Todd Lockwood

Ut Wikipedy
Jump to navigation Jump to search
Todd Lockwood
Art-1300258.svg keunstner
Todd Lockwood - Lucca Comics & Games 2018 01.jpg
persoanlike bysûnderheden
echte namme Todd Wills Lockwood
nasjonaliteit Flag of the United States.svg Amerikaansk
berne 9 july 1957
berteplak Boulder (Kolorado)
etnisiteit Flag of the United States.svg Angelsaksysk Amerikaansk
wurkpaad
wurksum as yllustrator, boekbânûntwerper
jierren aktyf 1981 – no
prizen   2x World Fantasy Award
12x Chesley Award
offisjele webside
www.toddlockwood.com

Todd Lockwood (folút: Todd Wills Lockwood; Boulder (Kolorado), 9 july 1957) is in Amerikaansk yllustrator en boekbânûntwerper dy't him spesjalisearre hat yn it meitsjen fan fantasy- en science fiction-ôfbyldings. Hy is it bekendst wurden troch syn omslaggen fan 'e romans fan R.A. Salvatore en C.J. Cherryh, útjeften fan 'e útjouwerijen Tor Books en DAW Books, en tydskriften lykas Asimov's Science Fiction en Analog Science Fiction and Fact.

Libben en karriêre[bewurkje seksje | boarne bewurkje]

Lockwood waard yn 1957 berne yn Boulder, yn 'e Amerikaanske steat Kolorado. Hy genoat syn oplieding oan it Keunstynstitút fan Kolorado, yn Denver, dêr't er yn 1981 cum laude ôfstudearre. Neitiid wurke er oardel jier yn 'e reklamebrâns, foar't er úteinsette mei in fyftjinjierrich wurkpaad as freelance yllustrator. Yn dy tiid wie de Coors Brewing Company, in Amerikaanske bierbrouwer, ien fan Lockwood syn wichtichste klanten, en yn in fraachpetear út 1999 seid er dat er doedestiden wol bierfusten tekenje koe yn syn sliep.

Yn 1993 begûn Lockwood, dy't in fûleindich fan wie fan 'e role-playing game Dungeons & Dragons, him ta te lizzen op it tekenjen fan fantasy- en letter ek science fiction-yllustraasjes. Dêrby waard er nei eigen sizzen beynfloede troch it wurk fan Jeff Easley, Gerald Brom, Frank Frazetta en Michael Whelan. Lockwood syn earste wurk op it mêd fan fantasy waard foarme troch guon omslaggen foar it tydskrift Asimov's Science Fiction. Sels seid er dêr yn 1999 oer: "Dat wie it begjin. Ik fielde my as wie my nij libben ynblaasd. Einlik tekene ik dingen dy't my ynteressearren!"

Yn 1994 wenne Lockwood Wordcon by, de wrâldkonvinsje op it mêd fan science fiction en fantasy, yn it Kanadeeske Winnipeg. Dêr mette er foar it earst oare science fiction- en fantasykeunstners, ûnder wa Michael Whelan, en lei er kontakten yn dy wrâld. Sadwaande waard er letter troch TSR, de útjouwer fan Dungeons & Dragons, frege om wurk foar harren te dwaan. Yn 1996 koe Lockwood dêr foltiids oan 'e slach, in kâns dy't er mei beide hannen oangriep. Nei't TSR yn 1997 oernommen wie troch Wizards of the Coast, ferhuze Lockwood mei syn frou en trije bern foar syn wurk nei de steat Washington (dêr't Wizards of the Coast fêstige is).

Neitiid gie Lockwood troch mei syn yllustraasjes foar Dungeons & Dragons en ek foar oare útjeften, lykas Magic: The Gathering, Ravenloft, Forgotten Realms en Dragonlance. Dêrnjonken begûn er ek omslaggen foar romans te meitsjen, benammen foar it wurk fan R.A. Salvatore, dat troch Wizards of the Coast útbrocht waard. Yn dyselde snuorje wied er in hoart fise-foarsitter fan 'e Association of Science Fiction and Fantasy Artists (ASFA). Nei't Wizards of the Coast yn 1999 oernommen wie troch Hasbro, ferfette Lockwood yn 2002 syn freelance-karriêre. Dêrby makke er benammen omslaggen foar publikaasjes fan 'e útjouwerijen Tor Books en DAW Books, wêrûnder ferskate dielen fan 'e Foreigner-searje fan C.J. Cherryh (lykas Conspirator, Deceiver en Betrayer). Yn 2003 joech Lockwood sels in boek út mei keunstwurken fan sines, ûnder de titel Transitions: Art of Todd Lockwood. Hy hat ûnderwilens twa World Fantasy Awards en tolve Chesley Awards wûn.

Prizen en nominaasjes[bewurkje seksje | boarne bewurkje]

Jier Priis Resultaat Kategory Foar
1995 World Fantasy Award wûn bêste swart-wytyllustraasje Cerberus
1996 Chesley Award wûn bêste swart-wytyllustraasje Cerberus
World Fantasy Award wûn bêste swart-wytyllustraasje Kali
1997 Chesley Award wûn bêste binnenyllustraasje Death Loves Me (fan it tydskrift Realms of Fantasy)
1998 Chesley Award wûn bêste omslach – tydskrift Black Dragon (fan it tydskrift Dragon)
1999 Chesley Award wûn bêste yllustraasje op it mêd fan in fideospultsje omslach fan 'e Dragonlance 15th Anniversary
2001 Chesley Award wûn bêste omslach – tydskrift Swashbuckler (fan it tydskrift Dragon)
2009 Chesley Award wûn bêste omslach – hardcover The Thousands Orcs
wûn bêste omslach – tydskrift Hellfire Dragon (fan it tydskrift Dragon)
wûn bêste yllustraasje op it mêd fan in fideospultsje omslach fan City of the Spider Queen
2004 Chesley Award wûn bêste omslach – paperback Tangled Webs
wûn bêste binnenyllustraasje Crossing into Empire (yn it tydskrift Realms of Fantasy)
wûn bêste yllustraasje op it mêd fan in fideospultsje omslach fan Draconomicon
wûn grutste artistike prestaasje oeuvre

Keppelings om utens[bewurkje seksje | boarne bewurkje]

Boarnen, noaten en referinsjes[boarne bewurkje]

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.