Iemsmûn

Gemeente Iemsmûn


(Flagge fan Iemsmûn)		(Wapen fan Iemsmûn)

Provinsje

Grinslân

Boargemaster

Marijke van Beek (PvdA)

Haadplak

Uithuizen

Oerflak
- wetter

551,24 km²
- 361,00 km²

Ynwenners

15.780 (83 km²)

Ferkearsieren

Spoar Grins-Roodeschool

Netnûmer

0595, 0596

Postkoades

9979-9986, 9988-9989, 9995-9999

Offisjeel webstee

www.eemsmond.nl

Iemsmûn (Nederlânsk: Eemsmond) is in eardere gemeente yn de provinsje Grinslân. De gemeente beslacht in oerflak fan 551,24 km² en is dêrmei ien fan de gruttere gemeenten yn Nederlân. De doarpen fariearje yn grutte fan 75 oant sa'n 5600 ynwenners. Yn de grutste kearnen binne iuwenâlde tsjerken, pleatsen, boargen, moles en huzen te finen.

De gemeente is sa neamd omdat sy oan de noardkust fan Grinslân leit, by it plak dêr't de rivier de Iems yn de Waadsee mûnet. De hiele kontrei (oan Nederlânske en Dútske kant) is bekend as it Iemsmûngebiet en leit sa'n 22 km noardeast fan de stêd Grins.

De gemeente is foarme yn 1990 troch gearfoeging fan de eardere gemeentes Hefshuzen, Kantens, Uskwert en Warffum. De fúzjegemeente krige doe de namme Hefshuzen, mar yn 1992 waard dat feroare yn Iemsmûn.Per 1 jannewaris 2019 sille de gemeenten Bedum, De Marne, Iemsmûn en Winsum fúzjearje ta de nije gemeente It Hegelân (Het Hogeland).

Yndieling

De gemeente Iemsmûn bestiet út de neikommende doarpen, buorskippen en (ûnbewenne) eilannen: Iemshaven, Alddoarp, Aldskip, Aldesyl, Breede, Deastille, It Eastein, Easter Nijlân, Eppenhuzen, De Grinzer Falom, Hefswâl, Kantens, Katershoarne, Keningsoard, 't Lege fan de Wei, Noardpoldersyl, Paapske Tille, Roodeschool, Rottum, Rottumereach, Rottumerplaat, Sânhuzen, Sânwier, Simenssân, Startenhuzen, Stitswert, Uskwert, Uthuzen, Uthuzermieden, Waadwert en Warffum.

Iepenbier ferfier

Der rint in spoar fan Grins oant Roodeschool mei stasjons yn Grins, Grins Noard, Sauwerd, Winsum, Baflo, Warffum, Uskwert, Uithuzen, Uithuzermeeden en Roodeschool (it meast noardlike fan Nederlân). De treintsjinst wurdt eksploitearre troch Arriva. Foar frachttreinen splist it spoar justjes foar Roodeschool ôf nei de Iemshaven.

Bustsjnsten fan Qbuzz yn de gemeente binne:

line 41: Uithuzen-Uithuzermeeden-Roodeschool-Oosteinde-Spyk (oerstap nei Delfsyl-Appingedam)
line 61: Uithuzen-Uskwert-Rottum-Kantens-Middelstum-Onderdendam-Bedum-Grins
line 62/662: Uithuzen-Zandeweer-Loppersum

Ut de Iemshaven wei giet in fearboot fan AG Ems nei Borkum.