Jaimie Alexander

Jaimie Alexander
akteur
persoanlike bysûnderheden
echte namme	Jaimie Alexander
nasjonaliteit	Amerikaansk
berne	12 maart 1984
berteplak	Greenville (Súd-Karolina)
etnisiteit	Angelsaksysk Amerikaansk
jierren aktyf	2001 – no
offisjele webside
Jaimie Alexander yn 'e IMDb

Jaimie Alexander (Greenville (Súd-Karolina), 12 maart 1984) is in Amerikaansk film- en tillefyzje-aktrise. Hja is benammen bekend wurden troch har rollen yn 'e tillefyzjesearjes Kyle XY en Agents of S.H.I.E.L.D. en yn 'e films Thor, it ferfolch dêrop Thor: The Dark World, en The Last Stand.

Libben en karriêre

Jonkheid en oplieding

Alexander waard yn 1984 berne yn Greenville, yn 'e Súdlike Amerikaanske steat Súd-Karolina, mar se groeide op yn it Teksaanske Grapevine, dêr't har âldelju hinne ferhuzen doe't se fjouwer jier wie. Hja wie it iennichste famke yn in húshâlding mei fiif bern.

Op 'e legere skoalle sette Alexander foar it earst útein mei aktearjen, mar op 'e middelbere skoalle waard se út 'e teäterklub set om't se net sjonge koe. Sadwaande lei hja har yn dy tiid benammen ta op sport. Mei santjin jier naam se it plak fan in freon yn by in ôfspraak mei in talintescout, en sa kaam se yn 'e kunde mei har lettere manager Randy James, dy't har in pear senario's tastjoerde. Nei't se slagge wie foar har middelbere-skoaleksamen, ferfear se nei Los Angeles om in aktearkarriêre nei te stribjen.

Karriêre

Yn 2003 kaam dy karriêre fan 'e grûn, doe't Alexander cast waard yn 'e haadrol fan Hanna Thompson yn 'e lowbudgetfilm The Other Side, dy't útkaam yn 2006 en ferskate prizen wûn. Neitiid ferfolle se lytsere rollen en gastrollen yn oare films en yn ferskate tillefyzjesearjes, lykas de komeedzjesearje It's Always Sunny in Philadelphia en de plysjesearjes Bones en CSI: Miami. Yn 2006-2007 fertolke Alexander de fêste rol fan Caitlin Porter yn 'e rige Watch over Me. Teffens hie se de haadrol yn 'e horrorfilms Rest Stop (2006) en Hallowed Ground (2007).

Alexander yn 2008, op 'e San Diego Comic-Con.

Har trochbraak kaam foar Alexander mei har rol fan Jessi yn 'e tillefyzjesearje Kyle XY, dy't se fan 2007 oant 2009 fertolke. Dêryn spile se in boppeminsklik bejeftige mar emosjoneel betize famke, dat besiket har wei yn 'e wrâld te finen. In oare fêste rol hie Alexander fan 2015 oant 2020 yn 'e aksjesearje Blindspot. Om utens krige Alexander yn 2011 bekendheid mei har rol as Sif, de Germaanske goadinne fan nôt en wyn, yn 'e superheldefilm Thor fan 'e Marvel Studios. In oare bekende rol fan Alexander wie dy fan helpsheriff Sarah Torrance yn 'e aksjefilm The Last Stand, út 2013, mei Arnold Schwarzenegger yn 'e haadrol.

Yn 2013 kroep Alexander ek foar de twadde kear yn 'e hûd fan Sif, foar in rol yn Thor: The Dark World, it ferfolch op Thor. Dyselde rol spile se dêrnei noch ferskate kearen, lykas twa kear yn in crossover-gastrol yn 'e fantasytillefyzjesearje Agents of S.H.I.E.L.D. (2014 en 2015), in kear yn 'e searje Loki (2021) en as stimaktrise yn it fideospultsje Thor: God of Thunder (2011) en twa kear yn 'e searje Wat If…? (2021). Yn 'e twadde ferfolchfilm Thor: Ragnarok (2017) ûntbriek Alexander har Sif, mar yn Thor: Love and Thunder (2022) spile se wer mei.

Njonken har aktearwurk is Jaimie Alexander ek belutsen by oare projekten. Sa wurke se yn 2009 mei oan 'e fideoklip fan it nûmer Save You, fan Matthew Perryman Jones. Ek hat se yn 'e sjuery sitten fan it realitytillefyzjeprogramma Project Runway.

Priveelibben

Yn 2012 rûn Alexander slimme ferwûnings oan 'e rêchbonke op doe't se op in reinige moarn op 'e set fan Thor útglied op in metalen trep en op 'e rêch op 'e triemmen delkaam. Dat smiet har in hernia op en teffens rekke har lofterskouder út it potsje. It duorre in moanne ear't se safierhinne opbettere wie dat se de opnamen fan 'e film ferfetsje koe.

Yn 2012 begûn Alexander in relaasje mei de akteur Peter Facinelli, nei't hja op 'e filmset fan Loosies mei-inoar yn 'e kunde kommen wiene. Yn maart 2015 ferseine se har oaninoar, mar yn febrewaris 2016 ferbrieken se de ferloving.

By de opnamen fan 'e aksjesearje Blindspot (2015-2020) rûn Alexander in grut tal ferwûnings op, wêrûnder nije hernia's oan 'e rêch, in brutsen noas, it rjochterskouder út it potsje, in brutsen rjochterwiisfinger, in brutsen lofterfoet, in brutsen rjochterfoet, trije kear brutsen teannen oan 'e lofterfoet, ien kear brutsen teannen oan 'e rjochterfoet, de ûnderkaak út it potsje en ferskate oare ferwûnings dy't se omreden fan har kontrakt net iepenbier meitsje mocht.

Yn maart 2018 waard Alexander yn it sikehûs opnommen foar in operaasje om har barsten blineterm te ferwiderjen.

Filmografy

Filmografy as aktrise
jier	titel	rol of funksje	opmerkings
films
2004	Squirrel Trap	Sara
2006	Rest Stop	Nicole Carrow
2006	The Other Side	Hanna Thompson
2007	Hallowed Ground	Liz Chambers
2010	Love & Other Drugs	Carol	net fermeld op 'e ôftiteling
2011	The Birds of Anger	Annie	koarte film
2011	Thor	Sif	nom. Scream Award foar bêste byrol fan in aktrise nom. Scream Award foar bêste trochbraakrol fan in aktrise
2012	Loosies	Lucy Atwood
2013	The Last Stand	helpsheriff Sarah Torrance
2013	Collision	Taylor Dolan
2013	Savannah	Lucy Stubbs
2013	Thor: The Dark World	Sif
2016	Broken Vows	Tara Bloom
2018	London Fields	Hope Clinch
2022	Thor: Love and Thunder	Sif
tillefyzje
2005	It's Always Sunny in Philadelphia	Tammy	gastrol; ôfl. Underage Drinking: A National Concern
2006	Standoff	Barrista	gastrol; ôfl. Pilot
2006–2007	Watch over Me	Caitlin Porter	fêste rol
2007–2009	Kyle XY	Jessi Hollander	fêste rol yn seizoen 2–3 nom. Saturn Award foar bêste byrol fan in aktrise op 'e tillefyzje
2009	Bones	Molly Briggs	gastrol; ôfl. The Beaver in the Otter
2009	CSI: Miami	Jenna York	gastrol; ôfl. Flight Risk
2011	Nurse Jackie	Tunie Peyton	weromkearende rol; 3 ôfl.
2011	Covert Affairs	Reva Kline	weromkearende rol; 2 ôfl.
2012	Perception	Nikki Atkins	gastrol; ôfl. Messenger
2014	Under the Gunn	harsels	as sjuerylid; ôfl. Superhero Fashion
2014–2015	Agents of S.H.I.E.L.D.	Sif	weromkearende rol; 2 ôfl.
2015–2020	Blindspot	Jane Doe / Remi Briggs / Alice Kruger	fêste rol
2015	The Brink	Gail Sweet	weromkearende rol
2021	Loki	Sif	gastrol; ôfl. The Nexus Event
2021	What If...?	Sif	as stimaktrise; weromkearende rol; ôfl. What If... the World Lost Its Mightiest Heroes? en What If... Thor Were an Only Child?
fideospultsjes
2011	Thor: God of Thunder	Sif	as stimaktrise

Keppelings om utens

• (in) Folsleine filmografy fan Jaimie Alexander yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Jaimie Alexander fan Wikimedia Commons.