Augustinitsjerke (Stynsgea)

Ut Wikipedy
Jump to navigation Jump to search
Augustinitsjerke
Augustinuskerk, Augustinusga.jpg
lokaasje
lân Flag of the Netherlands.svg Nederlân
provinsje Frisian flag.svg Fryslân
gemeente Flag of Achtkarspelen.svg Achtkarspelen
plak Stynsgea wapen.svg Stynsgea
adres Geawei 15
bysûnderheden
type bouwurk tsjerke
boujier 13e iuw (toer), 15e iuw (tsjerke)
boustyl Gotyk
oare ynformaasje
webside Side Protestanske gemeente Stynsgea

De Augustinitsjerke is de tsjerke fan de protestanske gemeente yn Stynsgea, gemeente Achtkarspelen.

Skiednis[bewurkje seksje | boarne bewurkje]

De oarspronklik oan Augustinus wijde tsjerke waard likernôch healwei de 15e iuw boud oan in âldere toer út de 13e iuw. It wiene nei alle gedachten de muontsen fan it kleaster Jeruzalim út Gerkeskleaster dy't de tsjerke bouden. Letter fûn der in ferheging fan it skip plak, itjinge te sjen is oan it feit dat de nok fan it tsjerkedak oant de kloksgatten fan de toer rikt. It gotyske gebou hat spitsbôgeramen en steunberen en wurdt eastlik ôfsletten troch in rjocht koer mei trije ramen, werfan't de twa bûtenste ramen ticht sitte. Yn de geveltop fan it koer sitte nochris trije bline nissen. Oant 1895 hie de toer in sealtek, dy't doe ferfongen waard troch in ynsnoerde spits.

Ynterieur[bewurkje seksje | boarne bewurkje]

Alde ynterieur
Tsjintwurdige ynterieur

In soad Fryske tsjerke ferlearen yn de rin fan de tiid it ferwulft, mar yn de tsjerke fan Stynsgea bleaune de krúsgewelven bewarre. Doe't de tsjerke yn de jierren 1954-1957 restaurearre waarde, waarden de banken ferwidere en ferfongen troch stuollen. De preekstoel út likernôch 1650 stie foar de restauraasje yn de jierren 1950 oan de súdlike muorre, mar krige dêrnei in plak oan de noardlike muorre. It eardere klankboerd en it doophek binne mei de ferhûzing net werom kommen.[1] De kûp fan de kânsel is op de hoeken fersierd mei draaide pylders mei Korintyske kapitelen. Op de foarkant fan de kûp binne de wapens oanbrocht fan Harckama en Coyters. Oan de preekstoel is in lessener út 1778 mei in wapen fan Haersma befêstige. Allinnich de ikebeam is noch op it wapen te sjen, de seispuntige stjer en de leelje binne der ôf hakt.

It wapen fan Haersma is noch wol folslein te sjen op it rêchskot fan de hearebank út 1650. Under twa helmen binne de wapens oanbrocht fan de famyljes Harckama en Coyters (lofts) en Haersma en Fan Scheltinga (rjochts). Twa banken dy't foar de restauraasje fan de jierren 1950 foar de preekstoel oer oan de noardlike muorre stiene, krigen in plak oan de wand ûnder it oargel en datearje út de 18e iuw. De koperen kroanen stamme út de 17e iuw. Yn it koer lizze sarken út de 17e en 18e iuw.[2]

Oargel

In restant út de katolike tiid is de goed bewarre piscina oan de eastlike muorre.

Yn de toer hinget in klok út 1617, dy't troch Hans Falck út Neurenberg yn Ljouwert waard getten. De klok is fersierd mei de nammen en wapens fan dyjingen, dy't it jitten fan de klok mooglik makken.

Fresko's[bewurkje seksje | boarne bewurkje]

Mei de restauraasje fan de tsjerke yn de jierren 1950 waarden der meardere fragminten fan midsiuwske fresko's ûntdutsen. Boppe de noardlike útgong is it fresko te sjen fan de hillige Kristoffel. Yn de kap fan it twadde travee binne fragminten fan twa ingels te sjen, wylst achter it oargel op de westlike muorre noch in skyld mei ferskate soarten reau waard bleatlein.[3]

Oargel[bewurkje seksje | boarne bewurkje]

It oargel is fan Dútske makkelei en waard boud troch Friedrich Leichel út Düsseldorf. It oargel waard op 16 augustus 1883 yn gebrûk nommen. In restauraasje fan it ynstrumint yn 2006 troch Bakker & Timmenga brocht it oargel wer werom yn de âlde steat.

Boarnen, noaten en referinsjes[boarne bewurkje]

Boarnen, noaten en/as referinsjes: