Phina Oruche

Phina Oruche
akteur
persoanlike bysûnderheden
echte namme	Phina Oruche
nasjonaliteit	Britsk
berne	31 augustus 1972
berteplak	Liverpool (Ingelân)
etnisiteit	Ibo
jierren aktyf	1995 – no
offisjele webside
www.phinaoruche.com

Phina Oruche (Liverpool, 31 augustus 1972) is in Britsk aktrise fan Nigeriaansk komôf. Hja sette har karriêre útein as model yn 'e Britske moadeyndustry, mar waard benammen bekend as aktrise, mei har rol as Liberty Baker yn 'e dramasearje Footballers' Wives. Dêrnjonken is Oruche ek aktyf as presintatrise fan radioprogramma's, as regisseur, editor en produsinte fan koarte films en fideoclips, as kabaretiêre mei har autobiografyske ienmansshow Liberating Character, en as skriuwster fan berneboeken.

Libben en karriêre

Jonkheid en wurkpaad as model

Oruche waard yn 1972 berne yn 'e Ingelske havenstêd Liverpool as de dochter fan Nigeriaanske ymmigranten. Hja is in etnyske Ibo (de Ibo of Igbo binne ien fan 'e grutste folken fan súdlik Nigearia). Ein 1980-er jierren begûn Oruche in wurkpaad as model en mannekên yn Londen, mar hja ferfear al rillegau nei New York. Dêr wie se fiif jier lang in fêst model foar de Amerikaanske kleanwinkelkeatling Gap. Yn dy tiid stie se op 'e omslach fan ferskate Amerikaansk moadeblêden, mar se hie in spesjale bân mei it tydskrift Essence, dat gauris fotoreportaazjes fan har publisearre.

Aktearkarriêre

Nei't Oruche foar de tillefyzje 'ûntdutsen' wie troch de Britske reklame- en filmregisseur Tony Kaye, liet dy har yn in hiele rige reklamespotsjes spylje. Dêrmei makke er by har de ambysje wekker om aktrise te wurden. Oruche sette yn Los Angeles útein mei in aktearkarriêre nei't se in oplieding folge hie oan 'e Actors Studio yn New York. Se hie ferskate gastrollen yn Amerikaanske tillefyzjesearjes, lykas Nash Bridges, V.I.P., Charmed, Nip/Tuck en Diagnosis: Murder (2 kear). Yn 'e fantasysearje Buffy the Vampire Slayer hie Oruche in weromkearende rol yn trije ôfleverings. Op it wite doek figurearre se yn Sabrina (1995) mei Harrison Ford en Julia Ormond, en spile se yn The Forsaken (2001) en Happy Ever Afters (2009).

Uteinlik kearde Oruche werom nei Ingelân, dêr't se yn 'e plysjesearje The Bill spile. It bekendst waard se lykwols mei har fertolking fan 'e rol fan Liberty Baker yn 'e dramasearje Footballers' Wives, oer it wol en wee fan 'e froulju fan 'e leden fan in profesjoneel fuotbaltiim. Dêrfoar wûn se in Screen Nations Award yn 'e kategory Favorite Tillefyzjestjer. Oruche hie fierders yn 2008 ek in cameo yn 'e humoristyske sketcheshow Little Miss Jocelyn. Yn 2010 waard se cast foar in fêste rol (as mem) yn Hollyoaks, in soapsearje foar teenagers.

Yn 2012 makke se, nei in hoart lins nommen te hawwen foar de opfieding fan har soan, har comeback op 'e BBC yn 'e dramasearje Doctors. Letter wie se noch te sjen yn û.m. de tillefyzjesearjes Taken Down, Moving On en The Magpie Murders. Ek spile se yn 'e tillefyzjefilm Anthony en wurke se mei oan 'e podcastsearje Slayers: A Buffyverse Story.

Oar wurk

Op 'e Ierske radio presintearre Oruche ferskate jierren trije kear yn 'e wike it programma Ireland AM, en yn Londen wie se yn 2008 in wike lang as panellid belutsen by it praatprogramma The Wright Stuff, dat moarns útstjoerd waard. Oruche hat fierders noch ferskate oare programma's op 'e radio en de tillefyzje presintearre, en ek die se yn 2006 as kandidate mei oan it realitytillefyzjeprogramma I'm a Celebrity... Get Me Out of Here!

Letter presintearre en produsearre Oruche yn har bertestêd Liverpool op 'e sneontejûnen it radioprogramma Upfront, op 'e regionale radiostjoerder BBC Radio Merseyside. Teffens skreau se in skoft lang in kollumn yn 'e krante de Liverpool Echo. Fierders is se de eigneresse fan in eigen filmstudio, Ibo Girl Films, wêrfoar't se koarte films en fideoclips regissearret, montearret en produsearret.

Yn april 2012 publisearre Oruche har autobiografy, mei as titel Liberating Character. Mei har ienmansshow Identity Crisis, basearre op har eigen libbensferhaal, debutearre se yn 2016 yn it teäter op 'e Edinburgh Festival Fringe. Yn 2017 stie se mei deselde foarstelling op 'e planken yn it Ynternasjonaal Slavernijmuseum yn Liverpool en letter ek yn it Ovalhouse yn Londen. Neitiid stiek se mei Identity Crisis de Atlantyske Oseaan oer om it yn it Soho Playhouse yn New York te spyljen.

Under de koroanapandemy skreau Oruche twa berneboeken, Jacopo Jacopo Football Star en Jacopo Jacopo on Lockdown, dy't allebeide yn 2020 ferskynden by Amazon Publishing. Se geane oer in tsienjierrich jonkje fan mingd etnysk komôf út Liverpool en syn krewearjen om troch te brekken as fuotballer.

Priveelibben

Phina Oruche troude yn augustus 2007, en hat út dat houlik ien bern, in soan. Yn 2006 en 2007 draafde se de Maraton fan Londen, wêrmei't se £35.000 ophelle foar it goede doel. Oruche wennet tsjintwurdich wer yn har berteplak Liverpool.

Bibliografy

• 2012 – Liberating Character (autobiografy)
• 2020 – Jacopo Jacopo Football Star (berneboek)
• 2020 – Jacopo Jacopo on Lockdown (berneboek)

Filmografy

Filmografy as aktrise
jier	titel	rol of funksje	opmerkings
tillefyzje
1995	Saved by the Bell: The New Class	Ashley	gastrol; ôfl. No Smoking
1996	If Looks Could Kill	Britske stewardess	tillefyzjefilm
1997	Homeboys in Outer Space	tsjeppe frou	gastrol; ôfl. Tales from the Dark Side, or: Ty Takes the Redeye
1997	Players	Victoria	gastrol; ôfl. In Concert
1997	Nash Bridges	Daysha Long	gastrol; ôfl. Dirty Tricks
1998	Diagnosis: Murder	Elena Martin	gastrol; ôfl. Rain of Terror
1999–2000	Buffy the Vampire Slayer	Olivia	weromkearende rol; 3 ôfl. (The Freshman, Hush en Restless)
2000	V.I.P.	Mercy	gastrol; ôfl. Val Point Blank
2000	The Pretender	dokter	gastrol; ôfl. The Inner Sense, Part 1
2000	FreakyLinks	de folwoeksen Virginia	gastrol; ôfl. Subject: Fearsum
2000	Diagnosis: Murder	Asia	gastrol; ôfl. Sleight-of-Hand
2003	Charmed	Jada	gastrol; ôfl. Lucky Charmed
2003	Nip/Tuck	Mia	gastrol; ôfl. Cliff Mantegna
2003	She Spies	befeiligingsmeiwurkster	gastrol; ôfl. Crossed Out
2006	The Bill	Heather Lees	weromkearende rol; ôfl. Where We Belong, Part 2 en A Day to Remember
2006	Footballers' Wives	Liberty Baker	fêste rol; minysearje fan 8 ôfl.
2007	The Unit	haadfrou	gastrol; ôfl. The Outsiders
2008	Little Miss Jocelyn	harsels	cameo; ôfl. S2E3
2010	Hollyoaks	Gabby Sharpe	tydlike fêste rol yn in soapsearje; 36 ôfl.
2012	Doctors	Jane Williams	gastrol; ôfl. Beautiful Girl
2018	Taken Down	Marvellous	weromkearende rol; 5 ôfl.
2020	Anthony	muoike Ven	tillefyzjefilm
2021	Moving On	Sheryl	gastrol; ôfl. Hungry to Learn
2022	The Magpie Murders	Bryony	gastrol; ôfl. S1E3
films
1995	Sabrina	model
1998	How Stella Got Her Groove Back	Leslie James
1998	High Freakquency	seksy frou
1999	Out in Fifty	Lowanda
1999	The Sky is Falling	Amanda
2000	Punks	supermodel
2001	Note Come Due	Mary	koarte film
2001	The Forsaken	Cym
2004	Who's Kyle?	Scouser fanke	koarte film
2009	Happy Ever Afters	Emily
podcasts
2023	Slayers: A Buffyverse Story	Olivia	gastrol; ôfl. S1E3 en S1E4

Keppelings om utens

• (in) Offisjele webside fan Phina Oruche
• (in) Folsleine filmografy fan Phina Oruche yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.