Gil Birmingham

Gil Birmingham
akteur
persoanlike bysûnderheden
echte namme	Gil Birmingham
nasjonaliteit	Amerikaansk
berne	13 july 1953
berteplak	San Antonio (Teksas)
etnisiteit	Komantsje (Comanche)
jierren aktyf	1982 – no
offisjele webside
www.gilbirmingham.com

Gil Birmingham (San Antonio, 13 july 1953) is in Amerikaansk film-, tillefyzje- en stimakteur fan Yndiaansk komôf. Hy waard it bekendst mei syn fertolking fan 'e rol fan Billy Black yn The Twilight Saga-filmsearje, en mei syn weromkearende rol as Virgil White yn 'e tillefyzjesearje Unbreakable Kimmy Schmidt. Birmingham hat ek spile yn films as The Doe Boy, Hell or High Water en Wind River, en de tillefyzjesearje Body & Soul en de tillefyzjefilm Dreamkeeper.

Libben en karriêre

Jonkheid en oplieding

Birmingham waard yn 1953 berne yn 'e stêd San Antonio, yn it wesltike part fan 'e Amerikaanske steat Teksas. Syn beide âlden wiene Yndianen en hearden ta it folk fan 'e Komantsjen (Comanche). Om't syn heit yn it Amerikaanske Leger tsjinne, ferhuze it gesin gauris en groeide Birmingham yn in grut tal ferskate plakken op. Hy learde al ier gitaarspyljen en beskôget muzyk as syn "earste leafde". Nei't er mei in bachelorgraad ôfstudearre oan 'e Skoalle foar Belied, Planning en Untwikkeling fan 'e Universiteit fan Súdlik Kalifornje (USC), wurke er as yngenieur yn 'e petrogemyske yndustry.

Aktearkarriêre

Yn 'e iere 1980-er jierren waard Birmingham 'ûntdutsen' troch in talintescout wylst er oefenings die yn in sportskoalle. Hy wie yn dy tiid yn 'e besnijing rekke fan bodybuilding en hie sels oan inkele wedstriden op dat mêd meidien. Troch tuskenkomst fan 'e scout kaam er foar it earst mei aktearjen yn oanrekking, doe't er yn 1982 meiwurke oan 'e fideoklip fan it nûmer Muscles fan sjongster Diana Ross. Neitiid begûn Birmingham aktyf te besykjen om in aktearkarriêre fan 'e grûn te krijen. Hy folge aktearlessen by Larry Moss en Charles E. Conrad, en ferfolle in skoft de live-rol fan it bekende fantasypersonaazje Conan de Barbaar yn 'e attraksje The Adventures of Conan: A Sword and Sorcery Spectacular, yn it ferdivedaasjepark fan Universal Studios yn Hollywood.

Yn 1986 makke Birmingham syn debút op 'e Amerikaanske tillefyzje mei in lyts roltsje yn in ôflevering fan 'e aksjesearje Riptide. De folgjende jierren hied er gastrollen yn ôfleverings fan û.m. de soapsearje Falcon Crest, de fantasysearje Buffy the Vampire Slayer (ôflevering Inca Mummy Girl), en de westernsearje Dr. Quinn, Medicine Woman. Ek wurke er as stimakteur mei oan û.m. de tekenfilmsearje The Legend of Calamity Jane en in ôflevering fan The Wild Thornberrys. De earste kear dat Birmingham yn in film ferskynde, wie yn 1987 yn House II: The Second Story, mar dat wie amper mear as in figuranteroltsje. Yn 1999 liende er syn stim oan it personaazje Ghostalker yn it fideospultsje Command & Conquer: Tiberian Sun.

Yn 2001 hie Birmingham syn echte debút yn in film, doe't er de rol fan Manny Deadmarsh spile yn it bekroande The Doe Boy. Neitiid spile er ek yn films as Skins (2002), No Man's Land: The Rise of Reeker (2008) en Love Ranch (2010), mei Joe Pesci en Helen Mirren. Yn 2008 liende er syn stim oan it personaazje Nashoba yn 'e tekenfilm Turok: Son of Stone. Datselde jiers waard Birmingham cast yn 'e rol fan Billy Black yn 'e film Twilight, it earste diel fan The Twilight Saga-filmsearje. Dêrmei rekke er bekend by in breder publyk. Dyselde rol spile er letter op 'e nij yn 'e films The Twilight Saga: New Moon (2009), The Twilight Saga: Eclipse (2010), The Twilight Saga: Breaking Dawn – Part 1 (2011) en The Twilight Saga: Breaking Dawn – Part 2 (2012).

Yn 'e 2000-er jierren wie Birmingham fierders op 'e tillefyzje te sjen yn gastrollen yn searjes as Family Law, V.I.P., Medical Investigation, Charmed, Veronica Mars, Nip/Tuck, 10 Items or Less, Castle en The Mentalist. Ek hied er in weromkearende rol as Oz yn acht ôfleverings fan 'e sikehûssearje Body & Soul, wêrfoar't er yn 2002 in FAITA Award yn 'e kategory 'treflik optreden' wûn. Yn 2005 waard er cast as de âldere Dogstar yn Steven Spielberg syn seisdielige minysearje Into the West. Fierders spile Birmingham ek yn ferskate tillefyzjefilms, lykas Gentle Ben (2002), Dreamkeeper (2003), dêr't er in American Indian LA Film and Television Award mei wûn foar bêste byrol, en Love's Long Journey (2005), mei Erin Cottrell en Irene Bedard.

Yn 'e 2010-er jierren hie Birmingham weromkearende rollen yn ferskate tillefyzjesearjes, wêrûnder The Lying Game, Banshee, House of Cards (as Daniel Lanagin), en Siren. Ek hied er gastrollen yn û.m. de aksjesearje Vegas en de plysjesearje NCIS: Los Angeles. Ien fan syn bekendste rollen hie Birmingham, doe't er fan 2015 oant en mei 2017 yn sân ôfleverings fan 'e searje Unbreakable Kimmy Schmidt de rol fan Virgil White spile. Yn 2011 wurke er as stimakteur mei oan 'e westerntekenfilm Rango. Fierders hied er rollen yn films as Shouting Secrets (2011), Crooked Arrows (2012), The Lone Ranger (2013), The Space Between Us (2017), Transformers: The Last Knight (2017) en Saint Judy (2018).

Yn 'e misdiefilm Hell or High Water (2016) spile Birmingham de rol fan Texas Ranger Alberto Parker, en datselde jiers fertolke er de rol fan T.B. Thompson, de heit fan aktrise Te Ata Fisher yn 'e troch de Tsjikkesou Naasje produsearre biografyske film Te Ata. Hy wenne de premiêre fan dy lytse produksje by yn Moore, yn Oklahoma, op 13 septimber 2016. Yn 'e neo-western Wind River, regissearre troch Taylor Sheridan, wie Birmingham te sjen as de roujende heit fan in fermoarde en ferkrêfte dochter. Fan 2018 ôf hied er de fêste rol fan Thomas Rainwater, it snoade opperhaad fan 'e pleatslike Yndianestamme yn 'e ek troch Sheridan regisearre dramasearje Yellowstone, mei û.m. Kevin Costner. Yn febrewaris 2021 waard oankundige dat Birmingham de rol fan Charlie Bass spylje sil yn 'e oankommende skrillersearje Pieces of Her, basearre op 'e roman mei deselde namme fan Karin Slaughter.

Filmografy

Filmografy as akteur
jier	titel	rol of funksje	opmerkings
tillefyzje
1986	Riptide	plysjeman	gastrol; ôfl. Chapel of Glass
1987	Falcon Crest	helpsheriff	gastrol; ôfl. Desperation
1997	The Legend of Calamity Jane	ferskate personaazjes	as stimakteur; 13 ôfl.
1997	Buffy the Vampire Slayer	Perûviaanske man	gastrol; ôfl. Inca Mummy Girl
1997	Night Man	Vargas	gastrol; ôfl. I Left My Heart in San Francisco
1997	Dr. Quinn, Medicine Woman	kriger #1	gastrol; ôfl. Safe Passage
1999	The Wild Thornberrys	heit fan Jim	as stimakteur; gastrol; ôfl. Tamper Proof Seal
2001	Family Law	Bernard	gastrol; ôfl. Americans
2001	V.I.P.	Roland	gastrol; ôfl. Uncle from V.A.L.
2002	Gentle Ben	Pete	tillefyzjefilm
2002	Body & Soul	Oz	weromkearende rol; 8 ôfl.
2003	Gentle Ben 2	Pete	tillefyzjefilm
2003	The Lone Ranger	One Horn	pilotôflevering fan in net makke westernsearje
2003	Dreamkeeper	Sam	tillefyzjefilm
2005	Medical Investigation	Walter Shephard	gastrol; ôfl. Tribe
2005	Into the West	de âldere Dogstar	minysearje, 4 ôfl.
2005	Love's Long Journey	Sharp Claw	tillefyzjefilm
2006	Charmed	opperhaad	gastrol; ôfl. Payback's a Witch
2006	Veronica Mars	Leonard Lobo	gastrol; 2 ôfl.
2009	Nip/Tuck	medisynman	gastrol; ôfl. Budi Sabri
2009	10 Items or Less	John Greene	gastrol; ôfl. Dances with Groceries
2010	Castle	Cacaw Te	gastrol; ôfl. Wrapped Up in Death
2010	The Mentalist	Markham Willis	gastrol; ôfl. Aingavite Baa
2012	The Lying Game	Ben Whitehorse	weromkearende rol; 3 ôfl.
2012	Wilfred	Red Wolf	gastrol; ôfl. Questions
2012	Vegas	Don Simmons	gastrol; 2 ôfl.
2014	Banshee	George Hunter	weromkearende rol; 5 ôfl.
2014	House of Cards	Daniel Lanagin	weromkearende rol; 4 ôfl.
2015–2017	Unbreakable Kimmy Schmidt	Virgil	weromkearende rol; 7 ôfl.
2016	Dr. Del	Crow	tillefyzjefilm
2017	Animal Kingdom	Pearce	gastrol; ôfl. Betrayal
2018-2020	Siren	sheriff Dale Bishop	weromkearende rol; 14 ôfl.
2018–no	Yellowstone	opperhaad Thomas Rainwater	fêste rol
2019	NCIS: Los Angeles	kaptein-op-see Steven Douglas	gastrol; slotôfl. fan it seizoen
2021	Pieces of Her	Charlie Bass	weromkearende rol
20??	Under the Banner of Heaven	Bill Taba	minysearje
films
1987	House II: The Second Story	kriger
1996	Le Jaguar	liifwacht fan Kumare
2001	The Doe Boy	Manny Deadmarsh
2002	Skins	Sonny Yellow Lodge
2005	End of the Spear	Moipa
2007	Cosmic Radio	stamâldste
2008	Turok: Son of Stone	Nashoba	as stimakteur
2008	No Man's Land: The Rise of Reeker	Eaglesmith
2008	Twilight	Billy Black
2009	The Twilight Saga: New Moon	Billy Black
2010	Love Ranch	sheriff Johnny Cortez
2010	The Twilight Saga: Eclipse	Billy Black
2011	Rango	Wounded Bird	as stimakteur
2011	Shouting Secrets	Cal Bishnik
2011	The Twilight Saga: Breaking Dawn – Part 1	Billy Black
2011	California Indian	Charles "Chi" Thomas
2012	Crooked Arrows	Ben Logan
2012	The Twilight Saga: Breaking Dawn – Part 2	Billy Black	inkeld fermeld op 'e ôftiteling
2013	The Lone Ranger	Red Knee
2016	Hell or High Water	Alberto Parker
2017	Wind River	Martin Hanson
2017	The Space Between Us	medisynman Neka
2017	Transformers: The Last Knight	opperhaad Sherman
2018	Saint Judy	Michael Bowman
20??	The Marsh King's Daughter	?
fideospultsjes
1999	Command & Conquer: Tiberian Sun	Ghosttalker	as stimakteur

Keppelings om utens

• (in) Offisjele webside fan Gil Birmingham
• (in) Folsleine filmografy fan Gil Birmingham yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.