Gideon Samson

Ut Wikipedy
Jump to navigation Jump to search
Gideon Samson
Livro preto.svg skriuwer
persoanlike bysûnderheden
oar pseudonym Menno Fernandes
echte namme ûnbekend
nasjonaliteit Flag of the Netherlands.svg Nederlânsk
berne 17 febrewaris 1985
berteplak De Haach (Nederlân)
etnisiteit Flag of the Netherlands.svg Nederlânsk
wurk
taal Nederlânsk
sjenre jeugdliteratuer, berneboeken
bekendste
  wurk(en)
Ziek
Zwarte Zwaan
útjouwer Uitgeverij Leopold
prizen Sulverne Griffel 2010, 2013
Flagge en Wimpel 2008, 2017
jierren aktyf 2007 – no
offisjele webside
www.gideonsamson.nl

Gideon Samson (echte namme ûnbekend; De Haach, 17 febrewaris 1985) is it pseudonym fan in Nederlânsk skriuwer fan jeugdliteratuer en berneboeken. Syn wurk is twaris bekroane mei de Sulverne Griffel, en hy hat dêropta ferskate oare prizen wûn. Boeken fan Samson binne oerset yn it Dútsk, Deensk, Spaansk, Katalaansk en Frysk. Samson hat ûnder it pseudonym Menno Fernandes ek in kollumn skreaun yn 'e krante NRC Handelsblad.

Libben en karriêre[bewurkje seksje | boarne bewurkje]

Jonkheid en oplieding[bewurkje seksje | boarne bewurkje]

Gideon Samson waard yn 1985 berne yn De Haach. Hy studearre film- en tillefyzjewittenskippen, en dreamde der as jonge fan om proffuotballer te wurden. Syn mem wie ien fan 'e beide skriuwsters dy't publisearren ûnder de skûlnamme Abbing & Van Cleeff.

Karriêre[bewurkje seksje | boarne bewurkje]

Foar himsels keas Samson it pseudonym Gideon Samson, in kombinaasje fan syn wiere foarnamme en in optochte efternamme. Dêrmei wurdt ferwiisd nei twa foaroanmannen út 'e skiednis fan 'e Israeliten lykas beskreaun yn it bibelboek Rjochters: Gideon en Simson (Ingelske foarm: Samson). Neffens de auteur sels keas er Samson as efternamme ek mei it each op eventuële takomstige oersettings fan syn wurk, mei't syn eigen efternamme ûnútsprekber wêze soe foar net-Nederlânsktaligen.

Samson debutearre yn 2007 as skriuwer mei it berneboek Niks Zeggen!, dat yn 2008 de Flagge en Wimpel wûn. Yn 2010 waard er mei 25 jier, mei it boek Ziek, de jongste winner fan 'e Sulverne Griffel ea. In oar bekend boek fan Samson is Overspoeld út 2014, dêr't er it wier barde ferhaal yn ferteld fan Julius 't Hart, dy't ûnder de Aziatyske tsûnamy fan 2004 frijwilligerswurk ferrjochte yn Sry Lanka.

Yn 2012 publisearre Samson de opsjochjaande jeugdroman Zwarte Zwaan, oer it fernimstige, dominante en manipulative famke Rifka Ravesteijn, dat it yn 'e holle kriget om har eigen begraffenis yn sêne te setten. Mei dy psychologyske skriller weefde de auteur ôf mei it romantyske klisjee fan it ûnskuldige bern. Foar Zwarte Zwaan wûn Samson yn 2013 foar de twadde kear de Sulverne Griffel. Ynternasjonaal wie it boek ek in súkses, mei't it troch de Internationale Jugendbibliothek keazen waard as in White Raven. Dêrmei kaam it op in jierlikse oanriedlist fan 250 titels te stean, keazen út in wrâldwiid oanbod fan mear as 10.000 boeken.

Njonken syn wurkpaad as skriuwer wie Samson ek in jier lang aktyf as kollumnist yn NRC Handelsblad. Hy skreau dêr op 'e efterside ûnder it pseudonym Menno Fernandes de kollumn De Scheids, wêryn't er syn ûnderfinings dielde as skiedsrjochter yn 'e legere difyzjes fan it Nederlânske amateurfuotbal. De stikjes ferskynden letter ek as in bondel by útjouwerij Podium. Yn 2014 hold Samson ûnder de titel Messen en Scharen Zijn Kindergevaren de jierlikse Annie M.G. Schmidtlêzing. Dêryn ferdigene er de stelling dat in berneboek allinnich goed is as it ek troch folwoeksenen wurdearre wurdt.

Wurk[bewurkje seksje | boarne bewurkje]

  • 2007 – Niks Zeggen!
  • 2009 – Ziek
    • Flag of Germany.svg Dútske oersetting: Der Himmel kann noch warten (2010)
    • Flag of Denmark.svg  Deenske oersetting: Superstakkel (2012)
  • 2010 – Met Je Hoofd Boven Water
    • Flag of Germany.svg Dútske oersetting: 70 Tricks, um nicht baden zu gehen (2014)
    • Flag of Spain.svg Spaanske oersetting: Mis Trucos para Sobrevivir Clase Natacio (2016)
    • Flag of Catalonia.svg Katalaanske oersetting: Els Meus Trucs per Sobreviure a la Classe de Natació (2016)
  • 2011 – Hoe Word Ik een Superheld?
  • 2012 – Zwarte Zwaan
  • 2014 – De Scheids (bondele kollumns, ûnder it pseudonym Menno Fernandes)
  • 2014 – Overspoeld (mei Julius 't Hart)
    • Flag of Germany.svg Dútske oersetting: Flutlicht (2016)
    • Flag of Denmark.svg  Deenske oersetting: Ravage (2017)
  • 2016 – Eilanddagen
  • 2017 – Alle Dieren Drijven (printeboek mei yllustraasjes fan Annemarie van Haeringen)
  • 2018 – Zeb

Prizen en nominaasjes[bewurkje seksje | boarne bewurkje]

jier priis resultaat kategory foar
2008 Flagge en Wimpel wûn bêste berneboek Niks Zeggen!
2010 Sulveren Griffel wûn bêste jeugdroman Ziek
2012 IBBY Honour List (fan 'e IBBY) earfolle fermelding bêste jeugdboek Met Je Hoofde Boven Water
2013 Gouden List earfolle fermelding bêste jeugdboek foar 12- oant 15-jierrigen Zwarte Zwaan
Sulveren Griffel wûn bêste jeugdroman Zwarte Zwaan
White Raven beneamd ien fan 'e bêste jeugdboeken (fan 'e Internationale Jugendbibliothek) Zwarte Zwaan
2015 Dioraphte Jongereinliteratuer Priis nominearre bêste jeugdboek Overspoeld
Gouden List wûn bêste jeugdboek foar 12- oant 15-jierrigen Overspoeld
White Raven beneamd ien fan 'e bêste jeugdboeken (fan 'e Internationale Jugendbibliothek) Overspoeld
2017 Flagge en Wimpel wûn bêste berneboek Eilanddagen

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: Bronnen, noten en/of referenties, op dizze side.