Stynsgea

Stynsgea
Doarpsgebiet fan Stynsgea yn de gemeente Achtkarspelen
Flagge	Wapen
Sifers
Ynwennertal	1.198 (↓) (2021)
Oerflak	7,44 km² wêrfan lân: 7.16 km² wêrfan wetter: 0,29 km²
Befolkingstichtens	167 ynw. / km²
Polityk
Lân	Nederlân
Provinsje	Fryslân
Gemeente	Achtkarspelen
Oar
Tiidsône	UTC +1
Simmertiid	UTC +2
Koördinaten	53° 13' 04.6" N 6° 09' 44.7" E
Webside	FB-side Doarpsbelang

Filla Wâldhof

Stynsgea is in doarp yn de gemeente Achtkarspelen, súd fan Bûtenpost by it Prinses Margrietkanaal. By Stynsgea hearre ek de buorskippen Blauferlaat (mei in haven oan it Prinses Margrietkanaal), Reahel (in stripe mingde bebouwing by de noardkant fan it Prinses Margriet lâns) en Reaskuorre (de kant fan De Harkema út). It doarp wie eartiids haadplak fan de gritenij en is neamd nei de hillige Augustinus. Eartiids stie hjir de stins Siccamastate.

Mienskip

Alde weinmakkerij

Doarpsblêd 'Us Blêd' ferskynt sûnt oktober 1975 hast alle moannen. Der is gjin eigen doarpshûs.

Doarpsskoalle De Twa-ikker

Yn 2015 binne de iepenbiere skoalle De Maskelyn en de kristlike skoalle De Saad opgien yn in gearwurkingsskoalle. Fanâlds joegen boeren faak in namme oan harren stikken lân. Sa ferwiist de strjitnamme Skoalikker noch nei in stik lân by de earste iepenbiere skoalle fan Stynsgea. Yn 2016 is der, om't oerdrachtlik de ikkers fan twa skoallen gearfoege waarden, de namme De Twa-ikker ûntstien.

Ferienings

• Fuotbalferiening ASC '75
• 'Jounswille' - toaniel

Tsjerken

De Wikipedy hat ek in side Augustinitsjerke (Stynsgea).

Augustinustjerke

It âldste part fan de Augustinitsjerke is de toer út de 13e iuw en dy hie oant 1895 in sealtek. Om 1350 hinne waard de gotyske tsjerke wijd oan Augustinus. De muontsen fan kleaster Jeruzalim (Gerkeskleaster) hawwe him nei alle gedachten boud. Op in tekening út 1723 fan Jacobus Stellingwerf is goed te sjen dat it dak fan de tsjerke leger west hat. By in ferbouwing yn ± 1765 is de kap twa meter ferhege. By de restauraasje fan 1954-1957 kamen resten fan de eardere fresko's oan it ljocht. Der binne no skansearre ienfâldige ofbylden fan twa ingels en Sint Kristoffel te sjen. Yn 1994 wie der lykwols al wer in wiidweidige restauraasje nedich.

De klok út 1617 is getten troch Hans Falck fan Neurenberch út Ljouwert.

De Wikipedy hat ek in side Pypketsjerke (Stynsgea).

Njonken de Augustinitsjerke wie der oant 2016 ek noch in grifformearde tsjerke, de Pypketsjerke. De Pypketsjerke lei healwei Stynsgea en Surhuzum en wie it tsjerklik sintrum fan twa grifformearde gemeenten. Mei de fúzje fan de grifformearden en herfoarmen ta ien protestanske tsjerke waard de Pypketsjerke oerstallich en ferkocht.

Befolkingsferrin

Jier	1954	1959	1964	1969	1974	200	2021
Ynwenners	1121	1188	1147	1157	1134	1150	1198

Doarpswapen

It boek mei in baarnend hert yn it wapen ferwiist nei Sint Augustinus fan Hippo. De ikels en klaverbledsjes komme fan eardere aadlike famyljes (Gaickema, Jensma en Siccama) dy't hjir eartiids wennen.

Strjitten

Feartswâl

Alle strjitten yn Stynsgea.

• De nammen Gaickema, Jensma en Siccama komme fan de aadlike famyljes dy't hjir wenne ha.

Iepenbier ferfier

Busline fan ferfierder Arriva:

• Line 12: Drachten - Nijtap - Rottefalle - De Houtigehage - Boelensloane -Surhústerfean - Surhuzum - Stynsgea - Bûtenpost

Berne yn Styngea

• Willem Barteles van der Kooi (1768-1836), keunstskilder
• Ytzen van der Veen (1861-1931), arsjitekt

Ferskaat

East fan it doarp stiet de Tsjasker Stynsgea, ien fan de lêste trije boktsjaskers fan Nederlân. Noch wat fierder by Blauferlaat stiet it oarlochsmonumint fan it doarp. It bestiet út in bulte fjildstiennen, wêrfan't ien de tekst FRIJDOM WIE DE HEEGHSTE WET draacht.

Sjoch ek

• Fryske doarpen

Boarnen, noaten en referinsjes

Boarnen, noaten en/as referinsjes:

Webstee Stynsgea Webstee Achtkarspelen Commons  Ofbylden dy't by dit ûnderwerp hearre, binne te finen yn de kategory Stynsgea fan Wikimedia Commons.