Kim-Lian van der Meij

Ut Wikipedy
Jump to navigation Jump to search
Kim-Lian van der Meij
Mikrofono.svg tillefyzje- en/of radiopersoanlikheid
Kim-lian-der-meij-1312212316.jpg
persoanlike bysûnderheden
echte namme Kim-Lian van der Meij
nasjonaliteit Flag of the Netherlands.svg Nederlânsk
berne 1 oktober 1980
berteplak Beverwyk (Noard-Hollân)
etnisiteit Flag of the Netherlands.svg Nederlânsk
Flag of Indonesia.svg Yndonezysk
wurkpaad
wurksum as presintatrise, aktrise, model
sjongster, dûnseresse
medium tillefyzje
wurksum by Jetix, SBS, NCRV
bekend fan Goede Tijden, Slechte Tijden
CallTV
jierren aktyf 1996 – no
prizen Miss Fitness Nederlân 1998
offisjele webside
www.kim-lian.nl

Kim-Lian van der Meij (Beverwyk, 1 oktober 1980) is in Nederlânsk presintatrise, aktrise, model, sjongster en dûnseresse. Hja briek troch mei rollen yn 'e tillefyzjesearjes Kees & Co., Costa! en Goede Tijden, Slechte Tijden, mar wie letter benammen wurksum as presintatrise fan û.o. kwissen, talintejachten en realitytillefyzjeprogramma's. Dêrnjonken boude Van der Meij ek in bloeiende karriêre op as musicalaktrise, wêrby't se û.m. te sjen wie yn De Kleine Zeemeermin, Fame en Shrek de Musical.

Libben en karriêre[bewurkje seksje | boarne bewurkje]

Jonkheid[bewurkje seksje | boarne bewurkje]

Van der Meij waard yn 1980 berne yn it Noardhollânske Beverwyk en is foar in part fan Yndonezysk komôf. As bern die se mei oan ferskate pleatslike dûnswedstriden, en teffens oan guon playbackshows. Twa kear, op har sechsde en op har alfde, wie se op 'e tillefyzje te sjen yn 'e Mini-Playbackshow fan Henny Huisman. Doe't se sechstjin jier wie, sette Van der Meij útein om as model te wurkjen. Se posearre foar fotoreportaazjes en reklamewurk, en paradearre as mannekên by moadeshows oer de catwalk. Ek die se oan fitness, en yn 1998, op har achttjinde, wûn se de titel Miss Fitness Nederlân.

Tillefyzjekarriêre[bewurkje seksje | boarne bewurkje]

Fanôf likernôch 2000 wie Van der Meij as aktrise te sjen yn tillefyzjesearjes as de komeedzjerige Kees & Co. en de jongereindramasearjes Bonbini Beach en Costa! By it grutte publyk rekke se fral bekend troch har rol yn 'e soapsearje Goede Tijden, Slechte Tijden. Oanslutend wie se aktyf as presintatrise by CallTV en fan 'e kwis Puzzeltijd. Nei't der in pear jier net safolle fan Van der Meij fernommen wie, kearde se op 'e tillefyzje werom as presintatrise fan 'e Kids Top 20, in nij programma op 'e bernestjoerder Jetix. Yn 2006 presintearre se ek Nationale Kids TV.

Yn desimber 2007 die Van der Meij tegearre mei Sipke Jan Bousema de presintaasje fan 'e ynternasjonale finale fan it fyfde Junior Eurofyzjesongfestival yn Rotterdam. Yn 2012 presintearrre hja mei Ewout Genemans ek de ynternasjonale finale fan it tsiende Junior Eurofyzjesongfestival. Yn 2009 hie Van der Meij in rol yn 'e soapsearje Onderweg naar Morgen en presintearre se it spulprogramma Hider in the House by de NCRV. Yn 2011 wie se gastpanellid yn 'e sjuery fan 'e talintejacht Op Zoek naar Zorro. Datselde jiers naam se diel oan it earste seizoen fan 'e nije searje fan it spulprogramma Fort Boyard.

Yn 2014 wûn se de nijjiersútstjoering fan Paul de Leeuw syn show Ranking the Stars. Datselde jiers sette Van der Meij útein mei in nije baan by SBS Broadcasting, dy't û.m. har presintaasje fan 'e rabbersrubryk Shownieuws, op 'e stjoerder SBS6 omfiemet. Fierders presintearre hja op Net5 yn it neijier fan 2014 it programma Het Geheim van een Goed Huwelijk. Sûnt ein augustus 2015 presintearret Van der Meij it wyklikse praatprogramma Thuis op Zondag. Oant jannewaris 2016 wie Dirk Zeelenberg dêrby har fêste ko-presintator, mar neitiid gie se allinnich troch.

Ewout Genemans en Kim-Lian van der Meij yn 2012, as presintators fan it tsiende Junior Eurofyzjesongfestival.

Sjongkarriêre[bewurkje seksje | boarne bewurkje]

Bij platemaatskippij CNM krige Van der Meij begjin jierren 2000 de kâns en meitsje har eigen album. Har earste single, Teenage Superstar, waard yn oktober 2003 in top 10-hit. Nei noch ferskate oare singles, wêrûnder Hey, Boy! en Garden of Love, kaam yn 2004 Van der Meij har debútalbum Balance út, dat ek ferskynde yn û.m. Belgje, Itaalje, Yndoneezje, Singapoer en Súd-Afrika. Yn 'e simmer fan dat jier publisearre se de single Kids in America, in cover fan in liet fan Kim Wilde.

Yn 2005 rekke Van der Meij lykwols by CNM wei nei't der op artistyk mêd spul ûntstien wie. Dêrnei sette se dermei útein om har muzyk yn eigen behear út te jaan, begjinnend mei de single Road to Heaven en har twadde album Just Do It, beide út 2006. Yn it neijier fan 2009 waard it skeel mei CNM bylein en krige Van der Meij in nij platekontrakt oanbean. Under ynfloed fan har Sweedske freon socht se dêrnei gearwurking mei de Sweedske sjongster Linda Bengtzing, mei wa't se de single Not That Kinda Girl opnaam en útbrocht yn Nederlân, Flaanderen, Sweden, Noarwegen en Finlân.

Musicalkarriêre[bewurkje seksje | boarne bewurkje]

Njonken har wurk as sjongster is Van der Meij ek tige aktyf as musicalaktrise. Ein 2003 spile se de rol fan prinsesse Madelein yn 'e musical Kunt U Mij de Weg naar Hamelen Vertellen, Mijnheer? Tegearre mei Kathleen Aerts fertolke se fierders de titelrol yn 'e musicalferzje fan De Kleine Zeemeermin. Teffens spile se yn 2007 de rol fan Janis yn 'e musical Doe Maar!, wêrnei't se yn 2008 as Carmen yn 'e musical Fame te sjen wie, as de tsjinspylster fan Jim Bakkum.

It earste healjier fan 2009 wie Van der Meij te sjen yn 'e haadrol fan Ariël yn 'e musical Footloose, en fanôf oktober 2010 fertolke se de (op it wite doek troch Reese Witherspoon ferneamd makke) haadrol fan Elle Woods yn 'e musicalferzje fan Legally Blonde. Oanslutend wie se as Roos te sjen yn Daddy Cool. Fanôf oktober 2012 spile Van der Meij ta einbeslút de haadrol fan prinsesse Fiona yn Shrek de Musical, wêrby't se William Spaaij as tsjinspiler hie.

Oar wurk[bewurkje seksje | boarne bewurkje]

Van der Meij hat sûnt 2013 ek in trijetal berneboeken skreaun, wêrfan twa yn gearwurking mei Gitte Spee.

Priveelibben[bewurkje seksje | boarne bewurkje]

Van der Meij hat sûnt 2003 in relaasje mei in Sweedske muzykprodusint, mei wa't se yn 'e kunde kaam doe't er har debútsingle Teenage Superstar foar har skreau. Hja hawwe ien dochter en twa soannen. Fanwegen swierwêzen moast Van der Meij yn 2008 har rol yn 'e musical Fame in hoart dellizze, en yn 2013 waard har rol yn Shrek de Musical ferskate moannenlang oernommen troch Anouk Maas.

Diskografy[bewurkje seksje | boarne bewurkje]

albums
  • 2005 – Balance
  • 2006 – Just Do It
singles
  • 2003 – Teenage Superstar
  • 2004 – Hey, Boy!
  • 2004 – Garden of Love
  • 2004 – Kids in America
  • 2006 – Road to Heaven
  • 2006 – In Vain
  • 2009 – Gemengde Gevoelens
  • 2009 – Not That Kinda Girl
  • 2012 – Dit Pakt Niemand Ons Meer Af
  • 2012 – Break the Ice
  • 2014 – Kerstmis Vier Je Samen

Bibliografy[bewurkje seksje | boarne bewurkje]

  • 2013 – Sinterklaas Is een Snoeperd
  • 2013 – Dierendorpje (mei Gitte Spee)
  • 2014 – Dierendorpje in Rep en Roer (mei Gitte Spee)

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.