Tom Wopat

Ut Wikipedy
Jump to navigation Jump to search
Tom Wopat
Filmklapper.png akteur
Tom Wopat yn 1979.
Tom Wopat yn 1979.
persoanlike bysûnderheden
echte namme Thomas Steven Wopat
nasjonaliteit Flag of the United States.svg Amerikaansk
berne 9 septimber 1951
berteplak Lodi (Wiskonsin)
etnisiteit Flag of Poland.svg Poalsk
Flag of the Czech Republic.svg Tsjechysk
jierren aktyf 1970 – no
offisjele webside
www.wopat.com

Tom Wopat (folút: Thomas Steven Wopat; Lodi (Wiskonsin), 9 septimber 1951), is in Amerikaansk akteur en sjonger fan mingd Poalsk-Tsjechysk etnysk komôf. Hy is benammen bekend wurden troch de lang rinnende Amerikaanske tillefyzjesearje The Dukes of Hazzard, wêryn't er mei John Schneider de haadrol hie.

Libben en karriêre[bewurkje seksje | boarne bewurkje]

Tom Wopat waard yn 1951 berne yn Lodi, yn 'e steat Wiskonsin. Hy studearre oan 'e Universiteit fan Wiskonsin-Madison, en makke syn tillefyzjedebút yn 'e dramasearje One Live to Live. Hy briek yn 1979 troch mei de populêre tillefyzjerige The Dukes of Hazzard, dy't rûn fan 1979 oant 1985. Wopat spile yn dy searje de rol fan 'e dûnkerhierrige Luke Duke, dy't mei syn blûne neef Bo Duke (spile troch John Schneider) de korrupte county-kommissaris Boss Hogg en de net oersnoade sheriff Roscoe P. Coltrane altyd te fluch ôf wie.

Nei't The Dukes of Hazzard opholden wie, berikte Wopat nea wer it selde nivo fan ferneamdheid en populariteit. Hy spile troch de jierren hinne yn ferskate searjes, meast gastroltsjes, mar hie fan 1995 oant 1998 in fêste rol yn 'e komeedzjerige Cybill, mei û.o. Cybill Shepherd. Dêrnjonken spile er yn in stikmannich tillefyzjefilms en guon spylfilms, wêrûnder Jonah Hex (2010) en Quentin Tarantino syn Django Unchained (2012). Ferskate kearen kaam er fierders gear mei de rest fan 'e âlde cast fan The Dukes of Hazzard om reünyfilms op te nimmen.

Fierders sette Wopat ek útein mei in karriêre as musicalakteur. Syn earste Broadway-musical wie I Love My Wife, út 1977, mar syn earste haadrol spile er yn 'e revival út 1999 fan Annie, Get Your Gun (oer Annie Oakley). Datselde jiers noch waard er nominearre foar in Tony Award foar syn rol as Frank Butler (Oakley har man). Neitiid spile Wopat ek yn oare topmusicals, lykas Chicago, 42nd Street en Glengarry Glen Ross.

Njonken syn aktearkarriêre is Wopat ek wurksum as sjonger, wêrby't syn muzyk foar it meastepart ta it countrysjenre heart, al hat er ek wol rock n' roll songen. Hy hat ûnderwilens tsien ûnderskate albums útbrocht, te begjinnen mei de soundtrack fan 'e The Dukes of Hazzard, út 1981. Hoewol't syn sjongkarriêre net sa súksesfol wie as dy fan syn Dukes of Hazzard-"neef" John Schneider, hied er, fral oan 'e ein fan 'e jierren tachtich, dochs ferskate ferskes yn 'e country-top 40. Wopat syn hjoeddeistich houlik mei syn frou Kathy is syn twadde; hy wie earder troud mei (en skieden fan) Vickie Allen.

Diskografy (albums)[bewurkje seksje | boarne bewurkje]

  • 1981 – The Dukes of Hazzard Soundtrack
  • 1983 – Tom Wopat
  • 1987 – A Little Bit Closer
  • 1990 – Don't Look Back
  • 1992 – Learning to Love
  • 1995 – Hands On
  • 2000 – The Still of the Night
  • 2005 – Tom Wopat Sings Harold Arlen: Dissertation on the State of Bliss
  • 2009 – Consider it Swung
  • 2013 – I've Got Your Number

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.