Randall Wallace

	Randall Wallace
	regisseur en/of produsint
	persoanlike bysûnderheden
echte namme	Randall Wallace
nasjonaliteit	Amerikaansk
berne	28 july 1949
berteplak	Jackson (Tennessee)
etnisiteit	Skotsk
	wurkpaad
wurksum as	regisseur, senarioskriuwer, ; filmprodusint, romanskriuwer,; lietsjeskriuwer
bekenste; produksje(s)	Braveheart ; The Man in the Iron Mask ; Pearl Harbor ; Secretariat
jierren aktyf	1986 – no
prizen	Writers Guild of America Award 1995
	offisjele webside
	wallaceentertainment.com

Randall Wallace (Jackson (Tennessee), 28 july 1949) is in Amerikaansk skriuwer (fan senario's, lieten, romans en koarte ferhalen), regisseur en filmprodusint fan etnysk Skotsk komôf. Hy waard bekend doe't er yn 1995 it senario fan 'e súksesfolle Hollywood-film Braveheart skreau, wêrmei't er in nominaasje foar in Oscar binnensleepte. Letter debutearre er as regisseur mei de kaskreaker The Man in the Iron Mask. Ek wied er belutsen by de produksje fan films as Pearl Harbor, We Were Soldiers, Hacksaw Ridge en Secretariat.

Libben en karriêre

Jonkheid en oplieding

Randall Wallace waard yn 1949 berne yn Jackson, yn 'e Amerikaanske steat Tennessee, mar groeide op yn Memphis en Henderson County yn dyselde steat, foar't er mei syn âlden nei Firginia ferfear. Dêr folge er de middelbere skoalle oan 'e E.C. Glass High School yn Lynchburg, wêrnei't er fierder learde oan 'e Duke Universiteit te Durham yn Noard-Karolina. Hy studearre ôf yn Russyske taal- en letterkunde, teology en Ingelske literatuer. Wallace, dy't in swarte bân yn karate hat, ûnderhold himsels as fjochtsporttrainer wylst er neitiid in jier oan in seminaarje trochlearde.

Iere jierren

As folwoeksene wie Wallace ferskate jierren manager fan in bisteshow yn it ferdivedaasjepark Opryland, yn Nashville (Tennessee). Mids jierren tachtich ferhuze er nei Hollywood om in karriêre as sjonger en lietsjeskriuwer nei te stribjen. Hy begûn romans, koarte ferhalen en senario's foar films te skriuwen. As protezjee fan 'e foaroansteande tillefyzjeprodusint Stephen J. Cannell bestege er oan 'e ein fan jierren tachtich en it begjin fan 'e jierren njoggentich ferskate jierren oan it skriuwen fan skripts foar tillefyzjesearjes.

Filmkarriêre

Mids 1990-er jierren briek Wallace troch as skriuwer fan it senario fan 'e Hollywood-kaskreaker Braveheart, dy't it libbensferhaal fertelt fan 'e Midsiuwske Skotske frijheidsstrider William Wallace. Nei't it skynt waard Randall Wallace ta it skriuwen fan dit senario ynspirearre doe't er Skotlân besocht op 'e siik nei syn foarâlderlik erfskip. (Hy is ynsafier bekend net besibbe oan William Wallace oars as dat beiden leden fan deselde clan wiene/binne, te witten: de Clan Wallace.) Syn senario wekke de belangstelling fan akteur en regisseur Mel Gibson, dy't sawol de haadrol, de rezjy as (mei oaren) de produksje fan 'e film op him naam. Braveheart waard ien fan 'e súksesfolste films út 'e jierren njoggentich, en wûn ferskate Oscars, û.m. foar bêste film en bêste regisseur. Wallace sels waard nominearre foar in Oscar yn 'e kategory bêste senario, en teffens foar in Golden Globe yn deselde kategory. Hy wûn in Writers Guild of America Award foar bêste senario.

Yn 1998 makke Wallace syn debút as regisseur mei de film The Man in the Iron Mask, nei in senario fan eigen hân. Dat wie basearre op Le Vicomte de Bragelonne, ou Dix Ans Plus Tard ("De Boarchgreve fan Bragelonne, of Tsien Jier Letter") it trêde diel út 'e tetralogy oer de trije musketiers, fan 'e Frânske skriuwer Alexandre Dumas, út 1848. De film hie in stjerrecast dy't û.o. bestie út Leonardo DiCaprio, John Malkovich, Gabriel Byrne, Jeremy Irons en Gérard Depardieu, en wie in grut kommersjeel súkses. Yn 1999 rjochte Wallace fierders syn eigen filmstudio op, ûnder de namme Wheelhouse Entertainment, dy't him taleit op it meitsjen fan wrâldwiid fermaak dat de klassike wearden leafde, moed en eare útdraacht.

Koarte tiid letter skreau Wallace it senario foar Pearl Harbor, oer de Japanske oanfal op Pearl Harbor, yn 'e Twadde Wrâldoarloch, dat yn 2001 ferfilme waard troch regisseur Michael Bay, mei Ben Affleck en Kate Beckinsale yn 'e haadrollen. Hoewol't dat ûntsjinsislik in spektakulêre film wie, moast er it benammen hawwe fan 'e special effects; op it senario fan Wallace wie in protte krityk, en hy waard dermei nominearre foar in Golden Raspberry Award yn 'e kategory minste senario.

Yn 2002 regisearre Wallace syn twadde film, it rouwe We Were Soldiers, op 'e nij nei in senario fan himsels. Dêrby gie it ferhaal oer de Slach om Ia Drang, in inkele fjildslach út 'e Fjetnamoarloch. Wallace gie dêrfoar yn training mei beropssoldaten fan 'e Ranger School fan it Amerikaanske Leger om 'e motivaasje fan syn personaazjes better te begripen. Foar de ferfilming wurke er fannijs gear mei Mel Gibson, dy't de haadrol fan luitenant-kolonel Hall Moore spile.

De trêde film dy't Wallace regissearre wie Secretariat, foar Disney yn 2010, foar it earst nei in senario dat er sels net skreaun hie. Yn dy film wurdt it wierbarde ferhaal ferteld fan in racehynder dat yn 1973 de saneamde Trijefâldige Kroan binnenhelle (troch de trije wichtichste Amerikaanske hynstekoersen yn ien jier te winnen). Dêrby wurdt benammen omtinken skonken oan it krewearjen en de moed fan 'e eigneresse fan it hynder, Penny Chenery-Tweedy, dy't spile waard troch aktrise Diane Lane. Wallace skreau sels it ôftitelingsnûmer It's Who You Are, dat as ûnderdiel fan 'e soundtrack fan Secretariat útbrocht waard.

Wallace syn fyfde film as regisseur wie Heaven Is for Real, út 2014, wêrfan't er ek it senario skreaun hie, oer in jonge dy't nei eigen sizzen yn 'e himel west hat. Yn 2016 wurke Wallace as 'skriptdokter' (sûnder fermelding op 'e ôftiteling) mei oan 'e film oarlochsfilm Hacksaw Ridge, dy't regissearre waard troch syn freon Mel Gibson. Datselde jiers makke Wallace bekend dat hy en Gibson úteinset wiene mei de tarieding foar The Passion of the Christ: Resurrection (2025) oer de weropstanning fan Jezus, in ferfolch op Gibson syn súksesfolle (sij it kontroversjele) eardere film The Passion of the Christ (2004) oer de krusiging fan Jezus. Teffens hawwe Wallace en Mel Gibson, nei't it skynt, plannen foar in film oer de Wytsingen.

Oare beuzichheden

Los fan syn karriêre yn 'e filmyndustry is Wallace ek de auteur fan sân orizjinele romans, wêrûnder ferskaten dy't yn 'e prestizjeuze bestsellerlist fan The New York Times stien hawwe. Teffens hat er guon ferboekings skreaun fan syn eigen senario's (lykas de roman Braveheart, út 1995). Fierders hat er frijwat lieten skreaun, oer it algemien fan it popsjenre, mar û.o. ek de hymne Mansions of the Lord, dy't yn 2004 diel útmakke fan 'e routsjinst foar de Amerikaanske presidint Ronald Reagan. Yn 2008 skreau Wallace ferskate lieten mei sjonger en lietsjeskriuwer Richard Marx, wêrfan't ien, Flame in Your Fire, letter útbrocht waard op Marx syn album Emotional Remains. Wallace hat sporadysk ek as akteur yn 't spier west; sa spile er yn 2002 in Teksaanske oalje-arbeider yn 'e film The Rookie, en hied er in cameo as himsels yn it sânde seizoen fan 'e komeedzjesearje Entourage.

Priveelibben

Wallace is troud en hat twa soannen. Yn fraachpetearen hat er oanjûn in djippe tawijing oan it kristlik leauwe te hawwen, dat nei eigen sizzen in grutte ynfloed op syn meitsjen fan films útoefenet. Wallace is ek aktyf foar de goeddiedichheidsorganisaasje Habitat for Humanity, dy't him ynset foar it bouwen fan huzen foar dakleazen yn ûntwikkelingslannen.

Bibliografy

1973 – Tran Chau Cang
1980 – The Russian Rose
1983 – So Late into the Night
1990 – Blood of the Lamb
1992 – Where Angels Watch
1995 – Braveheart (ferboeking fan 'e film mei deselde namme)
1999 – The Man in the Iron Mask (ferboeking fan 'e film mei deselde namme)
2001 – Pearl Harbor (ferboeking fan 'e film mei deselde namme)
2002 – We Were Soldiers (ferboeking fan 'e film mei deselde namme)
2004 – Love and Honor (yn it Nederlânsk oerset as In de Gunst van de Tsarina)
2011 – The Touch (yn it Nederlânsk oerset as De Gave)
2015 – Living the Braveheart Life: Finding the Courage to Follow Your Heart (non-fiksje)

Filmografy

jier	titel	rol of funksje	opmerkings
Filmografy as filmmakker en akteur
tillefyzje
1986	Hunter	n.f.t.	senarioskriuwer, ôfl. Fagin
1986	Starman	n.f.t.	senarioskriuwer, ôfl. Secrets
1987	Stingray	n.f.t.	senarioskriuwer, ôfl. Anywhere, Anytime
1987–1988	J.J. Starbuck	n.f.t.	senarioskriuwer en tillefyzjeprodusint, 3 ôfl.
1988	Sonny Spoon	n.f.t.	senarioskriuwer en útfierend produsint, hiele searje
1989	Unsub	n.f.t.	senarioskriuwer, 2 ôfl.
1990–1991	Broken Badges	n.f.t.	senarioskriuwer en útfierend produsint, hiele searje
1996	Dark Angel	n.f.t.	tillefyzjefilm, betinker fan it ferhaal
2010	Entourage	himsels	gastrol, ôfl. Bottoms Up
2015	Point of Honor	n.f.t.	tillefyzjefilm, regisseur, senarioskriuwer en útfierend produsint
films
1995	Braveheart	n.f.t.	senarioskriuwer Writers Guild of America Award foar bêste orizjinele senario nom. Oscar foar bêste orizjinele senario nom. Golden Globe foar bêste senario
1998	The Man in the Iron Mask	n.f.t.	regisseur, senarioskriuwer, filmprodusint
2001	Pearl Harbor	n.f.t.	senarioskriuwer en útfierend produsint
2002	The Rookie	oalje-arbeider
2002	We Were Soldiers	n.f.t.	regisseur, senarioskriuwer en filmprodusint
2010	Secretariat	n.f.t.	regisseur
2014	Heaven Is for Real	n.f.t.	regisseur en senarioskriuwer
2016	Hacksaw Ridge	n.f.t.	skripdokter sûnder fermelding yn 'e ôftiteling
2022	The Swiss Guard	n.f.t.	senarioskriuwer
2025	The Passion of the Christ: Resurrection	n.f.t.	senarioskriuwer

Keppelings om utens

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.