Kaitlyn Dever

Kaitlyn Dever
akteur
Kaitlyn Dever yn 2026 op it Sundance Filmfestival.
persoanlike bysûnderheden
echte namme	Kaitlyn Dever
nasjonaliteit	Amerikaansk
berne	21 desimber 1996
berteplak	Phoenix (Arizona)
etnisiteit	Angelsaksysk Amerikaansk
jierren aktyf	2009 – no
offisjele webside
Kaitlyn Dever yn 'e IMDb

Kaitlyn Dever (útspr.: ['ke:tlɪn 'di:vəɹ], likernôch: "keetlin diivr"; Phoenix (Arizona), 21 desimber 1996) is in Amerikaansk film- en tillefyzje-aktrise, dy't benammen bekend wurden is mei har rollen yn 'e tillefyzjesearjes Justified, Last Man Standing en Unbelievable.

Libben en karriêre

Jonkheid en oplieding

Dever waard yn 1996 berne yn 'e stêd Phoenix, yn 'e súdwestlike Amerikaanske steat Arizona as de dochter fan Tim Dever, in stimakteur, en dy syn frou Kathy. Har belangstelling foar de poadiumkeunsten begûn doe't se noch mar fiif jier wie, en har âldelju har ynskreaune oan in toanielskoalle. Njonken aktearjen die hja as bern ek oan turnjen, ballet en skeelerjen, mar dy leafhawwerijen joech hja meitiid op om har mear ta te lizzen op har aktearjen.

Kaitlyn Dever yn 2012, by de presintaasje fan 'e cast fan 'e komeedzjesearje Last Man Standing.

Dever ferhuze mei har âlden nei it Teksaanske Dallas, dêr't se in oplieding folge by de Dallas Young Actors Studio. Neitiid wurke se mei oan ferskate reklamespotsjes, foar't it gesin, besteande út Dever sels, har âlden en twa jongere suskes, úteinlik ferfear nei Los Angeles, yn Kalifornje.

Aktearkarriêre

Har earste rol fan namme hie Dever yn 'e tillefyzjefilm An American Girl: Chrissa Stands Strong, út 2009, dêr't se in narre dakleas famke yn spile. Oare films dêr't se lytse roltsjes yn hie, wiene û.m. Bad Teacher (2011), mei Cameron Diaz yn 'e haadrol, en it troch Clint Eastwood regisearre J. Edgar (2011), in biografyske film oer de direkteur fan 'e FBI J. Edgar Hoover. Yn 2013 wie Dever te sjen yn 'e romantyske jeugddramafilm The Spectacular Now, mei Miles Teller en Shailene Woodley yn 'e haadrollen. Dever spile dêryn de bêste freondinne fan it personaazje fan Woodley. Fierders aktearre Dever ek yn 'e swarte komeedzje Laggies (2014), mei as tsjinspilers û.o. Chloë Grace Moretz en Keira Knightley. Itselde jier fertolke se ien fan 'e haadrollen yn 'e film Men, Women & Children.

Kaitlyn Dever yn 2014 op it Ynternasjonaal Filmfestival fan Toronto.

Op 'e tillefyzje hie Dever û.o. gastrollen yn tillefyzjesearjes as Modern Family, Private Practice en The Mentalist. Fan 2011 oant 2015 fertolke se de weromkearende rol fan Loretta McCready yn 'e dramasearje Justified. Har oare grutte rol wie dy fan Eve Baxter, de jongste dochter fan 'e personaazjes fan Tim Allen en Nancy Travis yn 'e komeedzjesearje Last Man Standing. Dy sette útein yn 2011, wêrnei't Dever seis seizoenen lang in fêste rol hie. Fan it sânde seizoen yn 2018 ôf gie Eve yn 'e searje út 'e hûs en hie Dever inkeld noch yn in weromkearende rol oant Last Man Standing yn 2021 stopset waard. Dever waard yn 2012 nominearre foar trije Young Artist Awards, foar har rollen yn Bad Teacher, Justified en Last Man Standing.

Yn 2018 hie Dever in lytse rol yn 'e politike dramafilm The Front Runner, dêr't se yn gearwurke mei Molly Ephraim, har "suster" út Last Man Standing. Datselde jiers wie se ek te sjen yn it biografysk drama Beautiful Boy, mei Timothée Chalamet. Begjin 2019 spile se yn 'e skrillerfilm Them That Follow, dy't foar it earst fertoand waard op it Sundance Filmfestival foar ûnôfhinklike films. Letter dat jier fertolke Dever mei Beanie Feldstein de haadrollen yn 'e jeugdkomeedzje Booksmart, ûnder rezjy fan Olivia Wilde, dy't yn premiêre gie op it filmfestival South by Southwest yn Austin (Teksas). Yn 2019 hie se ek ien fan 'e haadrollen yn Unbelievable, in minysearje fan Netflix. Foar dy rol waard se nominearre foar de Golden Globe foar bêste aktrise yn in minysearje of tillefyzjefilm en de BAFTA foar opkommende stjer. Yn 2020 wurke Dever mei oan it harkspuldrama When You Finish Saving the World.

Dever spile yn 2021 de rol fan Betsy Mallum yn 'e minysearje Dopesick, dêr't se in Emmy-nominaasje foar krige. Yn 2022 wie se te sjen yn 'e titelrol yn 'e film Rosaline, oer in personaazje dat inkeld neamd wurdt yn it toanielstik Romeo en Julia fan William Shakespeare, as in jonge frou mei wa't Romeo earder ferkearing hân hat. Datselde jiers spile Dever ek de wichtichste byrol yn 'e romantyske komeedzje Ticket to Paradise, mei George Clooney en Julia Roberts. Yn 2023 wie se te sjen yn 'e science fiction-skriller No One Will Save You, dêr't suver gjin dialooch yn sit. Dever waard troch de filmkritisy priizge foar har fermogen om hast allinnich mei gesichtsútdrukkings en lichemstaal it ferhaal oer te bringen. Yn 2025 fertolke Dever de rol fan 'e Australyske oplichtster Belle Gibson yn 'e biografyske minysearje Apple Cider Vinegar. Dat jiers krige se ek in weromkearende rol yn it twadde seizoen fan 'e post-apokalyptyske dramasearje The Last of Us, dy't yn it trêde seizoen omset waard yn in fêste rol.

Filmografy

Filmografy as aktrise
jier	titel	rol of funksje	opmerkings
tillefyzje
2009	An American Girl: Chrissa Stands Strong	Gwen Thompson	tillefyzjefilm
2009	Make It or Break It	skattich famke	gastrol; ôfl. Pilot
2009	Modern Family	Bianca Douglas	gastrol; ôfl. Fizbo
2010	Private Practice	Paige	gastrol; ôfl. Love Bites
2010	Party Down	Escapade Dunfree	gastrol; ôfl. Party Down Company Picnic
2011	Cinema Verite	Michelle Loud	tillefyzjefilm
2011	The Mentalist	Trina	gastrol; ôfl. Blood for Blood
2011	Curb Your Enthusiasm	Kyra O'Donnell	gastrol; ôfl. The Divorce
2011–2015	Justified	Loretta McCready	weromkearende rol; 17 ôfl.
2011–2021	Last Man Standing	Eve Baxter	fêste rol yn seizoen 1–6; weromkearende rol yn seizoen 7–9
2019	Unbelievable	Marie Adler	minysearje
2020	Home Movie: The Princess Bride	Westley	gastrol; ôfl. Battle of the Wits
2020	Coastal Elites	Sharynn Tarrows	tillefyzjefilm
2020	Monsterland	Toni / Jennifer	weromkearende rol; 3 ôfl.
2021	The Premise	Abbi Miller	gastrol; ôfl. The Ballad of Jesse Wheeler
2021	Dopesick	Betsy Mallum	minysearje
2025	Apple Cider Vinegar	Belle Gibson	minysearje; ek útfierend produsinte
2025–no	The Last of Us	Abby	searje; weromkearende rol yn seizoen 2, fêste rol yn seizoen 3
films
2011	Bad Teacher	Sasha Abernathy
2011	J. Edgar	dochter fan Palmer
2013	The Spectacular Now	Krystal
2013	Short Term 12	Jayden Cole
2014	Laggies	Misty
2014	Men, Women & Children	Brandy Beltmeyer
2017	All Summers End	Grace Turner
2017	We Don't Belong Here	Lily Green
2017	Detroit	Karen Malloy
2017	Outside In	Hildy Beasley
2018	The Front Runner	Andrea Hart
2018	Beautiful Boy	Lauren
2019	Them That Follow	Dilly Picket
2019	Booksmart	Amy Antsler
2021	Dear Evan Hansen	Zoe Murphy
2022	Ticket to Paradise	Lily Cotton
2022	Rosaline	Rosaline	ek útfierend produsinte
2023	Next Goal Wins	Nicole Megaloudis	cameo
2023	No One Will Save You	Brynn Adams	ek útfierend produsinte
2023	Good Grief	Lily Kayne	cameo
2025	A House of Dynamite	Caroline Baker	cameo
2026	See You When I See You	Leah Whistler
2027	Godzilla x Kong: Supernova	<noch net bekend>
fideospultsjes
2016	Uncharted 4: A Thief's End	Cassie Drake	as stimaktrise; en motion capture
2021	Open Roads	Tess Devine
fideoklips
2019	Graduation	Decker	nûmer fan Benny Blanco en Juice Wrld
2020	Raleigh	harsels	nûmer fan Beulahbelle; ek regisseur en produsint

Keppelings om utens

• (in) Folsleine filmografy fan Kaitlyn Dever yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Kaitlyn Dever fan Wikimedia Commons.