Coen Flink

Ut Wikipedy
Gean nei: navigaasje, sykje
Coen Flink
Coen Flink (m.) mei Caro van Eyck (l.) en Sigrid Koetse (rj.) yn Ritmeester Buat (1968).
Coen Flink (m.) mei Caro van Eyck (l.) en Sigrid Koetse (rj.) yn Ritmeester Buat (1968).
persoanlike bysûnderheden
echte namme Coenraad Flink
nasjonaliteit Flag of the Netherlands.svg Nederlânsk
berne 24 april 1932
berteplak Amsterdam (Noard-Hollân)
stoarn 29 juny 2000
stjerplak Blaricum (Noard-Hollân)
etnisiteit Flag of the Netherlands.svg Nederlânsk
jierren aktyf 19532000
offisjele webside
n.f.t.

Coen Flink (folút: Coenraad Flink; Amsterdam, 24 april 1932Blaricum, 29 juny 2000) wie in Nederlânsk toaniel-, tillefyzje- en filmakteur, dy't yn 'e 1950-er en 1960-er jierren namme makke mei grutte rollen yn it teäter en ek meiwurke oan ferskate harkspullen op 'e radio. Fan 'e jierren tachtich ôf wied er benammen te sjen yn komeedzjesearjes op 'e tillefyzje. In protte minsken sille him fral noch kenne as ien fan 'e pakes yn 'e searje Oppassen!!!, dy't útstjoerd waard troch de VARA.

Libben en karriêre[bewurkje seksje | boarne bewurkje]

Jonge jierren[bewurkje seksje | boarne bewurkje]

Flink waard yn 1932 yn Amsterdam berne as de soan fan 'e akteurs Richard Flink en Mieke Verstraete. Hy folge syn oplieding oan 'e Amsterdamske Toanielskoalle, dêr't er yn 1953 ôfstudearre. Yn 1959 boaske er oan Ellen fan Hemert, de dochter fan regisseur Willy van Hemert.

Karriêre[bewurkje seksje | boarne bewurkje]

Oan it begjin fan syn karriêre spile Flink benammen yn it teäter; sa wurke er by de Haachske Komeedzje en by it Nij Rotterdamsk Toaniel. Dêrby makke er namme yn grutte rollen, lykas yn 'e stikken De Keapman fan Feneesje, Julius Caesar en Antonius en Kleopatra. Teffens spile er yn ferskate harkspullen foar de radio.

Yn 1966 swarde Flink it toaniel lykwols ôf, en begûn er mei syn frou, dy't sels oerstapt wie fan aktearjen nei skilderjen, oan in frij libben. Yn 1976 kearde er noch ien kear werom yn it teäter, om mei syn neef Jules Croiset de frije produksje Grote Bek en Grote Buik te spyljen. Troch it toanielspyljen op te sizzen, moast Flink finansjeel frijwat ynleverje, en bestie er sels in hoart fan 'e bystân, mar hy ferkeas earmoede boppe de swierrichheden dy't mank giene mei maatskiplik súkses. Yn dy tiid reizge er yn 'e mande mei syn frou en harren trije bern Margje, Jesse en Jeroen yn twa caravans troch Jeropa.

Nei jierren omswalke te hawwen, fêstige Flink him úteinlik yn it Goai. Neitiid fertsjinne er syn lean mei it ynsprekken fan reklamespotsjes foar radio en tillefyzje. Teffens waard er yn 'e jierren tachtich almar aktiver as tillefyzje-akteur. Ien fan syn bekendste rollen wie datoangeande dy fan buorman Buys yn 'e VARA-searje Zeg 'ns Aaa, fan 1989 oant 1993. Dêr kaam letter ek de noch bekendere rol fan pake Henry Buys yn 'e komeedzjerige Oppassen!!! út fuort, in searje dy't makke waard troch deselde produsinten.

Fierders wie Flink ek wurksum as stimakteur, wêrby't er meiwurke oan 'e Nederlânsktalige ferzje fan in grut tal Disney-tekenfilms, lykas Jungle Book (Baloo), Robin Hood (Lytse Jan), Snowwhite and the Seven Dwarfs (Grumpy) en The Lion King (Mufasa).

Ferstjerren[bewurkje seksje | boarne bewurkje]

Coen Flink kaam yn 2000 yn 'e âlderdom fan 68 jier yn syn wenplak Blaricum te ferstjerren oan alfleisklierkanker. Hoewol't syn famylje en neiste freonen fan syn sykte ôfwisten, hied er it foar de bûtenwrâld fierders stil holden, sadat it berjocht fan syn ferstjerren foar in protte minsken as in folsleine en ûnoangename ferrassing kaam. Flink waard yn besletten fermidden kremearre op deselde deis dat syn dea bekendmakke waard.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: Externe links, op dizze side.