Ynternasjonaal Paralympysk Komitee

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory 2018 Winter Paralympics fan Wikimedia Commons.