Sint-Louis

Ut Wikipedy
Gean nei: navigaasje, sykje
Sint-Louis
St Louis night.jpg
Flagge Wapen
Flag of St. Louis, Missouri.svg Escudo de armas en blanco.svg
Sifers
Ynwennertal 318.172 (2012)
Oerflak 171,3 km² (ynkl. wetter)
160,4 km² (allinnich lân)
Befolkingstichtens 1.983,6 / km²
Stêdekloft 2.795.794 (2012)
Hichte 142 m
Polityk
Lân Flag of the United States.svg Feriene Steaten
Steat Flag of Missouri.svg Missoury
Gemeente Sint-Louis
Oar
Stifting 1764
Tiidsône UTC-6
Simmertiid UTC-5
Koördinaten 38°37′38″N 90°11′52″W
Webside stlouis-mo.gov
De lizzing fan Sint-Louis yn 'e steat Missoury.

Sint-Louis (Ingelsk: Saint Louis of St. Louis) is in ûnôfhinklike stêd (dy't dus gjin diel útmakket fan in county) yn 'e Amerikaanske steat Missoury. Mei krapoan 320.000 ynwenners is it nei Kansas City de grutste stêd fan dy steat. As alle foarstêden en de omlizzende heal ferstedske krite meirekkene wurde, komt it befolkingstal sels út op hast 2,8 miljoen minsken. Sint-Louis leit oan 'e eastgrins fan 'e Missoury, oan 'e rivier de Mississippy, justjes besuden it punt dêr't de rivier de Missoury dêryn útmûnet.

Skiednis[bewurkje seksje | edit source]

It stânbyld (yn Sint-Louis) fan 'e hillich ferklearre kening Loadewyk IX fan Frankryk, nei wa't Sint-Louis neamd is.
In byld fan it sintrum fan Sint-Louis, mei op 'e eftergrûn de Gateway Arch.

Sint-Louis leit yn it gebiet dat it sintrum wie fan 'e saneamde Mississippiaanske kultuer fan 'e Heuvelbouwers. Dat wie in heech ûntwikkele maatskippij dy't syn hichtepunt berikte tusken 1000 en 1100, mar dy't fan 1150 ôf yn it neigean rekke troch in feroarjend, droeger klimaat, dat foar hongersneed soarge. Yn 1541 waard de krite foar it earst besocht troch in Jeropeeske, Spaanske ekspedysje, ûnder lieding fan Hernando de Soto. De ierste kolonisten, dy't har yn 'e 1690-er en 1700-er jierren yn it gebiet nei wenjen setten, wiene almeast Frânsen, mei't wat letter de steat Missoury wurde soe, doe noch ta de grutte Frânske koloanje Louisiana hearde. Yn 1764 waard troch twa fan dy Frânske kolonisten, Pierre Lacècle en dy syn styfsoan Auguste Chouteau, in delsetting stifte dy't se Saint-Louis neamden, nei Loadewyk IX, de iennichste Frânske kening dy't hillich ferklearre is.

It jonge Sint-Louis dielde yn 'e lotgefallen fan hiele Louisiana, dat yn 1764 yn Spaanske hannen kaam, en ûnderdiel waard fan it ûnderkeninkryk Nij-Spanje (it hjoeddeiske Meksiko). Yn 1800 moasten de Spanjerts it wer ôfstean oan Frankryk, mar Napoleon, dy't doe yn Parys de leie yn 'e hannen hie, koe fanwegen de Britske oppermacht op 'e wrâldseeën net folle mei it gebiet, dat yn in die dy't yn Frankryk noch altiten beskriemd wurdt, besleat er genoegen te nimmen mei it op ien nei bêste, en ferkocht er hiele Louisiana (dat fan 'e Mississippy-mûning by New Orleans oant de Kanadeeske grins rikte) oan in oare fijân fan 'e Britten: de Feriene Steaten. Dy saneamde Louisiana-oankeap, út 1803, joech de Amerikanen de earste oanset ta wat se letter as harren lotsbestimming beskôgje soene, nammentlik om it Noardamearikaanske kontinint fan kust ta kust te oerhearskjen.

De Amerikanen makke fan it sintraal leine Sint-Louis de haadstêd fan harren nije territoarium Louisiana, al waard dat al gau opspjalte yn in stikmannich lytsere territoaria. Fan Sint-Louis út sette yn 1804 de ferneamde Ekspedysje fan Lewis en Clark ôf, dy't de Feriene Steaten in earste glimp joech fan wat der tusken it troch harren al kolonisearre gebiet en de kust fan 'e Stille Oseaan yn lei. De earste steamboat arrivearre yn 1818 yn Sint-Louis, en fan doe ôf bestie der in relatyf flugge ferbining oer de Mississippy nei New Orleans, dat foar it hiele eardere Louisiana-territoarium de poarte nei de widere wrâld foarme. Yn 1821 waard Missoury as selsstannige steat talitten ta de Amerikaanske Uny, en doe waard de haadstêd ferpleatst nei it yn 'e midden fan 'e nije steat leine Jefferson City. Troch syn funksje as rivierhaven mei de hiele steat as efterlân hold Sint-Louis lykwols oan mei groeien, en it jiers dêrop, yn 1822, krige it einlings offisjeel de status fan stêd.

Fan 'e 1840-er jierren ôf begûnen grutte oantallen Dútske en Ierske ymmigranten har yn Sint-Louis nei wenjen te setten, en it ynwennertal fan 'e stêd woeks oan fan minder as 20.000 yn 1840 ta 160.000 yn 1860. De Amerikaanske Boargeroarloch late ta twaspjalt yn 'e stêd: hoewol't Missoury in slavesteat wie dy't ornaris ta it Suden rekkene waard, sleat it him net oan by de Súdlike Konfederaasje, benammen om't in grutte Noardlike troepemacht dat, ta lulkens fan in grut part fan 'e ynwenners, tsjinkearde. Yn 1861, oan it begjin fan 'e oarloch, fûn der yn Sint-Louis in wapene treffen plak tusken boargers en Noardlike soldaten, wêrby't 28 boargers deade waarden. Likemin die de oarloch de pleatslike ekonomy folle goed, mei't it ferkear oer de Mississippy nei it Suden ta blokkearre waard. Wol waarden der yn 'e stêd mei izer beklaaide kannonearboaten foar it Noarden boud.

Nei't de Boargeroarloch yn 1865 mei in Noardlike oerwinning beëinige waard, folge der wer in lytse oplibbing fan it steamboatferkear, mar it waard nea mear wat it foartiid west hie en al rillegau leine de steamboaten it ôf tsjin it fluggere treinferfier. Sint-Louis rjochte him yn dy tiid fral op 'e hannel mei it nij iepenleine Wylde Westen, en de stêd waard ien fan 'e wichtichste tagongspoarten foar Westlike produkten dy't oer it spoar nei it Easten ta ferfierd waarden, lykas slachtfee. Yn 1876 waard Sint-Louis nei in stimming yn 'e gemeenterie bestjoerlik losmakke fan it omlizzende Sint-Louis County, en waard it in ûnôfhinklike stêd.

Yn 1904 fûn yn Sint-Louis de Wrâldtentoanstelling plak, en datselde jiers waard it ek de earste stêd bûten Jeropa dêr't de Olympyske Simmerspullen holden waarden. Mei it jild dat mei de Wrâldtentoanstelling fertsjinne wie, waarden û.m. it St. Louis Art Museum, de St. Louis Zoo en it Missouri History Museum oprjochte. Fan 'e fyftiger jierren ôf rekke de binnenstêd ferpaupere en sûnt fierde it stedsbestjoer ferskate grutskalige renovaasjeprogramma's troch.

Sint-Louis hjoed de dei[bewurkje seksje | edit source]

De ekonomy fan Sint-Louis draait tsjintwurdich benammentlik op 'e tsjinstesektor, beskate foarmen fan yndustry, en fral ek hannel en trochfier. Ek toerisme is net ûnbelangryk. De stêd is de thúsbasis fan trije sporttiims fan namme: it honkbaltiim de St. Louis Cardinals; it iishockeytiim de St. Louis Blues; en it Amerikaansk footballtiim de St. Louis Rams. Ien fan 'e wichtichste besjensweardichheden en in symboal fan 'e stêd is de saneamde Gateway Arch ("Poartebôge"), oan 'e rivierskant yn it stedssintrum.

De skyline fan Sint-Louis, mei de Gateway Arch op 'e foargrûn.

Berne yn Sint-Louis[bewurkje seksje | edit source]

Boarnen, noaten en referinsjes[bewurkje seksje | edit source]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.