Irene Bedard

Ut Wikipedy
Springe nei navigaasje Springe nei sykjen
Irene Bedard
Filmklapper.png akteur
Irene Bedard.jpg
persoanlike bysûnderheden
echte namme Irene Bedard
nasjonaliteit Flag of the United States.svg Amerikaansk
berne 22 july 1967
berteplak Anchorage (Alaska)
etnisiteit Gjin Flagge (Bekend).PNG Injûpiat
Flagge fan de Inûyt.PNG Inûyt
Gjin Flagge (Bekend).PNG Jûpik
Gjin Flagge (Bekend).PNG Kry
Flag of the Metis (anglophone).PNG Mety
jierren aktyf 1994 – no
offisjele webside
Irene Bedard op Twitter

Irene Bedard (Anchorage, 22 july 1967) is in Amerikaansk film-, tillefyzje- en stimaktrise fan mingd Yndiaansk en Eskimo-komôf. Hja hat sûnt it begjin fan har aktearkarriêre, yn 1994, in wiid ferskaat oan Yndiaanske froulju spile. It bekendst waard se mei har rol as Suzie Song yn 'e film Smoke Signals en trochdat se har stim liende oan it titelpersonaazje út 'e lange tekenfilm Pocahontas, fan Disney.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Bedard waard yn 1967 berne yn Anchorage, yn 'e Amerikaanske steat Alaska. Hja is fan mingd etnysk komôf, mei bloed fan trije Eskimofolken: de Injûpiat (Iñupiat) út noardlik Alaska, de Inûyt (Inuit) út noardlik Kanada en de Jûpik (Yup’ik) út súdwestlik Alaska. Dêropta stammet se ek ôf fan 'e Yndiaanske Kry (Cree) út súdlik Kanada en de noardlike 48 legere Feriene Steaten, en fan 'e Mety (Métis), in mingfolk fan blanken en Yndianen, dat yn Kanada mei Yndianen en Eskimo's as ien fan 'e trije lânseigen groepen beskôge wurdt. Bedard studearre muzikaal teäter oan The University of the Arts, yn Philadelphia.

Aktearkarriêre[bewurkje seksje | boarne bewurkje]

Bedard spile har earste rol as de Lakota-aktiviste Mary Crow Dog, yn 'e tillefyzjefilm Lakota Woman: Siege at Wounded Knee, út 1994, dy't oer de Besetting fan Wounded Knee yn 1973 giet. Foar dy rol waard se nominearre foar in Golden Globe yn 'e kategory bêste rol fan in aktrise yn in minysearje of tillefyzjefilm, en se wûn der in Western Heritage Award mei. Datselde jiers makke se ek har debút op it wite doek mei in lyts roltsje yn 'e film Squanto: A Warrior's Tale. Har bekendste rol hie se as stimaktrise doe't se yn 1995 har stim liende oan it personaazje fan Pocahontas, yn 'e lange tekenfilm Pocahontas fan 'e Walt Disney Animation Studios. Se stie ek lichaamlik model foar dat personaazje. It Amerikaanske tydskrift People keas har dat jiers ta ien fan 'e fyftich moaiste minsken fan 'e wrâld.

Op 'e tillefyzje hie Bedard gastrollen yn searjes as The Marshal (1995), Adventures from the Book of Virtues (1996), Profiler (1997) en The Outer Limits (2001). Yn 1996 spile se de rol fan Swarte Bizonfrou yn 'e tillefyzjefilm Crazy Horse, oer it Lakota-opperhaad Mâl Hynder. Ek fertolke Bedard yn 1997 de rol fan Minnehaha yn 'e film Song of Hiawatha, nei it ferneamde gedicht fan Henry Wadsworth Longfellow. In oare bekende rol fan harres wie dy fan Suzy Song yn 'e film Smoke Signals, út 1998.

Datselde jiers wie se ek te sjen yn 'e tillefyzjefilm Two for Texas, dy't har in twadde Western Heritage Award opsmiet, en teffens liende se op 'e nij har stim oan Pocahontas foar it direkt-op-fideo útbrochte ferfolch Pocahontas II: Journey to a New World (wêryn't Pocahontas op reis giet nei Jeropa). Bedard hie as stimaktrise ek in weromkearende rol as generaal Miriam Redwing yn fjouwer ôfleverings fan 'e science fiction-tekenfilmsearje Roughnecks: The Starship Troopers Chronicles (1999-2001). Oare stimrollen hie se yn ôfleverings fan What's New, Scooby Doo? (2004), Higglytown Heroes (2005), The Spectacular Spider-Man (2008), Young Justice: Invasion (2012), en de film Turok: Son of the Stone (2008).

Irene Bedard yn 2016.

Yn 2005 wie Bedard te sjen yn 'e film The New World, fan regisseur Terence Malick, dy't it ferhaal fan Pocahontas út in hiele oare hoeke besjocht. Dêryn hie se de rol fan Nonoma, de mem fan Pocahontas. Datselde jiers spile Bedard ek de healbloedfrou Margaret Light Shines Wheeler yn it mei loovjende kritiken ûntfongen Into the West, in minysearje fan it westernsjenre. Dêrmei wûn se har trêde Western Heritage Award. Fan 2012 oant en mei 2015 hie Bedard yn trije ôfleverings fan 'e plysjesearje Longmire in weromkearende rol as May Stillwater. In oare weromkearende rol hie se yn 2017 as Kimi Lucero yn njoggen ôfleverings fan 'e tillefyzjesearje The Mist. Ek hie se yn 2018 in gastrol yn 'e searje Westworld, en liende se jitris har stim oan it personaazje Pocahontas yn 'e tekenfilm Ralph Breaks the Internet. Yn 2017 wurke Bedard fierders mei oan 'e fideoklip fan it nûmer Family Feud, fan rapper Jay-Z, wêryn't se in ko-presidint fan 'e Feriene Steaten spilet.

Oar wurk[bewurkje seksje | boarne bewurkje]

Njonken har aktearkarriêre rjochte Bedard yn 2012, tegearre mei de Kanadeeske sakeman Thom Denomme, de ûnôfhinklike filmstudio's Sleeping Lady Films en Waking Giants Productions op, dy't fêstige binne yn Anchorage (Alaska), resp. Santa Fe (Nij-Meksiko). De studio's binne deroan wijd om positive en ynspirearjende ferhalen te ferfilmjen oer Yndianen en Yndiaanske kwestjes.

Yn 2001 presintearre Bedard de njoggende jierlikse útrikkingsseremoanje fan 'e First Americans in the Arts Awards (of FAITA Awards) yn it Beverly Hilton Hotel yn Beverly Hills. Bedard is ek tige aktyf yn organisaasjes dy't it miljeu en Yndiaanske hillige plakken besykje te beskermjen tsjin "untwikkeling" en eksploitaasje. Yn 2017 sleat se foar har studio's in kontrakt mei de Katôba Yndiaanske Naasje fan Súd-Karolina foar de ûntwikkeling fan beskate media.

Priveelibben[bewurkje seksje | boarne bewurkje]

Bedard troude yn 1993 mei sjonger Deni Wilson. Hja hawwe in soan, Quinn Wilson, dy't berne waard yn 2003. Yn novimber 2010 kaam út dat Bedard har hiele houlik lang troch Wilson seksueel misbrûkt en lichaamlik mishannele wie. Har man hie dêrnjonken beslach lein op alle jild dat se mei har aktearwurk fertsjinne en har ferbean om in rol oan te nimmen as hy dêr net mei safolle wurden tastimming foar jûn hie. Bedard en Wilson skieden yn 2012.

Filmografy[bewurkje seksje | boarne bewurkje]

Filmografy as aktrise
jier titel rol of funksje opmerkings
tillefyzje
1994 Lakota Woman: Siege at Wounded Knee Mary Crow Dog tillefyzjefilm; nominearre foar in Golden Globe foar bêste aktrise yn in minysearje of tillefyzjefilm
1995 The Marshal Melissa Carey gastrol; ôfl. Twoslip
1996 Grand Avenue Reyna tillefyzjefilm
1996 Crazy Horse Swarte Bizonfrou tillefyzjefilm
1996 Adventures from the Book of Virtues Morning Light and Sharp Eyes as stimaktrise; gastrol; ôfl. Honesty
1996 Adventures from the Book of Virtues dochter fan it opperhaad as stimaktrise; gastrol; ôfl. Perseverance
1996 The Real Adventures of Jonny Quest Alice Starseer as stimaktrise; weromkearende rol; 2 ôfl. Return of the Anasazi en Trouble on the Colorado
1997 Profiler Maddy Duvall gastrol; ôfl. The Sorcerer's Apprentice
1997 True Women Tobe tillefyzjefilm
1998 Two for Texas Sana tillefyzjefilm
1999 Blood Money Naomi Lister tillefyzjefilm
1999–2001 Roughnecks: The Starship Troopers Chronicles    generaal Miriam Redwing as stimaktrise; weromkearende rol; 4 ôfl.
2000 The Lost Child Grace tillefyzjefilm
2001 The Outer Limits Callie Whitehorse Landau gastrol; ôfl. In the Blood
2001 The Agency Diah Siagian gastrol; ôfl. The Year of Living Dangerously
2001 House of Mouse Pocahontas as stimaktrise; gastrol; ôfl. Thanks to Minnie
2003 Edge of America Annie Shorty tillefyzjefilm
2004 What's New, Scooby-Doo? Cody Long as stimaktrise; gastrol; ôfl. New Mexico, Old Monster
2005 Higglytown Heroes Forest Ranger Hero as stimaktrise; gastrol; ôfl. Fran Takes a Hike/Mystery at Kip's House
2005 Into the West Margaret Light Shines Wheeler minysearje
2005 Love's Long Journey Miriam Red Hawk McClain tillefyzjefilm
2008–2009 The Spectacular Spider-Man Jean DeWolff as stimaktrise; weromkearende rol; 4 ôfl.
2012 Young Justice: Invasion Shelly Longshadow as stimaktrise; gastrol; 1 ôfl.
2012–2015 Longmire May Stillwater weromkearende rol; 3 ôfl.
2017 The Mist Kimi Lucero weromkearende rol; 9 ôfl.
2018 Westworld Wichapi gastrol; ôfl. Kiksuya
2020 FBI: Most Wanted Mary Lou Skye gastrol; 2 ôfl.
2020 The Stand Ray Brentner minysearje
films
1994 Squanto: A Warrior's Tale Nakooma
1995 Pocahontas Pocahontas as stimaktrise
1996 Navajo Blues Audrey Wyako
1997 Song of Hiawatha Minnehaha
1998 6/29 Laura Cooper
1998 Naturally Native Tanya Lewis
1998 Smoke Signals Suzy Song
1998 Pocahontas II: Journey to a New World Pocahontas as stimaktrise; direkt-op-fideo útbrocht
1998 12 Bucks Babe
1999 Wildflowers Ruby
2000 Pussykat ?
2001 Your Guardian Kat Damon
2003 Paris Sandy
2003 Greasewood Flat Abbey
2005 Planting Melvin Billie Lawrence
2005 Miracle at Sage Creek Sunny
2005 The New World Nonoma (mem fan Pocahontas)
2007 Cosmic Radio K.C.
2007 Tortilla Heaven Liberata
2007 The Red Chalk Eve
2008 Turok: Son of Stone Catori as stimaktrise; direkt-op-fideo útbrocht
2011 The Tree of Life boadskipper
2011 Timberwolf Eleni
2013 Vertical Lucy Mills
2014 Ron and Laura Take Back America frou Alma
2015 Songs My Brothers Taught Me Lisa Winters
2017 Spreading Darkness Marci Gippolin
2018 Ralph Breaks the Internet Pocahontas as stimaktrise
2019 The Bygone frou Call
2019 The Harbinger Floating Hawk
fideospultsjes
1995 Animated Storybook: Pocahontas Pocahontas
fideoklips
2017 Family Feud ko-presidint fan 'e Feriene Steaten    nûmer fan Jay Z mei Beyoncé

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.