Wesley Snipes

Ut Wikipedy
Jump to navigation Jump to search
Wesley Snipes
Filmklapper.png akteur
Wesley Snipes yn 2009.
Wesley Snipes yn 2009.
persoanlike bysûnderheden
echte namme Wesley Trent Snipes
nasjonaliteit Flag of the United States.svg Amerikaansk
berne 31 july 1962
berteplak Orlando (Floarida)
etnisiteit Flag of the UNIA.svg Afro-Amerikaansk
jierren aktyf 19862010 & 2013 – no
offisjele webside
gjint

Wesley Snipes (folút: Wesley Trent Snipes; Orlando (Floarida), 31 july 1962), is in Amerikaansk akteur, filmprodusint en fjochtsportbeoefener fan Afro-Amerikaansk etnysk komôf. Hy briek yn 1989 troch mei syn byrol yn 'e honkbalfilm Major League, en waard dêrnei fral bekend mei syn haadrollen yn aksjefilms as Passenger 57, Rising Sun, Murder at 1600 en U.S. Marshals. Yn 1998 spile Snipes it personaazje Blade, basearre op in stripfiguer út 'e stâl fan Marvel Comics, yn 'e film mei deselde namme, en sûnt is syn namme dêr ûnskiedber mei ferbûn. Yn 2008 waard er feroardiele foar belestingûntdûking, en fan 2010 oant 2013 siet er dêrfoar yn it tichthûs.

Libben[bewurkje seksje | boarne bewurkje]

Jonkheid[bewurkje seksje | boarne bewurkje]

Wesley Snipes waard yn 1962 berne yn Orlando, yn 'e steat Floarida, as de soan fan Wesley Rudolph Snipes, in loftfeartboukundige, en Maryann Long, in klasse-assistinte. Hy groeide op yn 'e rûge Newyorkske wyk de Bronx, dêr't er it grutste part fan syn middelbere-skoaltiid trochbrocht. Nei't er mei syn âlden weromferhuze wie nei Orlando, slagge er dêr foar syn skoaleksamen oan 'e Jones High School. Neitiid learde Snipes fierder oan 'e Steatsuniversiteit fan New York te Purchase en ek oan it Súdwestkolleezje yn Los Angeles.

Wesley Snipes dielt hantekenings út.

Filmkarriêre[bewurkje seksje | boarne bewurkje]

Doe't er 23 jier wie, waard er ûntdutsen troch in agint út 'e filmyndustry wylst er meidie oan in wedstryd. Hy makke syn akteardebút yn 'e film Wildcats, in Goldie Hawn-fehikel út 1986. Letter dat jier hied er in lyts roltsje yn 'e populêre tillefyzjesearje Miami Vice, en yn 1987 spile er de aartsfijân fan popsjonger Michael Jackson yn dy syn troch topregisseur Martin Scorsese makke fideoklip Bad. Hoewol't er mei Bad de oandacht loek fan regisseur Spike Lee, dy't him frege foar in lyts roltsje yn syn film Do the Right Thing, sloech Snipes dat oanbod ôf om ynstee de (gruttere) byrol fan Willie Mays Hayes foar syn rekken te nimmen yn 'e fermaaklike honkbalfilm Major League, mei Tom Berenger en Rene Russo yn 'e haadrollen. Mei dy film, dy't yn 1989 útkaam, briek Snipes troch.

Neitiid spile er û.m. de jazz-saksofonist Shadow Henderson yn Spike Lee syn Mo' Better Blues (1990) en in travestyt yn To Wong Foo, Thanks for Everything! Julie Newmar (1995), en teffens wied er te sjen yn in drama's lykas The Waterdance (1992) en komeedzjes lykas White Men Can't Jump (1992). Snipes waard lykwols fral bekend mei syn haadrollen yn aksjefilms, wêrûnder Passenger 57 (1992), mei Halle Berry; Rising Sun (1993), mei Sean Connery; Demolition Man (1993), mei Sylvester Stallone; Money Train (1995), mei Woody Harrelson; Murder at 1600 (1997), mei Diane Lane; en U.S. Marshals (1998), mei Tommy Lee Jones.

Wesley Snipes mei kollega Ethan Hawke, yn 2009.

Yn 1997 wûn Snipes de Volpi Cup foar bêste akteur op it Filmfestival fan Feneesje foar syn optreden fan dat jier yn 'e film One Night Stand. It jier dêrop, yn 1998, belibbe er syn grutste kommersjele súkses as it titelpersonaazje yn 'e fantasyfilm Blade, dy't basearre is op in stripferhaal fan Marvel Comics. It giet oer in "deirinner" (daywalker), in persoan mei boppenatuerlike fampierekrêften dy't lykwols gjin fampier is, en krekt de striid oanbynt mei dy kwea-aardige wêzens. Dy film brocht wrâldwiid mear as $150 miljoen dollar op, en wie sa súksesfol dat er it begjin fan in filmrige waard, mei ferfolch Blade II dat yn 2002 útkaam, en diel trije Blade: Trinity út 2004. Tsjin dy tiid wie Snipes ek úteinsetten mei it produsearjen fan films, en hoewol't er as produsint by it meitsjen fan Blade: Trinity belutsen wie, ûntstie der dochs rûzje tusken him, studio New Line Cinema en regisseur David S. Goyer oer de úteinlike foarm fan 'e film, dy't sels útrûn op in rjochtsaak, al waard it spul letter sust, sadat it binnenskeamers ta in (geheim holden) skikking komme koe.

Wesley Snipes mei syn frou Nakyung Park, yn 2009.

Fjochtsport[bewurkje seksje | boarne bewurkje]

Snipes is in ekspêr yn ferskate fjochtsporten. Syn training dêryn begûn er doe't er tolve jier wie. Hy hat in fyfdegraads swarte bân yn shokotan-karate en in twaddegraads swarte bân yn hapkido. Fierders is er ek traind yn 'e Brazyljaanske fjochtsport/dûnsfoarm capoeira en ferskate oare dissiplines, lykas kung fu en de Brazyljaanske foarm fan jiu jiutsu. Mei syn broer runt Snipes in bedriuw dat befeiligingsminsken en liifwachten traind foar filmstjerren en oare pommeranten, ûnder de namme Amen-Ra, wat ek de namme is fan syn eigen filmproduksjebedriuw.

Priveelibben[bewurkje seksje | boarne bewurkje]

Snipes waard kristlik grutbrocht, mar bekearde him yn 1978 ta de islaam. Tsien jier letter, yn 1988, kearde er him ek fan dy godstsjinst ôf. Der binne oanwizings (lykas de namme fan syn bedriuwen en de nammen fan syn bern) dat er him oanlutsen field ta it kemetisme, it Aldegyptyske heidendom. Snipes wie fan 1985 oant 1990 troud mei April Dubois, mei wa't er in soan krige, Jelani Asar Snipes (1988). Yn 2003 wertroude Snipes mei de keunstskilderesse Nakyung "Nikki" Park, mei wa't er fjouwer bern hat: soan Akhenaten Kihwa-T Snipes, dochter Iset Jua-T Snipes (2001), soan Alaafia Jehu-T Snipes (2004) en soan Alimayu Moa-T Snipes (2007). It gesin wennet in diel fan 'e tiid yn Park har heitelân Súd-Koreä, dat Snipes syn "twadde thúslân" neamd hat.

Wesley Snipes yn 2014, by de premiêre fan The Expendables 3.

Belestingûntdûking[bewurkje seksje | boarne bewurkje]

Op 12 oktober 2006 waarden Snipes, Eddie Ray Kahn en Douglas P. Rosile oanklage foar gearspanning om it regear fan 'e Feriene Steaten te bestellen (troch mei ferfalske gegevens oanspraak te meitsjen op foar miljoenen oan belestingweromjeften), it willensmoeds opjaan fan falske gegevens en seis ûnderskate gefallen fan belestingûntdûking. Yn reäksje hold Snipes út dat er in net yn 'e Feriene Steaten wenjend bûtenlanner is, hoewol't er yn wurklikheid sawol de Amerikaanske nasjonaliteit hat as yn 'e Feriene Steaten wennet. Fierders bewearde er dat der in foarbyld fan him makke waard fanwegen syn ferneamdens.

Nei in rjochtsaak dy't twa jier duorre, waard er úteinlik op 1 febrewaris 2008 frijsprutsen fan 'e oanklachten fan gearspanning en it willensmoeds opjaan fan falske gegevens, mar skuldich befûn oan trije fan 'e seis gefallen fan belestingûntdûking. Op 24 april 2008 waard er sadwaande feroardiele ta trije jier finzenisstraf. (Syn mei-fertochten Kahn en Rosile waarden op alle punten skuldich befûn en krigen tsien, resp. fjouwer en in heal jier sel.) Yn heger berop waard it fûnis befêstige, wylst it Amerikaanske Heechgerjochtshôf Snipes syn berop net yn behanneling nimme woe. Snipes melde him dêrom op 9 desimber 2010 by de plysje en brocht krapoan twa en in heal jier troch yn in federaal tichthûs yn Pennsylvania. Hy waard op 2 april 2013 mei goed gedrach frijlitten, wêrnei't er frij maklik syn filmkarriêre wer oppakke koe. Yn 2014 hied er ien fan 'e haadrollen yn 'e film The Expendables 3.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.