Sint-Martinustsjerke (Boazum)

Ut Wikipedy
Jump to navigation Jump to search
De Sint-Martinustsjerke fan Boazum
Koar fan de Sint-Martinustsjerke fan Boazum

De Sint-Martinustsjerke is in yn de 12e iuw boude tsjerke yn it doarp Boazum.

It âldste gedielte fan de tserke wurdt foarme troch it yn de 12e iuw boude koar. Dêrnei waard it skip boud en it koar ferhege. De sealdaktoer is letter boud yn de 13e iuw. De bûtenmuorren fan de tsjerke binne fan dowestien. De toer is foar it grutste part fan bakstien, mei inkele dielen fan dowestien. De tsjerke hat romaanske rûnbôgefinsters mar ek letter oanbrochte goatyske spitsbôgefinsters. De toer sil grif, mei troch de dûbele rige galmgatten, yn lettere tiid ferhege.

Yn it koar binne nei de restauraasje yn 1941 plafondskilderingen sichtber wurden. De skilderingen komme út de 13e iuw. Op it ôfbyld in in burdleaze troanende Kristus te sjen, in saneamde "Majestas Domini". Hy stiet mids de symboalen fan de fjouwer evangelisten, de minsk of ingel fan Matteüs, de liuw fan Marcus, de bolle fan Lucas en de earn fan Johannes. Oan beide kanten fan Kristus steane fjouwer bylden fan hilligen.

Yn it ynterieur besteane in 17e-iuwske preekstoel, in 18e-iuwsk doopstek en twa hearebanken. It oargel komt út de 18e iuw en is makke troch de oargelbouwer Gottlieb Heineman. Syn wurk waard yn 1791 troch de oargelbouwer Rudolf Knol foltôge. De namme fan de lêste mei it jiertal 1791 is yn goudfarve oanbrocht oan de ûnderside fan it oargel.

Boarnen, noaten en referinsjes[boarne bewurkje]

Boarnen, noaten en/as referinsjes:
  • Karstkarel, Peter - Alle middeleeuwse kerken: Van Harlingen tot Wilhelmshaven (2007) Ljouwert/Grins, Utjouweerij Noordboek, ISBN 978 9033005589