All Hail King Julien

All Hail King Julien
tillefyzjesearje
makkers
betocht troch	Tom McGrath Eric Darnell
útfierend    produsint	Mitch Watson Bret Haaland
tillefyzjestudio	DreamWorks Animation TV
spilers
haadrollen	Danny Jacobs Kevin Michael Richardson Andy Richter India de Beaufort
skaaimerken
foarm	tekenfilmsearje
sjenre	komeedzjesearje foar bern
seizoenen	6
jierren	2014 – 2017
tal ôfl.	78
spyltiid (ôfl.)	22 min.
lân/lannen	Feriene Steaten
taal	Ingelsk
prizen	7 × Emmy Award
webside	www.dreamworkstv.com/shows/all-hail-king-julien
besibbe searjes	The Penguins of Madagascar Madagascar: A Little Wild

All Hail King Julien (yn Nederlân útstjoerd as Lang Leve Koning Julien) is súksesfolle Amerikaanske kompjûteranimearre tekenfilmsearje foar bern, dy't seis seizoenen rûn, fan 2014 oant en mei 2017. It wie (nei The Penguins of Madagascar) de twadde searje dy't basearre waard op 'e mediafranchise Madagascar. All Hail King Julien is in fantasy-aventoeresearje dy't draait om 'e aventoeren fan 'e narsistyske ringsturtmaky kening Julien XIII, dy't oer de makys fan Madagaskar regearret. De searje waard iepenbier makke fia de streamingtsjinst Netflix. Hy krige oer it algemien positive resinsjes fan 'e tillefyzjekritisy en wûn sân Emmy Awards.

Produksje

All Hail King Julien waard yn maart 2014 oankundige as ûnderdiel fan in oerienkomst dy't tekenfilmstudio DreamWorks Animation sletten hie mei streamingtsjinst Netflix. Dêrby lei DreamWorks himsels kontraktueel fêst om mear as 300 oeren oan eksklusive programmearring foar Netflix te produsearjen. All Hail King Julien wie de twadde searje dy't basearre waard op 'e Madagascar-franchise, nei The Penguins of Madagascar, út 2008-2012. Mei't All Hail King Julien spilet foarôfgeande oan 'e foarfallen yn 'e earste film Madagascar, foarmet de searje eins in prequel fan 'e rest fan 'e mediafranchise.

In ôfbydling fan kening Julien XIII.

De searje waard makke troch útfierende produsinten Mitch Watson en Bret Haaland op basis fan personaazjes dy't betocht wiene troch Tom McGrath en Eric Darnell. All Hail King Julien rûn seis seizoenen, fan desimber 2014 oant desimber 2017. Yn totaal waarden der 78 ôfleverings makke mei in spyldoer fan 22 minuten. Dy waarden allegear publisearre fia Netflix. Foar de Nederlânske tillefyzje (útstjoerd troch Nickelodeon) waard de searje yn it Nederlânsk neisyngronisearre mei de stimmen fan û.o. Louis van Beek, Jerrel Houtsnee, Thijs van Aken, Renée van Wegberg en Rosalie de Jong.

Utgongspunt fan 'e plot

All Hail King Julien spilet yn 'e wyldernis fan Madagaskar foarôfgeande oan 'e foarfallen yn 'e film Madagascar (2005). De ringsturtmaky kening Julien XII (yn 'e searje fierder ornaris "omke-kening Julien" neamd) is de tige strange, mar ek tige leffe hearsker oer alle makys. As him foarsein wurdt dat er ferslynd wurde sil troch de fossa's, beslút er troansôfstân te dwaan en yn ballingskip te gean om it libben derôf te rêden. Yn syn plak komt syn omkesizzer op 'e troan as Julien XIII. De nije kening is in narsistysk leafhawwer fan willemeitsjen, dy't syn hiele libben lang noch net folle út 'e wei set hat, en no hat er in hiel keninkryk om mei om te boartsjen.

Kening Julien XIII wurdt bystien troch syn trouwe en folle pleage adviseur, it fingerdier Maurice, en ek troch syn liifwacht, de froulike kroanmaky Clover. Ek de mûsmaky Mort is oanhâldend yn syn gefolch oanwêzich. Mort is de grutste fan fan kening Julien, en hâldt in ferskriklik soad fan him, mar yrritearret him ek sûnder ophâlden. Fjouweresom reitsje se fersyld fan alderhanne aventoeren en swierrichheden. Underwilens besiket de slûchslimme omke-kening Julien hieltyd op 'e nij kening te wurden, wylst der ek oare bedrigings foar it bewâld fan Julien XIII binne, lykas de sljochtsinnige fanaloka Karl en Clover har boasaardige twillingsuster Crimson.

Oan 'e ein fan it fjirde seizoen wurdt kening Julien ôfset en twongen om yn ballingskip te gean troch kening Koto en syn leger. It fyfde seizoen hjit dêrom: All Hail King Julien: Exiled ("ferballe"). Oan 'e ein fan it fyfde seizoen wit Julien lykwols Koto te ferslaan en syn keninkryk werom te winnen. It sechsde en lêste seizoen fynt plak nei't mei Koto ôfweefd is. Dêryn beslute smjunten as Karl en omke-kening Julien úteinlik har ferkeardens ôf te swarren en in nij libben te begjinnen. Oan 'e ein fan it sechsde seizoen arrivearje Alex de liuw en syn freonen op Madagaskar, sadat de searje oanslút by de earste Madagascar-film. Krekt op dat stuit giet Clover, in nij personaazje dat yn All Hail King Julien yntrodusearre waard, fuort op houliksreis mei har brêgeman Sage Moondancer, sadat alle losse eintsje kreas ôftriedde binne.

Koarte films

Op basis fan All Hail King Julien waarden yn 2017 twa (tige) koarte films makke, dy't los steane fan 'e searje. All Hail King Julien: Happy Birthday to You! is in filmke mei it tema 'jierdei', en All Hail King Julien: New Year's Eve Countdown hat as tema 'âld en nij'.

Rolferdieling

Haadrollen

personaazje	akteur/aktrise oarspronklike ferzje	akteur/aktrise Nederlânsk neisyngronisearre ferzje
kening Julien XIII, in ringsturtmaky	Danny Jacobs	Louis van Beek
Maurice, in fingerdier	Kevin Michael Richardson	Jerrel Houtsnee
Mort, in mûsmaky	Andy Richter	Thijs van Aken
Clover, in kroanmaky	India de Beaufort	Renée van Wegberg/Lotte Horlings/Rosalie de Jong

Weromkearende byrollen

personaazje	akteur/aktrise oarspronklike ferzje	akteur/aktrise Nederlânsk neisyngronisearre ferzje
Karl, in fanaloka	Dwight Schultz	Victor van Swaay
kening Julien XII ("omke-kening Julien"), in ringsturtmaky	Henry Winkler	Johnny Kraaijkamp jr./Huub Dikstaal
Timo, in tenrek	David Krumholtz	Ewout Eggink
Masikura, in kameleön	Debra Wilson	Johanne Telesford
Mary-Anne, in fossa	Debra Wilson	Jannemien Cnossen
Crimson, de suster fan Clover, in kroanmaky	India de Beaufort	Renée van Wegberg/Rosalie de Jong
Ted, in gouden healmaky	Andy Richter	Sander van der Poel/Huub Dikstaal
Sage Moondancer, in indry	Jeff Bennett	Lucas Dietens
Xixi, in toekan	Betsy Sodaro	Donna Vrijhof/Daphne Flint
Dorothy, in mangoestmaky	Sarah Thyre	Marjolein Algera/Jantine van den Bosch
Horst, in blau-eachmaky	Jeff Bennett	Ad Knippels/Florus van Rooijen
Dr. S, in keningskobra	Jeff Bennett	Ruud Drupsteen
kening Koto, in indry	Maurice LaMarche	Simon Zwiers

Seizoenen

seizoen	tal ôfl.		rûn fan	rûn oant	streamingtsjinst
1	10	5	19 desimber 2014	26 desimber 2014	Netflix
		5	3 april 2015	10 april 2015
2	16		16 oktober 2015	30 oktober 2015
3	13		17 juny 2016	24 juny 2016
4	13		11 novimber 2016	25 novimber 2016
5 (Exiled)	13		12 maaie 2017	19 maaie 2017
6	13		1 desimber 2017	1 desimber 2017

Untfangst en resultaat

All Hail King Julien krige oer it algemien positive resinsjes fan 'e tillefyzjekritisy, dy't benammen lof hiene foar de kulturele relevânsje fan 'e searje. Ek waard it wurk fan 'e stimakteurs priizge. Neffens Robert Lloyd fan 'e Los Angeles Times wie All Hail King Julien "slagge op it mêd fan styl, senario, timing en stimaktearjen ynstee fan it tal yndividuele hierren dy't tekene binne yn in pels."

De searje waard yn totaal 19 kear nominearre foar in Emmy Award, de wichtichste Amerikaanske priis foar tillefyzje. Dêrfan wûn All Hail King Julien 7 Emmys: yn 2015 foar bêste animearre berneprogramma, bêste stimakteur yn animearre programma (Danny Jacobs as kening Julien) en bêste casting foar in animearre searje of tillefyzjespecial; yn 2016 foar bêste senario yn in animearre programma en bêste orizjinele liet (True Bromance); en yn 2017 foar bêste lûdsmontaazje en bêste lûdsmixing. Yn 2017 waard All Hail King Julien ek nominearre foar in Annie Award.

Keppelings om utens

• (in) Offisjele webside fan All Hail King Julien
• (in) De titelmuzyk fan All Hail King Julien op YouTube
• (in) Ynformaasje oer All Hail King Julien yn 'e Internet Movie Database

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.