Moorslede

	Moorslede
	Gemeentehûs
	Emblemen
	Bestjoer
Lân	Belgje
gewest	Flaanderen
provinsje	West-Flaanderen
	Sifers
Ynwennertal	11.386 (2022)
Oerflak	35,45 km²
Befolkingsticht.	321,21 ynw./km²
	Oar
Postkoade	8890
Tiidsône	UTC +1
Simmertiid	UTC +2
Koördinaten	50° 53' N 3° 03' E
	Lokaasje Moorslede yn it arrondissemint Kortrijk yn 'e provinsje West-Flaanderen
	Offisjele webside
	moorslede.be

Moorslede (West-Flaamsk: Môoslee) is in plak en gemeente yn de Belgyske provinsje West-Flaanderen. It doarp leit likernôch 9 km súdwestlik fan de stêd Roeselare. De gemeente hat mear as 11.000 ynwenners. It is in plattelânsgemeente en Moorslede moat net betiizge wurde mei Moorsele yn de oanbuorjende gemeente Wevelgem. De gemeente bestiet njonken de dielgemeente Moorslede ek út de dielgemeente Dadizele.

Skiednis

Moorslede waard foar it earst yn 1085 neamd as Morcelede. Dat is in gearfoeging fan moor (sompe) en lede (dyk of trochgong). It sintrum fan Moorslede leit noch jimmeroan dúdlik heger as de omlizzende krite.

Moorslede wie in hege hearlikheid, dy't om 1700 hinne yn it besit kaam fan de hearen fan Dadizele. It yn 1617 werboude kastiel waard nei 1700 in kastielpleats.

Sûnt 1188 hearde it patronaatsrjocht fan 'e Martinusparochy ta it kapittel fan Us Leaffrou yn Doarnik. It kleaster Us-Leaffrouwe Ten Bunderen ûntstie yn de 13e iuw as in gasthûs foar wurge pylgers en reizgers. Sûnt 1815 waard it ek in belangryk ûnderwiissintrum.

Oant de Earste Wrâldkriich bestie de yndustry út it ferwurkjen fan lânbouprodukten: flaaksferwurking, brouwerijen, lytse tabaksfabriken en mais- en oaljemûnen. Yn 1917 en 1918 waard it doarp hast folslein ferneatige; Ingelsen beskeaten it doarp en Dútsers blaasden wichtige gebouwen op. Ein septimber 1918 waard Moorslede befrijd.

Sûnt 1919 kaam de befolking werom en nei 1921 sette de weropbou útein.

Yndieling gemeente

De gemeente Moorslede bestiet út it plak Moorslede en de dielgemeente Dadizele. De doarpskearn fan Dadizele leit likernôch fiif kilomer súdlik fan it plak Moorslede. Tusken de twa plakken leit yn 'e dielgemeente Moorslede it doarpke Slypskapelle.