George Kennedy

Ut Wikipedy
Jump to navigation Jump to search
George Kennedy
Filmklapper.png akteur
George Kennedy 1975.JPG
persoanlike bysûnderheden
echte namme George Harris Kennedy jr.
nasjonaliteit Flag of the United States.svg Amerikaansk
berne 18 febrewaris 1925
berteplak New York (New York)
stoarn 28 febrewaris 2016
stjerplak Middleton (Idaho)
etnisiteit Flag of Germany.svg Dútsk
Flag of Ireland.svg Iersk
Flag of England.svg Ingelsk
jierren aktyf 19271943 & 19552015
prizen Oscar 1967
offisjele webside
n.f.t.
1rightarrow.png Dizze side giet oer de akteur George Kennedy. Foar oare betsjuttings, sjoch: George Kennedy (betsjuttingsside).

George Kennedy (folút: George Harris Kennedy jr.; New York, 18 febrewaris 1925Middleton (Idaho), 28 febrewaris 2016) wie in Amerikaansk akteur en skriuwer fan mingd Dútsk, Iersk en Ingelsk etnysk komôf, dy't yn mear as twahûndert films en tillefyzjeproduksjes spile. Hy fertolke in breed skala oan rollen, en wûn yn 1967 in Oscar yn 'e kategory bêste manlike byrol. By in jonger publyk stied er benammen bekend as kaptein Ed Hocken, de gauris ta wanhoop dreaune sjef fan ynspekteur Frank Drebin (Leslie Nielsen) yn 'e Naked Gun-filmkomeedzjes. Njonken syn aktearkarriêre skreau Kennedy twa misdieromans en in autobiografy.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Kennedy waard yn 1925 berne yn New York, as telch út in artystefamylje. Syn heit, George Harris Kennedy sr., wie in muzikant en orkestlieder mei Ierske en Ingelske woartels, dy't stoar doe't Kennedy sels noch mar fjouwer jier wie. Hy waard sadwaande grutbrocht troch syn mem, Helen A. Kieselbach, in balletdûnseresse fan Dútsk komôf. Kennedy makke syn debút as toanielakteur doe't er twa jier âld wie, en letter yn syn jonkheid wied er aktyf as harkspulakteur. Under de Twadde Wrâldoarloch tsjinne er fan 1943 ôf yn it Amerikaanske Leger, dêr't er by de legerradiostjoerder wurke.

Aktearkarriêre[bewurkje seksje | boarne bewurkje]

Nei ôfrin fan 'e oarloch bleau Kennedy oant 1959 yn tsjinst. As ûnderdiel fan syn wurk foar it Foarljochtingsburo fan it Amerikaanske Leger wied er yn 'e fyftiger jierren as technysk adviseur belutsen by de tillefyzjesearje The Phil Silvers Show, wêryn't er, dêrta oanfitere troch Phil Silvers sels, ek in pear lytse roltsjes fertolke. Nei't er ôfswaaid wie, sette Kennedy om 1960 hinne serieus útein mei in aktearkarriêre. Datselde jiers hied er in hiel lyts roltsje yn 'e film Spartacus.

Kennedy as pastoar Sarge Cavenaugh yn 'e searje Sarge (1971).

Syn earste gruttere rol hie Kennedy yn The Little Shepherd of Kingdom Come (1961). Yn 'e iere sechtiger jierren hied er fierders rollen yn ferskate grutte Hollywood-produksjes, wêrûnder Charade (1963), Strait-Jacket (1964), The Flight of the Phoenix (1965), The Dirty Dozen (1967), Bandolero! (1968) en Guns of the Magnificent Seven (1969). Yn 1967 wûn Kennedy in Oscar foar de bêste manlike byrol yn 'e film Cool Hand Luke, as Dragline, in ta twangarbeid feroardiele finzene dy't earst in hekel hat oan it titelpersonaazje (spile troch Paul Newman), mar him úteinlik as in soarte fan idoal begjint te sjen.

Yn dyselde snuorje spile Kennedy ek yn withoefolle tillefyzjesearjes, lykas The Asphalt Jungle, The Andy Griffith Show, Peter Gunn, Bonanza, McHale's Navy en Gunsmoke. Ek hied er gastrollen yn 'e searjes Perry Mason en The Legend of Jesse James. Yn 1970 spile er de rol fan Joe Patroni yn 'e bekroande rampefilm Airport, wêrfoar't er nominearre waard foar in Golden Globe yn 'e kategory bêste manlike byrol. Kennedy kearde noch trije kear yn dyselde rol werom, yn 'e ferfolchfilms Airport 1975 (1974), Airport '77 (1977) en The Concorde... Airport '79 (1979). Yn 'e santiger jierren wurke er ek in pear kear gear mei Clint Eastwood, yn 'e films Thunderbolt and Lightfoot (1974) en The Eiger Sanction (1975). Teffens wied er yn 1974 te sjen yn 'e rampefilm Earthquake, mei û.o. Charlton Heston en Ava Gardner, en yn 1978 spile er yn 'e detektivefilm Death on the Nile, mei û.m. David Niven en Peter Ustinov.

Yn 1984 wie Kennedy de tsjinspiler fan Bo Derek yn 'e flop Bolero. Neitiid makke er noch ferskate oare mindere films, lykas Savage Dawn (1985), The Delta Force (1986) en The Gunfighters (1987), foar't er yn 1988 min ofte mear by tafal nij súkses fûn mei de kaskreaker The Naked Gun: From the Files of Police Squad! Dat wie in slapstickeftige komeedzje wêryn't Kennedy de rol fan plysjesjef Ed Hocken spile, dy't by fleagen ta wanhoop dreaun wurdt troch de nuvere eksploaten fan syn knoffelige ûnderhearrige Frank Drebin, spile troch Leslie Nielsen. Yn 1991 kearde Kennedy werom as Hocken yn The Naked Gun 2½: The Smell of Fear, en yn 1994 jitris yn Naked Gun 33⅓: The Final Insult.

Underwilens hie Kennedy op 'e tillefyzje yn 'e jierren 1988-1991 de rol fan 'e korrupte oaljetycoon Carter McKay yn 'e ferneamde soapsearje Dallas. Yn 1996 en 1998 wied er op 'e nij yn dy rol te sjen yn 'e tillefyzjefilms Dallas: J.R. Returns, resp. Dallas: War of the Ewings. Yn 1998 wurke Kennedy fierders as stimakteur mei oan 'e tekenfilm Small Soldiers. Neitiid makke er ferskate ûnôfhinklike films, foar't er yn 2003 weromkearde op 'e tillefyzje yn 'e rol fan Albert Miller yn 'e soapsearje The Young and the Restless. Kennedy bleau oan syn dea ta mei lytse roltsjes yn films en op 'e tillefyzje aktyf. Foar syn bydrage oan 'e Amerikaanske filmyndustry krige er in stjer op 'e Hollywood Walk of Fame, op Hollywood Boulevard 6352.

Kennedy as plysjeman Bumper Morgan yn 'e searje The Blue Knight (1976).

Skriuwkarriêre[bewurkje seksje | boarne bewurkje]

Njonken syn aktearwurk wie Kennedy ek yn 't spier as skriuwer. Yn 1983 publisearre er it moardmystearje Murder on Location, wêrfoar't er as dekôr in filmset brûkte. In twadde roman, Murder on High, kaam út yn 1984. Syn trêde en lêste boek wie syn autobiografy, Trust Me, dy't yn 2011 ferskynde.

Priveelibben[bewurkje seksje | boarne bewurkje]

Kennedy troude yn 1959 mei Norma Wurman, fan wa't er him yn 1971 skiede liet. Neitiid wertroude er yn 1978 mei Joan McCarthy, mei wa't er in dochter, Shaunna, krige. Nei't dyselde yn it tichthûs belâne, adoptearren Kennedy en de frou harren pakesizzer, it famke Taylor. Kennedy hie in fleanbrevet en fleach as piloat gauris yn syn eigen Cessna 210- en Beechcraft Bonanza-priveefleantugen.

Ferstjerren[bewurkje seksje | boarne bewurkje]

George Kennedy wenne yn Eagle, yn it súdwesten fan 'e Amerikaanske steat Idaho. Op it lêst bedarre er yn in fersoargingssintrum yn it deunby leine Middleton. Dêr kaam er op 28 febrewaris 2016 te ferstjerren, yn 'e âlderdom fan 91 jier.

Bibliografy[bewurkje seksje | boarne bewurkje]

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.