Auli‘i Cravalho

Ut Wikipedy
Jump to navigation Jump to search
Auli‘i Cravalho
Filmklapper.png akteur
Auli'i Cravalho December 2016.jpg
persoanlike bysûnderheden
echte namme Auli‘i Cravalho
nasjonaliteit Flag of the United States.svg Amerikaansk
berne 22 novimber 2000
berteplak Kohala (Hawaï)
etnisiteit Flag of Ireland.svg Iersk
Flag of Hawaii.svg Hawaïaansk
Flag of Portugal.svg Portegeesk
Flag of Puerto Rico.svg Portorikaansk
Flag of China (1889–1912).svg Sineesk
jierren aktyf 2016 – no
prizen Annie Award 2016
Teen Choice Award 2017
offisjele webside
Auli‘i Cravalho op Twitter

Auli‘i Cravalho (útspr.: [aʊ'li:ʔi krə'vɑ:ljo:], likernôch: "au-lii-y kruh-vaal-joo"; Kohala (Hawaï), 22 novimber 2000) is in Amerikaansk aktrise, sjongster en muzikante fan Hawaïaansk komôf. Se waard benammen bekend troch har fertolking fan 'e titelrol yn 'e Disney-tekenfilm Moana, en spile letter as Lilette Suarez yn 'e dramasearje Rise.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Cravalho waard yn 2000 berne yn Kohala, op it eilân Oähû yn 'e Amerikaanske steat Hawaï. Se is fan mingd etnysk komôf, mei Hawaïaansk, Portegeesk, Iersk, Portorikaansk en Sineesk bloed. Se waard yn it stedsje Mililani grutbrocht troch har mem, Puanani Cravalho, en genoat middelber ûnderwiis op 'e Kapālama-kampus fan 'e Kamehameha Schools.

Aktearkarriêre[bewurkje seksje | boarne bewurkje]

Yn 2015, doe't se fyftjin jier wie, hearde Cravalho dat The Walt Disney Company op Oähû audysjes hold foar in Hawaïaanske stimaktrise dy't har stim yn 'e nije jûnfoljende tekenfilm Moana oan it titelpersonaazje liene koe. Yn 't earstoan wie se sels net fan doel om audysje te dwaan, om't se ek heard hie dat dêrfoar al withoefolle oanmeldings dien wiene fia YouTube. Mar doe't se troch in talintescout ûntdutsen waard op in goeddiedichheidsevenemint, fitere dy har oan om ek in oanmelding yn te tsjinjen. Disney befêstige letter dat Cravalho de alderlêste fan hûnderten gadingmaksters wie dy't har oanmelden hiene foar de audysjes.

De kar foel lykwols op har en sa waard sy de stim fan Moana yn 'e film mei deselde namme, dy't yn 2016 yn 'e bioskopen útbrocht waard. Foar dy rol wûn Cravalho yn 2016 de Annie Award yn 'e kategory bêste stimaktrise yn in lange tekenfilm, in priis dy't se diele moast mei Ginnifer Goodwin foar dy har rol yn Zootopia. Yn 2017 wûn Cravalho foar Moana ek de Teen Choice Award foar bêste trochbraak fan in stjer.

Yn febrewaris 2017 waard bekendmakke dat Cravalho cast wie foar de fêste rol fan Lilette Suarez yn 'e dramasearje Rise. De earste ôflevering fan dy tillefyzjesearje waard op 13 maart 2018 op 'e Amerikaanske tillefyzjestjoerder NBC útstjoerd. Op 15 maaie fan dat jier waarden de útstjoerings lykwols stopset fanwegen te lege sjochsifers.

Yn 2017 wie Cravalho op 'e nij yn rol fan Moana belutsen by de koarte tekenfilm Moana: Gone Fishing. Yn novimber fan dat jier makke se sels bekend dat se op 'e nij de stim fan Moana ynsprekke soe yn 'e tekenfilm mei deselde namme foar de earste yn it Hawaïaansk neisyngronisearre filmferzje aller tiden. De Hawaïaanske ferzje fan Moana gie op 10 juny 2018 yn 'e bioskopen op Hawaï yn premiêre. Yn 2018 hie Cravalho ek in cameo as Moana yn 'e nije Disney-tekenfilm Ralph Breaks the Internet. Fierders stie Cravalho datselde jiers yn New York op 'e planken mei in rol yn it toanielstik Have a Nice Day, dat off-Broadway spile. Yn 2019 hie se in gastrol yn in ôflevering fan 'e tillefyzjesearje Weird City.

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.