Yldau

Ut Wikipedy
Jump to navigation Jump to search

Yldau is in Fryske band dy't bestiet út de sjongeressen Yldau Bijlsma en Yldau Hoekstra. Se troffen elkoar by de foaroplieding fan it konservatoarium yn Swol.

Se wûnen yn 2012 yn de Prinsetún yn Ljouwert de finale fan Liet 2012 mei it ferske Fjoer. De muzyk wie fan gitarist Jan Hoekstra, suske Marije Hoekstra drumt, Paul van Dijk spilet piano, Abel van der Laan spilet bas en Richard Riemersma gitaar. Yldau mei dêrom Fryslân fertsjintwurdigje op Liet Ynternasjonaal dat 1 desimber 2012 hâlden wurdt yn it Asturyske Gijón yn Spanje.

Yn 2008 wûn Yldau Bijlsma út Weidum al Sjong yn de De Koornbeurs yn Frjentsjer mei it nûmer Bysûnder (orzjineel 'Bijzonder' fan Veldhuis & Kemper). Hja studearret Pedagogyske Wittenskippen en Underwiiskunde yn Grins. Sjongles krijt se fan Geertsma yn Ljouwert. Yn 2009 waard se op Liet 2009 tredde mei Wiebe Kaspers en mei syn band brocht sy doe it nûmer Mynhear Winter, dat troch Wiebe sels skreaun wie.

Yldau Hoekstra fan Blauhûs wie al by rock- coverband Pledget (1999-2005) dêr't se sang en toetsen die. Mei har broer Jan skreaue se under de namme JoY-Project tegearre muzyk. Jan skreau mei beide Yldau's it nûmer Fjoer. Nei it Bogerman College yn Snits en it Marne College yn Boalsert wurket se no bûten de muzyk as doktersassistinte yn Ljouwert.

Boarnen, noaten en referinsjes[boarne bewurkje]

Boarnen, noaten en/as referinsjes:
  • Ljouwerter Krante, kultuerside 7 fan 7 maaie 2012